Eclesiastés 8 - Bible in Tzotzil de Chamula

¹ ¿Buch'u ta sco'oltas sba xchi'uc ti buch'u oy sbijile? ¿Buch'u xojtiquin ta st'unbel smelol ti c'usitic oye? Ti bijilil une ta xvinaj ta sat ti vinique, ta xc'ot ta pasel yu'un ta sjelbel ti pucujineb no'ox ti sate.

Ti buch'u ta xch'unbe smantal ti ajvalile

² C'otuc ta pasel avu'un c'u s'elan ta xalbot mantal ti ajvalile, yu'un jech laj avac' ave ta sba ta sat ti Diose.

³ Mu ta aniluc xaloc' ta stojol, yu'un stac' spas c'u s'elan ta xac' ti sjol ta xa'ie. Mu xatam ta spasel jech c'u cha'al ti buch'u mu'yuc xch'ulel xa'i sbaique.

⁴ Yu'un ti ajvalile yich'oj yabtel ti jbel xc'opoj c'u s'elan ta xloc' ta ye ta stsutsese. Mu'yuc buch'u junuc ta x'ich'bat ye sti' yu'un ti c'usitic ta spase.

⁵ Mi jutebuc oy c'usi chopol ta xc'ot ta stojol ti buch'u ta xc'ot ta pasel yu'un ti c'usi ta x'albate. Ti buch'u bij xa'i sbae, xa'ibe xchiquinal, sna' bu ora c'u s'elan ta xc'ot ta pasel yu'un.

⁶ Melel un, oy bu yorail stac' pasel scotol ti c'usi sc'an pasele. Le' une, muc' ta vocol smacoj ti vinique.

⁷ Ta j'ech'el mu sna' c'usi ta xc'ot ta pasel. Mi junuc oy buch'u ta xcaj'albat ya'i ti c'usi ta xc'ot ta pasele.

Mu'yuc buch'u ti oy yipal yu'un ta xac'be sba ti xch'iel sc'opojele, xchi'uc ta spojel sba yu'un ti lajele

⁸ Mu'yuc buch'u ti oy yipal yu'un ta xac'be sba xch'iel sc'opojel ti jalijuque, xchi'uc ta spojel sba yo' mu xc'ot ta stojol ti chamebale. Mi junuc oy buch'u ta spoj sba ti va'i s'elan ti c'op taje. Ti buch'u mu'yuc xch'ulel xa'i sbae, mu xpoje yu'un ti xchopolile.

⁹ Scotol taje, laj quil ti laj cac'be yipal ta st'unel ta yojtiquinel c'usi ta xich' pasel li' ta banomile, xchi'uc ti viniquetic oy yipal yu'unic ta yilbajinel ti svinquilelique.

Oy c'usitic mu'yuc smelol ti bu ta stam batele

¹⁰ Laj quil xtoc, ti buch'u mu'yuc xch'ulel xa'i sbaique, ti mu'yuc laj sventain ta sbainel ti lequilale, le' une, c'alal ta xbat smuquique, xlic xcaj no'ox ta xalbeic a'yejal ti lec ech' ta banomile. Yu'un ch'ay ta yo'ntonic ti c'usi chopol laj spas ti ta jteclume. Ch'ayel xal ma' taj une.

¹¹ Mi mu xc'ot ta pasel ta ora ti oy stojol ti chopolale, sa'sun no'ox ma' ti vinic ta spasel ti chopole.

¹² Jech staoj yav ec un, ti jsa'mulile sa'ilan no'ox smul ti jal jabil ta xch'i xc'opoje. (Ti c'usi ta jna'e, ti buch'u sna' xchiman sbaic ta xi'tael ti Diose, lec ta xc'ot ta stojolic.

¹³ Ja'uc ti buch'u mu'yuc xch'ulel xa'i sbaique, laj to sc'oplal ma' ti oy c'usi lec ta staique. Ts'ij xi ti sc'oplalic une, xtemet jelavel jech c'u cha'al ti queove, yu'un mu'yuc laj snijan xchiman sbaic ta xi'tael ti Diose.)

¹⁴ Jech ta xc'ot ta pasel li' ta sba banomile, ti mu'yuc smelol yilele. Oy lequil viniquetic ta xich' svocolic co'ol s'elan ti chopolique. Ti chopol viniquetique, mu'yuc c'usi sna'ic co'ol s'elan lequil viniquetic yilel. Ch'ayel xal o ta xcal yu'un ma' taje.

¹⁵ C'ot ta co'nton ec un, ta yalbel sc'oplal ti muyubajele. Ti c'usi lec ta spas ti vinic li' ta banomile, ve'uc yuch'uc vo', yet'esuc yo'nton ta muyubajel, yu'un ja' jech yepal oy ta stojol ti vinic ta sventa yabtel ti c'u sjalil ta x'ac'bat xch'iel sc'opojel yu'un Dios li' ta banomile.

¹⁶ Ti jech li'och ta st'unel, ta sna'el, ta sq'uelel scotol ti c'usitic ta xc'ot ta pasel li' ta banomile, c'ot ta pasel un ti mu'yuc xac' vaycun mi junuc orae.

¹⁷ Lic ca'i un, ti vinique mu xa'ibe smelol c'usi ta spas ti Diose, c'usi ta xc'ot ta pasel li' ta banomile. Ac'o mi laj cac'be yipal ta sa'olanbel ti smelole, mu'yuc laj jta un. Manchuc mi ta xalbe xa sba ti bijil vinic laj xa stabe ti smelole, melel un, mi jutebuc cuchem yu'un ti staoj une.