Amós 7 - Bible in Tzotzil de Chamula

Jam ba satil ta yilel ti c'ulubetique

¹ Xi s'elan laj yac'bun quil ti Diose: C'alal naca to laux ta loq'uel ti ts'unubaletic ti c'alal laj xa ox yich' tsobel sts'unubal ti ajvalile, laj quil ti ja' o yacal ta yesomtael c'ulubetic ti Diose.

² C'alal vololic ti c'ulubetic ta stsutsel ti slajeb xa ti c'usi oy yanale, xi laj cale: “Ch'ayo jmul jcolo'cutic, Dios. ¿Mi yu'un ta la xcuch yu'un steclumal Jacob ti c'alal uni jutebic no'oxe?”

³ Va'i un, ti Diose laj sutes sba ti c'u s'elan snopoje, ti xi laj yale: “Bu la xata ti ta xc'ot ta pasel une.”

Jam ba satil ta yilel ti c'oq'ue

⁴ Xi s'elan laj yac'bun quil ti Diose: Laj quil ti laj stac talel muc'ul c'oc' ti ta xac'be yich' tsitsel ti muc' ta natil nab ti yacal xa ta soques xtoc ti osil banomile.

⁵ Xi laj calbe ya'i une: “Avocoluc, Cajval, pajeso to aba. ¿Mi yu'un ta ono'ox la xcuch yu'un ti steclumal Jacob c'alal jutebic no'oxe?”

⁶ Va'i un, ti Diose laj sutes sba ti c'u s'elan snopoje, yu'un xi laj yale: “Bu la xata ti ta xc'ot ta pasel xtoque.”

Jam ba satil ta yilel ti c'usi xchechechet ta sbise

⁷ Ti Diose xi to s'elan laj yac'bun quil jech c'u cha'al li'e: Va'al ec ta sts'el ti jun pac'bale ti stsacoj ti c'usi xchechechet ta stunes ti albanyile.

⁸ Va'i un, xi laj sjac'bune: “¿C'usi ta xavil, Amós?” “Ja' jun plomo ti ta stunes ti albanyile”, xcut. Va'i un, xi laj stac'bune: “Ti plomo ti xchechechet ta stunes ti albanyile, ja' jech ta xquil o c'u s'elan stuq'uil yutsil stalel ta spasic ti jteclumal Israele. Laj xa sc'oplal ti ta to jch'aybeic ti smulique.

⁹ Ti ch'ul c'opojebaletic yu'un snitilultac ti Isaaque, ta xc'ot ta pasel ti ta xlilije. Ti ch'ul naetic yu'un ti Israele, ta xc'ot ta pasel ti ta xlilije. Yu'un ta jtsac ta milel ta espada snitilultac ti Jeroboame.”

Ti Amose ta svul sbaic xchi'uc ti Amasíase

¹⁰ Ti Amasíase, pale yu'un ti jteclum Betele, xi laj stac batel mantal ta yalel ta stojol ti Jeroboam ajvalil yu'un ti Israele: “Ti Amose xvolet jmoj xchi'uc ti jnaclejetic yu'un Israel ta xchapel ti ta spaybot ac'oplal ti Jcuch abtelote. Jech ti jteclume mu xa ts'icbaj ta xa'iic ti xvulvune.

¹¹ Ta xvinaj ti xi s'elan ta xale: ‘Ti Jeroboame, espada xa xa'i o xcham xlaj. Yu'un scotol ti jteclum Israele, bec'bil ta xloq'uic ta slumalic.’ ”

¹² Laj taj une, ti Amasíase xi laj yalbe ya'i ti Amose: “Loc'an batel li'e, uni j'alc'op. Yu'un mi ja' jech ta xata o ave'el ta xava'i ta yalel ti c'usi ta xvul ta loq'uele, batan ta jteclum Judá.

¹³ Altic no'ox ta j'ech'el ti li' no'ox xavulvun ta yalel ti c'usi ta xvul ta loq'uel ti li' ta jteclum Betele. Yu'un ja' sna stuc ti ajvalile, xchi'uc xtoc li' oy ti bats'i ch'ulna yu'un ti jteclume.”

¹⁴ C'u stu un, xi tac'bat yu'un ti Amose: “Mi ja'uc jutebuc j'alc'opun, mi ja'uc jech ta jc'an. Ta jta jve'el ta uni q'uel-chij, xchi'uc ta stsobilanel ti uni te'tical icuxe.

¹⁵ Ti Diose laj sloq'uesun ti jech jq'uel-chijun to oxe, ti xi laj yalbune: ‘Batan, ba va'ano aba ta c'opojel ta jventa ta stojol ti jteclumal Israele.’

¹⁶ Ja' yu'un un cha'e, a'yio ava'i sc'opojel ti Diose. Ti vo'ote, xi s'elan ti ta xavale: ‘Mi ja'uc jutebuc xava'an aba ta c'opojel ta sventa ti Dios ta scontrainel ti israeletique. Mi ja'uc jutebuc oy c'usi xaval ta scontrainel ti snitilultac ti Isaaque.’

¹⁷ C'u stu un, xi s'elan oy c'usi ta xal ti Diose: ‘Ti avajnile, ta sba ta sat ti jteclume, ta xmulivaj. Jech xtoc ti aquerem atsebtaque, espada xa'i xcham xlajic. Yu'un ta orail ta xich' q'uelel ti ta xich' ch'aquel ti avosil abanomile. Jech ti vo'ot xtoque, ta xacham ta yosilalic ti buch'u yan ti sjol yo'ntonique. Ja'uc ti israeletic xtoque, nom ta xbatic ti chucbil ta xloq'uic batel ti li' ta slumalique.’ ”