Cantares 7 - Bible in Tzotzil de Chamula

Ti vinique xi ta xale:

¹ Avuni c'otebal o xa ta yantsil nich'on ajvalil ti bajal ta xonobil ti avuni oque. Cu'ajtic xa ti avuni valopate, ja' xa yilel ti c'usi loc'tabil yu'un ta lequil oro ti buch'u oy sbijil ta sloc'taele.

² Oy no'ox ti lequil vino ta avuni mixic' ti co'ol s'elan bis setele, ti co'ol s'elan jol trigoetic ch'iem ta yut roxatique.

³ Li avuni chu'taque, uni vach te'tical chij yilel ti chib xa cotajtique.

⁴ Ti avuni nuq'ue, tumul xa ta q'uelel ja' xa yilel ma' ti toyol luchlebal meltsanbil ta saquil baxtone. Ti sbec'tac avuni sate, co'ol s'elan chib ts'anleb vo' ti oy ta jteclum Hesbón ta sts'el ti'na yu'un ti Bat-rabime. Co'ol s'elan toyol luchlebal ta Líbano ti tuchul xa ti avuni ni' sq'ueloj batel ti jteclum Damascoe.

⁵ Ti avuni jol ta ajunleje, ja' xa yilel ma' ti toyol vits yu'un ti Carmeloe; yax'elan tsajal xela no yilel ti xi xq'uiet ti stsatsal avuni jole; tsacbil lec c'ot ti ajvalil ta syomobil ti jolale.

⁶ Snup cuni ch'ulel, jlo'laej ch'ulelal antsot ta j'ech'el, c'upil avuni ba, stuc xa no'ox jech avutsil ta j'ech'el.

⁷ Ti alinlinele, co'ol s'elan jun limlim xan, sat xa xan yiluc votajtic ti avuni chu'taque.

⁸ Jech o xal ta ximuy ca'i ti ta xane yo' ta xcu'nin ti jujuvoj sate. Ja' xa yilel un, ma' ti jujuvoj sat uva ti avuni chu'taque; smuil xa mantsanaetic xjamet ya'yel ti ta xavich' iq'ue.

⁹ Ti avuni pac'ove, co'ol s'elan lequil vino xchabioj, ti mu xlaj ta biq'uel ti chi' xa xa'i ti que jti'tique.

Ti antse xi ta xale:

¹⁰ Xi s'elan ti yu'unun xa ti snup cuni ch'ulele: ti bu c'alal yac'oj ti sjol yo'nton ta jtojole, jbainoj ta stael cu'un.

¹¹ Sob me ach'a un, snup cuni ch'ulel, batic le' ta jote. Somlucutic xa ta alheña nichimtic ta x'ech' ti ac'ubal cu'untique.

¹² Ta yoc'omal un, batic ta ts'unubal uvaetic. Jq'ueltic quic mi botajtic xa ta nich, mi ta x'analij xa, mi tinil xa ta nich ti granadaetique. Ti bu taj une, mu'yuc sjalal co'nton ta atojol un.

¹³ Xpaq'uet xa smuil ti mandrágoraetic une. Snup cuni ch'ulel, xi s'elan jq'uejojbot ti sat te'etic ti ep ta tos ch'iem ta sti' jnatique: naca taquintasbil sat te'etic xchi'uc sat te'etic ti naca to laj yich' tulele.