Deuteronomio 2 - Bible in Tzotzil de Chamula

Ti jabil ti c'u sjalil ta sbajtical banomile

¹ “Ts'acal to un, lijloc'otic ech'el ta sbajtical banomil ti jtamojtic ech'el ti bu ta x'ech' sbelel ti Tsajal Nabe jech c'u cha'al yaloj mantal ti Diose. Jal xijoyetotic ta xanobal ta j'ech'el ta sjoylej ti vitstic yu'un ti Seire.

² Va'i un, ti Diose xi laj yalbune:

³ ‘Jal xa ta j'ech'el ti li' xajoyetic ta xaniel ti vitstique. Avi tana li' une, batanic xi ta yeloval yolon ti yolon xocon sloq'ueb c'ac'ale.

⁴ Xi s'elan xavalbe ya'iic mantal ti jteclume: Ta xa'ech'ic ta yosilic snitilultac ti Esaú ti nacalic ta Seire, ti ja' avuts' avalalic xtoque. Ti stuquique batem xch'ulelic ta xi'el avu'unic. Ac'o mi jech un, bijanic me un.

⁵ Mu xatic' abaic ta snutsel loq'uel. Yu'un mi ja'uc oy ta co'nton ta xcac'boxuc jutebuc ti lum taje. Ti vitstic yu'un ti Seire, ja' c'otem ta xrextoic snitilultac ti Esaue. Yu'un vu'un laj cac'beic.

⁶ C'anbeic ti ac'o xchonboxuc ti ve'lil ta xtun avu'unique. Ti vo' ta xavuch'ique, ta xatojbeic.’

⁷ Yu'un ti Ajvalil ti ja' Dios avu'unique laj xa sva'an sba ta atojolic ta scotol ti c'usi laj xa apasique. Yu'un ti cha'vinic (40) jabil sjalile, oy ono'ox ta atojolic. Laj xchabioxuc talel ti laxanavic ta muc'tiquil sbajtical banomile. Yu'un mi ja'uc ti mu'yuc ti c'usi laj yac'boxuque.

⁸ “Ts'acal to un, lijloc'otic ech'el ta sbelel ti Arabae, ti ta xlic talel ta Elate xchi'uc ti ta Ezión-gebere. Lij'ech'otic ta yosilal ti cuts' calaltic snitilultac ti Esaú ti nacalic ta Seire. Ti bu taje, lic joytic ech'el ta stamel ech'el sbelel ti sbajtical banomil yu'un ti Moabe.

⁹ Va'i un, ja' o xi laj yalbun ti Diose: ‘Mu me xavilbajinic, mi ja'uc xanutsic loq'uel ti moabitaetique. Yu'un ja' snitilultac ti Lote. Yu'un mi ja'uc jutebuc ta xcac'boxuc ti slumale. Yu'un ja' c'ot ta xrextoic cu'un sbanomil ti Are.’

¹⁰ (Ti lum taje, nacalic to ox ta vo'ne ti emitaetique, ti muc'tiquil lum to ox ta jmeque, ti bolemic ta j'ech'ele, ti spajebal xa no'ox snatiquil ta j'ech'el jech c'u cha'al ti snitilultac ti inate' vinic Anaque.

¹¹ Ti jteclume, c'otem ta sjolic ti biiltasbil refaítaetique. ‘Pucujil natiquil viniquetic le'e’, xi sc'oplal yu'unic. Ja'uc ti moabitaetique sbiiltasojic emitaetic. ‘Xi'bal sbaic le'e’, xi sc'oplal yu'unic.

¹² Ti ta banomil Seir taje, nacalic to ox ta ba'yel ti horeoetique. Ja'uc le' une, tsutsesatic ta j'ech'el yu'un snitilultac ti Esaue. Laj yu'ninbeic ti steclumale. Ochic ta naclej ta j'ech'el jech c'u cha'al ta spas ti israeletic ta stojol ti jteclum ti ta x'ac'batic yu'un ti Diose.)

¹³ ‘Avi tana le' une, tamo ech'el abeic. Ech' tuch'ic ti uc'um Zerede’, xi laj yalbun ti Diose. Va'i un, laj jtuch'tic jelavel ti uc'ume.

¹⁴ “C'alal lijloc'otic ech'el ta Cades-barneae, jech oy xvaxaclajunebal xcha'vinic (38) jabil ti sba to velta lij'ochotic ta xtuch'el ti uc'um Zerede. Va'i un, c'ot xa ox ta pasel ti laj xa chamuc scotol snitilultac ti j'ac'-letoetic ti lamalic to ox ta naclej jech c'u cha'al laj yal ono'ox ti Diose.

¹⁵ Yu'un smuc'ul stsatsal ti Diose, lamal vul ta stojolic ja' to ti c'uxi cham scotolique.

¹⁶ “C'alal mu'yuc cuxulic mi junuc ti j'ac'-leto viniquetic taje,

¹⁷ xi laj yalbun ti Dios ti c'alal laj sc'oponun talele:

¹⁸ ‘Avi tana li' une, ja' xa yorail ta xa'ech'ic ta sts'ac ti moabitaetique, tuc' ta xatam batel ta Ar.

¹⁹ Ja' no'ox un, c'alal mi lac'otic ta stojol ti amonitaetique, ti ja' snitilultac xtoc ti Lote, mu xavilbajinic, mi ja'uc xanutsic loq'uel. Yu'un mi ja'uc xacac'boxuc jutebuc ti yosil sbanomilique. Yu'un c'otem xa ta xrexto cu'un.’

²⁰ (Ja' jech xtoc ti jteclum taje, ja' to' ox c'otem ta sbanomilic ti refaítaetique. Yu'un naquiic to ox ta vo'ne ti refaítaetique, ti ja' zomzomeoetic biiltasbilic yu'unic ti amonitaetique.

²¹ Muc' ta lum to' ox sc'oplal ti jteclum taje. Yu'un mu albajuc yepalic ta jmec ti natiquil viniquetic ta j'ech'el jech c'u cha'al snitilultac ti inate' vinic Anaque, ti ch'aybat sts'unubalic ta j'ech'el yu'un Dios ta sventa ti amonitaetique, ti j'ech'el com nacliicuc ta jteclume.

²² Taje, ja' co'ol c'ot ta stojolic ta j'ech'el jech c'u cha'al ti horeoetic ti nacalic to ox ta Seire, ti ch'aybat sts'unubalic yu'un snitilultac ti Esaú ti com nacliicuc ta j'ech'ele.

²³ Yu'un jech ono'ox c'ot ta stojolic ti heveoetic ti nacalic to' ox ta jun biq'uit jteclum nopol ta Gazae, ti ch'aybat sts'unubalic ta j'ech'el yu'un ti filisteoetic ti liquemic talel ta Cretae, ti com nacliicuc ta j'ech'ele.)

²⁴ ‘Batic’, xiyutun ti Diose, ‘tamic ech'el ti abeique, ech' tuch'ic ti uc'um Arnone. Yu'un ta xcac' ta avoc ta ac'obic ti amorreo Sehón ti ajvalil yu'un ti Hesbone, xchi'uc ti yosil sbanomile. ¡Liquesic ti letoe! ¡U'ninic ti sbanomile!

²⁵ Li' ta xlic batel tana ti ta xcac' xi'icuc avu'unic scotol ti jteclum ta banomile. C'alal ta xa'iic ti ac'oplalique, xnicnunic liquel, ta xlic u'ninaticuc yu'un ti xi'el ta j'ech'ele.’

Ti israeletique ta stsalic ti ajvalil Sehone

²⁶ “Ta sbajtical to banomil yu'un Cademot, laj jtac jelavel jun chibuc j'al-mantal j'ich'-c'opetic ta stojol ti Sehón ti ajvalil yu'un ti Hesbone, ti ta lequilal xi xcholet ta sc'anbeic jech c'u cha'al li'e:

²⁷ ‘Jnopojcutic ti ta xi'ech'cutic ta avosil abanomile, ti ja' ta jtamcutic ech'el ti muc' ta bee, ti mu ja'uc ti bu no'ox xibusetcutic ta avosil abanomile.

²⁸ Ta xajtojbecutic ta taq'uin ti ve'lil ti ta jtun ta jlajescutique, xchi'uc ti vo' ta x'ech' xcuch'cutique. Avocoluc, ac'buncutic ave ati' ti ech'cuncutic avu'une,

²⁹ jech c'u cha'al yac'oj ye sti' ta xi'ech'cutic snitilultac ti Esaú ti nacalic ta Seire, xchi'uc ti yac'oj ye sti' ta xi'ech'cutic ti moabitaetic ti nacalic ta Are. Ja' jech ta jc'ancutic ja' to ti c'uxi ta xi'ech' jtuch'cutic ti yuc'umal Jordane yo' jech ta xic'otcutic ta jteclum ti bu ta xiyac'buncutic ti Ajvalil Dios cu'uncutique.’

³⁰ “C'u stu un, ti ajvalil Sehone mu'yuc xac' ech'cutic ta yosil sbanomil. Yu'un ti Ajvalil ti ja' Dios avu'unique laj stsatsubtasbe yo'nton yo' jech mu'yuc xac' ye yo' ta xc'ot ta tsutsel ta avoc ta ac'obic jech c'u cha'al oy ta avoc ta ac'obic tana li'e.

³¹ “Va'i un, ti Dios une xi laj yalbune: ‘Li' xa lic batel tanae ti ta xcac'bot ta avoc ta ac'ob ti Sehone, xchi'uc scotol ti yosil sbanomile, ti ochanic xa batel ta steclumale, u'ninbeic xa ta j'ech'el.’

³² “Ti Sehone ta jech to yepal tal snupotic ta be xchi'uc scotol ti yajsoldadotaque yo' tal stsacotic ta leto ta Jahase.

³³ Ja'uc ti Ajvalil ti ja' Dios cu'untique laj yac' ochuc ta coc ta jc'obtic, ti tsalbil c'ot cu'untic ti stuque, ti xnich'nabe, xchi'uc scotol ti yajsoldadotaque.

³⁴ Scotol ti steclumale, och ta coc ta jc'obtic, ti c'ot ta sbaic ti ta j'ech'el laj jlilintique. Laj jmiltic ti viniquetique, ti antsetique, ti ololetique, ti mu junuc cuxul com cu'untique.

³⁵ Yu'un c'ajomal no'ox laj jtunestic ti vacaxe, xchi'uc ti c'usitic toyol stojol ti laj jtatic ti c'alal laj jtsaltic ti jteclumetique.

³⁶ Ti Ajvalil ti ja' Dios cu'untique, laj jtsaltic yu'un scotol ti jteclum ti lic talel ta Aroer ti oy ta sts'el uc'um Arnone, ti jteclum ti oy ta stenlejale, ti c'ot c'alal to Galaade. Mi junuc oy buch'u cuch yu'un laj spoj sbaic ti c'alal laj jtsactic ta letoe.

³⁷ Ti jteclumetic ti mu'yuc laj jtsactic ta letoe, xi s'elan jech c'u cha'al li'e: steclumalic ti amonitaetique, ti c'u sjamlej oy ta sts'el uc'um Jaboque, ti jteclumetic ti oy ta muc'tiquil vitstique, xchi'uc scotol ti yan ti lij'albatotic yu'un ti Ajvalil ti ja' Dios cu'untic ti mu jtsactic ta letoe.