Deuteronomio 6 - Bible in Tzotzil de Chamula

Ti mantal ti tsots sc'oplale

¹ “Ta sc'an ti ta xavabtelanic ta spasel ti mantaletic ta banomil ti bu ta xavu'ninique, ja' ti c'usitic oy jbel ti tsots albil sc'oplale, ti c'usi nopbil yu'un ti Ajvalil Dios avu'unic ti laj yalbun ti ac'o xajchanubtasoxuque.

² Ti jech taj une, ta xavaq'uic ta toyol cajal sc'oplal ta yich'el ta muc' ti Ajvalil Dios avu'unic ti c'u sjalil ti achi'el ac'opojelic ti li' ta banomile, ti c'otuc ta pasel avu'unic ti mantale, ti c'usitic oy jbel tsots albile, ti laj calboxuc ava'iic xchi'uc ti avalab anich'nabique, ti amomique. Yu'un ti jech taj une ep jabil ta xach'i xac'opojic.

³ Ja' yu'un un cha'e, israeletic, lic abtelanic ta spasel. Ja' to jech lec ta xc'ot ta atojolic. Jech ta xac'otic ta jun muc' ta lum ta banomil ti bu co'ol s'elan vo' ta xbein ti chu' vacaxe xchi'uc ti ajapome jech c'u cha'al laj ono'ox yal ti Ajvalil Dios ta stojol ti amolmuc'totic ti laj ech'icuc ta vo'nee.

⁴ “A'yio ava'iic, israeletic, ti Ajvalil Dios cu'untique, jun no'ox, mu'yuc yan.

⁵ “Ta sjunuluc avo'nton, ta sjunuluc ach'ulel, ta sjunuluc avip, c'uxuc xava'iic ti Ajvalil Dios avu'une.

⁶ “Bejluc c'otuc ta ajol scotol tana li'e ti va'i s'elan laj calbot ava'ie.

⁷ Ja'uc taj une, chanubtaso, ta yalbel ya'i ti anich'one. Albo ya'iic sc'oplal ti c'alal oyot ta anae, ti c'alal ta xaxanav ta bee, ti c'alal po'ot xa xavaye, ti c'alal mi lajulav xae.

⁸ Chuquic ech'el ta ac'obic ta ati'baic ti mantaletic taje yo' jech ta xt'ab ta avo'ntonic.

⁹ Ma'uc no'ox taje, ts'ibao ta oyetic, ta sti'tac anaic.

Ti israeletique ta xc'ubanbatic yu'un ti Moisese ti jch'unej mantal c'oticuque

¹⁰ “Ti Ajvalil ti ja' Dios avu'unique, ta xac' ochanic batel ta lum ti bu albat ta jamal ti ta x'ac'batic ti amolmuc'totic Abrahame, ti Isaaque, ti Jacobe, ti laj ech'icuc ta vo'nee. Ja' jun muc' ta lum ti c'upil sba ti jteclumetic ti oy yu'une, ti mu jutebuc laj atic' abaic ta smeltsanele.

¹¹ Ma'uc no'ox taje, yu'un ja' oy naetic ti nojic ta jun yutsiquil sbele, ti mu ja'uc jutebuc laj atic' aba ta snojesele, joq'uetic ti mu ja'uc jutebuc laj atic' abaic ta soquele, ts'unubal uvaetic xchi'uc olivoetic ti mu ja'uc jutebuc laj avabtelanic ta sts'unele. Ja'uc le' une, ta xatic' abaic ta slajesel ja' to ti c'uxi ta x'ech' lec avo'ntonic yu'une.

¹² C'alal jech ta xc'ot ta pasel taj une, tsotsanic ti mu xch'ay ta avo'ntonic ti Ajvalil Diose, ti ja' laj sloq'uesoxuc talel ta Egipto ti bu to ox mosovinbiloxuque.

¹³ Bic'tajeso ta snijanel xchimanel abaic ta yich'el ta muc' ti Ajvalil Dios avu'unique. C'ajomaluc no'ox tunan ta stojol. C'alal oy c'usi ta xavalic ta jamale, c'ajomaluc no'ox me c'otuc ta rextico avu'un ti stuque.

¹⁴ Mu xats'acliic ta yich'el ta muc' ti diosetic ti nijilic chimilic ta yich'el ta muc' ti jteclumetic ti nopol nacalic ta atojolic li'e.

¹⁵ Yu'un ti Ajvalil Dios avu'unic ti li' oy ta atojolique, ja' jun Dios ti mu sc'an ta xavac' abaic ta stojol yane. Yu'un xu' ta x'ilin ta atojolic ti ta xch'ay ats'unubalic ta j'ech'ele.

¹⁶ “Mu xaq'uelbeic ta slajeltsael yo'nton ti Ajvalil Dios avu'unique jech c'u cha'al laj apasic ti c'alal oyoxuc ta Masae.

¹⁷ Ta yutsiluc avo'ntonic, c'otuc ta pasel avu'unic smantaltac ti Ajvalil Dios avu'unique, ti c'usitic yaloje, xchi'uc ti jbel ti c'usi albil sc'oplal yu'un ti ac'o xapasique.

¹⁸ Ja' pasic ti c'usi lec tuq'ue, xchi'uc ti c'usi lec ta xil ta sba ta sat ti Diose, yo' jech lec ta xbat ac'oplalic. Jech ta xavu'ninic ti lequil banomil ti yaloj ono'ox ti Dios ti ta xac'be ti amolmuc'totic ti laj ech'icuc ta vo'nee.

¹⁹ Ma'uc no'ox taje, jech ti Ajvalil Diose ta xjatav batel yu'un ti avajcontraic ti c'alal ta stsacoxuc ta letoe jech c'u cha'al yaloj ono'ox ta spase.

²⁰ “Oy bu jun c'ac'al ti xi ta sjac'boxuc ti anich'onique: ‘¿C'usitic stunel o ti mantaletique, ti oy c'usi jbel albil ti tsots sc'oplale, ti c'usitic nopbil ti yaloj ti Ajvalil Dios cu'untic ti ta xac' ta na'el ti ac'o jpastique?’

²¹ Va'i un, xachi ta xatac'beique: ‘Ti ta Egiptoe, mosovinbiluncutic to ox yu'un ti faraone. Ja'uc ti Ajvalil Dios une, ta smuc'ul stsatsal laj sloq'uesuncutic talel ti bu taje.

²² Yu'un laj quilcutic ta jba ta jsatcutic ti c'usitic muc'tic xi'bal sbae, ti mu'yuc xquilcutic jech ti ch'ayal ta xc'ot o'ntonal yu'un ti laj yac' iluc ti Dios ta stojol ti faraone, xchi'uc sjunul sna ti c'otem ta pasob mantal yu'un ti oy ta Egiptoe.

²³ Ja'uc ti vu'uncutique, laj sloq'uesuncutic tal. Laj yic'uncutic talel ta lum ti bu albilic ono'ox ti jmolmuc'totic ti laj ech'icuc ta vo'ne ti ta x'ac'batique. C'ot ta pasel ti laj yac'buncutic eque.

²⁴ Ts'acal to un, ti Ajvalil Dios cu'untique laj yalbuncutic ti c'otuc ta spasel ta yabtelanel ti mantaletic taje, ti ac'o jchancutic ta snijanel xchimanel jbacutic ta yich'el ta muq'ue, yo' jech lec ta xbat ti jc'oplalcutique, yo' ta xischabiuncutic lec jech c'u cha'al tana li'e.

²⁵ Ja' yu'un un, toj jtunel cu'uncutic ti vo'otic ta stuc'ulanel lec ti c'otuc ta pasel cu'untic ti mantaletic ta sba ta sat ti Ajvalil Dios cu'untic jech c'u cha'al yaloj ono'oxe.’