Amós 6 - Bible in Tzotzil de Chamula

Ta xtub sc'oplal ti jteclum Israele

¹ Mu xa ono'ox cha'bel un, ti buch'utic mu'yuc no'ox svocolic ta xa'iic ti nacalic ta jteclum Sione. Mu xa ono'ox cha'bel un, ti buch'utic mu'yuc c'usi sna' ta xa'iic ti nacalic ta jteclum Samariae, ti banquilaletic ti ich'bil ye sti'ic yu'un ti muc'tiquil lum taje, ti xc'uletic ta sc'anic coltael ti israeletique.

² Batan avilic ta jteclum Calnee, q'uelic ti c'u s'elan ta xc'ot ta pasel ti bu taje. Ech'anic avilic ti bu ti muc' ta jteclum Hamate. Yalanic ech'el xtoc ta Gat ti oy ta yosilal filisteoetique. ¿Mi yu'un ta xanopic xana' ti toj lec oyoxuc ti vo'oxuque, ti ja' mu sta slequilic ti jteclumetic taje? ¿Mi yu'un ja' x'ech' to yutsil ti ateclumalique, ti ja' mu sta ti jteclumetic taje?

³ Ti vo'oxuque, mi ja'uc ta xanopic ti oy bu ta xvul ta loq'uel ti chopol ta xc'ot ta pasel junuc c'ac'ale. C'u stu un, yacal xa ta sa'el avu'unic ti muc' ta vocol ta xtal ta atojolique.

⁴ Ti vo'oxuque ts'eajticoxuc xa ta sc'upinel jun yutsiquil vayebal ti ac'bil lec xnichimaltac ta bax-tonetique, ti q'uiil no'ox asomlebic ti c'alal xyaquet ti aq'uinique, yu'un ja' apasob q'uinic ti ch'iom chijetique, ti jubemic ch'iom vacaxetique.

⁵ Lec ta xava'iic ta xaloc'taic q'uejimoletic jech c'u cha'al laj spas ti Davide. Ja' no'ox un, mi ja'uc xa a'yibaj lec smelol ti ama ta xavoq'uisanique.

⁶ Naca xa ta muc'tiquil bis ta xavuch'ic ti vinoe, ti naca lequiquil muil pox ta xatunesique. Mi ja'uc jutebuc oy ta avo'ntonic ti ta xlilij ti jteclume.

⁷ Ti vo'oxuque, ba'yel bec'bil ta xaloq'uic batel ta avosilic. Ta xtub sc'oplal ti xavochvunic no'ox ta spasel ti q'uine.

⁸ Laj sva'an sba ta yalel stuc ti Diose; ja' melel ti xi ta xal ti Ajvalil Dios ti scotol xu' yu'une: “Xti'et jol yu'un stoyobbailic steclumal ti Jacobe. Mu lecuc ta xquil ti muc'tiquil naetic yu'unique. Ta xcac' ochicuc ta yoc ta sc'ob yajcontraic jmoj xchi'uc ti c'usitic x'ayan teye.”

⁹ Ja' yu'un un, mi cuxul to ta xcom lajunvo' (10) viniquetic ta jbej nae, ta xchamic ti slajun-vo'alique.

¹⁰ Toj ech'em xi'el ta xac' c'alal mi oy buch'u ta spoy loq'uel ti yuts' yalal ti ta nae. Xi ta xalbe yan yuts' yalal ti ta yut nae: “¿Mi oy to buch'u tey xchi'inojot?” “Mu'yuc”, xi ta stac' talel ti june. Xi ta stac' ti buch'u ba'yel c'opoje: “Ch'an chan, naca mi loc'uc ta ave ta sbiiltasel ti Diose.”

¹¹ Ti Diose ta xloc' mantal yu'un ta slilinel ti muc'tiquil nae, xchi'uc ti bic'tal naetique, ti stuc xa no'ox slilijemal ta xcome.

¹² ¿Mi yu'un xu' ya'yel ti xbitet no'ox muyel ta tontic ti ca'etique? ¿Mi yu'un xu' ta xich' loquel ti banomil ti ts'ajal ta nabe? Ja'uc ti vo'oxuque, laj ajoybinic ta milobbail ti lequil chapanele. Ti lequil chapanele, laj ajoybinic ta at-o'nton.

¹³ Ta jeche' no'ox ta xapac'ta abaic ti xamuyubajic xae, ti xi ta xavalique: “Ta quiptic no'ox jtuctic ti jech laj jtatic ti xu' cu'untique.”

¹⁴ Chiquintao ava'iic lec, israeletic, ti xi s'elan ta xal ti Ajvalil Dios ti scotol xu' yu'une: “Ta xquic' talel jun muc' ta lum ti ta xilboxuc avocolic ta j'ech'ele, ti ta xlic c'alal to ta yolon ti yolon xocon sloq'ueb c'ac'ale, ti ta xc'ot c'alal to ta yolon ti yac'ol xocon sloq'ueb c'ac'ale.”