Deuteronomio 7 - Bible in Tzotzil de Chamula

Bijubtasel yu'un ti mu ich'baj ta muc' ti c'usitic meltsanbilique

¹ “Ti Ajvalile, ti ja' Dios avu'unique, ta xac' ochanic batel ta lum ti bu ta xavu'ninique, ti xi s'elan ta xavilic ta aba ta asatic ta sjip loq'uel ti vucub muc'tiquil lume ti jelavem xu' yu'unique, ti ja' mu sta ti vo'oxuque: ti hititaetique, ti gergeseoetique, ti amorreoetique, ti cananeoetique, ti ferezeoetique, ti heveoetique, xchi'uc ti jebuseoetique.

² C'alal mi laj xa yac'boxuc ta avoc ta ac'obic lum ti Ajvalil Dios avu'unic ti tsalbil xc'ot avu'unique, c'otuc ta pasel avu'unic ti tubbeic ti sts'unubal ta j'ech'ele. Mi ja'uc xavac' atrateic xchi'uc. Mi ja'uc xc'uxubaj avo'ntonic yu'unic.

³ Ja' jech xtoc, c'otuc ta pasel ti mu ja'uc xavuts' xavalalin abaic xchi'uque. Mi ja'uc xic'beic stsebic ti aqueremique. Mi ja'uc xic'beic atsebic squeremic ti lum taje.

⁴ Yu'un ti stuquic taje, ta xc'ot ta pasel ti ta xlic xch'ac sba ta stojol Dios yu'unic ti avalab anich'nabique, ti ta xlic snijan xchiman sbaic ta yich'el ta muc' ti yan diosetique. Jech o xal un, cajal ta xc'ot ta abaic sc'ac'al yo'nton ti Diose, yu'un ta jmuts'el jviq'uel no'ox asatic ti ch'abaloxuc ta jliquel yu'une.

⁵ Ti c'usi tsots sc'oplal sc'an xapasique, ja' lilinbeic ti altaretic yu'unic ti yich'ojic ta muq'ue. Jinesbeic loq'uel ta j'ech'el ti tonetique, xchi'uc ti c'usitic pajanbil ti ja' c'opojebaletic yu'unique. Chic'beic xtoc ti loc'obbail diosetic yu'unique.

⁶ Yu'un ti vo'oxuque, ja' jun lum ti ch'acbiloxuc ti tsots ac'oplalic c'otemoxuc yu'un ti Ajvalil Dios avu'unique. Yu'un ti ta scotol ti lumetic ti oy ta banomile, laj st'ujoxuc loq'uel ti Diose yo' jech ta xc'otic ta steclumal stuc.

Mu albajuc tsots sc'oplal ta x'a'yiatic xchi'uc stunelic ti israeletique

⁷ “Ti jech sc'oteb o laj yil ti Diose, ti laj st'ujoxuque, ma'uc ta sventa ti jun to avepalique, ti ja' mu sta yepalic ti yan muc'tiquil lume. Ja'uc le'e, yu'un xi no'ox avuni epalic ta melel ta scotol yu'un ti yan muc'tiquil lume.

⁸ Ti Diose, ta smuc'ul stsatsal laj spojoxuc loq'uel talel ta yoc ta sc'ob ti faraón ti bu to ox mosovinbiloxuc ta Egiptoe, yu'un c'uxoxuc ta yo'nton. C'otuc la ta pasel yu'un ti strate ti yaloj no'ox ta stojol ti amolmuc'totic laj ech'icuc ta vo'nee.

⁹ Ja' yu'un un cha'e, t'abuc lec ta avo'ntonic ti Dios ti ja' Ajvalil avu'unique, ja' ti bats'i Dios ti jbel sc'oplal ta xc'ot ta pasel yu'un ti strate ta stojol ti jaylajun-chop totil me'il chlaj ech'icuque, ta sventa ti buch'utic mu tuch'baj ta o'ntonal ta xa'iique, xchi'uc ti ta xch'unbat ti smantaltaque.

¹⁰ Ja'uc le'e, ta stsutsesbe sc'oplalic ta j'ech'el ti buch'u contra x'ilun yu'une. Ta xac'be stoj ya'i, ¡ti mu ta sjaliluc ta xac'be sc'upin stojol ti buch'u contra x'ilun yu'une!

¹¹ Ja' yu'un un cha'e, c'otuc ta pasel avu'unic ti smantaltaque, ti oy c'usi jbel tsots albile, xchi'uc ti c'usitic nopbil ti laj xcalboxuc ava'iic ti lic abtelanic ti c'ac'al tana li'e.

Ti jch'unej mantaletique ep c'uxubinel ta stojolic

¹² “Ti jech laj xa ava'iic ti c'usitic nopbile, ti ta xlic avabtelanic ti ta xc'ot ta pasel avu'unique, va'i un, ti Ajvalil Dios avu'unic une, ta sjunul yo'nton ta xc'ot ta pasel yu'un ti stratee, xchi'uc ti c'usi laj yalbe ti ta xac'be ti amolmuc'totic ti laj ech'icuc ta vo'nee.

¹³ Ta xa xc'uxubinoxuc. Yu'un ta sva'an sba ta atojolic ti tey ta lum ti bu albatic ti amolmuc'totic ti laj ech'icuc ta vo'ne ti ta x'ac'batique. Ta xa sbolesoxuc. Ta sva'an sba ta stojol ti avol anich'nabique, ti c'usitic xloc' x'ayan avu'unique, ti atrigoique, ti avinoique, ti avaceiteique, ti yoltac avacaxique, xchi'uc ti achijique.

¹⁴ Yu'un ti vo'oxuque ta xataic ti ep c'uxubinbil ta xac'otique, ja' mu sta scotol ti yan lumetique. Yu'un mu'yuc ta atojolic ti oy junuc ants ti mu sna x'alaje. Mi junuc vinic ti mu sna' xnich'naje. Mi ja'uc junuc chon bolometic ta atojolic ti mu xnich'naje, ti mu x'alaje.

¹⁵ Yu'un ti Diose ta sjip ta sten loq'uel ta atojolic ti c'usiuc no'ox ta xac' chamele jech c'u cha'al laj avilic ti c'usitic xi'bal sba laj stac talel ta stojol ti egipcioetique. Ja'uc ti avajcontraique, ta scajanbe ta sbaic yo' jech ta xich' svocolic yu'un taje.

¹⁶ Ja'uc ti vo'oxuc une, tsots sc'oplal, tubic ta j'ech'el scotol ti yajval lumetic ti ta xac'boxuc ta avoc ta ac'obic ti Ajvalil Dios avu'unique, ti mu ja'uc jutebuc xc'uxubaj avo'ntonic yu'une, ti mu ja'uc xanijan xachiman abaic ta yich'el ta muc' ti sdiosique. Ti mi jech taje, yu'un ja' ach'ayobilic ta be yu'un.

¹⁷ “Xu' nan ti xi ta xlic anopique: ‘Ti muc'tiquil jteclum li'e, toj ep ta j'ech'el, ja' mu sta ti vo'otique. ¿C'usi la ta utel yo' ta jnutstic loq'uel?’

¹⁸ ¡Mi ja'uc xasibtas abaic yu'un ta j'ech'el! Mu me xch'ay xava'iic ti c'usi laj spas ti Ajvalil Dios avu'unic ta stojol ti faraone, xchi'uc ta stojol scotol ti egipcioetique.

¹⁹ Ja'uc me taluc ta ajolic ta snopel ti c'u s'elan laj avilic ta aba ta asatic ti muc'tic no'ox ti c'usitic laj vinajuque, ti ch'ayal ta xc'ot o'ntonal yu'une, ti laj slaman talel ti smuc'ul stsatsal ti Dios ti c'alal laj sloq'uesoxuc talel ta Egiptoe. Yu'un ja' ono'ox ta spas ti Dios ta stojol scotol ti lumetic ta xaxi'ic yu'une.

²⁰ Ma'uc no'ox taje, yu'un ta xtic'batic ep xi'el ta stojolic yu'un ti Diose, ti ta xc'otic yu'un ta tsutsel yu'un ti buch'utic cuxajtic to comique, xchi'uc ti buch'utic snac'ojan xa sbaic ti yalojique.

²¹ Ja' yu'un un cha'e, altic no'ox ta xaniquic ta xi'el yu'un. Yu'un ti Ajvalil ti ja' Dios avu'unique, ja' jun Dios ti xi'bal sbae, ti jelavem ti smuc'ul stsatsale.

²² Yu'un ti Diose ta naca sta ta snuts loq'uel ti muc'tiquil lumetique. Yan ti mi jbel no'ox c'op ta xatsutsesique, ta x'epaj talel ti jti'oval chonetic ta jujujote, ti xu' ta xtal smiloxuque.

²³ Ja'uc le' une, ti Ajvalil Dios avu'unique ta xac'boxuc ta avoc ta ac'obic ti muc'tiquil lume, ti naca sta ta stsuts ech'el ja' to ti mi ta xc'ot ta pasel ti ch'ab xi ti sc'oplale.

²⁴ Ti ajvaliletic yu'unique, mi jbeluc xa ta stoy yeic ta atojolic. Yu'un ta xac'boxuc ta avoc ta ac'obic. Yu'un ta xc'ot ta pasel avu'unic ti mu'yuc xa buch'u ta xvul ta yo'ntonic sc'oplalic ti banomile. Yu'un mi junuc ti ta to xpac yu'unic ti sc'oplalic ti c'alal ta xatsaquic ta c'ope, tsutsesic ya'iic scotol un cha'e.

²⁵ Ta xachic'beic ya'iic ti sloc'obbail sdiosique. Ja'uc le' une, mu me x'och ta avo'ntonic ta yich'bel comel ti oroe xchi'uc ti plata ti ja' c'otem ta sbontaque. Mu me ja'uc ti xbic'taj avo'nton yu'une. Yu'un ta xatic' abaic ta spasel ti chopol ta xc'ot ta stojol ti Diose.

²⁶ Ja' yu'un un cha'e, mu me c'usi xavich'ic batel ta anaic ti albil sc'oplal ti mu xtune yo' jech mu xc'ot ta pasel ta atojolic ti ta xatub ac'oplalique. Yu'un taje, chapal xa sc'oplal ti ta xich' lilinele. Tsotsuc me sc'oplal, c'otuc ta avo'ntonic ti mu xa xtune.