Daniel 2 - Bible in Tzotzil de Chamula

Xvaich ti ajvalil Nabucodonosore

¹ C'alal xchibal xa ox jabil yochel ta ajvalilal ti Nabucodonosore, ep ta velta ti c'usitic laj yil ta xvaiche. Ta scoj ti jech taje, lic ta vul o'nton. Mu xa xvay xchi'uc ta snopel.

² Ja' yu'un un, ti ajvalile laj sta talel ta iq'uel ti viniquetic ti xilic cajal toyole, ti jt'unvanejetique, ti buch'utic oy c'usi xu' yu'unic ta yesomtaele, xchi'uc ti bijil viniquetique. Taje, ja' ta sbainic ta yalbel smelol ti jaytos vaichiletique. Jech ti stuquique batic, c'otic ta stojol ti ajvalile.

³ Va'i un, xi albatic yu'un ti ajvalile: “Oyun ta vul o'nton ta j'ech'el, yu'un oy c'usi laj quil ta jvaich ti tsots sc'oplal ta jc'an xca'i c'usi ti smelol ta xac' ta na'ele.”

⁴ Ti bijil viniquetique xi laj yalbeic ti ajvalile: “Cajal c'otuc sc'oplal ta j'ech'el ti Jcuch abtele. Va'i un, Jcuch abtel, chapbo ya'i c'usi laj avil ta avaich ti avajtuneltac li'e. Jech ti vu'uncutique ta xcalcutic ta jamal ti c'usi smelol ta xac' ta na'ele.”

⁵ Xi tac'batic yu'un ti ajvalile: “Ja' jech oy ta co'nton taj une. Mi mu x'al avu'unic ti c'usi laj jvaichintae, ti mi mu xvinaj avu'unic ti smelole, j'ech'el ta xavich'ic cu'un unbi. Jech ti anaique, stuc slilijemal busul ta xcom ta lum.

⁶ Yan mi xchapet avu'unic ti c'usi laj jvaichintae, mi xchapet avu'unic c'usi smelol ta xac' ta na'el ti jvaiche, ta xavich' amotonic cu'un. Ta xataic ti lec ac'oplalic cu'une, ti cajal ich'bil ta xac'otic ta muq'ue. Ja' yu'un un cha'e, chapbeicun talel ca'itic c'usi ti jvaich laj quile, xchi'uc albeicun ca'i ta jamal c'usi smelol ta xac' ta na'el.”

⁷ Xi laj staq'uic ti bijil viniquetic ta xchibal veltae: “Chapbun ca'icutic c'u s'elan ti avaichtac ti laj avile, Jcuch abtel. Jech ti vu'uncutique ta xcalcutic ava'i c'usi ti smelol ta xac' ta na'ele.”

⁸ Xi tac'batic yu'un ti ajvalile: “Laj xa jna' lec ti c'usi oy ta avo'ntonique. Xavac'toicuc nan ti ta xch'ay ta be ti laj ava'iic ti oy c'usi ta co'nton ta jpas ta atojolique.

⁹ Ja' yu'un un, mi mu xavalbeicun ti c'usi laj jvaichintae, co'ol ta xavich' acotolic. Yu'un laj xacomon-nopic ti naca jutbil xchi'uc yesomal no'ox ajolic ta xatac'beicun talel ti c'usi ta jc'an ta jaq'ue. Yu'un un avac'toicuc ta xjel ti c'usi nopbile. Mi xac'ane, albeicun ca'i c'usi ti jvaich laj quil une. Ja' jech ta jna' ti xu' avu'unic yalbel smelol ti c'usi laj quile.”

¹⁰ Ti bijil viniquetique xi laj staq'uique: “Ta sbejel ti banomile, mu'yuc bu ta tael junuc ti xu' yu'un ta yalel ti c'usi oy ta yo'nton ta sjac' ti Jcuch abtel yu'une. Yu'un ti va'i s'elan taje, mu'yuc xca'itic o junuc ajvalil, manchuc mi toj cajal, mi toj jelavem xu' yu'un. Yu'un ti c'usi mucul ta yo'ntone, mu'yuc laj stsatsal c'an ti ac'o albatuc smelol yu'un junuc ti buch'u jamal sba sate, ti jt'unvaneje, ti bijil viniquetique.

¹¹ Ti c'usi ta sc'an ta sjac' ti Jcuch abtele, toj vocol, yu'un mu'yuc bu ta tael mi junuc ti buch'u xu' ta xale. Xu' yu'unic ti diosetique, c'u stu un, ti stuquique ch'acal ta stojol ti jnaclejetique.”

¹² C'alal jech laj ya'i ti ajvalil taje, lic socuc sjol ta j'ech'el. Laj yal mantal ti ac'o yich'ic milel scotol ti bijil viniquetic ti tey ta jteclum Babiloniae.

¹³ C'alal vinaj xa ti loc' mantale, laj yich' sa'el xtoc ti Daniele xchi'uc ti xchi'iltaque yo' jech ta xich'ic milel ec.

Ti Daniele ta xalbe ya'i c'u s'elan laj yil xvaich ti ajvalile

¹⁴ Va'i un, ti Daniele, yich'oj lec sbijil, oy lec stuq'uil smelol, laj sc'opon ti Arioque, ti ja' jpas-mantal yu'un ti jchabivanej soldadoetic yu'un ti ajvalile, ti xchapanoj xa sba ta smilel ti bijil viniquetique.

¹⁵ Xi lic sjac'bee: “¿C'u cha'al jech laj yal mantal ti ajvalil ti ta stsutsesvan ta j'ech'ele?” Ti Arioque lic sjambe smelol c'u cha'al ti jech ta xc'ot ta pasele.

¹⁶ Va'i un, ti Daniele bat ta stojol ti ajvalile. Laj sc'anbe vocol ti ac'o yac' ye c'uc sjaliluc yo' jech xu' ta xich' albel ya'i ti c'usi xal o ti xvaiche.

¹⁷ Laj taj une, bat c'alal to sna yo' ta xchapbe ya'i scotol ti xchi'iltaque, ja' ti Ananíase, ti Misaele, ti Azaríase.

¹⁸ Laj yalbe ya'i ti ac'o sc'anic coltael ta stojol Dios ti oy ta vinajele yo' ac'o ac'batuc yilic ti c'usi mucule, yo' jech mu jmojuc ta xlajic ta milel xchi'uc ti yan bijil viniquetic ta jteclum Babiloniae.

¹⁹ Ti jech ac'ubal taje, ti Daniele jam ti sba sate. Ac'bat yil ti c'usi mucul ti mu xvinaje. C'alal jech ac'bat yile, laj slequil-c'opta ti Dios ti oy ta vinajele.

²⁰ Ti c'usi laj yalbee, jech li'e: “Sbatel osil, lequil c'optabiluc xch'ul bi ti Diose, yu'un ja' yu'un ti bijilile, ti muc'ul tsatsalile.

²¹ Yu'un ti stuque ta sjel ti c'usitic chapanbil ti ta xc'ot ta pasel ta jujucoje, xchi'uc ti c'u sjalil ta xc'ot ta pasele. Yu'un ja' yabtel ta sjip loq'uel ti ajvalile, ti ta xchotan yan ajvalil ti bu ta sc'ane. Yu'un ja' yabtel ta xac'be sbijil ti buch'utic bijique, ti ta xac'be snopbenal yu'un ti buch'u oy snopbenal yu'unique.

²² Yu'un ti stuque, ja' yabtel ta xac' ta ilel ti c'usi toj vocol ta na'el ti smelole, xchi'uc ti c'usitic mucule. Yu'un chajal ta sba ta sat ti c'usitic oy ta ic'al osile, ja' ti oy ta stojol ti sac jaman ta j'ech'ele.

²³ Ti vo'ote, Diosot yu'un ti jtot jme'e, colaval, xacutot. Ta jlequil-c'optaot, yu'un laj avac'bun jbijil, laj avac'bun jtsatsal, yu'un laj avac' ta na'el ti c'usi laj jc'ancutique; laj avac' ta ilel ti c'usi oy ta vul o'nton xchi'uc ti ajvalile.”

²⁴ C'alal laj taj une, jech ti Daniele xi laj yalbe ti c'alal bat sc'opon ti Arioque, ja' ti buch'u ac'bil mantal yu'un ajvalil ta smilel ti bijil viniquetic ta jteclum Babiloniae: “Mu xamil ti bijil viniquetique. Ic'un batel ta stojol ti ajvalile. Jech ti vu'une ta jchapbe ya'i scotol ti c'usi laj yil ta xvaiche.”

²⁵ Jech ti Arioque xi laj yal c'alal yic'oj c'otel ti Daniel ta stojol ti ajvalil Nabucodonosore: “Ti ta scotol ti israeletic ti bec'bil loq'uic talele, laj jta jun vinic ti xu' ta xac' ta na'el ti c'usi xal o xvaich ti Jcuch abtele.”

²⁶ Va'i un, ti ajvalile xi laj yalbe ti Daniele, ja' ti buch'u Belsasar laj yac'beic sbie: “¿Mi xu' avu'un ta xaval ti c'usi laj jvaichintae, xchi'uc ti c'usi smelol ta xac' ta na'ele?”

²⁷ Ti Daniele xi laj staq'ue: “Ti jech oy ta avo'nton ta xac'an ta xaq'uic ta na'el ti c'usi toj mucul ta j'ech'ele, Jcuch abtel, mi ja'uc junuc ti xu' ta x'al yu'unic ti bijil vinique, ti jt'unvaneje, ti xilic cajal toyole, ti sna' sq'uelel senyailtaque.

²⁸ Yu'un ja' no'ox xu' yu'un ta svinajes ti jun Dios ti oy ta vinajele, ti ja' yiloj scotol ti c'usitic oy ta mucule. Ja' yu'un un, Jcuch abtel, ja' stuc ta xac' ta na'el ti c'usitic ta xlic c'otuc ta pasele. Va'i un, Jcuch abtel, xi ta xlic jchapbot ava'i ti c'usi laj avil ta avaiche, xchi'uc ti c'usi la'ac'bat avil ti jam aba asat ti c'alal ta xavaye:

²⁹ “Va'i un, Jcuch abtel, ti c'alal telelot ta xacux ta avayebe, lic ochan ta snopilanel ti c'usi ta xc'ot ta pasel le' batele. Jech ti Buch'u ta xac' ta ojtiquinel ti c'usi toj mucule, laj xa yac'bot ana'.

³⁰ Jech ti vu'un eque, laj xa yac'bun quil ti c'usi laj avil ti oy ta mucule. Ti va'i s'elan laj quile, mu'yuc ta xcal ti vu'un jelavem ti jbijile, ti ja' mu sta scotol ti viniquetique. Yu'un ti jech taje, ja' no'ox yo' xu' ta xcalbe smelol c'usi ta xac' ta na'el xvaich ti Jcuch abtele. Jech ti Jcuch abtele ta xlic ya'ibe lec smelol ti lub xa sjol ta snopilanbel talel ti smelole.

³¹ “Ti c'usi la'ac'bat avil ta avaiche, Jcuch abtel, laj avil ti ta jech to yepal tey va'al c'ot ta ats'el jun muc' ta loc'obbail ti ta xac' xojobale, ti toj chop o ta q'uelel ta j'ech'ele.

³² Ti c'usi tey va'ale, naca bats'i oro ti sjole. Yan ti sti' yo'nton xchi'uc ti sc'obtaque, naca plata yich'oj. Yan ti xch'ut xchi'uc ti scubtaque, naca c'anal taq'uin yich'oj.

³³ Yan ti yo'taque, naca tsatsal taq'uin yich'oj. Yan ti yoctaque, oy jts'oc ti ja' tsatsal taq'uin yich'oje. Yan ti jts'oque, meltsanbil ta lum.

³⁴ C'alal yacal batem asat ta sq'uelele, Jcuch abtel, ta jech to yepal, pits talel ton ta vits ti mu balch'unbiluc talele. Tey xpujlij vul ta yoc ti loc'obbaile, ti toj lilijel c'ot yu'une.

³⁵ Ta jliquel no'ox un, ti tsatsal taq'uine, ti lume, ti c'anal taq'uine, ti platae, ti oroe, scotol ti jaytos yich'oje, stuc svoch'olil busul com co'ol s'elan bat jech c'u cha'al ta xich' majel ti trigo ta yorail ti q'uepelaltique, ti bec'bil ta xbat ta iq'ue, ti mu jutebuc c'usi com yu'une. Ja' no'ox un, ti ton ti laj smajbe yoc ti loc'obbaile, lic joybijuc ta jun muc' ta vits ti smacoj c'ot sbejel ti banomile.

³⁶ “Taj une, ja' jech s'elan ti avaich laj avile. Avi tana une, Jcuch abtel, ta xcalbot ava'i c'usi smelol ta xac' ta na'el ti avaich laj avile.

³⁷ Ti Jcuch abtelote, atuc no'ox cajal ac'oplal c'otem yu'unic scotol ti ajvaliletique. Yu'un ti Dios ti oy ta vinajele, laj yac' ochan ta ajvalil. Laj yac'bot amuc'ul atsatsal. Jelavem xu' avu'un, j'ech'el ich'bil lac'ot ta muc'.

³⁸ Ma'uc no'ox taje, yu'un laj yac'bot ta avoc ta ac'ob scotol ti buyuc no'ox oy ti jnaclejetique, ti chon bolometique, ti jaylajun-tos ti c'usitic oy sc'uc'umal ti stac' ts'unele. Scotol ti va'i yepal taje, laj yac'bot aventain ta sbainel ti vo'ote, Jcuch abtel. Ja' me smelol ti oro laj avil ti sjol ti loc'obbaile.

³⁹ C'alal mi c'ot ta tsutsel ti avabtele, Jcuch abtel, ta xvul ta loq'uel yan ajvalil ti mu sta jech xu' yu'un jech c'u cha'al ti vo'ote. Mi laj xtoc une, ta xvul ta loq'uel yoxibal ajvalil. Ja' smelol ti c'anal taq'uin ti xch'ute, xchi'uc ti sc'obtac laj avile, ti xu' yu'un ta spasel mantal sbejel ti banomile.

⁴⁰ Mi laj taj xtoc une, ta xvul ta loq'uel xchanibal ajvalil ti tsots xu' yu'un ta j'ech'el jech c'u cha'al ti tsatsal taq'uine. Jech c'u cha'al xu' yu'un ti tsatsal taq'uin ta slilinel xchi'uc ta soquesel scotole, ja' jech ti jun ajvalil ti ta xvul ta loq'uel taje. Xu' yu'un ta slilinel ta soquesel scotol ti yan ajvaliletique.

⁴¹ “Jcuch abtel, laj avil xtoc ti cha'tos yich'oj ti yoque, ti sni'tac yoque, ti ja' meltsanbil ta lume. Ti jts'oc xtoque, ja' tsatsal taq'uin yich'oj. Ti va'i s'elan taje, ja' ta xac' ta na'el ti ta xc'ot ta cha'ch'ac ti ajvalile, ac'o mi tsots xa yilel ti capal ta tsatsal taq'uine. Ja' yu'un un, Jcuch abtel, laj avil ti jc'os xa tsatsal taq'uine, ti jc'os xa lum yich'oje.

⁴² Ti va'i s'elan jc'os xa tsatsal taq'uine, ti jc'os xa lum yich'oj sni'tac yoque, ti jech taje, ja' smelol ta xac' ta na'el ti tsots xa xu' yu'un yilel ti ajvalile, ti c'alal mu'yuc c'usi xu' yu'un xtoque.

⁴³ Ja' yu'un un, Jcuch abtel, ti laj avil ti capal ta tsatsal taq'uin ti lume, ja' smelol ta xac' ta na'el ti ajvaliletique, ti ta xc'otic ya'iic ta jun ti ta sco'oltas sjol yo'ntonic ta nupunele. Ja' no'ox un, mu xu' ta spas ta jun ti snopobil yu'unique, jech c'u cha'al ti taq'uin ti mu xu' stsac sba lec xchi'uc ti lume.

⁴⁴ Ti c'u sjalil ta x'ech'ic ta ajvalilal ti ajvaliletic taje, ti Dios ti oy ta vinajele, ta xlic sva'an jun ajvalil ti mu'yuc buch'u xu' ta xliline yu'une. Mi ja'uc ta spase ta canal yu'un junuc ti yan muc' ta lume. Yu'un ti stuque, c'ajomal no'ox ta stsutses ta j'ech'el scotol ti yan ajvaliletique. Sbatel osil cuchem yu'un.

⁴⁵ Ti va'i s'elan ta xc'ot ta pasel taje, Jcuch abtel, ja' ta xac' ta na'el ti laj avil ti balalij yalel tal ton ta vits ti mu balch'unbiluc talele. Ja' jbej ton ti laj slilin ti tsatsal taq'uine, ti c'anal taq'uine, ti lume, ti platae, xchi'uc ti oroe. Ja' yu'un un, ti muc'ul Diose, Jcuch abtel, laj yac'bot avil ti c'usi ta xc'ot ta pasel le'tic batele. Ti avaich ti laj avile, ja' melel. Jech ti smelol ti yich' alele, mu jechuc no'ox nopbil.”

⁴⁶ Ja' yu'un un, ti ajvalil Nabucodonosore snupilan xa banomil laj squejan sba ta stojol ti Daniele. Laj yal mantal ti ac'o yich' ac'bel milbil matanale, ti ac'o yich' chic'bel pome.

⁴⁷ Ts'acal to un, xi laj yalbe ti Daniele: “Ta melel cac'tic un, ti Dios avu'unique, ja' ech'em xu' yu'un. Mi ja'uc xco'olaj xchi'uc jech c'u cha'al scotol ti yan diosetique. Yu'un ja' Dios yu'unic ti ajvaliletique, ti ja' ta xac' ta na'el ti c'usi toj mucul ta a'yibel ti smelole. Yu'un ti vo'ote vu' avu'un ta svinajesel ti c'usi oy ta mucule.”

⁴⁸ Laj taj une, jech ti ajvalile lic yac'be cajal yabtel ti Daniele. Spajeb xa no'ox yutsiquil ti matanaletic laj yac'bee. Ma'uc no'ox taje, yu'un laj yac'be yabtel ti c'ot ta its'inal ajvalil yo' ta sventain yosilal ti jteclum Babiloniae, xchi'uc c'ot ta banquilal jpas-mantal ta stojol scotol ti buch'utic bijil viniquetic ta muc' ta lum taje.

⁴⁹ Ac'bat ti c'usi laj sc'an ti Daniele. Jech o xal ti ajvalile laj stic' ta abtel ti Sadraque, ti Mesaque, ti Abed-negoe, cajal yabtelic laj yich'ic ta j'ech'el. Laj sbain ta sq'uelel ti c'usitic oy yu'un ti c'u sjamlej yosilal ti jteclum Babiloniae. Ja'uc ti Daniele com ta jpas-mantal yu'un ti ajvalile.