Esdras 6 - Bible in Tzotzil de Chamula

¹ Va'i ti ajvalil Darío une laj yal mantal ti yich'uc sa'el ta ti vunetic tsots sc'oplal ti q'uejbil comel ta sq'uejlebtac ti oy ta Babiloniae.

² Ta chapanobbail ti oy ta jteclum Ecbatana sbi ti oy ta yosilal ti Mediae, laj staic jpoc vun ti xi xcholet ta xal ti lo'il a'yeje:

³ “Ta sba sjabilal yochel ta ajvalil ti Ciroe, xi laj yal ma' ti loc' mantal yu'une: ‘Xi s'elan sc'oplal sventa xch'ulna Dios ti oy ta Jerusalene: Yich'uc liquesel ta lum ti sliqueb yoctac ti nae yo' jech ta xich' aq'uel ti milbil matanaletique. Yich'ojuc vucub xcha'vinic (27) metro ti stayleje, vucub xcha'vinic (27) metro ti sjamleje,

⁴ ti yich'uc xtoc oxchol muc'tiquil anbil ton xchi'uc jchol ach' te'e. Ti c'u yepal ta xlaje, ta stoj ti jchabiej taq'uin yu'un ti ajvalile.

⁵ Sc'oplal ti c'usitic jtuneletic meltsanbil ta oroe, ta platae, ti oy to ox ta xch'ulna Dios ta Jerusalene, ti laj stam loq'uel ti Nabucodonosor ti laj yich' ech'el ta Babiloniae, yich'uc sutesel, ti ich'biluc batel c'alal to Jerusalene, ti yich'uc aq'uel ta xch'ulna Dios ta yavil ono'oxe.’ ”

⁶ Va'i ti ajvalil Darío une laj stac batel mantal ta stojol ti Tatnai ajvalil ta yosilal uc'um Eufrates ti oy ta yelov smaleb c'ac'ale, xchi'uc ta stojol ti Setar-boznaie, xchi'uc ti xchi'ilic ta abtele, xchi'uc ti j'opisialetic yu'un ti bu taje, ti xi xcholet ti mantal laj stac batele: “Mu xa xba atic' abaic ti c'usi sc'an pasel ta Jerusalene.

⁷ Ch'an xa utic ti ajvalil yu'un ti judioetique, xchi'uc ti jva'lejetique, xcha'va'anicuc ta smeltsanel xch'ulna Dios ti bu ono'ox oy ti yave.

⁸ Xi s'elan ti jmantal loc' ta alel cu'un ta sventa scoltaelic ti jva'lejetic yu'un ti judíoetic yo' ta xcha'meltsanic xch'ulna ti Diose: Yo' jech mu xpaj ti abtele, sc'an ti mu xjelav sc'ac'alil ta stojic patan ti jnaclejetic ta yosil uc'um Eufrates ti oy ta yelov smaleb c'ac'ale, yo' mu ch'abaluc taq'uin ta sc'obic ti jchabiej taq'uin yu'un ti ajvalile.

⁹ Ti jujunuc c'ac'ale, tsots sc'oplal yaq'uicuc ti paleetic ta Jerusalén scotol ti c'u s'elan albil sc'oplal ta xtun yu'unique, mi ja' ti ch'iom tot vacaxetique, mi ja' ti chijetique, mi ja' ti ch'iom tot chijetique, yo' jech ta xchiq'uic ta stojol Dios yu'un ti vinajele. Yaq'uicuc xtoc ti trigoe, ti ats'ame, ti vinoe, mi ja' ti aceitee,

¹⁰ ti oyuc c'usi ta smilbeic ta smoton ti jun yutsil ta xa'i ti Dios ti oy ta vinajele, xchi'uc ti sc'anbeicuc vocol ta sventa ti ajvalile, yo' jech mu'yuc c'usi snuptanic xchi'uc ti yalab xnich'nabe.

¹¹ “Ta xcal xtoc, mi oy buch'u mu xac' ta venta ti jc'ope, pitsbatuc loq'uel junuc sts'amte'al sna yo' jech ta xich' joc'anel o. C'otuc ta pasel ti stucuc slilijemal busul ta xcom ti snae.

¹² ¡Yu'un ti Dios ta xava'i une, laj st'uj stuc ti c'ot ta staobil ta na'el ta Jerusalene! Va'i un, buch'uuc no'ox ta xac' ti vocole, ti ta soquesbe xch'ulna Dios ti oy ta Jerusalene, manchuc mi ajvalil, manchuc mi muc' ta lum, tsutsesatuc ya'i. Mu xatselbunic jutebuc mantal ti laj cal ti vu'un Daríoune.”

Lic xcha'liquesic ta stsutsesel ti Abtele

¹³ Va'i ti Tatnai une, ti ochem ta its'inal ajvalilal ta yosilal Eufrates ti oy ta yelov smaleb c'ac'ale, ti Setar-boznaie, xchi'uc ti xchi'iltac ta abtele, mu'yuc laj stselbunic scotol mantal ti albatic yu'un ti ajvalil Daríoe.

¹⁴ Ti jva'lejetic yu'un ti judíoetic une, c'ot ta pasel ti lic xcha'liquesic ti abtel co'ol jech c'u cha'al scaj'alojic ti j'alc'opetic Hageoe, xchi'uc ti Zacarías xnich'on ti Idoe. Ti abtele, c'ot ta tsutsel jech c'u cha'al yaloj ono'ox Dios yu'un ti Israele, jech c'u cha'al yaloj mantal ti Ciroe, ti Daríoe, xchi'uc ti Artajerjes ajvaliletic yu'un ti Persiae.

¹⁵ C'ot ta tsutsel xcha'meltsanel ti ch'ulnae, ta yoxibal c'ac'al sliquel ti yu'al Adar sbie, c'alal svaquibal (6) xa jabil yochel ta ajvalilal ta Persia ti Daríoe.

¹⁶ Ti israeletique, ti paleetique, ti levitaetique, xchi'uc ti yan buch'utic bec'bil loq'uic to ox ta slumalique, xmuyubajic xa lic spasbeic sq'uinal ti ochel ta yut xch'ulna ti Diose.

¹⁷ Ti yorail taje, laj yaq'uic milbil matanal vo'vinic (100) ta cot ch'in tot vacaxetic, lajunvinic (200) ta cot chijetic, xchi'uc chanib ciento (400) ta cot ch'iom tot chijetic. Ma'uc no'ox taje, laj to yaq'uic lajcha'cot (12) tentsun, jujucot yu'unic ti jujuvoc' snitilultac ti israeletique, ti c'ot ta stojol mulil yu'un sjunul ti Israele.

¹⁸ Ts'acal to un, ti paleetique laj yac'beic stsac yabtelic ti bu ta xc'ot ti stunelique. Ti levitaetic eque laj stamic ti bee stunelic ta sventa stoyel xi'el Dios ta Jerusalén jech c'u cha'al ts'ibabil ta jpoc vun yu'un ti Moisese.

¹⁹ Ti c'u yepal sutic talel ti bec'bil to ox loc' ta slumalique, laj spasic sna'obil q'uin Colel ta xchanlajunebal (14) c'ac'al yu'un ti sliqueb ue.

²⁰ Ti paleetique, ti levitaetique spocoj stusoj xa sbaic. Scotol xch'alte-ch'alteic xa jech c'u cha'al na'bil ono'ox yu'unique. Va'i un, lic yaq'uic ti milbil matanal sventa q'uin Colel ta sventa scotolic ti buch'utic bec'bil to ox loc' ta slumalique, ta sventa ti xchi'ilic ta paleale, xchi'uc ta sventa ti stuquique.

²¹ Scotol israeletic ti sutic xa talel ti bec'bil to ox loq'uique, jmoj laj svol sbaic ta ve'el ta sventa q'uin Colel, xchi'uc scotol ti buch'utic laj yicta sbaic ta spasel ti c'u s'elan chopol ta spasic ti yan muc'tiquil lume, volol laj spasbeic stoyel xi'el ti Ajvalil Dios yu'un ti Israele.

²² Vucub c'ac'al sjalil xmuyubajic laj spasic q'uin, laj sve'ic pan ti ch'abal ac'bil ti spajubtasobile. Ac'bat smuyubajel yo'ntonic yu'un Dios ti c'uxubinatic yu'un ti ajvalil ta Persiae, ti coltaatic ta xcha'meltsanel xch'ulna ti Diose, Dios yu'un ti Israele.