Deuteronomio 19 - Bible in Tzotzil de Chamula

Ti pojobbail jteclumetique

¹ “C'alal mi laj xa xch'aybe sts'unubalic ti muc'tiquil lum ti Ajvalil Dios avu'unique, mi laj xa avu'ninic ti yosilic ti ja' to yu'unic tana li'e, mi laj xa avu'ninbeic ti slumalique, xchi'uc ti snaique,

² va'i un, ti ta muc' ta lum ti bu ta xa'ac'bat arextoinic yu'un ti ajvalil Dios avu'unique, ta xach'aquic oxib jteclum.

³ Ma'uc no'ox taje, ta xameltsanbeic ech'el sbelel ti bu ta xc'ot ta jujune. Ja' jech xtoc pasic ta oxch'ac ti c'u sjamlej ti banomil ti ta xa'ac'batic yu'un ti Ajvalil Dios avu'unique. Buyuc no'ox junucal xu' ta xbat snac' sba junuc ta scotol ti mu yaleluc laj smil junuc ti svinquilele.

⁴ Yu'un ti buch'u mu yaleluc laj spas ti milvane, xu' chbat snac' sba yo' jech mu xtae ta milel mi ta xvinaj ti mu yaleluc laj spase, xchi'uc ti mu'yuc bu sna' scontrain sbaique.

⁵ Xcaltic no'ox, mi oy buch'u bat xtuch'ic si' xchi'uc junuc xchi'il ta te'tique, ti oy no'ox c'uxi bat pitc'ujuc loq'uel ta ste'el ti yeq'uel ti c'alal ta sjimbe ti te'e, ti toj chamel c'ot yu'un ti xchi'il ti lec laj sc'ojbe ti c'alal xjipip to batele, xu' xbat snac' sba ta junuc ti jteclum taje. Ti jech taj une, mu xtae ta milel.

⁶ Yan ti mi mu jechuc une, ti yuts' yalal ti buch'u chame, xu' ta scapemal xa sjol ta xbat sta ta nutsel ta be ti jmilvaneje, ti ta sta ta lubiel ta be ta scoj ti nat ta xanave, ti ta xcham ta yayijesel yu'un ti c'alal ma'uc to jech sc'oplal ta xcham ti c'alal mu bac'niuc contra xil sbaique.

⁷ Jech o xal un, ta jpasoxuc ta mantal ti tsots sc'oplal ti ch'aquic me ti oxib nac'obbail jteclumetique.

⁸ Va'i un, ti c'alal ta smuq'uibtas ech'el alumalic ti ta xac'boxuc scotol banomil ti Ajvalil Dios avu'unique, jech c'u cha'al albilic ono'ox ti amolmuc'totic laj ech'icuc ta vo'nee,

⁹ jech o xal un, xu' ta to xabolesic yan oxib ti pojobbail jteclume. Ja' slecoj xa ma' ti oxib pojobbail jteclum ti oy avu'unique. (Taje, ti mi staoj yav ta xavabtelanic ta spasel ti mantaletic ti laj calboxuc ava'iic li'e, ja' ti c'uxuc xava'iic ti Ajvalil Dios avu'unique, ti junuc avo'ntonic ts'acliic ech'el ti bu ta xayic'oxuc batele).

¹⁰ Ti jech taj une, mu ta jeche'uc no'ox ta xmalbat xch'ich'el ti buch'u ch'abal ti smul ti oy ta muc' ta lum ti bu xa'ac'batic ta arextoic yu'un ti Ajvalil Dios avu'unique, ti mu ja'uc tenel ta xc'ot ta abaic mi oy buch'u ta xchame.

¹¹ “Ja'uc le' une, mi oy jun vinic ti contra ta xil ti xchi'il ti tsac xut ta milele, ti ts'acal to ta xjatav batel ta junuc ti pojobbail jteclume,

¹² va'i un, ti moletic yu'un ti jteclume ta xalic mantal ti ac'o yich' tsaquele, ti ac'o yaq'uic ech'el ta stojol yuts' yalal ti animae, yo' ta xc'ot ta pasel ta xchapaj sc'oplal ti ta xich' milele.

¹³ Mi ja'uc jutebuc xc'uxubaj avo'nton yu'un. Yu'un ja' to jech ta xpaj sc'oplal ti bu oy ta jeche' no'ox ta xmalbat xch'ich'el ti buch'u ch'abal smul ti oy ta lum Israele. Ja' yu'un un, scotol ti c'usitic ta xapasique lec ta xc'ot ta loq'uel avu'unic.

¹⁴ “Ti ta banomil ti bu ta xa'ac'batic yu'un ti Ajvalil Dios avu'unique, tsots sc'oplal ich'ic ta muc' ti sts'aquil xrexto osil ti alac' nae, jech c'u cha'al ac'bil ono'ox comel ta vo'nee.

Ti jutc'op rexticoetique mu xa ono'ox xcol ya'iic yu'un ti jbel c'usi tsots albile

¹⁵ “Mu'yuc tac'bil ta xc'ot sc'op mi jun no'ox rextico ta sva'an sba ta yalel ti oy buch'u milvane, ti oy smule, ti oy c'usi chopol laj spase. Ja' no'ox ich'bil ta muc' ta xc'ot mi oy chib oxib rextico ta xalic ti oy smule.

¹⁶ “Ja'uc le' une, mi oy jun jchopol o'nton vinic ti ta sva'an sba ta rextico ta jeche' no'ox ta sa'be smul ti yane, ti ta xal ti oy smule,

¹⁷ va'i un, ti jech oyic xa ta vul bail ti xcha'vo'alique, ta xba yich'ic va'anel ta stojol ti Diose, ta stojol ti paleetique, xchi'uc ta stojol ti jchapanvanejetic ti jech ja' o sc'ac'alil ti ta xchapanvanique.

¹⁸ Jech ti jchapanvanejetique ta stuc'ulanic lec, ta sts'etan sni' xchiquin ta ya'yiel lec smelol ti c'ope. Mi ja' c'ot ta pasel ti naca jutbil ti c'usitic laj yal ti laj sa'be smul ti xchi'il ti laj sva'an sba ta rexticoe,

¹⁹ va'i un, ti c'u s'elan ta sq'uelbe ox ya'i svocol ti xchi'ile, ja' ta xjoybij ta sba scotol. Ja' to jech ta xtub sc'oplal ti c'usitic chopol ta xc'ot ta atojolique.

²⁰ C'alal ta xc'ot ta sni' ta xchiquinic ti yane, ta xlic ochuc xi'el yu'unic. Mi ja'uc xa oy buch'u ta x'och ta sjol ta spasel ti c'usi chopole.

²¹ Xi s'elan sc'an xapas, ti mu ja'uc jutebuc xc'uxubaj avo'ntonic yu'une: Ti buch'u milvane, ja' jech ta xich' ec. Ti buch'u laj st'us satile, ja' jech ta xich' ec. Ti buch'u laj sc'as tanal eile, ja jech ta xich' ec. Ti buch'u laj soques c'obile, ja' jech ta xich' ec. Ti buch'u laj soques acanile, ja' jech ta xich' ec.