Deuteronomio 10 - Bible in Tzotzil de Chamula

Ta liclejal ta xich' ts'ibael ti tratee

¹ “Ava'i un, xi laj yalbun ti Diose: ‘Anano ta tuch'el cha'pechuc ton co'ol jech c'u cha'al ta ba'yele. Jech xtoc, meltsano junuc caxa ti meltsanbil ta te'e. Mi laj taj une, muyan batel ta vits yo' ta jchi'in jbatic ta lo'il.

² Ti ta cha'pech tonetic taje, ta jts'iba ti c'opetic co'ol jech c'u cha'al ti ts'ibabil ta ba'yel ti vo'ot laj avoq'ue, ti tey ta xaq'uej ta caxa xtoc une.’

³ “Ja'uc taj une, laj jmeltsan ta acacia te' ti caxae. Laj jtuch' ta anel ti cha'pech tone. Quich'oj muyel ta vits xtoc un.

⁴ Jech ti Dios une laj sts'iba ta pech-pech ton ti lajuneb mantaletique co'ol jech c'u cha'al laj sts'iba ta ba'yel ti c'alal laj sc'oponoxuc talel ta o'lol leb c'oc' ta vits ti c'alal tsobolotic jcotoltique. Laj yac'bun un.

⁵ Ta jech no'ox yepal liyal talel ta vits. Laj taj une, laj jtic' ochel ta caxa ti pech-pech tone, ti co'ol s'elan laj jpas jech c'u cha'al laj yalbun mantal ti Diose, ti q'uejel xa ta yavil avie.”

⁶ (Ti israeletique loq'uic ech'el ta Bee-rot-bene-jaacán. Laj stamic ech'el sbeic ta stuq'uil Moserá. Ti bu taje, c'ot chamuc ti Aarone. Laj yich' muquel. Ja' ich'bat ta paleal yu'un ti Eleazar ti ja' xnich'one.

⁷ Ti bu taje, loq'uic ech'el yo' ta xbatic ta Gudgoda. Loq'uic ech'el ta Gudgoda, batic ta Jotbata, ta jun yosilal ti buyuc no'ox ta xtuc ti vo'e.

⁸ Ja' o me c'ot ta pasel un c'alal ti Dios lic st'uj snitilultac ti Levie, ti ja'icuc ta xich'ic batel xcaxail ti trate yu'un ti Diose, ti oyicuc ta stojol yo' jech ta xtunic ta sva'anel sbaic ta yaq'uel ti lequilal ta sventae, ti jech to syaquil ta spasic tana li'e.

⁹ Jech o xal un, ti levitaetique mu'yuc yich'ojic ti xrexto osilic jech c'u cha'al laj yich'ic ti svinquilelique. Yu'un ja' c'otem ta rextoil yu'unic ti Diose co'ol jech c'u cha'al laj ono'ox yal ti Diose.)

¹⁰ “Co'ol jech c'u cha'al ti sba veltae, licom ta jol vits cha'vinic (40) c'ac'al, cha'vinic (40) ac'ubal. Ja'uc taj une, laj ya'ibun jc'op ti Diose. Mi ja'uc xa laj yac' sjol ti ta xastsutsesoxuque.

¹¹ Yu'un c'ajomal no'ox xi laj yalbune: ‘Batan, chapano aba ech'el ta jba'be yu'un ti achi'iltaque yo' jech xbat avu'ninic ti lum ti caloj ti ta xcac'beic ti amolmuc'totic ti laj ech'icuc ta vo'nee.’

Ti tsots sc'oplal ta xa'i ti ac'o yich' pasbel ti Diose

¹² “Avi tana li' une, israeletic, ¿c'usi ti juteb ta yo'nton ti ac'o apasbeic ti Ajvalil Dios avu'unique? C'ajomal no'ox ti ac'o anijan achiman abaic ta stojole, ti nablanic ech'el ti bu ta x'ic'van batele, ti c'uxuc ta xava'iic ta sjunuluc avo'ntonic, ta sjunuluc ach'ulelic, ti ich'biluc ta muc' c'otuc avu'unique.

¹³ Ma'uc no'ox taje, c'otuc ta pasel avu'unic ti smantaltaque, ti jbel ti c'usitic tsots albil yu'une yo' jech lec ta xbat ac'oplalic.

¹⁴ Tuc'ulanic lec avilic, yu'un ti Ajvalil Dios avu'unique, ja' yu'un ti vinajele, ti x'ech' to jelavel ti bu oy ti vinajele, ti banomile, xchi'uc scotol ti c'usitic oy ta stojole.

¹⁵ Manchuc mi jech un, ti Diose tsots sc'oplal laj ya'i ti laj xc'uxubinan ti amolmuc'totic ti laj ech'icuc ta vo'nee. Ts'acal to un, lic st'uj ti snitilultac yu'unic ta scotol ti lumetique, ja' ti vo'oxuc avi tana li' une.

¹⁶ “Bejeluc c'otuc lec ta avo'ntonic svinajeb ti tratee. Mu me staojuc yav xacomic ti mu xava'iic ti sni' xchiquinale.

¹⁷ Yu'un ti Ajvalil Dios avu'unique, ja' Dios yu'unic ti diosetique, Ajvalil yu'unic ti ajvaliletique. Ja' stuc no'ox Dios ti cajal sc'oplal ta scotole, ti xi'bal sba jelavem xu' yu'une, ti mu sna' spas ti jeltos yo'ntone, ti mu ja'uc sna' xchon sba ta matanale.

¹⁸ Yu'un ti Dios taj une, ta stic' sba ta spojel ta scoltael ti buch'u ch'abal c'usi x'ayan yu'une, xchi'uc ti me'unal antse. Yu'un ta xc'uxubin, ta xac'be sve'el, ta xac'be sc'u' ti jyanlum ti nacalic ta atojolique.

¹⁹ Ja' yu'un ti vo'oxuc un cha'e, oyuc syail c'uxul avo'nton ta stojol ti jyanlumetique, yu'un xana'ic lec ti jyanlum la'ech'ic ta Egiptoe.

²⁰ “Xi'taic ti Dios avu'unique. Ja'uc no'ox stuc, nijano, chimano abaic ta yich'el ta muc'. Junuc avo'ntonic ta stojol. Ja'uc me xava'an ta rextico ti c'alal ta xava'an aba ta yalel ti jbel xa sc'oplal ta xc'ot ta pasel avu'un ti ac'op laj avalique.

²¹ Ti stuque, ja' Dios avu'unic ti xc'ot o lequil c'optabil avu'unic ta sventa ti muc'tic c'usitic ch'ayal o'ntonal laj c'otuc ta pasel yu'un laj avilique.

²² C'alal c'otic ta Egipto ti amolmuc'totic ti laj ech'icuc ta vo'nee, c'ajomal no'ox lajuneb xchanvinic (70) ta vo'. Avi tana li' une, ti Ajvalil Dios avu'unique laj yepajesoxuc ti co'ol a'elanic lac'otic jech c'u cha'al ti c'analetic ti oy ta vinajele.