Eclesiastés 5 - Bible in Tzotzil de Chamula

C'otuc ta pasel ti c'usi laj yich' alele

¹ C'alal ta xabat ta xch'ulna ti Diose, xi s'elan sc'an xatuc'ulan abae: mu xavac' ti milbil matanal jech c'u cha'al ta spasic ti jnaclejetic ti mu xa'i sbaic ta spasel ti c'usi chopole. Ja' lec sjunuluc avo'nton, nopajan ech'el ta yich'el ta muc' ti Diose.

² Mu me ba'yeluc xaval ti c'usi ta xavac'be ti Diose, mi ja'uc ti xanopnun xa xchi'uque, yu'un ti Diose oy ta vinajel; ta banomil oyot ma' ti vo'ote. Jech o xal un, ich'bo smelol ti c'usi ta xavale.

³ Mi yepal no'ox ti c'usi ta xich' nopele, mu xa xchiquintaj ti c'usi ta xich' alele. Mi yepal no'ox slo'il xmaxil ti o'ntonale, mu'yuc xa stuq'uil ti c'usi ta xich' alele.

⁴ Ta yorail no'ox c'otuc ta pasel avu'un ti oy c'usi avaloj ta xavac'be ti Diose. Mu lecuc ta xil ti buch'u mu xa'i sbae. C'otuc ta pasel avu'un ti c'usi avaloj ta xavac' une.

⁵ Ja' stac' to ma' ti mu'yuc c'usi ta xavale. Altic ma' ti aveinoj xa ta yalel c'alal mu xc'ot ta pasel avu'une.

⁶ Mu aq'uelojuc aba ta xata amul ta bet'bunel avee, ti xaval xa liquel ta ts'acal to ta stojol ti yajtunel Diose, ti mu'yuc stuq'uil laj anope. ¿C'u cha'al ta xavac' ilinuc Dios ti jech laj avale, xchi'uc ta soquesel ti c'usi ta xapas oxe?

⁷ Tsots sc'oplal vinajuc ti xana' xanijan xachiman aba ta stojol ti Diose. Ma'uc tsots sc'oplal mi yepal no'ox ti c'usi ta xich' nopele, mi yepal no'ox slo'il xmaxil ti o'ntonale, ti c'usi mu'yuc smelol loc' ta alele.

Ti cuxlejal li' ta banomile mu'yuc c'usi lec ta xc'ot ta spasel

⁸ Mu ch'ayaluc xc'ot avo'nton yu'un mi ta xavil jun muc' ta lum ilbajinbilic ti me'un mu'nate, ti mu xa xich'ic ta muc' ti lequil tuq'uil chapanele, xchi'uc ti oy c'usi tsots sc'oplal sc'an xich' pasele. Yu'un ti buch'u cajal yabtel yich'oje, ta xmucbat smul yu'un ti xjelav to cajal yabtel yich'oje. Xchibalic un ta xmucbat smul yu'un ti buch'u spajeb xa tsots yabtel yich'oje.

⁹ Taj une, sbiinoj la yu'unic slequilal yutsilal ti muc' ta lume, xchi'uc la sbainojan abtel ti ajvalil ta osil banomile.

¹⁰ Mu no'ox xpaj ta xa'i ma' ti buch'u bic'tajem yo'nton yu'un ti taq'uine. Mu'yuc no'ox c'usi staoj ta xa'i ti buch'u bic'tajem yo'nton yu'un ti c'ulejale. Taje, naca no'ox pich' o'ntonal ta xac'.

¹¹ Ti yepal no'ox ta xich' taele, yepal no'ox ta xich' lajesel un. ¿C'usi xtojolin o ti yepal no'ox c'usi x'ayane, ti batem xa xch'ulel ta slabanel ti c'usi oy yu'une?

¹² Ti buch'u ta xpich' yoc sc'ob ta abtele, mi sta no'ox ta lajesele, sjunul yo'nton ta xvay lec. Ja'uc ti jc'ulej une, mu x'aq'ue vayuc ta vul o'nton yu'un ti sc'ulejale.

¹³ Xi s'elan laj quil ma' ti mu xlaetuc o'ntonal yu'un li' ta banomile: ti yepal no'ox ta xich' tael ti c'ulejale, ta xc'ot ta soquel ti yajvale.

¹⁴ Mi mu lecuc c'ot ta loq'uel xchi'uc ti sbolomale, xu' ta xtub scotol ti c'ulejal taje. Mi oy xnich'one, mu'yuc xa c'usi ta xictabe comel.

¹⁵ Yu'un xi ta xc'ot ta stojol une: ti c'u s'elan vul ta banomile, jech ta sut batel. T'anal ta j'ech'el ti c'alal voc' talele, mi ja'uc ta xich' batel ma' ti slubel xchamel yoc sc'ob une.

¹⁶ Yu'un xi s'elan ti vul o'ntonal ta xac' ta j'ech'el une: ti c'u la s'elan vul ta banomile, jech la ta sut batel. ¿C'usi laj sbalin o ti laj smil sba ta abtel xchi'uc une? ch'abal.

¹⁷ Ic'uneb osil banomil laj ya'i ti c'u sjalil ch'i c'opoje. Yepal no'ox ti c'usitic chopol c'ot ta stojole. Ti vul o'ntonale, ti x'oc' x'avan no'ox xchi'uc ti svocole, quere, mu ch'ayel xal o ma' taj une.

¹⁸ Ti xloc' venta laj jta ta a'yiele, ti stac' chiquintaele, ve'cutic, cuch'tic vo', xchi'uc ta yet'esel co'ntontic ta stunel slajesel slubel xchamel ti coc jc'obtic c'u sjalil yac'oj ch'iel c'opojel ti Dios li' ta banomile. Albil jc'oplaltic ti jech ta jtatic yu'une.

¹⁹ Jech ec un, ti buch'u yepal no'ox ac'bat sc'ulejalic yu'un ti Diose, ac'bilic ta yoc ta sc'obic ti stunesicuc slajesicuc ti c'otem ta sventaique. Ti ta x'ech' ta que ta jti'tic slubel xchamel ti coc jc'obtique, liquem talel ta stojol ti Diose.

²⁰ Mu'yuc c'usi jna'tic c'u sjalil ti ch'iel c'opojele, Dios ta xijyac'botic ti smuyubajel co'ntontique.