Daniel 3 - Bible in Tzotzil de Chamula

Snijanel xchimanel bail ta yich'el ta muc' ti loc'obbail oroe

¹ Ti ajvalil Nabucodonosore laj yal mantal ti ac'o yich' meltsanel junuc loc'obbail ti naca oro yich'oje, ti yich'ojuc lajuneb xcha'vinic (30) metro ti snatile, ti yich'ojuc oxib (3) metro smuc'ul ti liquem ta yoque. Laj yal mantal xtoc ti ac'o yich'uc va'anel ta jun stenlej ti sbiinoj Dura ti oy ta yosilal ti jteclum Babiloniae.

² Ts'acal to un, laj sta ta iq'uel scotol ti its'inal ajvaliletic yu'un ti jujun lumetique, ti banquilal jpas-mantaletic yu'un ti soldadoetique, ti its'inal ajvaliletic ti oyic ta bic'tal lume, ti buch'utic cajal ich'bil ye sti'ique, ti jchabiej taq'uinetique, ti jchapanvanejetique, ti banquilal opisialetique, ti yan buch'utic oy yabtelic ti oyic ta bic'tal lume, yo' jech taluc stsob sbaic ta sq'uelel ti jech ta xlic yich' pasbel sq'uinal ti loc'obbail ti laj yac' ta meltsanele.

³ Scotolic ti buch'u cajal yabtel yich'ojic ti ta muc' ta lume, laj stsob sbaic talel ta sts'el ti loc'obbaile yo' jech ta spasbeic ti sliqueb sq'uinale.

⁴ Ti buch'u sbainoj ta yalel ti c'u s'elan ta xlic yich' pasbel ti stoyel xi'ele, xi s'elan tsots avan laj yal ti mantale: “A'yio ava'iic, ts'ijlanic acotolic, jnaclejetic, muc'tiquil lumetic, xchi'uc ti jujutos ac'opique:

⁵ C'alal ta xlic ava'iic ta xich' oq'uisanel ti oq'uese, ti amae, ti citara vobe, ti lira vobe, ti salterio vobe, ti oq'ues pasbil ta nucul ti xvuch'taobile, xchi'uc scotol ti c'usitic xa vobal stac' tijele, calal xnic xa liquel ti musica taje, quejan abaic ta yich'el ta muc' ti loc'obbail oro ti laj yac' ta meltsanel ti ajvalil Nabucodonosore.

⁶ Scotol ti buch'u mu squejan sbae, ti mu snijan sba ta yich'el ta muc' ti loc'obbaile, ta jech to yepal, ta xich'ic jipel ochel ta jorno ti xlomlun ti sc'ac'ale.”

⁷ Va'i un, ti c'alal xnic no'ox liquel scotol ti c'usiuc no'ox vobal stac' tijele, ti buch'utic tsobolic xae lic squejan sbaic ta yich'el ta muc' ti loc'obbail ti meltsanbil ta oroe.

⁸ Oy jun chib caldeoetic ti ja' o xa lec jamal be laj staic ta sa'bel smul ti israeletic ta stojol ti ajvalil Nabucodonosore,

⁹ ti xi laj yalbeique: “Cajaluc c'otuc ac'oplal ta j'ech'el, Jcuch abtel, ti na'biluc o ta xacom yu'unique.

¹⁰ Ti Jcuch abtelote laj aval mantal ti ac'o squejan sba scotolique, ti ac'o snijan sbaic ta yich'el ta muc' ti loc'obbail oro ti c'alal ta xa'iic xlomet no'ox liquel ta stijel ti vobetique.

¹¹ Ja'uc ti buch'u mu spas jeche, laj aval ti ta xich' jipel ochel ta jorno ti bu ta xtil ti sc'ac'ale.

¹² Lec ti jech laj avale, Jcuch abtel. Ja' no'ox un, oy jun chib israeletic ti vo'ot laj avac'be cajal yabtel ta sventainel ti bic'tal lumetic yu'un ti jteclum Babiloniae, mu ja'uc xayaq'uic ta venta ti Jcuch abtelote. Mi ja'uc snijan sbaic ta stojol ti diosetic avu'une, ti loc'obbail oro ti laj avac' ta va'anele, Jcuch abtel. Taje, ja'ic ti Sadraque, ti Mesaque, ti Abed-negoe.”

¹³ Calal laj ya'i ti Nabucodonosore, lic socuc sjol ta j'ech'el. Laj yal mantal ti ac'o yich' iq'uel talel ta stojol ti Sadraque, ti Mesaque, xchi'uc ti Abed-negoe. C'alal va'alic xa ta stojole,

¹⁴ ja' yu'un un, xi jac'batique: “¿Mi ja' melel mu xanijan abaic ta yich'el ta muc' ti diosetic cu'une, xchi'uc ti loc'obbail oro ti vu'un laj cal mantal ti ac'o yich' meltsanele?

¹⁵ C'alal xlomet no'ox liquel ti ta xich' tijel ti c'usiuc no'ox vobale, ¿mi chapaloxuc xa ta xlic anijan abaic ta yich'el ta muc' ti loc'obbail ti laj cac' ta meltsanele? Yu'un mi mu xanijan abaic ta yich'el ta muq'ue, mu jaliltastic, ta ora, ac'o ba avich'ic jipel ta jorno ti bu ta xtil ti sc'ac'ale. Ti mi jech une, ¿c'usi xa diosal xu' ta xaspojic?”

¹⁶ Xi laj staq'uic ti oxib querem viniquetique: “Ti c'usi laj avale, jeche' no'ox tey xijvulvun xchi'uc.

¹⁷ Ti buch'u xu' ta jnijan jbacutic ta yich'el ta muq'ue, ja' ti cuxul Diose. Yu'un ja' xu' ta xispojuncutic yo' jech mu xilajcutic ta sleb c'oc' yu'un ti jornoe, xchi'uc scotol ti c'usi chopol ta sc'an ta xispasbuncutic ya'i ti Jcuch abtele. Ta j'ech'el ta stic' sba ta jpojelcutic.

¹⁸ Ac'o mi mu xispojuncutic, ta xcac'cutic lec ana' ta j'ech'el, Jcuch abtel, ti mu ono'ox ta jnijan jbacutic ta yich'el ta muc' ti diosetic avu'une. Mi ja'uc ta jquejan jbacutic ta stojol ti loc'obbail oroe.”

Ti oxib querem viniquetique, pojatic ti c'alal oyic ta jorno ti bu ta xtil ti c'oq'ue

¹⁹ C'alal jech laj ya'i ti Nabucodonosor ti va'i s'elan tac'bate, chacpochan no'ox liquel sat ta spucujil ta scontrainel ti oxib querem viniquetique. Va'i un, laj yal mantal ti x'ech'uc to vucub velta yich'uc tic'bel sc'ac'al ti jorno jech c'u cha'al liquem ono'oxe.

²⁰ Laj taj une, laj yalbe mantal jun chibuc yajsoldadotac ti bu mu sna' xi'ique, ac'o xchuquic ti Sadraque, ti Mesaque, xchi'uc ti Abed-negoe, ac'o sjipic ochel bu ta xtil sleb ti c'oc' ta jornoe.

²¹ Ti oxib querem viniquetique slapojic o ti sc'u'ic ta sventa ti tsots yabtel yich'ojique. Chucbilic batel. Laj yich'ic jipel ochel ta jorno ti bu ta xtil ti c'oq'ue.

²² Ti c'u s'elan yaloj mantal ti ajvalile, laj yal ti c'otuc ta yorail no'ox ti c'usi loc' ta yee. Yu'un ti jornoe ta xtil ta j'ech'el. C'alal yorail laj sjipic ochel ti oxib querem viniquetique, jech ti soldadoetique, milatic yu'un sleb ti c'oq'ue.

²³ Va'i un, pech'elic laj sjipic ochel ta jorno ti querem viniquetique.

²⁴ Ta jech to yepal un, ti Nabucodonosore va'i ta anil, ti mu xa stac' a'yeluc ta xa'i c'usi ta xal ti xi laj yalbe ti jpas-mantaletic ti ta xtunic ta spasob mantale: “¿Mi mu ja'uc no'ox oxib viniquetic chucul laj yich'ic jipelic ochel ta c'oc'?” “Ja' no'ox jech yepalic”, xi laj staq'uique.

²⁵ Xi laj yal ti Nabucodonosore: “Yu'un ti vu'une, chanib viniquetic ti colemic ta xquil ta xanavic ta o'lol c'oc' ti mu'yuc c'usi ta spasbatique. Ti xchanibale, ja' jun vinic ti co'ol s'elan jun ánjel ta q'uelel yilele.”

²⁶ C'alal jech xa ox laj yale, ti Nabucodonosore nopaj batel ta sti' ti jornoe. Tsots avan ti xi laj yale: “Sadrac, Mesac, Abed-negó, ti vo'oxuc yajtuneloxuc ti muc'ul Dios ti oy ta toyole, loc'anic talel.” Ti oxibique loq'uic talel ti bu ta xtil sleb ti c'oq'ue.

²⁷ Scotol ti buch'utic oy yabtelic ta sjunul ti muc' ta lum ti bu tey oyique, nopajic batel ta sts'el ti viniquetique. Laj yilic ti mu'yuc c'aq'uem jutebuc sbec'talic yu'un ti c'oq'ue. Laj stuc'ulanic lec ti mu'yuc jutebuc muruchtajem ti stsotsil sjolique. Mi ja'uc jutebuc c'an-muxtajem ti sc'u'ique. Mi ja'uc jutebuc ti yic' xa c'aq'uet ta a'yiele.

²⁸ C'alal jech c'ot ta pasel taje, jech ti ajvalil Nabucodonosore, xi tsots lic c'opojuque: “Lequil c'optabiluc ti Dios yu'unic ti Sadraque, ti Mesaque, xchi'uc ti Abed-negoe. Yu'un laj stac talel yaj'ánjel ta spojel ti lequil yajtuneltaque. Mu'yuc xi'tabeic smantal ti ajvalile. Loc' ta yeic ti ac'o mi ta xchamique, mu ta snijan xchiman sbaic ta yich'el ta muc' ti yan diosetique, ti c'alal ma'uc ti Dios yu'unique.

²⁹ Avi tana li' une, buch'uuc no'ox ti chopol ta xc'opoj ta stojol ti Dios yu'unic ti querem viniquetic li'e, vu'un ta xcal mantal ti yich'icuc sesintael ta bojel, stucuc slilijemal busul ta xcom ti snae. C'usiuc no'ox lumal ti jech ta spase, mi ja' jun muc' ta lum, mi ja' yan c'op ta xc'opoj, ja' jech ta xich' taje. Yu'un mu'yuc yan dios ti xu' yu'un ta stic' sba ta pojvanej jech c'u cha'al le'e.”

³⁰ Ts'acal to un, ti oxib querem viniquetic taje, ac'bat cajal yabtelic yu'un ti ajvalile, ti sbainicuc ta sventainel c'u yepal ti bic'tal lumetic yu'un ti jteclum Babiloniae.