Eclesiastés 9 - Bible in Tzotzil de Chamula

C'otuc ta o'ntonal ti j'ech'el-be no'ox ti ch'iel c'opojele

¹ Ti jech oy ta yoc ta sc'ob Dios ti buch'u oy c'usitic lec ta spasique, xchi'uc ti xac' sjolilal yu'unique, laj jtij jol co'nton ta st'unel ti c'u s'elan ta xlic abtejuc scotol taje. Ti xc'uxul o'ntonale, ti scapemal sti'emale, ti vinique, mu stac' a'yeluc ta xa'i c'u cha'al jech ta x'abtej yu'un.

² Scotol taje, ta x'ech' ta stojolic ma' ti xi s'elan oyique: ti buch'u oy stuq'uil sjol yo'ntone xchi'uc ti buch'u ch'abal stuq'uile, ti buch'u oy slequile xchi'uc ti buch'u chopole, ti buch'u mu'yuc soquesoj sbae xchi'uc ti buch'u soquesoj sbae, ti buch'u sna' xac' milbil matanale, xchi'uc ti buch'u mu sna' xac' milbil matanale, ti oy slequil yo'ntone xchi'uc ti buch'u jsa'mulile, ti buch'u oy c'usi ta sva'an ta rexticoe xchi'uc ti buch'u mu'yuc c'usi ta sva'an ta rexticoe.

³ Ti c'usi toj vocole, ja' xi s'elan scotol li' ta banomile: mu'yuc bu xbatic ta jelavel, yu'un scotol ta x'ech' ta stojolic. Ti xcaltic ava'i une, scotol me'inem ta yo'ntonic ti c'usi chopol ti c'u sjalil ti ch'iel c'opojele. U'ninbil yu'un ti sbolil sjol yo'ntone, ja' to me xcom ca'itic mi muquinal xa xloc' batel une.

⁴ Ti buch'u ta to xil batel ti ch'iel c'opojele, jcoj to ta banomil ta xa'i. Ja' stac' to mi cuxul to ti ts'i'e, ja' mu sta sc'oplal mi chamem xa ti leone.

⁵ Ti buch'u cuxulic toe, sna'ic xtoc ti ta xchamique, ja'uc ti animaetique mu xa c'usi ta xa'i, mu xa xva'i talel, yu'un j'ech'el palch'uj o batel.

⁶ C'ot to me ta tsutsel ti xc'uxul yo'ntone, ti sti'emal scapemale, ti svocol yu'un ti sc'upijel yo'ntone. J'ech'el com o yu'un ma' ti c'u s'elan ech' ta banomil une.

⁷ Le' un cha'e, mu xamacbe aba ti ave'el avuch'ome. Jcojucot xa ta banomil xava'i ta yuch'el ti ya'lel a'uvae, yu'un lec laj yil ti Dios ti c'usi laj apase.

⁸ Sac ch'alanucot no'ox ta j'ech'el xchi'uc ti ac'u'e. Muetuc no'ox ta j'ech'el ta muil poxil ti ajole.

⁹ C'upino ti ach'iel ac'opojel xchi'uc ti ants ti snup ach'ulel ta xava'ie. J'ech'el no'ox ta x'ech' ta atojol ta sc'upinel ti c'usi yac'ojbot ti Dios li' ta banomile. Ja' no'ox jech yepal laj ata ti avac'oj avocol ta abtel xchi'uc li' ta banomile.

¹⁰ Ti c'usi oy ta avoc ta ac'ob ta spasele, o'ntolino ta sbainel scotol. Yu'un ta muquinal ti bu ta xac'ot ta tsutsele, mu'yuc c'usi ta xich' pasel. Mu'yuc xa c'usi ta xich' nopel. Mu xa x'abtej ti snopobile. Mu xa x'abtej ti bijilile.

Oy c'usi q'uelel talel ta jtojoltic

¹¹ Ti li' ta banomile, quiloj ti oy xi s'elan c'usitic ta xc'ot ta pasele: ma'uc cuchem xa yu'un anilajel ti buch'u xvilic no'ox ta anile. Ma'uc cuchem xa yu'un letovajel ti buch'u tsots xa'i sbaique. Ma'uc busul no'ox sve'el ti buch'u bijique. Ma'uc c'otem ta jc'ulej ti xac' lec sjolilal yu'une. Ma'uc ich'bilic xa lec ta muc' ti buch'u tojobtasbilic leque. Scotolic taje, taban to bu lec c'ot ti yorail yu'unique.

¹² Ti xcaltic ava'i une, mu'yuc buch'u sna' ma' ti xi ta xc'ot ti yuni orail yu'une: ja' to ono'ox xa'i, ochem ta syacobil jech c'u cha'al ta x'och ta stsacobil ti choyetique, jech c'u cha'al ta stsaque ta pets' ti mutetique. Jech ta xc'ot ta stojol ma' ti buch'u une, xavil xa no'ox, ch'ayal yuni o'nton tsacbil xa ta pets' xa'i ta anil un.

¹³ Laj quil ti li' ta banomil xtoque, xi s'elan x'ale ti tsots chanubtasele:

¹⁴ xi no'ox yuni epal jnaclejetic ti oy ta biq'uit jteclume, tsaque ta leto yu'un jun ajvalil ti tsots xu' yu'une, ti laj sjoyobta ta ep ta tos abtejebaletic yu'une.

¹⁵ Ti ta jteclume, nacal jun me'un vinic ti xac' sjolilal yu'un ti sbijile, ti xu' nan ta stic' sba ta spojel ti jteclum ta sventa ti sbijile. Teque' no'ox xch'a un, mu xa svulesat ta o'ntonal.

Ti tsots sc'oplal ta scotole, ja' ti bijilile

¹⁶ Va'i un, ta jva'an jba ta yalel ti tsots sc'oplal ma' ti bijilil une, ja' mu sta sc'oplal ti buch'u mu sna' xi' xa'i sbae, manchuc mi mu x'ich'e ta muc' sbijil ti me'un mu'nat vinic ti c'u s'elan ta xale.

¹⁷ Ts'etel chiquinal ta x'a'yibat sc'op ti buch'u oy sbijile, ja' mu sta ta x'a'yibat sc'op ti ajvalil bijubtasbil yu'un ti buch'u pimuneb xa'i sbaique.

¹⁸ Jelavem sc'oplal ma' ti bijilile, ja' mu sta sc'oplal ti abtejebaletic yu'un ti ac'ob-letoe. Mi oy bu tselbuj jtosuque, yepal no'ox vocol ta xac' unbi.