Daniel 5 - Bible in Tzotzil de Chamula

Ti c'usi laj yich' ts'ibael ta pac'bale

¹ Ti Belsasar ajvalil yu'un ti jteclum Babiloniae, lic yac' muc' ta ve'el uch'bajel. Laj stac talel ta iq'uel ti buch'utic cajal yabtel yich'oj ta sjunul ti muc' ta jteclume. Mu no'ox albajuc laj stsob sbaic talel ta j'ech'el. C'alal xyaquet xa ti ve'el yu'unique, jech ti ajvalil xchi'uc ti buch'utic ic'bil yu'une, laj sjambeic snuq'uilal ta yuch'el ta j'ech'el ti uch'bajel vinoe.

² C'alal xq'uixet xa sjol ta xa'i yu'un vino ti ajvalil Belsasare, laj yal mantal ti ac'o bat yich' ich'el talel ti bisetique, ti lech-lech taq'uinetic ti meltsanbil ta oroe, ti meltsanbil ta platae, ti ja' staoj talel ta ch'ulna yu'un Jerusalén ti Nabucodonosor ti ja' stote, yo' jech ta xuch'ic o uch'ubajel xchi'uc ti banquilal yajtuneltaque, ti c'u yepal volol ta stojole, ti yajniltaque, ti sts'acal ajniltaque.

³ Va'i un, tey laj yich' ich'el talel ti bisetic ti naca meltsanbil ta oro ti ich'bil loq'uel talel ti jteclum Jerusalén ti tey to ox ta xch'ulna ti Diose. Tey lic yuch' o vino xchi'uc ti ajvalile, ti banquilal yajtuneltaque, ti yajniltaque, xchi'uc ti sts'acal ajniltaque.

⁴ Scotolic sts'abetic no'ox ta yuch'el vino, ta spasbeic stoyel xi'el ti loc'tabil diosetic yu'unique, ti ja' meltsanbil ta oroe, ti ta platae, ti ta c'anal taq'uine, ti ta tsatsal taq'uine, ti ta te'e, ti ta tone.

⁵ C'alal jech xyaquetic taje, ta jech to yepal, vinaj sc'ob jun vinic yilel, ti lic ts'ibajuc ta sni' sc'ob ta pac'bal ti oy ta yut na ti sac sbon ti bu yac'oj batel xojobal ti c'usitic ta sq'uelic o osile. Va'i un, laj yil ti ajvalil ti ta sts'ibaj ti c'obale.

⁶ Ja' yu'un un, toj sac pac'tajel c'ot xchi'uc ti jech laj yile. Ti jech oy ti xi'el ta yo'ntone, sjunul sbec'tal xnicnun xa liquel ta j'ech'el.

⁷ Ta anil no'ox, tsots lic c'opojuc ti c'alal laj stac ta iq'uel ti jt'unvanejetique, ti bijil viniquetique, ti buch'utic sna'ic sq'uelel senyailtac ti oyic ta jteclum Babiloniae, ti xi laj yale: “Ti buch'u sna' yojtiquinel ti c'usi le' ts'ibabile, ti sna' yalbel smelol ti c'usi ta xac' ta na'ele, ta x'ac'bat slap yax'elan xela c'u'il. Ta x'ac'bat xtoc yuin jlicuc carina ti meltsanbil ta oroe. Jech xtoc ta xc'ot ta yoxibal ajvalil ti ja' ta x'och ta sbainel ti bu ta jpas-mantale.”

⁸ Scotol ti bijil viniquetic ti oyic ta yajtunel ti ajvalile, ochic batel ta yut na. C'u stu un, mi junuc ti oy buch'u cuch yu'unic ta yojtiquinel ta yalbel ti ajvalil c'usi smelol ta xac' ta na'el ti c'usi ts'ibabile.

⁹ Ja' yu'un un, ti ajvalil Belsasare, yich' to xchi'il ti xi'el ta xa'ie. Jeche' xa sac pac'an ti sat xchi'uc ta j'ech'ele. Jech ti buch'utic cajal yabtelic yu'un ti bu c'alal ta spas mantale, mu xa stac' a'yeluc ta xa'iic c'usi ta spasic ec.

¹⁰ Va'i un, sme' ti ajvalile laj ya'i talel ti tsots lic c'opojuc ti yole, xchi'uc scotol ti buch'utic cajal yabtel yich'ojic ti ic'bilic talel yu'une. Ja' yu'un un, ti me'ile xi c'ot yal ti c'alal och batel ta yut na ti bu ta xve'ic x'uch'ubajique: “Cajaluc o sc'oplal comuc ta j'ech'el ti Jcuch abtele. Ma'uc me x'och o ta vul o'nton. Ma'uc me ti sac pac'an xa xchi'uc ti c'usi laj yile.

¹¹ Yu'un ti bu c'alal aventainoj ta spasel mantale, oy jun vinic ti ventainbil yu'un xcuxlejal ti Ch'ul Diose. Yu'un ti c'alal yorail tiq'uil ta ajvalilal ti atote, Jcuch abtel, ti vinic taje laj yac' ta ilel ti jamal lec ti snopobil yu'une, ti jelavem ti sbijil ta j'ech'ele, ti ja' jech c'u cha'al sbijil ti diosetique. Jech ti ajvalil Nabucodonosor ti ja' atote, Jcuch abtel, ti vinic taje, laj yac'be tsots yabtel. Ja' c'ot ta banquilal jpas-mantal yu'un scotol ti buch'utic xilic ti toyol cajale, ti sna' xt'unvanique, ti bijil viniquetique, xchi'uc ti buch'utic xojtiquinic senyailtac ti oyic ta muc' ta lume.

¹² Yu'un ti ta stojolal ti Daniele, ti buch'u Belsasar ac'bat sbi yu'un ti ajvalile, oy ta stojol ti spajeb xa no'ox cuxule. Jelavem ti sbijile. Chajal ta sjol ta sbaquil scotol. Sna' lec yalbel smelol ti c'usi ta xac' ta na'el ti vaichiletique. Ta xloc' lec ta alel yu'un smelol ti c'usitic oy ta mucule. Ta stabe lec stuq'uil ti c'usitic toj vocol ta a'yiele. Jcuch abtel, ic'o talel ti Daniele. Ja' xu' ta xac'bot ana' c'usi smelol ta xac' ta na'el ti c'usi ts'ibabil ta pac'bale.”

¹³ Ti Daniele, ic'bil bat ta stojol ti ajvalile. Va'i un, xi lic jac'batuc yu'un ti ajvalile: “Daniel, ¿mi vo'ot jun ta scotol ti jchuquel israeletic ti laj yich'ic beq'uel loq'uel ta Judea banomil yu'un ti ajvalil Nabucodonosor ti ja' jtote?

¹⁴ Laj quich' albel ti ventainbilot yu'un xcuxlejal ti Diose, ti jamal lec ti snopobil avu'une, ti oy no'ox c'usi lec xvul ta ajole, ti bij xava'i abae.

¹⁵ Ti viniquetic ti jelavem sbijilic ti li' oyic ta muc' ta lume, ayic xa li'e ti ac'o yavtaic ti c'usi ta xal ti c'opetique, ti ac'o yalic ti c'usi smelol ta xac' ta na'ele. Mi jutebuc al yu'unic.

¹⁶ Ac'o mi jech un, ca'ioj ac'oplal ti xu' avu'un ta xajambe smelol ti c'usi mu na'baje, xchi'uc ti c'usitic juteb ta o'ntonal ti tsots sc'oplal ta xich' na'ele. Ti mi xu' avu'un yavtael ti c'opetic ti vi s'elan le'e, ti mi ta xavalbun ti c'usi smelol ta xac' ta na'ele, ta xcal mantal ti ac'o yaq'uic alap ti yax'elan xela c'u'ile, ti ac'o yaq'uic avuin carina ti meltsanbil ta oroe, ti ta xac'ot ta yoxibal ajvalil yo' ta xaventain ti bu c'alal ventainbil cu'une.”

¹⁷ Ja' yu'un un, ti Daniele xi laj staq'ue: “Ti matanal ti ta xavale, Jcuch abtel, tey no'ox oyuc. Va'anbo yan yajval ti buch'u xu' ta xavac'be ti ich'bil ta muc' ta xc'ot ta apasob mantale. Yu'un ti vu'une, manchuc mi mu'yuc c'usi ta xquich', yu'un ja' cabtel ta xcalbot ava'i, Jcuch abtel, c'usi ta xal ti c'opetic ti ts'ibabil ta pac'bale.

¹⁸ “Yu'un ti Dios ti oy ta toyole, laj yac' ochuc ta ajvalil, laj yac'be ti jelavem xu' yu'une, ti yutsilal slequilale, ti cajal ich'bil c'ot ta muc' ti Nabucodonosor ti ja' atote, Jcuch abtel.

¹⁹ Ti jech ac'bat ti jelavem xu' yu'une, scotol ti jnaclejetic ta jujun lumetique, ta jujun muc'tiquil lumetique, xchi'uc ti ep ta tos ti sc'opique, laj sbic'tajes sbaic ta stojol, xi'tabil c'ot yu'unic. Yu'un ti stuque xu' ta smilan ti buch'uuc no'ox ta sc'ane. Mi mo'oje, tey no'ox sq'ueloj ac'o cuxiuc yu'un ti mi jech ta sc'ane. Yu'un oy jlom ti cajal ich'bil ta muc' ta xc'ot yu'une. Yu'un oy jlom ti c'ajomal no'ox ta spec'tsanbe ti sc'oplale.

²⁰ Ja' no'ox un, ti c'alal lic stoy sba ta j'ech'ele, ti jot o xa ta xbat ti snopobil yu'une, ti stuc xa no'ox jech ti lec oy ta xa'i sbae, jech o xal pojbat ti jelavem xu' yu'une, ti yutsilal slequilal ti jech c'otem ta ajvalile.

²¹ Laj yich' ch'aquel loq'uel ta stojol ti jnaclejetique. Lic joybijuc jech c'u cha'al stalel ti chon bolometique. Ja' lic capetuc xchi'uc ti bu xlamet ti te'tical burroetique. Lic slo' jobel jech c'u cha'al ti vacaxetique. Xt'inet spat ta x'ech' yu'un ti job ac'ubale, ja' to ti c'uxi lic sna' ti oy smuc'ul stsatsal ta spas mantal ta stojol scotol ajvaliletic ti Dios ti oy ta toyole, ti ja' ta stojobtas ti ajvalil ti mi jech ta sc'an ta spas ta stojole.

²² “Avi tana une, Belsasar, ti vo'ot Jcuch abtelote, ti ja' xnich'onot ti ajvalil taje, scotol ti va'i s'elan c'ot ta stojol taje, laj ana' xa lec ti c'usi c'ot ta pasele. C'u stu un, mi ja'uc ta xabic'tajes aba jutebuc ti c'u a'elan oyot ti vo'ot eque.

²³ Yu'un le' une, Jcuch abtel, c'ajomal no'ox ta xavac' ta labanel ti Dios ti oy ta vinajele. Yu'un laj aval mantal ti ac'o atunes ta amexa ti bisetique, ti lech-lech taq'uinetic ti jtunel yu'un ti ch'ulnae. Jmoj laj avuch'ic o vino xchi'uc ti c'u yepal ic'bil talel avu'une. Jmoj tey laj apasic stoyel xi'el ti diosetic ti meltsanbil ta oroe, ti ta platae, ti ta c'anal taq'uine, ti ta tsatsal taq'uine, ti ta te'e, ti ta tone, ti ja' diosetic ti mu x'ilvane, ti mu xa'i ti c'usi ta xich' alele, ti mu'yuc c'usi xu' ta spasic jset'uque. Yan le' une, ma'uc ta xapasbeic stoyel xi'el ti Dios ti ja' oy ta yoc ta sc'ob ti acuxlejale, Jcuch abtel, ti ja' sbainoj scotol ti c'usi xu' ta xapase. Laj xa yich' bisel ti bu c'alal oye, pec'tsaj xa ti bu to ox c'oteme.

²⁴ Jech o xal un, ja' laj stac talel stuc ti laj sts'iba c'opetic ta pac'bal ti ta c'obale,

²⁵ ti laj yal MENE, MENE, TEKEL PARSIN, ti xie.

²⁶ Ti va'i yepal taje, ja' jech smelol ta xal ti jujubele: MENE ti xie, yu'un ti Diose c'ot ta chapel yu'un ti bu c'alal ta spas ajvalilal ti Jcuch abtele, xchi'uc laj xa sbis ti bu c'alal ta xc'ot ta tsutsele.

²⁷ TEKEL ti xie, yu'un ti Jcuch abtele, laj xa yich' bisel ti bu c'alal oye, pec'tsaj xa ti bu to ox c'oteme.

²⁸ PARSIN ti xie, yu'un ti c'u yepal smacoj ti Jcuch abtele, loc' xa sc'oplal ti cha'ch'ac ta xbate. Yu'un ta x'och ta yoc ta sc'obic ti medoetique xchi'uc ti persaetique.”

²⁹ Laj taj une, ta yorail no'ox, ti ajvalil Belsasare laj yal mantal ti ac'o yich' lapbel yax'elan c'u'il ti Daniele, ti ac'o ac'batuc yuin jlicuc carina ti meltsanbil ta oroe. Laj yal ta jamal xtoc ta stojol scotol ti ta xc'ot ta yoxibal ajvalil ta sbainel ti c'u yepal sbainoj to ox ti ajvalile.

³⁰ Ti jech c'ac'al taje, ta yac'ubalil no'ox, laj smilic ti Belsasar ti ja' ajvalil yu'un ti caldeoetique.

³¹ Va'i un, ti Darioe, ti ja' liquem talel ta Mediae, och ta yoc ta sc'ob ti pasob mantale. Ti jech c'ac'al taje, yich'oj xa ox chib xchanvinic (62) jabil ti Darioe.