Amós 9 - Bible in Tzotzil de Chamula

C'alal ta xchapanvan ti Diose, mi ja'uc junuc ta xcol

¹ Laj quil ti Dios ti oy ta sts'el ti altar ti xi laj yalbune: “Pujo ta majel ti oyetique, ja' to ti c'uxi ta xlic yuq'uilajuc ta niquel ti cajti'naetique. Lilijemuc, cajal c'otuc ta sba ti jnaclejetique. Xi s'elan ta xc'ot ta pasel cu'un ta stojolic ti buch'u cuxul to chlaj comicuque: Vu'un ta jmil ta espada. Ac'o mi ta to xjatavic, yu'un mi ja'uc junuc ta xcolic.

² Ac'o mi ta xbat snac' sba ti bu xa c'alal spajeb snatil ti banomile, ta jloq'uesic talel ti bu taje. Ac'o mi ta xmuyic batel ti bu xa slajeb staylej ti vinajele, ta jipic yalel tal ti bu taje.

³ Ac'o mi ta xbat snac' sbaic ta vits Carmeloe, ta xbat jsa'ic ti bu taje. Mi ta xbat snac' sbaic ta snatil ti nabe, ta xcalbe mantal ti xi'bal sba chanul nabe yo' jech ta xbat slilin ta ti'el.

⁴ Ac'o mi bec'bil ta xloq'uic batel, ti ic'bil ta xbatic yu'un ti scontraique, ye'bil yespadailic cu'un yo' jech ta xlajic ta milel. ¡Cac'oj jsat ta sq'uelel ti c'usi chopole, ma'uc ti c'usi leque!”

⁵ Ti Ajvalil Dios ti scotol xu' yu'une, c'alal ta x'ech' stij ta majel ti banomile, ta xlic unijuc ta ulel yu'un ti banomile, ta xlic ochicuc ta oq'uel ti jnaclejetic yu'une. Ti banomile xvuc'uq'uet no'ox ta yalel ta muyel jech c'u cha'al ti xvuc'uq'uet no'ox ta yalel ta muyel ti uc'um Niloe.

⁶ Ti Diose smeltsanoj sna ta vinajel, ti pujul yaxts'ijan ta toyol yu'un ti banomile. Ta xic' talel ti vo' ti oy ta muc' ta nabe, ti xchajet no'ox ta xtal yu'un yo' jech ta smalta ti banomile. Jech o xal, Dios, xi sc'oplal.

⁷ Ja' jech s'elan ti xi laj sva'an sba ta yalel ti Diose: “Israeletic, ti ta xquil ta jba ta jsate, co'ol a'elanic jech c'u cha'al ti etiopeetique. Jech c'u cha'al laj quic'oxuc loq'uel talel ta Egiptoe, ja' jech laj quiq'uic loq'uel ta Creta ti filisteoetique, xchi'uc xtoc ti laj quiq'uic loq'uel ta Kir ti arameoetique.”

⁸ Ti Diose ta xil ti ja' jsa'muliletic ti jchop jteclum li'e, ti xi ta xal xtoque: “J'ech'el ta jtubbe sc'oplal ya'iic ta banomil. Ja' no'ox un, mu j'ech'eluc ta jtubbeic sts'unubaltac ti Jacobe. Ti vu'un Diosune, mu me lo'iluc no'ox ta xcal.

⁹ “Ta xcal mantal ti ac'o yich' vuyilanel ta c'uyel ti Israele jech c'u cha'al ta xich' yuq'uilanel ti trigo ta xchichinobile, ti mu jbejuc trigo ti ta xbaj ta lum xtoque.

¹⁰ Scotolic ti jsa'muliletic yu'un ti jteclumale, ta xlajic ta milel ta espada, xchi'uc scotol ti buch'u xi ta xalique: ‘Mu xc'ot ta pasel un. Mu xvul ta jtojoltic ma ti c'usi chopole.’

Ta xc'ot ta pasel ta xich' lecubtasel ti jteclum Israele

¹¹ “Ta xc'ot sc'ac'alil ti ta jcha'va'an ta ach' ti slomemal na ti Davide. Ta jmac ti bu jomemique. Ta ach' ta xlic jva'an ti jech jinemic xae. Ta ach' ta xlic jmeltsan jech c'u cha'al laj yich' meltsanel ta vo'nee,

¹² yo' jech ti buch'utic cuxulic ta xcomic ta jteclum Edome, xchi'uc ti oyic ta scotol ti muc'tiquil lumetic ti ja' ono'ox cu'untaque, ta xc'ot ta yu'unic yan velta ti jteclum Israele.” Ti Diose laj xa yac' ye sti'. Ja' yu'un un, ta xc'ot ta pasel yu'un.

¹³ Xi ta xal ti Diose: “Xi yelanil ta xc'ot ta pasele: c'alal mu to ta xlaj yich' tsobel ti trigoe, sta xa ox yorail ta xlic yich' loquel ti osile. C'alal mu to ta xlaj yich' pits'el ti uvae, sta xa ox yorail ta xlic yich' ts'unel ti trigoe. Buyuc no'ox ta vitstic, ta stenlejtic x'oquin no'ox ti ya'lel uva jech c'u cha'al ti vo'e.

¹⁴ Ta xquiq'uic talel ta jteclum Israel ti jteclum ti bec'bil loq'uic ta slumalique. Ta xlic xcha'va'anic ta ach' ti jteclumetic ti lilijemic xae. Ta xlic cha'naquiicuc. Ta xlic sts'unic ti uvae. Ta xuch'beic ti ya'lele. Ta sts'unic ti c'usitic stac' tunel lajesele. Ta stunesic ti c'usitic xlaj loc'uque.

¹⁵ Ta jnacanic ta yosilal sbanomilic stuquic. Ta jbel sc'oplal, mi ja'uc xa ta xich'ic beq'uel loq'uel ti ta sbanomilic ti laj cac'beique.” Ti Dios ti ja' Ajvalile, mu me lo'iluc no'ox ta xal.