Esdras 7 - Bible in Tzotzil de Chamula

Ti Esdras xchi'uc ti xchi'iltaque ta xc'otic ta Jerusalén

¹ Ta sjalil to un, c'alal tiq'uil ta ajvalil yu'un Persia ti Artajerjese, vul ta loq'uel jun vinic ti sbiinoj Esdrase, ti liquel talel ta sbats'i nitilultac ti Seraíase, ti Azaríase, ti Hilcíase,

² ti Salume, ti Sadoque, ti Ahitobe.

³ ti Amaríase, ti Azaríase, ti Meraiote,

⁴ ti Zeraíase, ti Uzie, ti Buquie,

⁵ ti Abisúae, ti Fineese, ti Eleazare, xchi'uc ti Aarón ti sliquebal palee.

⁶ Ti Esdras taje, ja' jun jchanubtasvanej yich'oj lec chanubtasel ta jbel c'usi tsots albil yu'un ti Ajvalil Dios yu'un Israel ti laj yac' comel ta stojol ti Moisese. Coltabil lec yu'un Dios ti laj sta scotol c'usi laj sc'ananbe ti ajvalil Artajerjese. Ti jech taj une, loc' talel ti Esdras oy ta Babiloniae.

⁷ Ta yucubal jabil yochel ta ajvalilal ti Artajerjese, laj stam batel sbeic c'alal Jerusalén xchi'uc epal israeletic ti jmoj xvoletic batel xchi'uc ti paleetique, ti levitaetique, ti jq'uejimoletique, ti jchabiej ti'naetique, xchi'uc ti jtuneletic yu'un ti ch'ulnae.

⁸ Ta yo'obal to u, c'otic ta Jerusalén ti c'alal yucubal xa jabil yochel ti ajvalile.

⁹ Yu'un ta sliqueb c'ac'al ti sba ue, ja' o laj stam loq'uel sbeic ta Babilonia. C'ot ta sba c'ac'al yu'un ti yo'obal ue ta sventa ti sva'anoj sba ti yutsil slequil yo'nton ti Dios ta stojol ti Esdrase.

¹⁰ Ti Esdrase c'otem ta yo'nton ta snopel, ta yabtelanel ti c'u s'elan ta xal ti oy c'usi jbel albil yu'un ti Diose, xchi'uc ti yac'oj yo'nton ta xchanubtasel ti israeletic ta sventa ti c'usi oy jbel tsots albile, xchi'uc ti c'usitic nopbil yu'une.

¹¹ Xi s'elan ta xal ma' ti cha'loc'tabil vun ti ac'bat yu'un ajvalil Artajerjes ti Esdrase, ti ja' pale xtoque, ti ja' jun jchanubtasvanej ta sventa ti chanubtasbil lec ta scotol ti mantaletique, xchi'uc ti oy c'usi jbel albil yu'un ti Dios ta sventa ti Israele, ti xcholet jech c'u cha'al li'e:

¹² “Ti banquilal ajvalil Artajerjese, chabanuc xalbe ti pale Esdrase, ti ja' jun jchanubtasvanej ti chanubtasbil lec ti oy c'usi jbel tsots albil yu'un ti Dios yu'un ti vinajele.

¹³ “Laj cal mantal, scotol israeletic ti ochemic talel ti bu c'alal jmacoje, mi sc'an ta xchi'inicot batel ta Jerusalene, xu' xbatic mu'yuc ta alel mi levitaetic, mi paleetic.

¹⁴ Yu'un ti ajvalile, xchi'uc ti vucub jbijubtasvanejetic yu'une, ta stacbot batel ta sq'uelel ti c'usi sc'an pasel ta Judae, xchi'uc ta Jerusalén jech c'u cha'al ta xal ti oy ta avoc ta ac'ob ti oy c'usi jbel albil yu'un ti Dios avu'une.

¹⁵ Ich'o batel ti platae, xchi'uc ti oroe, ti loc' ayan ta yutsil yo'nton ti ajvalile, xchi'uc ti yajbijubtasvanej ti laj yaq'uic ta stojol Dios yu'un Israel ti ta xnaqui ta Jerusalene.

¹⁶ Ich'o batel xtoc ti platae, ti oroe, ti c'u yepal ta xata ta tsobel li' ta jteclumetic ti oy ta yosilal ti Babiloniae, xchi'uc sna'obilic ti jteclum ti ta yutsil yo'nton ta xaq'uic ti taq'uine, xchi'uc ti paleetic ti ta xaq'uic sventa ta xtun ta xch'ulna Dios ta Jerusalene.

¹⁷ Ta sventa ti taq'uin taje, xu' xaman o ti ch'in tot vacaxetique, ti chijetique, ti ch'iom tot chijetique, ti jmoj ta xatunes xchi'uc ti sat ts'unubale, xchi'uc ti vinoe, yo' jech ta xavac' ta altar ta xch'ulna Dios avu'unic ta Jerusalene.

¹⁸ Ti c'u to yepal com scomelal ti oroe, xchi'uc ti platae, tunesic o ti c'usi lec ta xavilic xchi'uc ti achi'iltaque, ti co'oluc jech c'u cha'al oy ta yo'nton ti Diose.

¹⁹ Ja'uc ti c'usitic jtunel ta xtun ta sventa stoyel xi'el Dios avu'un ta ch'ulna ti la'ac'bat ta avoc ta ac'obe, ba ac'o atuc ta stojol Dios ti oy ta Jerusalene.

²⁰ “Ti c'usitic yan ta xtun ta sventa xch'ulna ti Dios avu'une, xu' ta xata ta snailtac ti c'usitic q'uejbil yu'un ti ajvalile.

²¹ Ti vu'un ajvalil Artajerjese, yu'un loc' mantal cu'un ta stojol scotolic ti jchabiej-taq'uinetic ti oyic ta yelov smaleb c'ac'al yu'un ti uc'um Eufratese, ti yac'beicuc yu'un Esdras scotol ti c'usitic ta sc'ane, ti ja' jun palee, ti c'otem ta jun jchanubtasvanej ta sventa ti chanubtasbil lec ta jbel ti c'usi tsots albil yu'un ti Dios yu'un ti vinajele. Ma'uc me ti ch'abal xc'ote.

²² Xu' ta xc'ot ta pasel ti ta xich' oxmil xchi'uc vo'lajunvinic (3,300) ta kilo ti platae, chib xcha'vinic mil (22,000) ta almul ti trigoe, cha'mil xchi'uc lajunvinic (2,200) ta litro ti vinoe, cha'mil xchi'uc lajunvinic (2,200) ta litro ti aceitee, xchi'uc ti c'u yepal ta xtun yu'un ti ats'ame.

²³ “Scotol ti c'usi ta xtun ta sventa xch'ulna ti Dios yu'un ti vinajele, yich'uc no'ox aq'uel ta anil yo' jech mu xvul jtosuc vocol ta stojol xnich'nab ti ajvalile, xchi'uc ta stojol ti c'u yepal smacoje.

²⁴ Sc'an xana'ic xtoc, albil sc'oplal ti mu xu' ta xich' c'anbel tojomajel, patanetic, mi yan ti c'usitic oy sc'oplal ta stojic ti buch'utic paleetique, ti levitaetique, ti jq'uejimoletique, ti jchabiej-ti'naetique, ti jtuneletic ta ch'ulnae, mi buch'uuc no'ox yan ti ta xtunic ta xch'ulna ti Diose.

²⁵ “Jechot ec Esdras, paso me co'ol jech c'u cha'al yac'ojbot abijil ti Dios avu'une. Va'anano jchapanvanejetic xchi'uc ajvaliletic yo' jech ta xchapanic scotol ti jnaclejetic ti oyic ta yosilal uc'um Eufrates ti oy ta yelov smaleb c'ac'ale, ja' sc'oplal scotol xcaltic ti buch'utic xa'ibeic smelol ti oy c'usi jbel albil yu'un ti Dios avu'une. Ti buch'utic mu'yuc ya'binojic ti smelol une, ac'bo sna'ic.

²⁶ Scotol ti buch'u mu sc'an xch'un spasel ti oy c'usi jbel tsots albil yu'un ti Dios avu'une, xchi'uc ti oy c'usi jbel tsots albil yu'un ti ajvalile, ta jech yepal un, chap xi sc'oplal ta xich' milel ta yorail no'ox, mi jip xi loq'uel ta slumal, mi ta stoj smulta, mi jip xi ta chuquel.”

Sc'opojel sti'inel ti Esdrase

²⁷ Va'i un, xi lic c'opoj ti'inuc ti Esdrase: “Jun no'ox yutsil ti Ajvalile, Dios yu'unic ti jtot jme'tique, ti laj stijbe yo'nton ti ajvalile yo' jech ich'bil ta muc' c'ot ti xch'ulna Dios ta Jerusalene.

²⁸ Yu'un laj yac'bun quil yutsil slequil yo'nton ta jtojol ta sventa ti ajvalile, xchi'uc ta stojol ti jbijubtasvanejetic yu'une, xchi'uc ti viniquetic ti ich'bil ye sti'ic ta xtunic ta stojole. Yu'un ayan to yip co'nton yu'un ti laj to jtsob ti israeletic ti ich'bil ye sti' yo' jech jmoj lisutcutic talel ti laj sva'an sba ta jtojole.”