Deuteronomio 23 - Bible in Tzotzil de Chamula

Sc'oplal ti buch'utic mu stac' x'ochic ta tsoblebal yu'un ti Diose

¹ “Ti buch'u t'usemic ti sc'unile, mi setbil yu'un ti ste'ele, mu xu' ta x'och ta tsoblebal yu'un ti Diose.

² “Mu xu' ta x'och ta tsoblebal yu'un Dios ti buch'u ma'uc bats'i nich'onile, ac'o mi ech' xa ox ti slajun-chopal ti totil me'iletique.

³ “Ti amonitaetique, ti moabitaetique, ta j'ech'el mi ja'uc xu' ta x'ochic ta tsoblebal yu'un ti Diose, ac'o mi ech' xa ox ti slajun-chopal totil me'ile.

⁴ Yu'un c'alal laloq'uic talel ta Egiptoe, ti la'ech'ic ta slumalique, mi ja'uc laj yac'boxuc jset'uc ave'elic, mi ja'uc jbochuc vo' laj avuch'ic yu'un. Ma'uc no'ox taje, yu'un laj stojic ta taq'uin ti Balaame, xnich'on ti Beor ti liquem talel ta Petor ti oy ta Mesopotamiae, yo' jech ta sc'an alajelic.

⁵ Ja'uc le' une, ti Dios avu'unique mu'yuc laj ya'ibe sc'op ti Balaame. Yu'un joybij ta alequilalic ti alajelic ti laj sc'anboxuque, ja' ti c'uxoxuc ta yo'ntone.

⁶ Yu'un ti c'u sjalil ti ach'iel ac'opojelic ta xa'ech'ique, mu xaco'oltas avo'ntonic xchi'uc. Mi ja'uc xasa' alequilalic ta stojolic.

⁷ “Manchuc mi jech un, mu xabajic ti edomitaetique, yu'un ja' avuts' avalalic. Mi ja'uc xabajic xtoc ti egipcioetique. Yu'un lanaquiic to ox ta slumalic.

⁸ Le' une, xu' x'och ta tsoblebal yu'un Dios ti mi ech' xa ox ti yoxcojal xa snitilulique.

Ti ch'aybajele oy sc'oplal ta sventa ti oy c'usi jbel tsots albile

⁹ “Ta scoj ti ta uni axibal na nacaloxuc ti c'alal oyoxuc ta letovajel xchi'uc ti avajcontraique, q'uelo me abaic ti mu'yucuc me c'usi jtosuc chopol xc'ot ta pasele.

¹⁰ Mi oy buch'u junucal avu'unic soquesoj sba ta scoj ti oy c'usi ta xjelav yu'un ti c'alal vayale, loc'uc ech'el ti bu lamaloxuc ta voleje, sjunul c'ac'al ma'uc xu' x'och talel.

¹¹ C'alal mi bat xa ti c'ac'ale, ac'o spoc sba ta vo', ja' to xu' ta x'och batel mi xyabet xa ti osil ti bu lamaloxuc ta voleje.

¹² “Tsots sc'oplal ta xbat ch'ayobajanic ta loq'uebal xa ech'el ti bu lamaloxuc ta voleje.

¹³ C'alal mi ta xapaxyajique, jmoj xchi'uc ti avabtejebique, tsots sc'oplal oyuc junuc te' avu'unic ti lec sni'e. Jomic o ti banomile. But'iic ta banomil ti avic'obalique.

¹⁴ Yu'un xlajun xanav no'ox ti Ajvalil Dios avu'unic ti bu lamaloxuc ta voleje yo' ta xchabioxuc, yo' ta xatsalic yu'un ti acontraique. Tsots sc'oplal ti ch'ul banomiluc ti bu vololoxuc ta lamleje yo' jech mu'yuc c'usi chopol ta xil ti Dios ti bu taje. Yan ti mi mu jechuc une, ta sq'uej sba loq'uel ta atojolic.

Oy jbel c'usitic tsots albil ta sventa ti jnac'bail jch'om nae

¹⁵ “Mi oy jun mosovil ta xjatav loq'uel ta stojol ti yajvale, ti ta xch'amun ti anaique, mu xavaq'uic ech'el ta sc'ob ti yajval to oxe.

¹⁶ Ch'an utic, nacluc ta atojolic ta jteclum ti bu jun yo'nton xchi'uc ta xa'ie, ti bu c'ot ta t'ujel yu'une.

Mu stac' ti capal xchi'uc mulil ti c'usi ta xich' toyel xi'taele

¹⁷ “Ja'uc ti vo'oxuc une, israeletic, mi ja'uc junuc vinic, mi ja'uc junuc ants, ta scapin sba ti xchonoj sba ta sbolomalinel sba ti bu ta spasic stoyel xi'el ti yan c'u s'elan cuxul xchi'uquique.

¹⁸ Ti ta Axibalna yu'un ti Ajvalil Dios avu'unique, ma'uc me ti lec xava'iic ta xch'ambel ti c'usitic ta xloc' ta eal ta xich' aq'uel ti mi staojic talel ta sbolomalinel sbaic xchi'uc ti taq'uine. Yu'un ti va'i s'elan taje, toj chopol ta xil ti Diose.

¹⁹ “Mi ja'uc xasuj ta stojel sjol ti c'usi ta xch'amun ti avinquilele, mi ja' jun taq'uin, mi ja' ti c'usi stac' chonele, mi c'usiuc no'ox yan ti stac' ch'amunel ti ta sutes xchi'uc ti sjole.

²⁰ Ja'uc ti jyanlumetique, xu' xac'anbeic ti ac'o sutes xchi'uc sjol ti c'usi laj avac'beic xch'amune. Ja'uc ti avinquilele, mu me jechuc xapasic mi junuc ta stojolic. Yu'un scotol ti c'usi ta xapasique, ta sva'an sba ta atojolic ti Ajvalil Dios avu'unic ta lum ti bu ta xavu'ninique.

²¹ “Mi oy c'usi avalojic ta xavac'beic ti Diose, mu xajaliltasic. Oyuc ta ajol ti ta jbel sc'oplal ta xa'ich'bat ave'ic ati'ic yu'un ti Ajvalil Dios avu'unic mi ech' jelav no'ox une.

²² Mi mu'yuc avac'oj ave'ic ati'ic ti oy c'usi ta xavaq'uique, mu xata mi jtosuc amulic.

²³ Yan mi loc' ayan ta avo'nton ta yalel ti c'usi ta xavac'be ti Ajvalil Dios avu'unique, ja' yu'un un unbi, c'otuc ta pasel avu'unic.

²⁴ “Mi la'ochic ta sts'unub uva ti avinquilele, xu' xalo' ti uva ti c'u yepal xal ti avo'ntonique. Ja' no'ox un, mi ja'uc xavich' batel jbejuc ta alcu moch.

²⁵ Mi la'ochic batel ta yut ts'unbil trigoe, xu' xatuch' ac'uxic ti sjole. Ja' no'ox un, mi ja'uc xatuch' ta jos ti trigoe.