Cantares 4 - Bible in Tzotzil de Chamula

Ti vinique xi ta xale:

¹ C'upil aba ta j'ech'el, snup cuni ch'ulel. C'upil avuni ba ta j'ech'el. Co'ol s'elan sat cha'cot uni paloma yilel ts'ililic xa ta xq'uelvan talel ti avuni sat macbil ta chaj-chaj poq'ue. Ti stsotsil avuni jole, co'ol s'elan epal tentsunetic ti xq'uiet no'ox ta vitstic yu'un ti Galaade.

² Ti stanaltac avuni ee, stuc xa no'ox jech ta j'ech'el, co'ol s'elan epal chijetic ti naca to laj yich' pocbel yuni tsotsil yo' ta xich' loc'bele.

³ Tsojic xa ti sti'iltac avuni ee, co'ol s'elan jech c'u cha'al ti tsajal noe. Oy slo'laob ti avuni c'ope, co'ol s'elan cha'voj granada te' ti avuni chov ti macbil ta chaj-chaj poq'ue.

⁴ Ti avuni nuq'ue, c'upil yuni ba tumul ta q'uelel, ja' xa yilel ma' ti toyol luchlebal ti naca anbil meltsanbil yu'un ti Davide. Le' une, sjoc'leb yu'unic lajuneb ciento (1,000) ta chop macobbail, smacobbailic ti tsatsal soldadoetique.

⁵ Li avuni chu'taque, uni vach te'tical chij yilel, ti chib xa cotajtic ta sa' yuni ve'elic ta yut roxatique.

⁶ Sc'an to sacub talel ti osile, yo' to ac'ubaltic, ta xibat ta vits ti bu xpaq'uet smuil ti mirrae, ta stselejtic ti bu xpaq'uet smuil ti pome.

⁷ C'upil aba ta j'ech'el, snup cuni ch'ulel, ta avuni junul c'upil avuni ba. Mu'yuc c'usi sbajobil avu'un jutebuc.

⁸ Cuni lecom, jchi'in jbatic yalel ta te'tic yu'un Líbano, jchi'in jbatic yalel ta te'tic yu'un ti Líbano une. Ti ta toyol vits yu'un ti Amanae, tuc'ulano avil lec batel ti stenlejale, ti toyol vits yu'un ti Senire, ti toyol vits yu'un ti Hermone, ti bu to oy svitsal snail-ch'enic ti leone, ti ta toyol vitsetic ti bu xa snail ti jchop o ta bolometique.

⁹ Uni tseb, cuni lecom, laj xa avu'ninbun ti co'ntone; u'ninbil c'ot co'nton avu'un c'alal laj quil snaultac avuni nats' c'alal laj aq'uelun talele.

¹⁰ Uni tseb, cuni lecom, mu xa c'usi xtaun o ti xameselete. Ti jech xameselete, stuc xa no'ox jun yutsil ta j'ech'el, ja' mu sta yutsil xchi'il ti vinoe. Ti muil poxiletic avu'une, stuc xa no'ox jun yutsil smuil, ja' mu sta xpaq'uet smuil scotol ti yan muil poxiletique.

¹¹ Cuni lecom, stuqueb ajapom ti avuni ee. Naca ajapom xchi'uc chu' vacax xchabioj ti avuni ee. Ti va'i s'elan xpaq'uet smuil ti ac'u' apoq'ue, mu xa yanuc jech c'u cha'al xpaq'uet smuil ti vits Libanoe.

¹² Ti vo'ote, uni tseb, cuni lecom, yavil nichimot ti bajal leque, tuquem vo' ti macbil leque, sat vo' ti pac'bil leque,

¹³ jun yav ts'unubal ti bu cuchajtic no'ox liquel sat ti granada ti c'upil sba ta lo'ele, jun yav nichim ti tuquemic no'ox xnich ti alheñae,

¹⁴ ti nardoetique xchi'uc ti azafrane, ti jchop o ta muil vale'e, xchi'uc ti canelae, ti ep ta tos te'el pometique, ti mirrae, xchi'uc ti áloe, scotol xpaq'uet no'ox smuil ti c'usitic ep ta tos taje.

¹⁵ Ti sat vo' ta yut ts'unubale, ta xvul ta tuquel ta jun joc' ti liquem talel yacan ta vits Libanoe.

¹⁶ Jumetel ic' ti oyot ta yolon ti yolon xocon sloq'ueb c'ac'ale, jumetan liquel. Jumetel ic' ti oyot ta yolon ti yac'ol xocon sloq'ueb c'ac'ale, jumetan talel li'e. Jumetan liquel ta stojol ti yavil jts'unubale, tanijuc batel avu'unic ti xpaq'uet smuil ti muil poxil yu'une. La' li' ta ts'unubaltic avu'une, snup cuni ch'ulel, tuno ta slajesel ava'i ti c'upil sba sat te'etic yu'une.