Deuteronomio 9 - Bible in Tzotzil de Chamula

Yu'un ti c'usi lec ta xc'ot ta pasele, ma'uc yabtelic ti israeletique, ja' yabtel ti Diose

¹ “A'yio ava'iic, israeletic, ti xi ac'oplale: Yu'un sta xa yorail ta x'ech' atuch'ic ti uc'um Jordán ti ta xatic' abaic ochel ta yu'ninel ti muc'tiquil lumetic ti jelavem xu' yu'unique, ti ja' mu sta ti vo'oxuque. Muc'tic no'ox ta j'ech'el ti lume. Mu albajuc staylej ti smocal yich'oj ta sjoyleje.

² Ti jnaclejetic yu'une, muc'tic ta j'ech'el, natiquil viniquetic ti co'ol s'elan jech c'u cha'al snitilultac ti inate' vinic Anaque, ti xana'ic lec ti xi ta x'albat ti sc'oplalique: ‘¿Buch'u ono'ox la xu' yu'un ta stic' sba ta stsalel snitilultac ti inate' vinic Anaque?’

³ “Avi tana li' une, sc'an xana'ic ti ja' jba'be ech'el avu'unic ti Ajvalil Dios avu'unique, ti co'ol s'elan jun jtsutsesvanej c'oc' ti ch'abal c'usi ta xcom yu'un jutebuc, ti ta aba ta asatic ti peq'uel ta xc'ot sc'oplalic yu'une, ti ta xch'aybat ti sts'unubalic ti muc' ta lumetic taje. Yu'un ta jviq'uel jmuts'el no'ox asatic ta xatenic loq'uel. Ta xatsutsesbeic sc'oplal ta j'ech'el jech c'u cha'al yaloj ono'ox ti Diose.

⁴ C'alal mi laj xa snuts loq'uel ta aba ta asatic ti Ajvalil Dios avu'unique, mu me xi'uc xlic ajolic ta yalele: ‘Colyal ti litojob yu'un ti jbijiltic ti jna'tic c'usi xcut jbatique, ti laj yac'botic cu'nintic muc' ta lum ti Diose.’ Ti jech nutsatic loq'uel yu'un ti Dios le'e, ja' ta scoj ti smul scolo'ique.

⁵ Mo'oj, yu'un ma'uc ta sventa ti xana' c'usi xavut abaic yu'un ti abijilique. Mi ja'uc ta sventa slequilal yutsilal avo'ntonic ti yo' jech la'ochic ta yu'ninel ti slumalique. Yu'un ti jech ta xtenatic loq'uel yu'un ti Dios ta aba ta asatique, ja' ta scoj ti xchopolalique, xchi'uc xtoc yo' ta xc'ot ta pasel yu'un ti strate ti laj ono'ox yalbe ya'i ti amolmuc'totic Abrahame, ti Isaaque, xchi'uc ti Jacob ti laj ech'icuc ta vo'nee.

⁶ Yu'un sc'an xana'ic lec ti ma'uc ta sventa ti xana' c'usi xavut abaic xchi'uc ti abijilic ti ta xavu'ninic ti lequil banomil yu'un ti Ajvalil ti ja' Dios avu'unique. Yu'un ti vo'oxuque, ja' jun lum ti mu xava'ibeic ti sni' xchiquinale.

Stoyobbailic ti israeletic ta vits Horebe

⁷ “Ta j'ech'el mi ja'uc sc'an xch'ay ta avo'ntonic ti laj acontrainic ti Ajvalil Dios avu'unic ta sbajtical banomile. Yu'un mi ja'uc ono'ox xava'ibeic xchiquinal ti c'alal laloq'uic talel ta Egiptoe, ti c'alal lavulic ta loq'uel li'e.

⁸ Yu'un ti ta vits Horebe, ilin avu'unic ti Diose. Ep ilin ta j'ech'el ta atojolic, ti jutuc xa mu laj xch'ay ats'unubalique.

⁹ Ja'uc ti vu'une limuy ech'el ta jol vits yo' jech ta xquich' talel ti pech-pech tonetique, ti ja' pech-pech ton yu'un ti trate ti laj spas ti Dios ta atojolique. Va'i un, licom cha'vinic (40) c'ac'al, cha'vinic (40) ac'ubal, ti mi ja'uc live' li'uch'umaje.

¹⁰ Va'i un cha'e, ti Diose laj yac'bun talel cha'pech ton ti ts'ibabil yu'un stuque, ti ts'ibabil talel yu'un scotol ti c'op ti laj yal talel ti c'alal c'opoj ta o'lol leb c'oc' ta vits c'alal ti ja' o yorail tsobolotic jcotoltique.

¹¹ C'alal ech' xa ox ti cha'vinic (40) c'ac'ale, xchi'uc ti cha'vinic (40) ac'ubale, ti Ajvalil Diose laj yac'bun ti cha'pech tone, ti ja' pech-pech ton yu'un ti tratee.

¹² Va'i un, xi laj yalbune: ‘Yalan batel ta anil ti li'e. Yu'un ti jteclum ti laj aloq'ues talel ta Egiptoe, ch'ayic xa ta be. Yu'un ta jech no'ox yepal ta anil laj yicta sbaic ta spasel ti c'usitic calojbe ta spasique. Yu'un laj xa smeltsan jun sdiosic ti ulesbil ta taq'uine.’

¹³ “Ti Ajvalil Diose xi laj yalbun xtoque: ‘Laj xa cojtiquin ti lum li'e, ti mu ja'uc xa'ibeic ti xchiquinale.

¹⁴ Mu xamacun ta be. Yu'un ta jtsutsesic ya'iic ta j'ech'el. Ch'ayuc ti sc'oplalic ta banomile. Ja'uc ti vo'ote, ta xac'otic cu'un ta jun muc' ta lum ti tsots xu' yu'une, ti mu albajuc yepalique, ti ja' mu sta ti stuquique.’

¹⁵ “C'alal liyal talel ta vits ti bu ta xtil ta c'oq'ue, quich'oj talel ti cha'pech ton yu'un ti tratee.

¹⁶ Ja'uc ti c'alal laj quil ti laj xa ata amulic ta stojol ti Diose, ti laj xa ameltsanic sloc'obbail ti ch'in tot vacax ti unijesbil ta c'anal taq'uine, ti ta jech to yepal, laj avictaic ta sts'acliel ti Dios ti c'alal laj yalboxuc mantal ti mu xavictaique,

¹⁷ va'i un, laj jip ech'el ti cha'pech ton ti quich'oj talele, ti toj lilijel c'ot cu'un ta aba ta asatique.

¹⁸ Ts'acal to un, lic jquejan jba ta stojol ti Dios jech c'u cha'al ta jpas ono'ox talele. Mu ja'uc live', li'uch'umaj ti cha'vinic (40) c'ac'ale, ti cha'vinic (40) ac'ubale, ta scoj ti c'ot ta pasel ti laj ata amulic ta soquesbel yo'nton ti Diose, ti laj asa'beic ti sc'ac'al yo'ntone.

¹⁹ Ja'uc ti vu'une, batem xa jch'ulel ta xi'el ti c'alal laj yac' iluc ta atojolic ti ilinem xchi'uc sc'ac'al yo'nton ti Diose, ti jbel xa yo'nton ta xastsutsesoxuque. Ja'uc le' une, laj to ya'ibun yan velta jc'op ti Diose.

²⁰ Ja' jech xtoc ti Diose tsots ilin ta stojol ti Aarone, ti sc'an ox ta stsutses ya'i ta j'ech'ele. Ja'uc ti vu'une laj to jpacbe ti sc'oplale.

²¹ Ts'acal to un, sloc'obbail ti ch'iom vacax ti laj ameltsanic ti laj ata amulic yu'une, laj jip ochel ta c'oc'. C'alal laj co'nton slilinel ta juch'ele, lec xa nin com cu'une. Laj jip ochel ta uc'um ti ta xyal talel ta vitse.

²² “Ja' jech xtoc laj ono'ox aliquesbeic sc'ac'al yo'nton ti Dios ta Taberae, ti ta Masae, xchi'uc ti ta Kibrot-hataavae.

²³ C'alal laj yalboxuc mantal ti Dios ta Cades-barneae, ti loc'anic ech'el ta yu'ninel ti lum ti bu yaloj ta xayac'boxuque, laj ono'ox abajbeic ti smantale. Mi ja'uc laj apat avo'ntonic ta stojol. Mi ja'uc laj ach'unic.

²⁴ ¡Yu'un toyobbaoxuc ono'ox ta stojol ti Ajvalil Dios ti c'uxi lic cojtiquinoxuc talele!

²⁵ Ti jech sva'anoj xa sba ta j'ech'el ta stubbe ac'oplalic ti Diose, cha'vinic (40) c'ac'al, cha'vinic (40) ac'ubal, xiquejelet liquel ta stojol ti Diose,

²⁶ ti xivocolet xa liquel ti xichi laj calbee: ‘Ch'ul Dios, mu xach'aybe sts'unubal ti lum li'e ti c'alal ja' avu'une, ti ta amuc'ul ta atsatsal laj acoltae, ti laj aloq'ues talel ta Egiptoe.

²⁷ Vuleso ta avo'nton ti avajtuneltac Abrahame, ti Isaaque, xchi'uc ti Jacobe. Mu xavac' ta avo'nton spochanilic ti jteclum li'e, mi ja'uc ti xchopolalique, ti smulique,

²⁸ yo' jech mu xiuc alo'iltael yu'un ti jteclum ti bu laj aloq'ues talele: Ti Diose mu'yuc xu' yu'un ta yotesel ta lum ti bu yaloj ox ta xac'bee. Ti jech laj yic' loq'uel li'e, ti bat yac' chamicuc ta sbajtical banomile, ja' ti mu ono'ox lecuc xile.

²⁹ Ja'uc ti stuquic une, ja' alumal, ja' avu'untac, laj aloq'ues talel ta Egipto ta sventa ti la laman talel ti amuc'ul atsatsaele.’