Deuteronomio 1 - Bible in Tzotzil de Chamula

Sliquebal ti c'u s'elan laj yich' alele

¹ Ti li'e, ja' sc'op ti Moisés ti laj sc'oponan ti israeletic c'alal oyic ta sbajtical banomile, ta yeloval sloq'ueb c'ac'al yu'un ti uc'um Jordane. Ti lec xcaltique, ti c'alal oyic ta Arabá ta yeloval Suf ti oy ta o'lol yu'un steclumtac ti Parane, ti Tofele, ti Labane, ti Hazerote, xchi'uc ti Dizahabe.

² Ti ta xlic batel ta vits yu'un Horeb ti ta xc'ot c'alal to Cades-barneae, ja' yich'oj buluchib c'ac'al sjalil ti sbelel mi ja' ta xich' tamel ech'el sbelel ti vitstic Seire.

³ Ti sba c'ac'al yu'un ti xbuluchibal (11) u ti ja' xa xcha'vinic jabil sloq'uelic talel ta Egiptoe, ti Moisese laj xchapbe ya'i ti israeletic ti ac'o c'otuc ta pasel yu'unic ti c'u s'elan yaloj scotol smantal ti Diose.

⁴ Taj une, ja' o c'ot ta pasel c'alal ti Moisés laj xa ox stsal ti Sehone, ti ja' ajvalil yu'un ti amorreoetic ti nacalic ta Hesbone, xchi'uc ti Oge, ti ja' ajvalil yu'un ti Basán ti nacal ta Astarot ti oy ta yosil Edreie.

⁵ Xi xcholet lic tojobtasvanuc ta bijubtasvanej ti Moisés ti c'alal oyic to ox ta yeloval sloq'ueb c'ac'al yu'un ti uc'um Jordán ti tey ta yosilal Moabe:

⁶ “Ti Ajvalil Dios cu'untique xi s'elan laj yalbotic ti c'alal oyotic ta Horebe: ‘Lajalijic xa ono'ox ta j'ech'el ti li' ta vitstique.

⁷ Tsobic ti c'usitic x'ayan avu'unique. Batanic xtoc ta muc'tic vitstic yu'un ti amorreoetique, xchi'uc ti c'u yepal ti joyol ta spat xocon ti xi s'elan oye: ti Arabae, ti muc' ta vitstique, ti stenleje, ti Négueve, ti sti'il Nabe, ti steclumal ti cananeoetique, ti Líbanoe, c'alal to ti muc' ta uc'um Eufratese.

⁸ Yu'un laj xa cac'boxuc ta avoc ta ac'obic ti muc' ta lume. Batanic, u'ninic ti banomil une. Ti vu'un Diosune laj ono'ox jva'an jba ta yalel ti ta xcac'beic ti amolmuc'totic ti laj ech'icuc ta vo'nee xchi'uc ti snitilultaque, ja' sc'oplal ti Abrahame, ti Isaaque, xchi'uc ti Jacobe.

Ta xich' va'anel ti jchapanvanejetique

⁹ “Xichi ono'ox laj calboxuc ava'iic ti jech c'ac'al taje: ‘Mu xu' cu'un abainelic acotolic ta jtuc no'ox.

¹⁰ Toj ep yac'ojboxuc avalab anich'nabic ti Ajvalil Dios avu'unique. Yu'un avi tana li' une, lac'otic ta jun muc' ta lum ti co'ol s'elan avepalic jech c'u cha'al ti c'analetic ti oy ta vinajele.

¹¹ Ti Ajvalil Dios yu'un ti amolmuc'totic ti laj ech'icuc ta vo'nee, ta smilal no'ox, ac'o epajanic ech'el yu'un, ti ja' ta xcom ta be ti vi avepalic tana li'e, xchi'uc xtoc, ac'o sva'an sba ta atojolic jech c'u cha'al yaloj ono'ox ta spase.

¹² Manchuc mi jech un, ¿mi xavac'toicuc la ti xu' cu'un ta sbainel ti avocolic ta jch'ul tuc no'ox ti c'alal sc'an chapanel ti ac'opique, xchi'uc ta spajeseloxuc ti bu mu lecuc ta xavil abaique?

¹³ Avi tana li' une, t'ujic viniquetic ta jujuvoc' nitiluletic ti jamal lec ti sba satique, ti oy sbijilique, ti lec sna'ic snopel ti razone, yo' jech ta xcac'be yabtelic ta sventaineloxuc.’

¹⁴ “Xachi laj ataq'uique: ‘Toj lec ta xca'icutic ti jech laj anope.’

¹⁵ “Va'i un, laj quic'an talel ti viniquetic ta jujuvoc' anitilulique, ti jamal sba satique, ti lec sna'ic snopel razone. Laj cac'be yich' yabtelic ta sbaineloxuc. Yu'un oy jlom laj cac'be sbain jmil (1,000) ta vo' viniquetic. Yu'un oy jlom laj cac'be sbain vo'vinic (100) ta vo' viniquetic. Yu'un oy jlom laj cac'be sbain lajuneb yoxvinic (50) ta vo' viniquetic. Yu'un oy jlom laj cac'be sbain lajunvo' (10) viniquetic. Yu'un oy jlom laj jva'an ta ajvaliletic yo' ta sventainic ti jujuvoc' nitiluletique.

¹⁶ Ta yorail no'ox taje, xi xcholet laj jbijubtasic ti jchapanvanejetic avu'unique: ‘A'yibeic lec sc'op scotolic. Lec xachapanic xtoc. Ti c'u s'elan ta xapasic ta stojol ti avinquilelique, ja' no'ox jech xapasic ta stojol ti jyanlumetique.

¹⁷ Yu'un xi s'elan sc'an xapasic ti c'alal ta xachapanvanique: Mu t'ujbiluc no'ox xapas ti c'alal ta xaval ti oy smule. Ich'beic ta muc' sc'op ti buch'u mu xtojob spoj sbae jech c'u cha'al ti buch'utic c'oc' xa'i sbaique. Yu'un mi ja'uc xaxi' yu'un. Ti chapanele c'otem ta sventa ti Diose. Mi oy bu laj ataic ti mu xchapaj avu'unique, et'esbun talel ta jtojol yo' ta xca'ibe ti sc'ope.’

¹⁸ “Ti jech yorail taje, jamal laj calbeic ya'iic scotol ti c'u s'elan xu' ta spasique.

Yabtelic ti lajcha'vo' ayic smucul chajic ta q'uelel ti banomile

¹⁹ “C'alal lijloc'otic ech'el ta Horebe, tuc' lijbat ta vitstic yu'un ti amorreoetique, ja' jch'unojtic smantal ti Ajvalil Dios cu'untique. Laj jxanitic ech'el scotol ti muc'tiquil sbajtical banomil ti xi'bal sba laj avilique, ja' to ti c'uxi lijvul ta Cades-barneae.

²⁰ Ti bu taje, xichi laj calboxuc ava'iique: ‘Lijvulotic xa ta vitstic yu'un ti amorreoetique, ti albil sc'oplal ta xiyac'botic ti Ajvalil Dios cu'untique.

²¹ Ti Ajvalile, ti ja' Dios avu'unique, laj xa yac'boxuc ta avoc ta ac'obic ti banomil li'e. Ochanic batel ta yu'ninel un cha'e jech c'u cha'al yaloj ono'ox ti Ajvalil ti Dios yu'unic ti amolmuc'totic ti laj ech'icuc ta vo'nee. Mi ja'uc xaxi'ic. Mi ja'uc xatsiq'ues avo'ntonic.’

²² Ja'uc ti vo'oxuc une xi tal avalbeicune: ‘Ja' lec ti jelavicuc ech'el jayibuc cu'uncutic ti ac'o smucul xchaj ta q'uelel ti muc' ta lume, ti ja' xu' ta xiyalbotic ca'itic bu beal xu' ta jtamtic batele, xchi'uc ti bu jteclumal xu' ta xij'och batel c'alal mi sutic talel une.’

²³ “Ti va'i s'elan c'ot ta nopel avu'unique, lec laj ca'i ec. Va'i un, lic jt'uj lajcha'vo' viniquetic ta atojolic ti laj jloq'ues jujun ti ta jujuvoc' nitilulile,

²⁴ ti laj stam batel sbeic ta stuq'uil ti muc' ta vitstique. C'otic c'alal to ta stenlejal yu'un Escol. Laj xaniic scotol ti banomil taje.

²⁵ C'alal jech laj spasic une, ti c'usitic xch'i ta banomil taj une, laj xtuch'ic talel ti xi vul yalique: ‘Ti banomil ti bu ta xijyac'botic ti Ajvalil Dios cu'untique, spajebal xa no'ox yutsil ta j'ech'el.’

²⁶ Ja' no'ox ti vo'oxuc une, mi jset'uc och ta avo'ntonic ta xa'ochic batel. Yu'un smantal ti Ajvalil Dios cu'untic ti laj yalboxuque, c'ajomal no'ox laj abajic.

²⁷ Yu'un ti ta anaique, xavulajetic xa liquel ti xachiique: ‘Tenbil jipbilotic yu'un ti Diose. Yu'un ti jech laj sloq'uesotic talel ta Egiptoe, c'ajomal no'ox tal yac'otic ta yoc ta sc'ob ti amorreoetique yo' jech ts'ij xi ti jc'oplaltic yu'une.

²⁸ Avi tana une, ¿bu ta xijbat un cha'e? Ti le' lae, laj xa yalic ca'itic ti jvinquileltic ti oy la yajval banomil ti tsotsic ta jmeque, ti jun la snatiquil ta j'ech'ele, ti ja' la mu sta ti vo'otique. Laj la yilic ti muc'tic no'ox la ta j'ech'el ti lumetic ti macal lec ta jun toyol moque. Laj yilic xtoc snitilultac ti inate' vinic Anaque. Scotol taje, ta j'ech'el ta stsic' co'ntontic yu'un.’

²⁹ “Va'i un, xichi laj jtac'boxuque: ‘Mu xatsiq'ues avo'ntonic yu'un. Mi ja'uc xaxi'ic yu'un.

³⁰ Ti Ajvalil Dios avu'unique jba'be ech'el ta xbat avu'unic. Ja' ta xletovaj avu'unic jech c'u cha'al laj avilic ti laj spas ta Egiptoe.

³¹ Ma'uc no'ox un, ja' jech ta spas xtoc ti c'u s'elan laj spas avilic ta sbajtical banomile. Yu'un ti c'u sjalil laxanavic talele, ja' to ti c'uxi lavulic yu'un li'e, ti Ajvalil Dios avu'unique snitojoxuc talel ta sc'ob, co'ol s'elan jech c'u cha'al junuc totil ti ta snitbe sc'ob ti xnich'nabe.

³² Manchuc mi ja' jech s'elan un, mu'yuc teq'uel xc'ot ta avo'ntonic ti ta scoltaoxuc ti Ajvalil Dios avu'unique,

³³ ti c'alal ja' jba'be ech'el avu'unic ta st'ujel ti bu xu' ta xc'ot alaman abaique. Yu'un ti ta ac'ubaltique, jun to c'oc' s'elan ta svinajes batel bu ti be ti xu' ta xatamic ech'ele. Ja'uc ti ta c'ac'altique, jun to voletel toc s'elan ta svinajes batel ti bu xu' ta xatamic batele.’

Ta x'ilin ti Dios ta stojol ti israeletique

³⁴ “C'alal laj ya'i ti Dios ti xavulajetic liquel ta scontrainele, ep soc sjol, ti ta j'ech'el xi laj sva'an sba ta yalele:

³⁵ ‘Ti chopol lum li'e, mi junuc xu' ta x'ochic batel ta lequil banomil ti laj calbe ya'i ti smolmuc'totic ti laj ech'icuc ta vo'ne ti ta xcac'beique.

³⁶ Ja'uc ti Caleb xnich'on ti Jefone, mu jechuc ta jpas ta stojol une. Yu'un ta xbat sq'uel ti banomile. Ti stuque xchi'uc ti snitilultaque, ta xcac'beic ti banomil ti bu laj stec'an yoque ta sventa ti sjunul yo'nton laj snaban sba ta stojol ti Diose.’

³⁷ “Ta scoj amulic, ilin ta jtojol ti Dios avu'unique, ti xi laj yalbune: ‘Mi ja'uc ta xa'och batel ta banomil ti vo'ot eque.

³⁸ Ja' ta x'och batel ta aq'uexol ti Josuee, xnich'on ti Nune. Tsatsubtasbo yo'nton un, yu'un ja' ti buch'u ta xac'be ta yoc ta sc'ob lum ti israeletique.

³⁹ Ac'o mi laj ach'unic un cha'e ti ta xchuquic ech'el avantsilelic anich'nabic ti avajcontraique, ti ololetic ti mu'yuc to vulem ti xch'ulelic ta snopel avi tanae, ja'ic ti ta x'ochic batel ta muc' ta lume. Yu'un ta xcac'beic ti ta xc'ot ta xrextoic cu'une.

⁴⁰ Yan ma' ti vo'oxuc une, ¡sutanic ech'el ta sbajtical banomil yan velta! ¡Ta liclejal, batanic c'alal to ta Tsajal Nab yan velta!’

Ta scoj stoyobbailic, tsalbil ta xc'otic ti israeletique

⁴¹ “Va'i un, ti vo'oxuc une xachi ta xatac'beicune: ‘Laj xa jta jmulcutic ta stojol ti Dios un cha'e. Avi tana li' une, ta xibatcutic, ta xcac'becutic yipal ti c'anubajuc xa liquel ti letovajel jech c'u cha'al laj yal mantal ti Ajvalil Dios cu'untique.’ Laj atsac ti avabtejebique. Laj anopic ti mu'yuc no'ox la c'usi ta xc'ot ta pasel ti c'alal lamuyic ech'el ta vitstique.

⁴² Ja'uc ti Dios une xi laj yalbun ti ac'o xajbijubtasoxuc une: ‘Mu xbat tsacvanicuc ta letovajel. Mi ja'uc ti naca no'ox ta xavac' abaic ta yoc ta sc'ob ti avajcontraic ti tsalbil ta xac'ot yu'unique, yu'un mu'yuc xa oyun ta atojolic.’

⁴³ “Laj cac'boxuc ana'ic ti tojobtasel bijubtasele. Ja'uc ti vo'oxuc une c'ajomal no'ox laj acontrainic smantal ti Diose. Atoyoj xa abaic xaviletic xa muyel ta anil ti ta vitstique.

⁴⁴ Va'i un, ti amorreoetic ti nacalic ta vitstic taj une, loq'uic talel, tal snupoxuc ta be ti co'ol to s'elan xchanul acov snutsojoxuc batele, ti tsalbil lac'otic yu'un ta Seire, c'alal to ta Horma.

⁴⁵ Ti c'alal lasutic talel une, laoq'uic ta stojol ti Diose. Ja'uc ti stuc une mu'yuc xa'i ti xa'oc'lajetic xa ta stojole.

⁴⁶ Jech o xal ti vo'oxuc une jal lajoc'tsajic ta naclej ta yosilal ti Cadese.