Deuteronomio 4 - Bible in Tzotzil de Chamula

Ti Moisese ta sbijubtas ti jch'unej-mantaluc israeletique

¹ “Avi tana li'e, israeletic, a'yio ava'iic, ts'etano ani' achiquinic yu'un ti oy c'usitic jbel tsots albile, xchi'uc ti c'usitic nopbil ti laj xa jchanubtasoxuque. C'otuc ta spasel avu'unic yo' jech ta xach'i xac'opojic ta yu'ninel ti lum ta xac'boxuc ti Ajvalil Dios yu'unic ti amolmuc'totic ti laj ech'icuc ta vo'nee.

² Mi ja'uc xavepajesic xach'aybe yip jlomuc ti c'u yepal laj xa calboxuc ava'iique. Yu'un c'otuc ta pasel avu'unic smantaltac ti Ajvalil ti ja' Dios avu'unique jech c'u cha'al calojboxuc ava'iique.

³ Yu'un laj avilic ta aba ta asat atuquic c'u s'elan laj spas ti Dios ta stojol ti Baal-peore, xchi'uc xtoc ti c'ot ta pasel ti laj stsutses ta j'ech'el ta atojolic ti buch'utic laj yich'ic ta muc' ti dios ti bu taje.

⁴ Ja'uc ti c'u avepalic ti vo'oxuc ti jun ajol avo'ntonic ta stojol ti Ajvalil ti ja' Dios avu'unique, li' to cuxuloxuc acotolique.

⁵ Ta sventa ti oy c'usitic jbel tsots albile, xchi'uc ti c'usitic nopbil yu'un ti Dios cu'une, yu'un laj xa jchanubtasoxuc yu'un ti mantaletique, yo' jech ta xavabtelanic ta spasel ta jteclum ti bu ta xavu'ninique.

⁶ C'otuc ta pasel avu'unic un, abtelanic. Yu'un ti jech ta xapasic taje, ja' to jech ta xlic yilic ti lumetic ti oy abijilique, ti xatojobic ta snopele. Ti c'alal jech ta xc'ot ta sba ta satic ti oy jbel ti c'usitic tsots albile, ‘¡Ti muc' ta lum le'e, toj ech'em jelavem sbijilic!’ xi ta xalic.

⁷ Ja'uc le' une, ¿mi oy to bu yan muc'tiquil lum ti nopol va'al ti diosetic ta stojolic ti xu' yu'un jech c'u cha'al ti vo'otic ti nopol va'al ti Ajvalil Dios cu'untic ti c'alal ta jc'opontic jujucoje?

⁸ ¿Mi yu'un oy la bu muc' ta lum ti oy ta yoc ta sc'obic ti oy jbel ti c'usitic tsots albile, xchi'uc jun yutsiquil nopbil ti lec tuc' ta j'ech'el ta xchanubtasvan jech c'u cha'al laj xa cal ava'iic ta atojolic avi tana li'e?

⁹ Ja' yu'un un, bijanic ti mu xch'ay ta avo'ntonic ti c'usitic laj avilic ti c'ot ta pasele, ti mi ja'uc ta j'ech'el ta xaten ta apat ta axoconique. Ja'uc le'e, albeic ya'iic smelol ti anich'nabique xchi'uc ti amamubtaquique.

Ti Diose c'opoj ta vits Horeb

¹⁰ “Ti sc'ac'alil ti c'alal oyoxuc ta stojol ti Ajvalil Dios avu'unic ta vits Horebe, xi laj yalbun ti Diose: ‘Tsobo talel ti jteclume yo' jech ta xa'iic ti jc'op ca'yeje, yo' jech ta xchanic ta yich'elun ta muc' ti c'u sjalil ti xch'iel sc'opojelique, ti ac'o xchanubtasic ti xnich'nabic jech c'u cha'al ta spasic ti stuquique.’

¹¹ Lanopajic ech'el ta yoc ti vitse, ti c'alal xtil ti c'oq'ue, ti natic ta xmuy ti slebe, ti lic talel jun muc' ta ic'al lumal toque.

¹² Va'i ti Dios une laj sc'oponoxuc talel ta o'lol sleb ti c'oq'ue. Laj ava'ibeic ti sc'opojele. Ti jech laj ava'ibeic ti sc'opojele, mu'yuc xavilic ti oy buch'u va'ale.

¹³ Va'i un, ti Diose laj yac'boxuc ana'ic ti stratee, ja' sc'oplal ti lajuneb mantal ti laj sts'iba ta chib pech-pech ton ti laj yalboxuc ava'iic ti ac'o avabtelanic ta spasele.

¹⁴ Jech xtoc ti Diose laj yalbun ca'i ti ac'o xajchanubtasoxuc ta sventa ti jbel c'usitic tsots albile, xchi'uc ti c'usitic nopbil yu'une, ti tsots sc'oplal c'otuc ta pasel avu'unic ta banomil ti bu ta xacomic ta nacleje.

Ti bijubtasel tojobtasel yu'un ti mu ich'baj ta muc' ti c'usitic meltsanbile

¹⁵ “Ti sc'ac'alil ti c'alal laj sc'oponoxuc talel ti Dios ta o'lol sleb ti c'oc' ta vits Horebe, mu'yuc c'usi va'al laj avilic. Ich'o abijilic un cha'e.

¹⁶ Mu ta jechuc to yepal xlic ajolic ta soquesel abaic ta sloc'tael sloc'obbail vinic, mi ja' jun ants,

¹⁷ mi ja'uc ta sloc'tael sloc'obbailic ti chon bolometique, mi ja'uc ti mutetique,

¹⁸ mi sloc'ol jun quiletel chon, mi sloc'obbail junuc choy.

¹⁹ C'alal ta xatoy muyel asatic ta vinajele, ti ta xavilic ti c'ac'ale, ti ue, ti c'analetique, xchi'uc scotol ti c'usi ta xvinaje, mu ta jechuc yepal xlic ajol ta soquesel abaic ta yich'el ta muq'ue. Yu'un taje, meltsanbil yu'un ti Ajvalil Dios avu'unic ta sventa ti jnaclej ta sbejel banomile.

²⁰ Ja'uc ti vo'oxuc une, laj stsoboxuc ti Diose. Laj sloq'uesoxuc ti bu co'ol s'elan yunijesel taq'uin horno ti ja' sc'oplal ti Egiptoe. C'ot ta pasel ti xi ac'oplalic yu'un avi tana li' une: jteclum ti ja' yu'une.

²¹ Manchuc mi jech un, ti Diose ilin ta jtojol ta acojic ti vo'oxuque. Yu'un ta j'ech'el laj sva'an sba ta yalel ti mi ja'uc ta xijelav ta jot uc'um Jordane. Mi ja'uc ta xi'och batel ta lequilal banomil ti bu ta xayac'boxuc ti arextoique.

²² Ti jech ta xicham li' ta lum une, mu'yuc c'usi xcut jba un. Yu'un mu cha'bel ta x'ech' jtuch' ti uc'um Jordane. Yavil ti vo'oxuque ta x'ech' atuch'ic, ti ta xavu'ninic ta yu'ninel ti lequil banomile.

²³ Ja' no'ox un, bijanic ti mu xch'ay ta avo'ntonic ti yac'ojboxuc strate ti Ajvalil Dios avu'unic ti laj spas ta atojolique. Mu xaloc'taic ta smeltsanel loc'obbail, c'usiuc no'ox yan ti laj yalboxuc ava'iic ti Ajvalil Dios avu'unic ti mu stac' jech ta xapasique.

²⁴ Yu'un ti Ajvalil Dios avu'unique, ja' jun Dios ti mu sc'an ta xavac' abaic ta stojol yan. ¡Ja' jun c'oc' ti xlilij yu'un scotole!

²⁵ “Yu'un c'alal mi laj xa avilic ti ayan ti anich'nabique, ti amamubtaquique, ti laj to avilic ta aba ta asatic ti lamolibic ta jteclume, mu me xlic ajol ta sloc'tael c'usiuc no'ox loc'obbailetic ti ja' ta xata o amul ta stojol ti Ajvalil Dios avu'unique, ti yalel ta xaliquesbeic ti sc'ac'al yo'ntone.

²⁶ Yu'un ta jva'an ta rextico ti vinajele, ti banomil avi tana li' une, ti ta jech no'ox yepal ta xch'ay ac'oplalic ta lum ti bu ta xavu'ninic ta jot uc'um Jordane. Yu'un mu xjalij ti ach'iel ac'opojel ta banomil taje. Yu'un c'ajomal no'ox ta xac'otic ta tsutsel ta j'ech'el.

²⁷ Yu'un tan puc ta xabatic yu'un ti Dios ta muc'tiquil lume. Yu'un c'ajomal xa no'ox jun chiboxuc ti cuxul ta xacomique.

²⁸ Ti bu taj une, ta xlic avich'ic ta muc' ti diosetic ti meltsanbil ta c'abale, ti loc'tabil te'e, ti loc'tabil tone, ti mu x'ilvane, ti mu xa'iic ti c'oponel ti'inele, ti mu xve'ique, ti mu xich'ic iq'ue.

²⁹ Ja'uc ti bu taj une, mi ta yutil avo'ntonic ta sjunul ach'ich'elic ta xlic asa' ti Ajvalil Dios avu'unique, ta xataic ta sa'el.

³⁰ Ta slajeb ta scotol un, mi cuch avu'un scotol ti vocoletic taj une, ti ilbajinele, ti vul o'ntone, ti mi lasutic talel ta stojol ti Diose, ti j'ech'el mu tuch'baj ta avo'ntonique,

³¹ ja'uc ti stuc une, ti jech mu albajuc ti yutsil slequil yo'ntone, mi ja'uc xastenoxuc comel. Mi ja'uc ti ta xastsutsesoxuc ta j'ech'ele. Mi ja'uc ta xch'ay ta yo'nton ti strate laj spas xchi'uc ti amolmuc'totic ti laj ech'icuc ta vo'nee, ti laj sva'an sba ta yalel ti ta xc'ot ta pasel yu'une.

³² “Jac'o ava'iic sc'oplal mi oy bu c'ot ta pasel junuc velta ta vo'ne jech c'u cha'al li'e, ti c'alal ch'abaloxuc to oxe, ti c'alal lic smeltsan jun sba vinic li' ta banomil ti Diose. Xanavanic ta sjoylej banomil ta sjac'olanel mi oy bu ya'binojic sc'oplal ti c'usitic muc'tic c'otem ta pasel jech c'u cha'al avi tana li'e.

³³ ¿Mi oy bu c'ot ta pasel ta stojol junuc jteclum ya'yel ti laj ya'ibeic sc'opojel Dios jech c'u cha'al laj ava'ibeic sc'opojel ta o'lol leb c'oc' vo'oxuc ti mu'yuc xchamique?

³⁴ ¿Mi yu'un oy bu c'otem ta pasel ya'luc sc'oplal junuc dios ti laj stsob loq'uel jun lum ta stojol yan lum ti ep ta tos ti c'usitic laj spase? Yu'un ti tey ta aba ta asatique, laj cotuc ta pasel yu'un ti jchop o ta q'uelele, ti ch'ayal ta xc'ot o'ntonal yu'une, ti xletovaj no'oxe, ti laj slaman ta bail ti bu xa c'alal xu' yu'une, ti smuc'ul stsatsal ti xi'bal sbae, laj c'otuc ta pasel yu'un ti laj spas ta atojolic ti Ajvalil Dios avu'unic ta Egiptoe.

³⁵ Ti jech laj yac' ta ilel taje, yo' jech ta xana'ic ti Ajvalile ja' ti bats'i Dios ta melele, ti mu'yuc xa yan ta tael jech c'u cha'al ti stuque.

³⁶ Yu'un ta vinajel to, laj sc'oponoxuc talel yo' jech ta xastojobtasoxuc. Ja'uc ti li' ta banomile, laj yac' avilic ti muc'ul c'oc' yu'une. Laj ava'ibeic ti c'opoj talel ta o'lol leb c'oq'ue.

³⁷ Yu'un laj xc'uxubinan ti amolmuc'totic laj ech'icuc ta vo'nee. Laj st'ujanan ti snitilultac yu'une, ti poj loq'uel talel yu'un ta Egipto ta sventa smuc'ul stsatsale.

³⁸ Yu'un ta aba ta asatic, laj sten loq'uel ti yajval lumetic ti epic ta j'ech'ele, ti tsots xu' yu'unique, ti ja' mu sta ti vo'oxuque, yo' jech ta xavu'ninic ti slumalique, ti ta xarexto-osilinic jech c'u cha'al ti yacal ta xc'ot ta pasel avi tana li'e.

³⁹ “Taj une, c'otuc ta ajol ta abaquilic, ti Ajvalile, ja' Dios ti oy ta vinajele ta banomile. Mu'yuc xa yan Dios jech c'u cha'al ti stuque.

⁴⁰ Ch'unbeic ti jbel ti c'usi tsots albil sc'oplale, xchi'uc ti smantaltac ti ta xcac' ana'ic ti c'ac'al avi tana li'e. Jech lec ta xc'ot ta atojolic xchi'uc ti anitilulique, ti ta xnatij ach'iel ac'opojelic ta lum ti bu ta xayac'boxuc ta j'ech'el ti Ajvalil Dios avu'unique.”

Ti pojobbail lumetic ti oy ta yelov sloq'ueb c'ac'al yu'un ti uc'um Jordane

⁴¹ Va'i un, ti Moisese laj st'uj oxib lum ti oy ta yeloval sloq'ueb c'ac'al yu'un ti uc'um Jordane.

⁴² Ti lum taje, ja' ta xc'ot ta sventa snac'obbailic yu'un ti buch'u mu yaleluc ta smil ti yane, ti mu'yuc smajoj sbaic xchi'uque, ti xu' ta xbat snac' sba ta junuc ti bu taje yo' jech mu xtaat ta milel.

⁴³ Ti lumetic taje xi s'elan jech c'u cha'al li'e: Ta sventa snitilultac ti Rubene, ja' laj yich' ti Beser ti oy ta stenlej jol vits ti oy ta sbajtical banomile. Ta sventa snitilultac ti Gade, ja' laj yich' ti Ramot ti oy ta Galaade. Ta sventa ti o'lol jvoc' ti ja' snitilul ti Manasese, ja' laj yich' ti Golán ti oy ta Basane.

Sliquebal yu'un ti c'u s'elan ta xich'ic ac'bel ti lajuneb mantaletique

⁴⁴ Ti li'e, ja' ti chanubtasel ti laj yich'ic albel ti israeletic yu'un ti Moisese.

⁴⁵ Sc'oplal ti mantaletique, ti jbel ti c'usitic tsots albile, xchi'uc ti c'usitic nopbil ti albatic ti c'alal iloq'uic talel ta Egiptoe,

⁴⁶ ti c'alal oyic to ox ta yeloval sloq'ueb c'ac'al yu'un ti uc'um Jordane, ta stenlejal yeloval Bet-peor ti oy ta yosilal Sehón ti ja' ajvalil yu'un ti amorreoetique. Ti Sehone nacal to ox ta Hesbón ti tsalbil c'ot yu'un ti Moisese xchi'uc ti israeletic ti c'alal loq'uic talel ta Egiptoe.

⁴⁷ Ti israeletique laj yu'ninbeic ti yosile, xchi'uc yosil ti Og ti oy ta Basane, ti ja' chib ajvalil amorreo ti nacalic to ox ta stuq'uil sloq'ueb c'ac'al yu'un ti uc'um Jordane.

⁴⁸ Ti jamal ta j'ech'el ti yosil sbanomile, ja' ta xlic ta Aroer ti ta sti'il uc'um Arnone, ti c'otem c'alal to vits Sirión ti sbiinoj Hermón xtoque.

⁴⁹ Jech xtoc smacoj scotol ti Arabá ti oy ta stuq'uil sloq'ueb c'ac'al yu'un ti uc'um Jordane, ti c'otem c'alal to ta muc' ta Sts'ijlajan Nabe, xchi'uc ti c'otem c'alal to yoc vits Pisga ti yosil sbanomile.