Eclesiastés 7 - Bible in Tzotzil de Chamula

Bainbiluc tuc'ulanbiluc c'otuc ti bu tsots sc'oplale

¹ Stac' to ma' ti oy bu ta xvinaj lec ti c'oplalile, ja' mu sta sc'oplal ti jun yutsil smuil ti muil poxile. Ti ts'ij xi batel ti lum ach'ele, stac' to une, ja' mu sta sc'oplal ti voq'uel ayanele.

² Ti xbat to yich' q'uelel ti buch'u chame, stac' to une, ti bu no'ox ta xch'ay ti o'ntonale, ja' mu sta sc'oplal; Ti palch'ujel batele, ja' tsutsem o ta scotol ti buch'uuc no'oxe, ti buch'u cuxulic toe, svulesicuc ta sjolic un.

³ Ja' stac' to ma' ti oq'uel avanele, ja' mu sta sc'oplal ti tse'eje, manchuc mi mu lecuc ta q'uelel ti yelov jsatique, ja' xloc venta ta xa'i ti o'ntonale.

⁴ Ti buch'u oy sbijile sna'oj ono'ox ti ta xchame, ja' ti buch'u pimunebe, batem yo'nton ti bu no'ox ech' ti c'ac'al yu'une.

⁵ Ja' stac' to ma' ti achiquintaoj ta ya'yiel ti tojobtasel yu'un ti buch'u oy sbijile, ja' mu sta ti lequil c'optael yu'un ti buch'u pimuneb xa'i sbae.

⁶ Stse'ej ti buch'u pimunebe, co'ol jech c'u cha'al junuc ch'ix ta xc'ac', j'ech'el mu'yuc c'usi ta xich' tael yu'un.

⁷ Mi ta xlo'lavan ti buch'u oy sbijile, co'olaj xa sjol xchi'uc ti buch'u pimunebe, ti mich'ob c'abale, ta soquesat yu'un.

⁸ Ja' stac' to ma' ti tsutsuc no'ox sc'oplal ti c'usi ta xich' chapele, ja' mu sta ti naca no'ox ta xich' liquesbele. Ja' stac' to ma' ti oy sts'iquemal xcuchemale, ja' mu sta sc'oplal ma' ti jbel no'ox ta c'ope.

⁹ Mu ava'binojuc no'ox aba yu'un ti sti'emal jolile, yu'un ti sti'emale c'otem ta sventa ti buch'u pimuneb xa'i sbae.

¹⁰ J'ech'eluc mu xajac'be aba ti c'u cha'al lec c'ot ta pasel scotol ti ech' xa talele, ma'uc oy abijil ma' ti jech ta xajac'be abae.

¹¹ Jun yutsil slequil ti bijilil ta sventaic ti buch'u cuxulic li' ta banomile, c'ulejal xal o ta j'ech'el.

¹² Yu'un ti bijilile ta spojot jech c'u cha'al ti taq'uine. Ti bijilile ta xac' ch'iel c'opojel.

¹³ Labano avil lec ti xi s'elan laj xa spas ti Diose: ¿mi oy la buch'u xu' yu'un ta stuq'uibtas mi oy c'usi laj xa xotbine?

¹⁴ Mi ataoj scotole, tuno lajeso ti c'usi lec ataoje. Mi mu lecuc ta xc'ot ta atojol une, nopo xa no'ox ava'i ti liquel talel ta stojol Dios ti xchibal taje. Ta ts'acal un, ti vinique, j'ech'el mu sna' c'usi ta xc'ot ta stojol.

¹⁵ Scotol taje, xi s'elan laj quil ti naca pich' o'ntonal ta xac' ti c'u sjalil lich'i lic'opoj tale: viniquetic ti oy yutsil slequil yo'ntonique, laj xa chamicuc. Ti buch'u mu'yuc xch'ulel xa'i sbaique, jal jabil ta xch'i xc'opojic, manchuc mi chopolic.

¹⁶ Mu xabis aba ti jun xa avutsil oyote, mi ja'uc ti cajal xa xava'i abae. ¿C'u cha'al ta xavac'be aba avocol ta jeche' no'ox?

¹⁷ Mu xajelav ta spasel ti chopole, mi ja'uc ti xa'alet no'oxe. ¿C'u cha'al ta xapalch'uj no'ox batel ava'i c'alal ma'uc to yoraile?

¹⁸ O'lol xavac' aba xchi'uc taje, yo' mu xastsalot un. Lec ta xloc' xchi'uc scotol taje, ti buch'u ta xi'ta ti Diose.

¹⁹ X'ech' to ta x'ac'bat yip ti buch'u ta stuc'ulan sba ta sventa staoj ti sbijile, ja' mu sta yip mi oy lajunvo' ajvaliletic sventainojic ti jun lume.

²⁰ Ti li' ta banomil une, mu'yuc ono'ox ma' ti oy buch'u junuc lec tuc' ta x'ech'e, ti lec ta spas sbae, ti mu jutebuc ta sta ti smule.

²¹ Mu tac'aluc xc'ot avu'un scotol ti c'usi ta x'alee yo' jech mu xava'i ac'oplal mi oy bu ta sbisot ta cotol chaval ti amosove.

²² Manchuc un, na'o ava'i ec ti yepal no'ox oy buch'u laj achopol c'opta eque.

Sa'ilanel ti bijilile

²³ Lic jtunes jbijil ta st'unel, ta sa'el scotol ma' taje, yu'un laj jc'an ti oyuc jbijile. Le' une, nom to oy ta jtojol.

²⁴ ¡Nom to oy ta jtojol scotol ma' ti c'usitic x'ayane! ¡Yu'un toj chucul ti mu'yuc buch'u stabe ti smelole!

²⁵ Va'i un, lic jt'unilan c'u s'elan ta ojtiquinel, ta xchanel, ta sa'el c'u s'elan ta xic'ot ta loq'uel xchi'uc sc'oplal ti bijilile. Lic quil un ti chopol ta j'ech'el ti buch'u pimuneb xa'i sbae, xchi'uc ti chuvajineb ti buch'u ts'i'unebe.

²⁶ Laj jta ta ilel xtoc un ti xi s'elan x'ech' to ti chopole, ti ja' mu sta sc'oplal ti chijchame: ja' ti ants ti sna' syac ta u'ninel ti o'ntonal ti xmeyelet xae. Mu sq'uelojuc sba ma' ti buch'u sna' xi'ta ti Diose, ja'uc ti buch'u xyal oe, yacbil xa c'ot yu'un un.

²⁷ Ti jvolvanej j'alc'opune, oy c'usi juteb ta co'nton ta jsa'be ca'i smelol ti xi no'ox s'elane:

²⁸ mu'yuc to jtaoj ma' ti c'usi juteb ta co'nton ta jta ca'ie, melel ochemun ta sa'el un. Ti jmil ta vo' viniquetique, c'ajomal no'ox jun laj jta ti xa'ibe xchiquinale. Ta scotol c'u yepal oy ti antsetique, mi junuc.

²⁹ C'ajomal no'ox xi s'elan ti laj jta ta t'unele: ti Diose, jun yutsil laj smeltsan ti vinique, le' une, laj syanijes xa sba stuc.