Deuteronomio 8 - Bible in Tzotzil de Chamula

Ma'uc no'ox yip vaj ta xcuxi ti vinique

¹ “Ti mantaletic ti laj calboxuc ava'iic avi li'e, lic abtelanic ta spasel yo' jech ta xach'i xac'opojic, ti ta xac'otic ta jun epal jteclume, ti ta xavu'ninic ti muc' ta lum ti albilic ono'ox yu'un Dios ti ta x'ac'batic ta amolmuc'totic ti laj ech'icuc ta vo'nee.

² Mu me xch'ay xava'iic scotol ti bu c'alal la'ech'ic ta xanubal yu'un ti Ajvalil Dios avu'unic ti cha'vinic (40) jabil ta sbajtical banomile, yo' jech yamal no'ox c'ot ac'oplalic yu'un xchi'uc ta sq'uelel avo'ntonic, yo' jech ta xojtiquin c'u s'elan snopobil avu'unique, xchi'uc ta sna'el mi ta xc'ot ta pasel avu'unic ti smantaltaque, mi mu'yuc.

³ Ac'o mi laj yac'bot avocolic, xchi'uc ta sts'iquel vi'nal yu'un, ts'acal to un, laj smalq'uinoxuc ta maná, ve'lil ti mu ja'uc jutebuc xavojtiquinique, mi ja'uc oy bu xojtiquinic ti amolmuc'totic ti laj ech'icuc ta vo'nee. Jech laj spas ti Dios taje, yo' jech ta xac' ana'ic ti ma'uc no'ox ta yip vaj ta xch'i xc'opoj ti vinique, ja' ta xch'i xc'opoj xchi'uc ta jujubel ti c'usi ta xloc' ta ye ta sti' ti Diose.

⁴ Ti cha'vinic (40) jabil taje, mu'yuc xlaj jchopuc ti ac'u'ique, mi ja'uc oy bu situb ti avacanique.

⁵ Tuc'ulanic avilic lec ti ja' no'ox jech laj stojobtasoxuc ti Ajvalil Dios avu'unic jech c'u cha'al ta stojobtas xnich'on ti totile.

⁶ Ja' yu'un un cha'e, c'otuc ta pasel avu'unic smantaltac ti Ajvalil Dios avu'unique. Xi'taic, ich'ic ta muc'. Abtelanic ta spasel batel ti c'u s'elan laj xchanubtasoxuque.

⁷ Yu'un ti Diose ta xayic'oxuc ech'el ta jun lequil banomil, ta jun muc' ta lum ti buyuc no'ox x'ayan ti uc'umetique, ti tuquem vo'etique, xchi'uc sat vo'etic ti buyuc no'ox ta xtuc talel ta stenlejale, ti ta vitstique.

⁸ Ja' jun banomil xch'ieb ti trigoe, ti jchop o ta trigoe, ti uvae, ti icuxe, ti granada sbie, ti olivoe, xchi'uc ti ajapome.

⁹ Ta jteclum taje, mi ja'uc ta xavulilan avo'ntonic yu'un ti c'u s'elan xu' ta xata ti ave'elique, mi ja'uc jtosuc ti mu'yuc c'usi ta xataique. Ta xataic ti naca asero ton oy yu'une. Ta xataic ti naca c'anal taquin cobre ta vitstic oy yu'une.

¹⁰ Ts'acal to un, c'alal mi laj xa atun alajesic ti ave'el avuch'omique, ti xlaet ta xava'i ti avo'ntonique, tsots sc'oplal ti colaval xavutic ti Ajvalil Dios avu'unic ta sventa ti laj yac'boxuc ti jun lequil banomile.

Bijubtasel tojobtasel ti mu ch'ay ta o'ntonal ti Diose

¹¹ “Bij bijanic me un ti mu xch'ay ta avo'ntonic ti Ajvalil Dios avu'unique. Mu me xavicta abaic ta yabtelanel ti smantaltaque, ti c'usitic nopbil yu'une, xchi'uc ti oy jbel ti c'usitic albil ti laj calbot ava'i avie.

¹² C'alal mi laj xa atun ti ave'el avuch'omique, ti xlaet xa ti avo'ntonic ti nojoxuc lec yu'une, ti nacaloxuc xa ta lequil naetic ti laj ameltsanique,

¹³ ti c'alal ta xavilic ti epajem ta bolel ti avacaxique, ti achijique, ti oy avu'unic ti oroe platae, ti c'usitic xloc' x'ayan ta avosil abanomilique,

¹⁴ mu me ja'uc ti cajal tojol xa xava'i abaic ti ta xach'ay ta avo'ntonic ti Ajvalil Dios avu'unic ti laj sloq'uesoxuc talel ta Egipto ti bu to ox tiq'uiloxuc ta mosovile.

¹⁵ Yu'un laxanavic yu'un Dios ta xi'bal sba jamal sbajtical banomile, ti bu naca yavilal ti jti'oval chij chonetique, ti tsequetique, ti bu ch'abal ti vo' xtoque. Va'i un, ti stuque, loc' talel vo' yu'un ta jun ch'ut ton ti laj yac'boxuc avuch'ique.

¹⁶ Yu'un ti ta sbajtical banomile, laj smalq'uinoxuc ta maná, ti ja' jun ve'lil ti mu'yuc laj yojtiquinic ti amolmuc'totic ti laj ech'icuc ta vo'nee. Jech laj spas ti Dios taje, yo' jech yamal ac'oplalic c'ot yu'un, xchi'uc ta sq'uelboxuc avo'ntonic, ti ja' c'ot ta alequilalic ta slajebe.

¹⁷ “Mu me xi'uc xtal ta ajolic ta snopele: ‘Scotol ti c'ulejal laj jtatic li'e, ta yipal no'ox cu'un jtuctic quere.’

¹⁸ Tsots sc'oplal ti vuleso ta avo'ntonic ti Ajvalil Dios avu'unique. Yu'un ja' laj yac'boxuc avipic ta stael. Yu'un laj c'otuc ta pasel yu'un ti strate ta atojolic jech cu cha'al laj ono'ox yalbe ya'i ti amolmuc'totic ti laj ech'icuc ta vo'nee.

¹⁹ “Yan ti mi laj atenic comel ta avo'ntonic ti Ajvalil Dios avu'unique, ti lic xi ajolic ta sts'acliel ti yan diosetic ti ta xanijan xachiman abaic ta yich'el ta muq'ue, jamal ta xcalboxuc ava'iic li' unbi, li' no'ox c'alal ech'el ch'ab xi ti ac'oplalique.

²⁰ Va'i un, ti Diose, ti c'u s'elan ta stubbe ech'el sc'oplal ti muc'tiquil lumetic ti ta xataic batel ti bu ta xa'ech'ique, ja' no'ox jech ta xavich'ic tsutsesel ta j'ech'el ec ta scoj ti laj abajic ti c'u s'elan ta xac' ana'ic ti Ajvalil Dios avu'unique.