Daniel 10 - Bible in Tzotzil de Chamula

Ti c'usi laj yil ti Daniel ti c'alal jam sba sat ti co'ol s'elan oy ta ti' uc'um Tigrise

¹ C'alal yoxibal (10) xa ox jabil yochel ta ajvalilal ti Ciro tey ta jteclum Persiae, jech ti Daniel ti sbiinoj Belsasar xtoque, toj tunel ta j'ech'el ti c'usi laj yile. Ja' no'ox un, toj vocol ta a'yiel ti c'usi ta xac' ta na'ele. Ac'o mi jech un, ti Daniele lic sts'ijan sba lec ta snopel c'usi xal o taje. Va'i un, lic t'unuc yu'un smelol ti c'usi laj yile.

² Ta yorail ti jech c'ac'al taje, ti vu'un Danielune, oxib (3) xemuna sjalil ti oyun ta at-o'ntone.

³ Mu'yuc laj jtun laj jlajes ti lequil ve'liletique. Yu'un mu'yuc laj jlajes ti beq'uete, ti vinoe. Mi ja'uc laj cac'be jba muil poxil ech' ti oxib (3) xemuna taje.

⁴ C'alal xchanibal xa ox xcha'vinic (24) c'ac'al ti sliqueb u yu'un ti jabil taje, oyun yilel laj quil ta sti'il ti muc' ta uc'um Tigrise.

⁵ Ta jech to yepal, laj jtoy batel jsat. Laj quil jun vinic ti lequil saquil poc' ti sc'u' slapoje. Meltsanbil ta bats'i oro ti xchuque.

⁶ Co'ol s'elan xojobal c'anal ton ti xlaplun no'ox sjunul yilele. Yan ti sat yelove, co'ol s'elan jech c'u cha'al xjapluj ti sac tsel ta q'uelele. Ja'uc ti sbec' sataque, co'ol s'elan tiletel toj yilel. Jech ti sc'obtaque, ti yacantaque, co'ol s'elan c'anal taq'uin ta xac' ti xojobale. Jech ti sc'opojele, co'ol s'elan ti ep buch'u xvochet ta j'ech'ele.

⁷ C'ajomal no'ox vu'un ti jam ti jba jsat ti c'usi laj quile. Yu'un ti yantic ti buch'u tey xchi'inojicune, mu'yuc xilic jutebuc c'u s'elan. Yu'un tsalatic yu'un ti xi'ele. Jech ti stuquique bat snac' sbaic ta anil.

⁸ Yu'un jch'ulel-tuc xa licom ti c'u s'elan mu no'ox albajuc c'usi laj quil ti c'alal jam ti jba jsate. Sac pac'an xa licom yu'un ta j'ech'el. Jutuc xa ma' ti mu lilom ta lum yu'un laj ca'ie.

⁹ Va'i un, c'alal laj ca'i ti c'opoj talele, toj batelun yu'un. Jeche' xa telel licom ta lum.

¹⁰ Va'i un, tal jun c'obal ti laj snitun liquele, ja' to ti c'uxi laj yac' liquel yip ti coc jc'ob liva'ie.

¹¹ Va'i un, xi lic yalbune: “Daniel, ti c'uxubinbilot yu'un ti Diose, a'yio ava'i lec ti xi ta xcalbote: Lican, va'lan, yu'un tacbilun talel ta aventa.” C'alal laj yo'nton ta yalel comel ti lo'il yich'oj talele, jech ti vu'une xinicnun lic va'icun.

¹² Ja' yu'un un, xi laj yalbune: “Mu xaxi', Daniel, yu'un ti c'alal laj anijan aba lec ta snopbel smelol ti c'usi toj vocol ti laj avil ta sliqueb c'ac'ale, ti loc' ayan ta avo'nton ti laj abic'tajes aba ta stojol ti Dios avu'une, laj ya'i ti ac'opojel ati'inele. Ja' yu'un un, lital ta atojol.

¹³ C'u stu un, ti jun ánjel ti tsots xu' yu'un ti sventainoj ti jteclum Persiae, loc' xa jun xcha'vinic (21) c'ac'al ti contra xiyilune. Ja' no'ox un, ti Miguele, ti ja' jun banquilal ánjel ti x'ech' to jelavem xu' yu'une, tal stic' sba ta scoltaelun. Jech ti vu'une, jtuc xa licom xchi'uc ti ajvaliletic yu'un ti jteclum Persiae.

¹⁴ Ja' yu'un un, tal jchapbot ava'i lec ti c'usi ta xc'ot ta stojol ti alumal ta ts'acale. Yu'un ti c'usi la'ac'bat avil ti c'alal jam ti aba asate, ja' me smelol ta xac' ta na'el ti mi c'ot yorail jech taje.”

¹⁵ C'alal jech yacal ta yalbelun ti va'i s'elan taje, jech ti vu'une, j'ech'el nijilun ta banomil. Mi ja'uc juteb c'usi xloc' ta alel cu'un.

¹⁶ Ta jech to yepal un, oy Buch'u xco'olaj s'elan jun vinic yilel ti tal yac' sc'ob ta quee. Va'i un, xi laj calbe ti va'al ta jts'ele: “Cajval, ti jech jam ti jba jsat ta sq'uelel ti c'usi laj quile, laj yac'un ta at-o'nton ta j'ech'el, ti tey xa mu'yuc c'usi xu' cu'un licom yu'une.

¹⁷ ¿Mi yu'un la xu' to ono'ox ta xchi'inot ta lo'il ti avajtunel li'e, ti c'alal ch'abal xa ti yipal yu'une, ti mu ja'uc stac' xich' lec ti iq'ue?”

¹⁸ Jech ti Buch'u xco'olaj s'elan vinic yilele, lic snitun yan velta. Ja' jech litsatsub liquel.

¹⁹ Va'i xtoc un, xi laj yalbune: “Mu xaxi', mi ja'uc xavul avo'nton. Yu'un c'uxbinbilot yu'un ti Diose. Vuleso lec ach'ulel, tsotsan lec ava'i.” C'alal jech yacal ta xisc'oponune, jech ti vu'une laj ca'i ti litsatsub talele. Xi laj calbee: “Cajval, c'opojan talel ca'itic un, yu'un laj atsatsubtasun xa.”

²⁰ Jech xtoc un, xi laj yalbune: “¿Mi xana' c'u cha'al ti tal jq'uelote? Yu'un avi tana li'e, ta xisut batel ta stsaquel ta leto yan velta ti banquil ánjel ti sventainoj ti jteclum Persiae. C'alal mi tsuts cu'un ta stsaquel ta letoe, ta xtal xtoc ti banquil ánjel yu'un ti jteclum Greciae.

²¹ Avi tana li' une, ta xcalbot ava'i smelol ti c'u s'elan ts'ibabil ta jpoc svunal ti melele: Ti stsaquelic ta leto taje, ja' no'ox coltabilun yu'un ti Miguele, ti ja' banquilal ánjel ti sventainoj ti jteclum Israele.