Esdras 3 - Bible in Tzotzil de Chamula

Lic xchapanic stoyel xi'el ti Diose

¹ C'alal sta sc'ac'alil ti yucubal ue, ti jun xa yo'ntonic ti israeletic nacalic ta jujun slumalique, scotol jteclum bat stsob sbaic ta Jerusalén.

² Va'i ti Josuee, xnich'on ti Josadaque, xchi'uc ti xchi'iltac ta paleale, ti xcaltique, ja' ti Zorobabel xnich'on ti Salatiele, xchi'uc ti yuts' yalaltaque, lic smeltsanic yaltar ti Dios yu'un ti Israele, yo' jech ta xaq'uic chic'bil matanal ta sba jech c'u cha'al ti oy c'usi jbel tsots albil yu'un ti Moisés yajtunel ti Diose.

³ Lec nopbil ti laj smeltsanic ti altare, yu'un oy xi'el ta stojol ti jnaclejetic teye. Ta jujun sob, ta jujun mal c'ac'al, ta xaq'uic chic'bil matanal ta sba sventa yich'el ta muc' ti Diose.

⁴ Lic spasbeic sq'uinal Lambil Yanalte' Axibalna xtoc, jech c'u cha'al ta xal ti ts'ibabil ti oy jbel tsots albile. Ta xaq'uilanic jujun c'ac'al ti chic'bil matanaletic jech c'u cha'al liquem yu'unic sc'an pasel ti c'u yepal ta xaq'uic sventa jujun c'ac'ale,

⁵ jech c'u cha'al ti chic'bil matanal jujun c'ac'ale, ta sventa ti jujun ach' ue, ti c'u yepal ta xtun ta jujun q'uinetic ti c'otem ta sventa ti Diose, xchi'uc ti oy buch'u ta xac' ta slequil yo'nton ta stojol ti Diose.

⁶ Ta sliquebal no'ox c'ac'al yu'un ti yucubal ue, lic yaq'uic talel ti chic'bil matanal ta stojol ti Diose, ac'o mi mu'yuc to liquem xcha'meltsanel xch'ulna ti Diose.

⁷ Laj taj une, lic yac'beic taq'uin ti j'albanyiletique, ti jch'ul-te'etique, xchi'uc laj yaq'uic ve'lil, uch'bolal, xchi'uc aceite sventa ta stunesic ti j'abteletic ti liquemic talel ta Tiro xchi'uc ta Sidone, sventa ta sloq'uesic talel ti ch'ut te' ta Líbanoe, ti ta scajanic ech'el ta nabe yo' jech ta xc'ot ta Jope, ti c'u s'elan yac'oj ye sti' ti Ciro ajvalil yu'un ti Persiae.

Ta sliquesic xcha'meltsanel ti ch'ulnae

⁸ Ti Zorobabel xnich'on ti Salatiele, ti Josué xnich'on ti Josadaque, jmoj xchi'uc ti xchi'ilic ta paleale, ti levitaetique, xchi'uc scotol ti sutic talel ta Jerusalén ti bec'bil to ox loq'uique, lic sliquesic xcha'meltsanel xch'ulna ti Dios ta xchibal u yu'un xchibal jabil ti sc'otelic ta Jerusalene. Sbainoj c'ot abtel yu'unic ti levitaetic ti x'ech' xa ta jtob (20) jabil yich'oje.

⁹ Ti Josué xchi'uc xnich'nabe, ti svinquileltaque, lic svol sbaic ta jmoj xchi'uc ti Cadmiele xchi'uc ti xnich'nabe, ti ja'ic snitilultac ti Judae, xchi'uc snitilultac xnich'nab ti svinquilel Henadad ti levitaetique. Jech ta xaq'uic ta ilel ti abtel ta stojol ti j'abteletic yu'un xch'ulna ti Diose.

¹⁰ C'alal lic sliquesic talel ta lum xch'ulna Dios ti j'abteletique, ti jech c'ac'al taje, naca jtunel c'u'il slapoj ti paleetic va'ajtic xchi'uc yoq'uesic. Ti levitaetic snitilultac ti Asafe oy ta sc'obic set-set taq'uinetic yo' ta smuyubtaic Dios jech c'u cha'al albil yu'un ti David ajvalil ech' ta Israele.

¹¹ Ti jlome ta sq'uejintaic ta yalbel yutsil slequilal ti Diose. Xi ta staq'uic sutel ti yane: “Colij-albat yu'un ti Diose, jun yutsil ti yo'nton ta j'ech'ele, ti sbatel osil oy syail xc'uxul yo'nton ta stojol ti Israele.” Xmuyubajic no'ox ta avanel scotol ti jteclum ta smuyubtael ti Diose, ti lic xcha'meltsanel ti xch'ulna Diose.

¹² Yepal ti paleetique, ti levitaetique, xchi'uc ti ch'iem c'opojemic banquilaletic yu'un ti jujuchop taje, ti laj yilic ta sba ta satic ti ba'yel ch'ulnae, tsots lic oq'uicuc c'alal laj to yilic ta xlic xcha'meltsanel ta ach' ti ch'ulnae. Ta yorail, yepal ti x'avlajetic ta muyubajele.

¹³ Mu xa buch'u xchiquintaj yu'un mi ta x'oq'uic, mi x'avlajetic ta muyubajel ti jnaclejetique, xvochetic ta avlajetel ta j'ech'el ti xvinaj to ta nome.