Daniel 6 - Bible in Tzotzil de Chamula

Ti Daniele laj yich' tiq'uel ochel ta nail ch'en ti bu tiq'uil ti leonétique

¹ Ti ajvalil Darioe c'ot ta nopel yu'un ti ta sva'an vacvinic (120) ta vo' its'inal ajvaliletic ta jujun lumetic ti oyic ta nomtique yo' jech ta sbainic ta stuc'ulanel ta scotol ti bu c'alal smacoj ti ajvalile.

² Va'i un, laj sva'an oxib viniquetic ti ja' cajal yabtelic ta xc'ote yo' jech ta stuc'ulanic lec c'u s'elan ta xventainvanic ti jujun its'inal ajvaliletique. Yu'un ti jech laj spase, ja' ta sventa ti mu'yuc c'usi chopol ta xc'ot ta stojol ti ajvalile. Ti jun ta scotol ti buch'u cajal yabtel yich'oj ta sbainel ta sq'uelele, ja' no'ox stuc ti Daniele.

³ Ta ora no'ox vinaj ti ja' lec xtojob ti Daniele, ti ja' mu sta ti yan banquilal yu'unic ti yan xchi'iltac ti co'ol cajal yabtel yich'ojique, xchi'uc ta stojol ti banquilaletic ti c'u s'elan xu' yu'unic ta sbainel ti jujun slumalique. Jech o xal ti ajvalile laj snop ti ja' no'ox stuc ta xc'ot ta banquilal ti ta spas mantal ti ta muc' ta lume.

⁴ C'u stu un, ti buch'u yich'oj cajal yabtelic ta q'uelvaneje, xchi'uc ti its'inal ajvaliletique, lic sa'ilanbeic sc'oplal c'u s'elan ta sa'beic smul ti xu' ta xalic ti mu lecuc ta xbat yu'un ti c'u s'elan ta spas mantal ti bu c'alal sventainoj ti ajvalile. Ta sventa ti ja' jun vinic ti tuc' sjol yo'nton ti Daniele, jech o xal mu'yuc jtosuc ta staic ti oy c'usi chopol ta spase. Ja' yu'un un, mu'yuc xu' yu'unic ta stic'bel smul ta sventa ti c'u s'elan yabtel yich'oje.

⁵ Manchuc mi jech un, yac'ojbeic ono'ox yipal ta snopilanbel ti sc'oplale, ti xi lic yalique: “Avie, mu'yuc c'usi laj jtabetic jtosuc yo' ta jsa'betic smul ti Daniele. Ja' van xu' ta jtabetic smul ta sventa ti c'u s'elan xch'unoje.”

⁶ Ja' yu'un un, jech laj staic juteb be taje. Yu'un ti buch'utic yich'oj yabtelic ta q'uelvaneje xchi'uc ti its'inal ajvaliletique, tey laj scomonop sc'opic ti ta xbat xchi'inic ta lo'il ti ajvalil Darioe, ti xi lic yalbeic ti c'alal volol scotolic ta sts'ele: “Cajaluc c'otuc sc'oplal ta j'ech'el ti Jcuch abtele.

⁷ Yu'un scotol ti its'inal ajvaliletic ti sbainojic ta spasel mantal ta sjunul ti muc' ta lume, c'ot ta pasel ti laj stsob sbaique. Laj svules ta yo'ntonic ti ac'o yich' alel ti loc'uc mantal yu'un ti ajvalile, ti mu'yucuc buch'u xnijilet xchimilet ta sc'oponel mi junuc ti yan diose, mi ja'uc ta stojol jun vinic ti ta xloc' ti lajuneb xcha'vinic (30) c'ac'ale, ti ja'uc no'ox atuc ti cajaluc ac'oplal ta xc'ot yu'unic ti Jcuch abtelote. Ti buch'u mu xac' ta venta ti va'i s'elan taje, ac'o ba yich' tiq'uel ta nail ch'en ti bu tiq'uil ti leonetique.

⁸ Ja' yu'un un, Jcuch abtel, ac'o ave ati' ti jech c'ot ta nopele. Ac'o avuni pirma un. Jech mu'yuc buch'u xu' ta soques ti c'usi c'ot ta nopele, jech c'u cha'al liquem ti oy c'usi jbel tsots albil yu'unic ti medoetique, xchi'uc ti persaetique, ti mu stac' tuch'bel yip ti c'usi nopbile.”

⁹ Ti jech laj sc'anic ti va'i s'elan nopbil yu'unique, ja' yu'un un, ti ajvalil Darioe laj yac' spirma yu'unic.

¹⁰ C'alal laj ya'i ti Daniel ti laj xa yich' pasel pirma ti c'u s'elan loc' ta nopel yu'unic ti mantale, jech ti Daniele bat ta sna. C'ot sjam ti sventanatac ti bu ta xvaye, ti xi sq'ueloj batel ta stuq'uil Jerusalén ta yelov ti sloq'ueb c'ac'ale. Lic squejan sba ta slequil c'oponel ta sti'inel ti Diose. Ja' oxib (3) velta ta xc'opoj ta xti'in ta c'ac'al jech c'u cha'al nopem ono'ox xa'i ta xc'opoje.

¹¹ Va'i un, c'alal ochic batel ta sna Daniel ti viniquetic taje, ja' o ta xc'opoj ta xti'in ta slequil-c'opta ti Dios yu'un c'alal c'otique.

¹² C'alal jech laj yilique, ta anil no'ox batic ta stojol ti ajvalile yo' jech ta slo'iltabeic ya'i ti oy chapajem jun mantale, ti xi c'ot yalbeique: “Yu'un ti vo'ote, Jcuch abtel, avac'oj ave ati' ti vinajem lec ti loq'uem jun mantal avu'une. Ti buch'u ta xlic sjol ti xvocolet liquel ta stael ta c'oponel ti c'usiuc no'ox diosale, mi ta stojol jun vinic ti ma'uc ti Jcuch abtele, ti buch'u jech ta spas ti c'alal mu to ta x'ech' ti lajuneb xcha'vinic (30) c'ac'ale, loc' mantal ti ac'o yich' tiq'uel ochel ta nail ch'en ti bu tiq'uil ti leonetique. ¿Mi mu jechuc chapanbil taje? Xi laj stac' ti ajvalile: “Jech unbi, tsots sc'oplal ac'o c'otuc ta pasel jech c'u cha'al ti oy c'usi jbel ti tsots albil yu'un ti medoetique xchi'uc ti persaetique, mi ja'uc stac' ch'ayel ta be.”

¹³ Va'i un, ti stuquique xi xvulajetic liquele: “Yu'un ti Daniele, ti ja' jun israel ti bec'bil loc' tal ta slumale, mi ja'uc xac'ot ta venta ti jech Jcuch abtelote. Mi ja'uc xac' ta venta ti loq'uem xa jun mantal avu'une. Yu'un quilojcutic ti oxib (3) velta ta xc'opoj ta xti'in ta c'ac'ale.”

¹⁴ C'alal jech laj ya'i ti ajvalile, och ta at-o'nton. Laj sa'olan mi oy c'usi xut ta spoj ti Daniele. Yich'oj o mal c'ac'al ti yo'ntonuc xa xa'i c'usi yut ti xu' ta spoje.

¹⁵ C'u stu un, ti viniquetique xi c'ot yalic yan velta xtoc ta stojol ti ajvalile: “Xana' lec, Jcuch abtel, ti c'u s'elan liquem yu'unic ti oy jbel ti c'usi tsots albil yu'unic ti medoetique xchi'uc ti persaetique, ti mi oy c'usi chapanbil ti mu stac' jech ta xich' pasele, ti c'alal pasbil xa pirma yu'un ti ajvalil ti c'usi c'ot ta nopele, mu ono'ox ta xch'ay ta be.”

¹⁶ Jech o xal un, ti ajvalile laj yal mantal ti ac'o yich' iq'uel talel ti Daniele yo' ta xich' tiq'uel ochel ta nail ch'en ti bu oy ti leonetique. C'alal mu to x'ac'at batel ta c'abale, ti ajvalile xi laj yalbe ti Daniele: “Ja' ac'o xaspojot ti Dios avu'une ti j'ech'el avich'oj ta muc' ta sjunul avo'ntone.”

¹⁷ C'alal och xa batel ta yut nail ch'en yu'unic ti Daniele, laj sa'ic talel jbej ton yo' ta smacbeic sti' ti ch'ene. Jech ti ajvalile tey laj yac'be seyoal ta seyo stuc xchi'uc seyotac ti buch'utic cajal yabtel yich'ojic yu'une, yo' jech ta xvinaj ti xc'ot ta pasel ti c'usi nopbil yu'unic ta sventa ti c'usi laj spas ti Daniele. Yu'un c'ot ta pasel jech c'u cha'al ta xal ti oy c'usi jbel ti tsots albil yu'unique.

¹⁸ Ts'acal to un, ti ajvalile bat ta sna. Mu'yuc xa xve'. Bat xpuch'an sba. Ma'uc xa ta yo'nton ta ya'yiel ti oy c'usi xlomet no'ox ta xich' tijel jech c'u cha'al liquem yu'une. Ma'uc no'ox taje, yu'un sjunul ac'ubal mu xtal ti vayel ta xa'ie.

¹⁹ C'alal po'ot xa sacub talele, bat ta anil ta nail ch'en ti bu oy ti leonetique.

²⁰ Jech ti ajvalile xme'inaj xa ye ti xi c'ot sbiiltas ti Daniel ti c'alal tey xa nopol va'ale: “Daniel, yajtunelot ti cuxul Diose, ti j'ech'el avich'oj ta muq'ue, ¿mi cuch yu'un ti mu'yuc xayac' ta ti'el yu'un ti leonetique?”

²¹ Jech ti Daniele xi tac'av talele: “Ich'biluc ta muc' c'otuc ta j'ech'el ti Jcuch abtele.

²² Ti Dios cu'une laj stacbun talel yaj'ánjel ti laj yalubtasbe ye ti leonetic yo' jech mu'yuc xisyayijesun jutebuque. Yu'un ti Diose yiloj ti mu jechuc ti jmule, ti mu'yuc c'usi chopol caloj ta stojol ti Jcuch abtele.”

²³ Ja' yu'un un, ti ajvalile xmuyubaj xa ta jmec. Laj yal mantal ti ac'o yich' loq'uesel talel ta nail ch'en ti Daniele. C'alal laj xa sloq'uesic talele, mi jutebuc yayijesbil laj staic, ja' ti ta j'ech'el spatoj yo'nton ta stojol ti Dios yu'une.

²⁴ Ts'acal to ec un, ti ajvalile laj yal mantal ti ac'o yich'ic iq'uel talel ti viniquetic ti buch'u laj sa'beic smul ti Daniele. Va'i un, jmoj laj yich'ic tiq'uel ochel xchi'uc yajnilic, xchi'uc xnich'nabic ta nail ch'en ti bu tiq'uil ti leonetique. Ja'uc ti stuquic une, mu to ta xc'otic lec ta yut ch'en ti c'alal xjipet no'ox talel ti leonetique. Ta jliquel no'ox lilinatic ta j'ech'el.

²⁵ Va'i un, ti ajvalil Darioe xi laj yal ti laj sts'iba ech'el vunetic ta stojol ti jnaclejetic ti oy ta sjunul ti muc' ta lume, ti jaylajun-tos ti sc'opic ti buyuc no'ox nacalic ta banomile: “Ta jc'an ti lamajemuc c'op ta atojolique, ti mu'yucuc c'usi xana'ic ta j'ech'ele.

²⁶ Ja' yu'un un, loc' mantal cu'un ti ta jpas-mantal ta stojol scotolic ti bu c'alal jventainoje, ti ich'biluc c'otuc ta muq'ue, ti ac'o snijan xchiman sbaic ta stojol ti Dios yu'un ti Daniele. “Yu'un ti stuque, ja' cuxul Dios ta j'ech'el, sbatel osil tey oy o. J'ech'el mu stac' tubel ti c'u s'elan ta spas mantale, yu'un mu'yuc spajeb ti smuc'ul stsatsale.

²⁷ “Yu'un ti stuque, ja' jcoltavanej, ja' jpojvanej, ti ch'ayal no'ox ta xc'ot o'ntonal yu'un ti c'usi ta xac' ta ilel ti ta vinajele, ti li' ta banomile. Yu'un ja' laj stic' sba ta spojel ti Daniele yo' jech mu'yuc xlaj ta ti'el yu'un ti leonetique.”

²⁸ Ja' yu'un un, ti Daniele jech com o ti tsots yabtel yich'oj ti c'u sjalil tiq'uil ta ajvalilal ti Darioe, xchi'uc ti c'u sjalil tiq'uil ta ajvalilal ti Ciro ti ja' ajvalil yu'un ti jteclum Persiae.