Daniel 11 - Bible in Tzotzil de Chamula

¹ Ja' jechun ec laj jcolta laj jtsatsubtasbe yo'nton ti Darío ti ja' ajvalil yu'un ti jteclum Media ti c'alal ja' o sliqueb jabil yochel ta yabtele.

² Avi tana une, ta xcac' ta na'el smelol ti c'usi ja' melele: “Yu'un ta to spasic mantal oxib ajvaliletic ti tey ta jteclum Persiae. Ts'acal to un, ti mi laj ech'icuc xa oxe, ta xlic spas mantal ti xchanibal ajvalil ti jc'ulej ta j'ech'ele, ti ja' mu sta ti oxib (3) ajvaliletic ti laj ech'icuque. C'alal ta sta ti cajal ta xc'ot sc'oplal ta sventa ti jech oy ti sc'ulejale, ta xlic sa'ilanbe smelol ta scontrainel ti ajvalil ta jteclum Greciae.

Ti ajvaliletic ti oyic ta yolon ti yolon xocon sloq'ueb c'ac'ale, xchi'uc ti oy ta yolon ti yac'ol xocon sloq'ueb c'ac'ale

³ “Ti ta ts'acal toe, ta xlic ochuc ta ajvalilal ti buch'u jun banquilal j'ac'-leto xa'i sbae, ti jelavem xu' yu'un ti tsalvaneje, ti ta spas ti c'usi xa xal ti yo'ntone.

⁴ Manchuc mi jech un, c'alal cuchem xa ox lec yu'une, ta xlic lilijuc ti jech spasoj xa ox canal ta yu'ninel scotole. Yu'un ta xich' pasel ta chanch'ac ti c'u sjamlej smacoje. Ti jech jelavem xa ox xu' yu'un ti ajvalil taje, mi ja'uc junuc ti jech ta xloc' ti snitilultaque. Mi ja'uc xa ta xvol yu'un jech c'u cha'al ti buch'u ech' ta ba'yel ti jelavem xu' yu'une, ja' ti ta xc'ot ta pasel ti ta spas ta chanch'aque, ti yan o xa ajvaliletic ta x'och ta xq'uexole.

⁵ “Jech ti ajvalil ti oy ta yolon ti yac'ol xocon sloq'ueb c'ac'ale, oy smuc'ul stsatsal ec. C'u stu un, oy jun ta scotol ti banquilal jpas-mantal yu'un ti soldadoetique, ti xjelav to ti xu' yu'une, ti ja' mu sta ti stuque. Jech o xal ti soldado taje, ta stsalvan batel ta j'ech'el ti mu no'ox albajuc ti bu c'alal ta svol ta u'ninele.

⁶ C'alal mi ech' xa ox jayibuc jabile, jech ti xchibalic taje, xi s'elan ta xlic spas ti strateique: Jech ti ajvalil ti oy ta yolon ti yac'ol xocon sloq'ueb c'ac'ale, ta xac' ta malijel stseb ta sventa ti jun ajvalil ti oy ta yolon ti yolon xocon sloq'ueb c'ac'ale. Ti jech laj spasic taje, ta snopic ti ja' to jech ta xc'ot ta lamajel ti c'op yu'unic ti chib muc'tiquil lum taje. Ti jech nopbil yu'unic taje, soc ta be. Yu'un ti tsebe, ti yole, ti smalale, xchi'uc ti smosovtaque, ta xlajic ta milel.

⁷ Manchuc mi jech taj une, ja' no'ox un, oy jun ti yuts' yalal sbaique, ta stsac ta leto ti soldadoetic ti oyic ta yolon ti yolon xocon sloq'ueb c'ac'ale. Yu'un ta xu'ninbe ti spojobbail ti ajvalile. Yu'un ta stsalvanic ti soldadoetic yu'une.

⁸ Ma'uc no'ox taje, yu'un ta xich'ic batel ta jteclum Egipto ti diosetic yu'une, ti loc'obbailetic ti meltsanbil ta unijesbil taq'uine, xchi'uc ti c'usitic yan toyol stojol ti meltsanbil ta oroe, ta platae. Ts'acal to un, c'alal mi ech' jayibuc jabile, ta xc'ot ta pasel yu'unic ti xlamaj c'op yu'unic ti chib muc'tiquil jteclum taje.

⁹ Ja'uc ti ajvalil ti oy ta yolon ti yolon xocon sloq'ueb c'ac'ale, ta stsob ya'i ta u'ninel ti banomil ti oy ta yolon ti yac'ol xocon sloq'ueb c'ac'ale. C'u stu un, ta stsatsal c'op ta xloc' batel.

¹⁰ “Ja' no'ox un, ti xnich'nabtac ti ajvalil ti oy ta yolon ti yolon xocon sloq'ueb c'ac'ale, ta xlic xchapan sba ta spasel leto. Jech o xal ta svol ta tsobel ti yajsoldadotaque. Oy jun ta scotolic ti xvoletic no'ox batel xchi'uc ti yajsoldadotac ta yu'ninel ti banomil ti oy ta yolon ti yac'ol xocon sloq'ueb c'ac'ale, ti co'ol s'elan ta xc'ot ta pasel yu'un jech c'u cha'al junuc yoc uc'um ti mu'yuc c'usi x'ayan ta xcom yu'un c'alal mi ech' ti yipe. Mi laj taj xtoc une, ta xlic tsacvanuc ta leto xtoc, ja' to ti c'uxi ta xc'ot ta snac'obbail ti ajvalil ti oy ta yolon ti yac'ol xocon sloq'ueb c'ac'ale.

¹¹ Ti jech ta snet' ya'i ta spojel banomil ti soldadoetic ti liquemic ech'el ta yolon ti yolon xocon sloq'ueb c'ac'ale, ta xcap sjol ta j'ech'el ti ajvalil ti oy ta yolon ti yac'ol xocon sloq'ueb c'ac'ale. Jech ti stuc eque ta xloc' ech'el ta tsaquel ta leto ti epal soldadoetic ti ja' yajcontrataque. Va'i un, tsalbil ta xc'ot yu'un ta j'ech'el.

¹² Ti jech cuch yu'un ti tsalvaneje, ti chamemic busul no'ox com ti yajcontrataque, ta xlic stoy sba xchi'uc. Ja' no'ox un, mu xjalij ti jech cuchem yu'une.

¹³ “Yu'un ti ajvalil ti oy ta yolon ti yolon xocon sloq'ueb c'ac'ale, mu albajuc yepal ta xlic xcha'vol ti yajsoldadotaque, ti ja' mu sta ta ba'yel to oxe. Va'i un, mi ech' jayibuc jabile, chapalic lec xchi'uc yabtejebic ti yajsoldadotac ti xvoletic no'ox batel ti xbat stsaquic ta leto ti ajvalil ti oy ta yolon ti yac'ol xocon sloq'ueb c'ac'ale.

¹⁴ C'alal jech ta xc'ot ta pasel ti va'i s'elan taje, ep ti buch'utic ta xlic stoy sbaic ta stojol ti ajvalil ti oy ta yolon ti yac'ol xocon sloq'ueb c'ac'ale. Ti ta scotol ti va'i s'elan taje, oy jun chib jchopol o'nton israeletic jech c'u cha'al ac'bat iluc ti c'alal jam ti sba satile. Ja' no'ox un, mu xc'ot ta pasel yu'unic.

¹⁵ Yu'un ti ajvalil ti oy ta yolon ti yolon xocon sloq'ueb c'ac'ale, ta xtal, ta xlic sbusanbe lum ta joyob ti jun jteclum ti oy nac'obbail yu'une. Ja' jech ta xu'nin. Yu'un mi ja'uc junuc ti banquilal j'ac'-leto soldado ti oy ta yolon ti yac'ol xocon sloq'ueb c'ac'al ti xu' ta smac ta be ti jcontrainvanej soldadoetique.

¹⁶ Yu'un ti j'ilbajinvaneje ta spas ti c'usi xa xal ti yo'nton ta stojol ti buch'u tsalbil c'otique. Yu'un mi ja'uc xpac yu'unic ti sc'oplalique. Yu'un ta xc'ot svol sbaic ta banomil ti bu sbiinoj ti C'upil sbae, ti naca slilinel no'ox yu'unic ti c'usi ta staic ta bee.

¹⁷ “Ma'uc no'ox taje, yu'un ta xchapan sba ta yu'ninel ti banomil ti oy ta yolon ti yac'ol xocon sloq'ueb c'ac'ale. Yo' jech ta sta taje, jech o xal ta xlic spas strate xchi'uc ti ajvalil taje. Jech xtoc ta xac' ta malijel ti yantsil nich'on ta stojole yo' ta xc'ot ta pasel ti ta slilin ti spasob mantale. Ja' no'ox un, ti va'i s'elan snopoj taje, mi ja'uc ta xc'ot ta pasel.

¹⁸ Ts'acal to xtoc un, ta xlic stsac ta leto ti jteclumetic ti oy ta sti'il nabe. Ep xtoc ti ta x'och ta yoc ta sc'obe. Ja' no'ox un, oy jun banquilal jvolvanej yu'un soldadoetic ti ta xlic stubbe sc'oplal ti q'uexlal sba ti va'i s'elan snopoje, ti yaloj ox ti ja' q'uexlal apun ta xc'ot yu'un ti ajvalil ti oy ta yolon ti yolon xocon sloq'ueb c'ac'ale.

¹⁹ Ti jech ta xc'ot ta pasel ti va'i s'elan taje, jech ti ajvalile ta xloc' batel ta nac'obbail ti ta slumale. Ja' no'ox un, oy c'usi ta xc'ot ta stojol ti ta xcham o xchi'uque. Mi ja'uc xa oy bu ta xvinaj sc'oplal liquel.

²⁰ “Ti bu to ox chotole, ta x'och ta q'uexolil yan ajvalil ti ta stac batel jc'an-patanetic yo' jech ta xlic ayanuc sc'ulejal ti jech chotol ta spas mantale. C'u stu un, ja' no'ox jun chib c'ac'al ti jech ta spase. Tey ta xlic yich' milel, ac'o mi ma'uc tey ti bu xyaquet ti letovajele.

²¹ “Ts'acal to un, ta xlic ochuc jun vinic ta ajvalilal ti spajebal mu'yuc xch'ulel ta j'ech'ele, ti ma'uc sc'oplal ta x'och ta ajvalilale. Ta mucul sna' c'usi xut sba ti naca lo'lavanej ta spas yo' jech ta xlic yich' liquel yip ti jech jelavem xu' yu'une.

²² Ti buch'u oy smuc'ul stsatsal ti ta xmacun ta bee, ta stubbe sc'oplal ta j'ech'el. Ma'uc no'ox taj xtoque, yu'un ta smilbe yajval ti tratee.

²³ Ta slo'la xtoc ti buch'utic ti laj xa yac' strateic ti lec xil sbaic xchi'uque. Manchuc mi jutuc ta q'uelel ti svinictaque, yu'un ono'ox ta stsalvan.

²⁴ Ja' to xa'iique, ochem xa ono'ox batel ta jun banomil ti oy sc'ulejal ti oy ta jujun bic'tal lume, ti xi ta xlic spas ti mu jechuc laj ech'icuc ti stot sme'taque: Ta xlic xch'acbe yajsoldadotac ti c'usitic lec laj staique, xchi'uc ti c'ulejaletic ti laj staic ta tsobel ti c'alal xyaquet ta letoe. Yu'un ta xlic xchapan sba ta stsaquel ta leto ti nac'obbail jteclumetique, ac'o mi ja' no'ox jun chib c'ac'al ti jech xu' yu'une.

²⁵ “Ti ja' xa spatoj o yo'nton xchi'uc ti jelavem xu' yu'une, ti jech mu'yuc xi'el yu'une, xvolet no'ox batel xchi'uc ti yajsoldadotaque, ta xbat stsac ta leto ti ajvalil ti oy ta yolon ti yac'ol xocon sloq'ueb c'ac'ale. Jech ti ajvalil ti oy ta yolon ti yac'ol xocon sloq'ueb c'ac'ale, ta sjunul yip ta spac sutel, yu'un xvolet no'ox batel xchi'uc epal soldadoetic ti ta stsacvan ta letoe. C'u stu un, ta x'aq'ue ta c'abal. Mi ja'uc xu' yu'un ta spaquel sc'oplal ti c'alal tsacbil ta leto yu'un ti epal soldadoetic ti yajcontrae.

²⁶ Yu'un ti buch'utic ta x'ac'vanic ta vocole, ja'ic no'ox ti yajbijubtasvanej ti jmoj xve'ic xchi'uque. Ja' jech tsalbil ta xc'otic ti yajsoldadotaque. Jech tey ep ta xchamic ti yajsoldadotaque.

²⁷ Va'i un, ti chib ajvaliletique, ti c'ajomal oy ta yo'ntonic ti ta xilbajin sbaique, ta xlic chotiicuc ta mexa ta ve'el uch' vo', ti yo'nton sna'ic jujun ti ye sti'ic ta xlo'ilajique. Ja' no'ox un, mu'yuc ta xc'ot ta pasel yu'unic ti c'usi snopojique, yu'un ma'uc to yorail.

²⁸ Ti ajvalil ti liquel talel ta yolon ti yolon xocon sloq'ueb c'ac'ale, ta xcuch batel ta slumal ti c'ulejal ti laj sta ta tsobel ti c'alal letovaje. Va'i xtoc un, ta xlic ochuc ta scontrainel ti ch'ul tratee. Ta xc'ot ta pasel yu'un ti jech snopoje. Ts'acal to un, ta sut ech'el ta slumal.

²⁹ “C'alal ta xc'ot yorail ti c'usi nopbile, ta stic' ochel ti yajsoldadotac ta stsaquel ta leto ti ajvalil ti oy ta yolon ti yac'ol xocon sloq'ueb c'ac'ale. Ja' no'ox un, ti jech ta spas ti va'i s'elan taje, mu'yuc xa ta spas canal jech c'u cha'al ta ba'yele.

³⁰ Yu'un ti yajsoldadotaque, tsacbil ta xc'ot ta leto yu'un jvoc' soldadoetic ti cuchbilic talel ta barco ti liquemic talel ta smaleb c'ac'ale. Ti jech u'ninatic xa yu'un ti xi'ele, tey xvoletic batel ta sten sbaic loq'uel, ta xbatic. Jech ti ajvalil ti liquem talel ta yolon ti yolon xocon sloq'ueb c'ac'ale, ta xlic sloq'ues ti sc'ac'al yo'nton ta scontrainel ti ch'ul tratee. Ja' ta xlic sco'oltas yo'nton xchi'uc ti buch'utic mu sc'an xac' sbaic ta tunel ta sventa ti ch'ul tratee.

³¹ “Jech ti yajsoldadotaque ta xlic soquesic ti ch'ulnae xchi'uc ti nac'obbailetique. Yu'un ta xlic spajes ti milbil matanal ti ta xich' aq'uel jujun c'ac'ale. Jech xtoc ta xlic spasic ti c'usi spajebal xa no'ox ta xac' ib-o'nton ta q'uelele.

³² Jech ti ajvalile, stse'in no'ox sat ta xlic slo'labe yo'nton ti buch'utic mu lecuc ta xilic ti tratee. Yan ti jteclum ti buch'utic c'ux ta xa'iic ti Diose, mi ja'uc ta stsiq'ues yo'ntonic, ta stsal yu'unic ec ti c'usitic ta xc'ot ta pasele.

³³ Ti bijil viniquetic yu'un ti jteclume, ep jnaclejetic ta sbijubtasic. C'u stu un, ti stuquique ta xlic yich'ic milel. Ta xlic yich'ic chiq'uel. Ta x'elc'anbatic loq'uel ti c'usitic x'ayan yu'unique. Ta xich'ic mosovinel yu'un jyanlum ti ta namal banomile. Ti va'i s'elan ta xc'ot ta pasel taje, ta xjalij jutuc.

³⁴ C'alal ta xc'ot yorail nutsel ilbajinele, oy bu ta xich'ic jutuc coltael ti steclumal Diose. Ac'o mi oy jlomuc ta svol sbaic talel ta stojol un, ja' no'ox ta spasic ti jech lec ta xa'iique.

³⁵ Ja' jech xtoc ta xich'ic nutsel jlomuc ti buch'utic laj sbijubtasic ti jteclume, yo' jech ta xq'uelbat yo'ntonic ti ta xich'ic mesel tusele, yo' jech mu'yuc c'usi chopol ta xtabatic ti c'alal ta sta sc'ac'alil ti c'usi ora albile.

³⁶ “Ti ajvalil ti oy ta yolon ti yolon xocon sloq'ueb c'ac'ale, ta xlic spas ti c'usi xal ti yo'ntone. Ta xc'ot ta pasel yu'un ti stuc xa no'ox ti cajal xa'i sba xchi'uc ti stoyobbaile, ti ja' peq'uel ta xcom yu'un scotol ti yan diosetique. Spajeb xa no'ox chopol ta xc'opoj ta stojol ti cuxul Diose. Scotol ti c'usitic ta xlic spase, lec ta xbat yu'un c'uc sjaliluc, ja' to ti mi ta x'ac'bat talel tsitsel yu'un ti Diose. Yu'un ti c'usi ta snop ta spas ti Diose, ta xc'ot ta pasel ono'ox yu'un.

³⁷ Yu'un ti ajvalil taje, mi ja'uc oy stu ta xil ti diosetic yu'un ti stot sme'tac ti laj ech'icuque, mi ja'uc ti diosetic ti ja' yajvalic ti antsetique, mi ja'uc ti yan diosetique, yu'un stuc no'ox ti sbisoj sba ti ja' cajal c'otem ta stojol scotol ti yan diosetic taje.

³⁸ Manchuc mi jech un, ta xlic sva'an ta dios ta snijanel xchimanel sba ti dios yu'un ti pojobbailetique. Ta xlic yich' ta muc' ti ja' ta sbis ta dios taje, ti c'alal mu'yuc laj snijan xchiman sbaic ta yich'el ta muc' ti stot sme'tac ti laj ech'icuque. Ta xac'beic ta matanal ti oroe, ti platae, ti c'upil sba tonetique, xchi'uc ti c'usitic toj tunel ti toyolic stojole.

³⁹ Yo' jech ta spoj ti nac'obbailetique, ta xlic st'uj viniquetic ti ta xlic snijan xchiman sbaic ta stojol ti jun dios ti ma'uc ojtiquinbile. Scotol ti buch'utic ta snijan xchiman sbaic ta stojol ti ajvalil taje, ta xlic yac'an ta ich'el ta muc'. Ta xac'be cajal yabtelic. Ta xac'be sbanomil xtoc ti ja' xc'ot ta smotonic yu'une.

⁴⁰ “C'alal po'ot xa xc'ot yorail ti stsutsesele, jech ti ajvalil ti oy ta yolon ti yac'ol xocon sloq'ueb c'ac'ale, ta xbat stsac ta leto ti ajvalil ti oy ta yolon ti yolon xocon sloq'ueb c'ac'ale. Jech ti ajvalil ti oy ta yolon ti yac'ol xocon sloq'ueb c'ac'ale, co'ol s'elan jun sutub ic' ti xvolet no'ox batel ta stsaquel ta leto ti buch'utic oyic ta yolon ti yac'ol xocon sloq'ueb c'ac'ale. Nojem ta xcom yu'un sbejel ti jteclum ta carretaetic yu'un ti ac'ob-letoe, ti soldadoetic xchi'uc ti sca'ique, xchi'uc ti mu no'ox albajuc yepal ti barcoetique.

⁴¹ Ja' jech xtoc ta x'och batel ta banomil ti C'upil Sba sbiinoje. Mu no'ox albajuc ta smil comel ti jnaclejetic teye. Ja' no'ox un, ta to xcolic ti jnaclejetic ta Edome, ti ta Moabe, xchi'uc yepal to ta xcolic ti c'u yepal oyic ta yosilal ti Amone.

⁴² Jech ti yajsoldadotaque ta xu'ninic ech'el yan jteclumetic, mi ja'uc xa ono'ox xcol ec ti jteclum Egiptoe.

⁴³ Ta xich'ic batel ti oroe, ti platae, xchi'uc scotol ti c'usitic toj alaq'uic sba ti toj tunel ti ja' sc'ulejal ti jteclum Egiptoe. Ts'acal to un, ta xc'ot ta stojol ec ti jteclum Libiae, xchi'uc ti jteclum Etiopiae.

⁴⁴ Ta xc'ot ta sni' ta xchiquinic ti buch'utic oyic ta sloq'ueb c'ac'ale, xchi'uc ti oyic ta yolon ti yolon xocon sloq'ueb c'ac'ale, ti mu xa sna' c'usi xu' ta spasic xchi'uquique. Ja' yu'un un, capem xa sjolic ta xloq'uic batel ti oy xa ta yo'ntonic ti mu no'ox albajuc ta xmilvanique.

⁴⁵ Mi laj taj une, ta xlic lamlicuc ta naclej ti ta xchotiic ta ajvalilal ta banomil ti oy ta o'lol yu'unic ti nabe xchi'uc ti ch'ul vits ti sbiinoj C'upil Sbae. Ti bu taj une, ta xc'ot ta lajel ti c'ac'al ora yu'une. Mu'yuc xa buch'u xu' ta xpojun.