Amós 8 - Bible in Tzotzil de Chamula

Ti toc'on lo'bolal sat te'etic ti oy ta moche

¹ Xi s'elan laj yac'bun quil ti Ajvalil Dios jech c'u cha'al li'e: Oy jun moch tiq'uil toc'on lo'bolal sat te'etic.

² Va'i xtoc un, xi laj sjac'bune: “¿C'usi laj avil, Amós?” “Toc'on lo'bolal sat te'etic ta xquil oy ta moch”, xcut. Xi laj yalbun ti Dios xtoc une: “Ja' xa jech sta'ajemal ti Israele. Ta j'ech'el mi ja'uc ti oy bu ta jch'aybeic ti smulique.

³ Ta xc'ot sc'ac'alil ti ta xjoybij ta me'inal ti xlaetic no'ox ta q'uejimol ta muc'tiquil naetique. Yu'un ep jnaclejetic ta xchamic. Jech xtoc ts'ijil no'ox c'op jip xi batel ti animaetique. Ti vu'un Diosune, mu lo'iluc no'ox ta xcal.”

Nopaj xa talel sc'ac'alil ta xich' chapanel ti Israele

⁴ A'yio ava'iic li'e, ti vo'oxuc ti ta xavilbeic svocol ti buch'utic biq'uit yac'oj sbaique, ti ta xavilbajinic ta j'ech'el ti me'un mu'nat ti ta alumalique.

⁵ Ti vo'oxuque xachi ta xavalique: “¿C'usi to ora ta x'ech' sq'uinal ti ach' ue yo' jech xu' ta jchontic ti trigoe? ¿C'usi to ora ta x'ech' sc'ac'alil ti cuxob o'ntonale yo' jech xu' toyol ta jchontic ti sat ts'unubale, ti ja' o yorail ti mu ts'acaluc ta xich' tunesel ti sbisobile, ti ja' o yorail ti mu ts'acaluc ta xich' aq'uel ti c'usi chechbil ta xich' bisele?

⁶ Quilbetic lec svocolic ya'iic ta j'ech'el ti me'un mu'natetique, ja' to ti c'uxi ta xchon yoc sc'obic ta jtojoltic ti ta xc'otic ta mosovil yo' jech ta xtoj yu'un ti yilique, ac'o mi c'ajomal jchop uni xonobil. C'otuc ta pasel ti xchi'uc xa solepal ta jchonbetic ti trigoe.”

⁷ Xi laj sva'an sba ta yalel ti Dios yu'un ti Israele: “Ta j'ech'el mi ja'uc ta xch'ay ta co'nton ti c'u s'elan laj xa spasique.”

⁸ ¿Mi yu'un la mu xnic ti banomil yu'un scotol ti va'i s'elan taje? ¿Mi yu'un ca mu x'ochic ta oq'uel scotol ti jnaclejetic yu'un taje? Ti banomile xcototet no'ox liquel ti xyal xmuy no'ox jech c'u cha'al ti uc'um Nilo xyal xmuy no'ox ta spase.

⁹ Xi ta xal ta jamal ti Diose: “Yu'un ti jech c'ac'al taje, ta xc'ot ta pasel cu'un ti ta x'ic'ub ti banomil ti c'alal ja' o yorail ti o'lol c'ac'ale. C'alal xt'ajalin ti c'ac'altique, ta xc'ot ta pasel cu'un ti ta x'ic'ub ti banomile.

¹⁰ Ti q'uin ta xapasique, ta joybin ta oq'uel avanel ta scoj ti oy buch'utic ta xchamique. Ti muyubajel ta q'uejimole, ta joybinbe ya'i ta me'inal oq'uel yu'un ti lajel jtubele. Ta xc'ot ta pasel cu'un ta atojolic ti lamal ta xvul ti avocolique, ti xat'anbunic xa ta loq'uel ti stsotsil ajolic ta scoj ti mu x'ech' xjelav ta xava'iic ti me'inale. Yu'un ta xc'ot ta pasel ti jech ta xa'oq'uic jech c'u cha'al ta x'oc' ti buch'u ch'ay ti c'ajomal no'ox yo jun ti yole. Yu'un mu xnel ta xava'iic ti jech c'ac'al taje.”

¹¹ Xi laj sva'an sba ta yalel ti Diose: “Ta xc'ot sc'ac'alil ti ta xcac' taluc vi'nal ti li' ta banomile. Ma'uc yu'un ch'abal ti ve'lile. Ma'uc yu'un oy ti taqui ti'ile. Ti vi'nale, ja' ti juteb ta yo'ntonic ta sc'an ta xa'i ya'iic ti sc'op Diose.

¹² Ti jnaclejetique xtal xbatic ta jujujot ta sa'el ti sc'op Diose. Ta xbatic ti xi ta jujujot to sti'il ti nabe, ti xi ta stuq'uil yolon ti yolon xocon sloq'ueb c'ac'ale, ti xi ta stuq'uil ti sloq'ueb c'ac'ale. C'u stu un, mi ja'uc ta staic ta sa'el.

¹³ Ti c'upil sba c'ac'al tsebetique, xchi'uc ti tsatsaquil jva'lej queremetique, ta xyalic ta lum scoj ti taqui ti'il ti jech c'ac'al taje.

¹⁴ Ti buch'utic ta sva'anic ta rextico ti loc'obbailetic ti oy ta jteclum Samariae, ja' ti buch'utic xi ta xalique: ‘Ta jva'an ta rextico ti dios yu'un ti Dane’, mi mo'oje, ‘Ta jva'an ta rextico ti dios yu'un ti Beersebae’ ti xiique. Ti buch'utic taje ta xyalic ta lum, mi ja'uc xa ta stam sbaic liquel.”