Deuteronomio 14 - Bible in Tzotzil de Chamula

¹ “Yu'un ti vo'oxuque, yalab xnich'naboxuc ti Ajvalil Dios avu'unique. Mi ja'uc xayayijes abaic. Mi ja'uc xat'anbun ta loq'uel ti stsotsil ajolic ta scoj mi oy buch'u chame.

² Yu'un ti vo'oxuque, ja' jun jteclum ti ch'acbiloxuc loq'uel yu'un ti Ajvalil Dios avu'unique. Yu'un ja' stuc laj st'ujoxuc loq'uel ta stojol scotol ti yan lumetic ti oy ta banomile yo' jech ta xac'otic ta steclumal stuc.

Ti jti'el chon bolometique xchi'uc ti ma'uque

³ “Mu xati'ic ti albil sc'oplal mu stac' ti'ele.

⁴ “Xi s'elan xcholet sbitac ti chon bolometic ti stac' xati'ique: ti tot vacaxe, ti ch'iom chije, ti ch'iom tentsune,

⁵ ti muc' ta yaxal te'tical chije, ti tsajal te'tical chije, ti basas te'tical chije, ti te'tical tentsune, xchi'uc scotol ti chon bolometic ti c'usitic xc'ublajetic ta xjuch' ti sve'elique.

⁶ Ja' yu'un un cha'e, stac' xati'ic scotol ti chon bolometic ti cha'xol svoyique, xchi'uc ti xc'ublajet ta xjuch' ti sve'elique.

⁷ Ja'uc le'e, xi s'elan ti chon bolometic ti mu stac' xati'ique, manchuc mi cha'xol ti svoye, mi xc'ublajet ta xjuch' ti sve'elique: “Ti camello ti ja' jun jcuch icatsil chon bolome, ti muc'tic te'tical t'ule, ti cotome, c'otuc ta o'ntonal ti mu stac' ti'el ti chon bolometic taje, manchuc mi xc'ublajet ta xjuch' ti sve'elique, yu'un ma'uc yich'oj cha'xol svoyic.

⁸ “Ti chitome, cha'xol ti svoye. Ja'uc le' une mu'yuc xc'ublajet ta xjuch' ti sve'ele. C'otuc ta o'ntonal un cha'e ti mu stac' ti'ele. Mu xati'beic sbec'tal ti chon bolom taje, mi ja'uc xu' xapiquic ti bu chamemique.

⁹ “Ja'uc ti c'usiticuc chanul cuxulic ta yut vo'e, ja' no'ox xu' xati'ic ti oy snene' xiq'uique, xchi'uc ti oy smic'ale.

¹⁰ Ja'uc ti mu'yuc ti snene' xiq'uique, xchi'uc ti mu'yuc smic'ale, c'otuc ta o'ntonal ti mu stac' ti'ele.

¹¹ “Stac' xati'ic ti mutetic ti albil sc'oplal ti stac' ti'ele.

¹² Ja'uc le' une, oy yan ti xi s'elan albil sc'oplal ti mu stac' xati'ique: ti muc' ta xique, ti vacose, ti xical nabe.

¹³ Ma'uc no'ox taje, mu stac' ti'el ti mutal nab ti co'ol s'elan xique, scotol ti jti'oval mutetic ti cujajtic yeique.

^14-15 Ma'uc no'ox taje, mu stac' ti'el scotol ti c'usiuc no'ox jojale, ti j'anilajel muc' ta mute, ti cux-cuxe, ti pop xique, ti jaylajun-tos sts'unubal xiquetique.

¹⁶ Ma'uc no'ox taje, mu stac' ti'el ti mutal bolome, ti jti'-chon mute, ti muc' ta ic'al ichine.

^17-18 Ma'uc no'ox taje, mu stac' ti'el ti muc' ta sac jol mute, ti muc'tic xuleme, ti jojal nabe, ti muc' ta tsajal ichine, ti jti'us mute, xchi'uc ti sots'e.

¹⁹ “Scotol ti nene' chonetic ti xvilte-viltee, c'otuc ta o'ntonal ti ma'uc jti'ele. Mi ja'uc xati'ic.

²⁰ Ja'uc ti mutetic ti albil sc'oplal ti stac' ti'ele, xu' xati'ic.

²¹ “Ta j'ech'el mu stac' xati'ic scotol ti c'usiuc no'ox chon bolomal ti ta xcham stuque. Yu'un le' cha'e, oy ac'oplalic ti ja' jun lum ti t'ujbiloxuc yu'un ti Ajvalil Dios avu'unique. Ja'uc c'otuc ta pasel avu'unic ti ac'beic ti jyanlumetic ti nacal ta alumalique. Yu'un ti stuquique xu' ta sti'ic. Mi mo'oje, xu' xachonbeic xtoc ti j'ech'el-be jyanlumetique. “Mi ja'uc capal xalacanic xchi'uc ya'lel xchu' sme' ti ch'in tentsune.,

Bijubtasel ta sventa sc'oplal ti jun ta jujun lajlajunebe

²² “Ti jujun jabil une, mu me xch'ay ta be avu'unic ti sc'an ch'aquel loq'uel ti jun ta jujun lajlajuneb ti c'u yepal loc' ta tsobel avu'unic sat ti c'usi loc' ayane.

²³ Ti jch'ac ta jujun lajlajuneb ti sat trigo taje, ti vinoe, ti aceitee, ti sba yoltac ti avacaxique, xchi'uc ti achijique, ta xatun xalajes ta sba ta sat ti Ajvalil Dios avu'unic ti bu st'ujoj ti yavil ti bu ta xich' tael ta na'ele, yo' jech ta xachanic ta snijanel xchimanel abaic ta j'ech'el ta stojol ti Diose.

²⁴ Yu'un mi sva'anoj sba ti Dios ta atojolique, ja'uc ti vo'oxuc une, ti jech nat ta xaxanavic ta yich'el batel ti jun ta jujun lajlajuneb ta yavil to ti bu t'ujbil yu'un ti Dios ti staobil ta na'ele, ta scoj ti nom nacaloxuque,

²⁵ ja' yu'un un cha'e, xu' xachonic ti jun ta jujun lajlajuneb ti bu nacaloxuque. Jech ti stojol ti c'usi laj achonique, ich'ic batel ta yavil ti bu t'ujbil yu'un Dios ti staobil ta na'ele.

²⁶ Ta sventa ti taq'uin taje, ja' xc'ot amanic o xchi'uc ti c'usitic ti xi c'ot ta nopel avu'unique: ti vacaxetique, ti chijetique, ti vinoe, mi oy c'usi yan uch'bolal ti pasem xae, yu'un ti xcaltique, ja' ti c'usi xal avo'ntonic ta xalajes ta sba ta sat ti Ajvalil Dios avu'unique, ti jmoj ta xapasic q'uin ti c'u avepalic ta nacleje.

²⁷ “Ja'uc ti levitaetic ti nacalic ta alumalic une, ta j'ech'eluc mu xajip xatenic. Yu'un ti stuquic le'e mu'yuc laj yich' xrexto osilic jech c'u cha'al ti vo'oxuque.

²⁸ “Ta jujun ox-ox jabile, tsots sc'oplal ta xach'aquic loq'uel ti jch'ac ti jun ta jujun lajlajuneb ti c'usitic loc' ayan avu'unic ti jun jabile, ti tsobbil xa avu'un ta q'uejel ta alumale.

²⁹ Ja'uc ti c'alal ta xc'ot ta atojolic ti levitaetic ti mu'yuc laj yich'ic ti xrexto osilique, mi ja' ti jyanlumetic ti nacal ta atojolique, mi ja' ti buch'u mu'yuc xa buch'u x'ayan yu'unique, mi ja' ti me'un antsetique, ja' xu' ta sve'ic ja' to ti c'uxi xnojic lec xchi'uquique. Va'i un, ti Ajvalil Dios avu'unique ta sva'an sba ta stojol scotol ti c'usiuc no'ox ti avabtelic ta xapasique.