Esdras 1 - Bible in Tzotzil de Chamula

Ti mantal laj sliques ti Ciroe

¹ Ti sba jabil yochel ta ajvalilal ti Ciroe, ajvalil yu'un ti Persiae, yo' ta xc'ot ta pasel sc'op Dios ti laj scaj'al ti Jeremíase, ti Diose laj stijbe yo'nton ti Ciroe, ti xi laj stac batel mantaletic ta ts'ibabil vunetic ta jteclumetic ti bu c'alal smacoje:

² “Xi xcholet ta xal ti Ciro ajvalil yu'un ti Persiae: Ti Ajvalil Dios yu'un ti vinajele, ti laj yac'bun ta coc ta jc'ob scotol ti ajvaliletic ti oy ta banomile, laj yac'bun jbain ta sva'anel jun ch'ulna ta Jerusalén ti oy ta yosilal ti Judae.

³ Buch'uuc no'ox steclumaloxuc ti Diose, ac'o xa scoltaoxuc ti Diose, batanic ta Jerusalén ti oy ta Judae ta sva'anbel xch'ulna ti Ajvalil Dios yu'un ti Israele, ti Dios ti ta xnaqui stuc ta Jerusalene.

⁴ Ti c'u to yepal cuxulic ti buch'utic sc'an xloq'uic batel ti buyuc no'ox nacalique, ti slac'natac teye, ac'o coltavanicuc batel ta plata, ta oro, ta scotol ti c'usiuc xloc' x'ayane, ti chon bolometique, xchi'uc yaq'uicuc xtoc ta sventa sva'anel xch'ulna ti Dios ta Jerusalene.”

Ti israeletique ta xcha'sutic batel ta Jerusalén

⁵ Ti banquilaletic yu'un ti jujuchop snitilultac ti Judae, ti jujuchop snitilultac ti Benjamine, ti paleetique, xchi'uc ti levitaetique, ti xcaltique, scotolic ti buch'utic ac'bat yip yo'ntonic yu'un ti Diose, lic xchapan sbaic yo' ta xbatic ta Jerusalén, yo' jech ta xlic xcha'meltsanic ti ch'ulna yu'un ti Diose.

⁶ Coltaatic ta oro, ta plata, ti c'usitic x'ayan yu'unique, ti chon bolometique, ti c'usitic toyol stojole, ti matanaletic ti loc' ayan ta o'ntonal ti ac'batic yu'un scotol ti slac'naique.

⁷ Ti ajvalil Ciro eque lic yac' ta c'abal ti c'usitic jtunel laj yich' tael ta xch'ulna Dios ti laj spoj loq'uel ta Jerusalén ti Nabucodonosor ti bat yac' ta xch'ulna ti sdiostaque.

⁸ Ti Ciroe, c'alal laj sutes ti c'usitic jtunel meltsanbile, laj yac'be jelavel ta sc'ob ti Mitrídatese, ti sbainoj ta xchabiele. C'alal laj xchap ti c'u yepale, laj yac'be jelavel ta yoc ta sc'ob ti Sesbasare, ajvalil yu'un ti Judae.

^9-10 Ti c'u yepal loc' ta chapel ti c'usitic jtunel meltsanbile, ja' jech yepal li'e: Lajuneb xcha'vinic (30) muc'tic lech-lech taq'uin ti oroe. Lajuneb ciento (1,000) muc'tic lech-lech taq'uinetic ti platae. Baluneb xcha'vinic (29) cuchiluetic. Lajuneb xcha'vinic (30) bochetic ti meltsanbil ta oroe. Chanib ciento xchi'uc lajuneb (410) bochetic ti jutuc no'ox yich'oj ti platae. Oy to lajuneb ciento (1,000) xtoc ti c'usitic xlic ta lum stunelique.

¹¹ Ta scotol ti c'usitic meltsanbil ta oroe, xchi'uc ti ta platae, c'ot ta vo'mil xchi'uc chanib ciento (5,400) ta scotol. Scotol taje, laj yich' sutel ta Jerusalén ti Sesbasar c'alal loq'uic batel ta Babilonia jmoj xchi'uc ti c'u yepal bec'bil to ox loq'uic talele.