Amós 5 - Bible in Tzotzil de Chamula

Iq'uel sutel ta stojol ti Diose

¹ A'yio ava'iic ti jc'ope, israeletic, ts'et chiquintao ava'iic ti xi s'elan ta xime'inal q'uejin ta acontrainelique:

² Ti jech c'upil sba yutsil ti Israele, yal xa ta lum, mi ja'uc xa xu' ta stam sba liquel yan velta. Telel com ta yosilal stuc, mi ja'uc xa oy buch'u ta xtoyat liquel yu'un.

³ Xi ta xal ti Dios ta stojol ti israeletique: “Mi ta stac batel jmil (1,000) ta vo' viniquetic ta yaq'uel leto ta jun jteclume, c'ajomal xa no'ox vo'vinic (100) cuxul ta sutic talel. Mi ta stac batel vo'vinic (100) ta vo' viniquetic ta yaq'uel leto ta jun jteclume, c'ajomal xa no'ox lajunvo' (10) ta sutic talel.”

⁴ Xi ta xal ti Dios ta stojol ti israeletique: “La'ic ta jtojol, yu'un ja' jech ta xacuxiic.

⁵ Mu xabatic ta jteclum Betel. Mu xabatic ta jteclum Gilgal. Mi ja'uc xa'ech'ic ta Beerseba. Ti jteclum Gilgale, jbel sc'oplal bec'bil ta xloq'uic batel. Ti jteclum Betel xtoque, lilijem ta xcom ta j'ech'el.”

⁶ La'ic ta stojol ti Diose, ja' to jech xach'i xac'opojic. Yan mi mu jechuque, ta stac talel c'oc' ta sjunul yosilal ti Israele. Mu'yuc buch'u ta xtub yu'un ti c'oc' ta Betele.

⁷ Mu xa ono'ox cha'belucoxuc un, ti ta xajoybinic ta vocol ti tuq'uil chapanele, ti ta xavalopatinic ta j'ech'el ta xchapbel sc'oplal yo' lec oy ti yane.

⁸ Ti Diose laj smeltsan ti c'analetic xchi'uc ti xolome. Ti stuque ja' ta sjoybin ta ic'al osil ti sob ic'lumane. Ta sjoybin ta ic'al osil ti c'ac'altique. Ta sta ta iq'uel ti ya'lel nabe yo' jech xchajet no'ox ta xac' ti vo' ta banomile. Jech o xal, Dios, xi sbiinoj ti sc'oplale.

⁹ Ta xac'be yipal ta spojbel ti c'usi x'ayan yu'un ti buch'u mu tsalbaj xa'i sbae. Ta xac' taluc ti yan sba c'usi ta xc'ot ta pasel yu'un ti teye.

¹⁰ Mu xa ono'ox cha'belucoxuc un, ti xti'et ajolic yu'un ti buch'u ta spacbe sc'oplal ti oy c'usi lec ta xich' chapele, ti ta xachopol-c'optaic ti lequil rexticoe.

¹¹ Ti jech ta xavilbe svocol ti me'un mu'nate, ti ta xac'anbeic spatanil ti strigoe, mi ja'uc ta xac'upinic ta snainel ti anaic ti naca ta ton laj ameltsanique. Mi ja'uc ta xava'ibeic yutsil ta uch'el ti vino ti loc' ayan ta ats'unub-uvaique.

¹² Xcojtiquin lec ti xi s'elan spimil busul ti c'usitic chopol ta xapasique, ti mu'yuc slajeb ti amulique. Ta xavilbeic svocol ti buch'u oy stuq'uil sjol yo'ntone. Lec ta xava'iic stsaquel ti mich'ob c'abale. Ti c'alal oyic ta chapanobbaile, ta xc'ot ta pasel avu'unic ti ch'ab xi no'ox ta xchapanbel sc'op ti buch'u ch'abal smule.

¹³ Jech o xal un, ti buch'u oy sbijile, tsijil no'ox, yu'un soquem ti c'usi xc'ot ta pasele.

¹⁴ Ja' lec, ac'beic yipal ta spasel ti c'usi leque. Ictaic ta spasel ti c'usi chopole, ja' to jech ta xacuxiic. Ja' yu'un un, ja' melel unbi ti ta xavalic ti chi'inbiloxuc yu'un ti Ajvalil Dios ti scotol xu' yu'une.

¹⁵ Ti'oltaic ti c'usi chopole. C'otuc ta avo'ntonic ta spasel ti c'usi leque. Tuc'ulanic lec ta sq'uelel ti tuc'uc batuc lec ti chapanel ta chapanobbaile. Ti mi jech taj une, ja' to nan jech ta xlic c'uxubajuc yo'nton ti Ajvalil Dios ti scotol xu' yu'un ta stojol ti Israel ti cuxul to comique.

¹⁶ Xi ta xal ti Ajvalil Dios ti scotol xu' yu'une: “Ta scotol ti amaq'uetique, ta scotol ti beetique, x'avlajet no'ox liquel ta oq'uel ti jech mu xnel x'ech' ta xa'i ti svocolique. Ta xiq'uic talel ti buch'utic oyic ta osiltic ti jmojuc ac'o xchi'in sbaic ta at-o'ntone. Jech ti buch'utic ja' yabtelinojic ti oq'uele, ac'o oq'uicuc yu'un ti me'inale.

¹⁷ Ta scotol ti ts'unubaletique, c'ajomal xa oq'uel ta xvinaj c'alal ta xtal jtsitsoxuque.” Ti Ajvalile, mu me lo'iluc no'ox ta xal.

¹⁸ Mu xa ono'ox cha'beluc un, ti buch'u sq'uel xa ya'i ta anil sc'ac'alil yu'un ti Diose. ¿Mi yu'un laj xa sna'ic xa ti c'u s'elan ta xc'ot ta stojolique? Yu'un ja' ta xc'ot ta pasel ti ta x'ic'ub ti osile. Ma'uc ti xojobin xa ti c'ac'ale.

¹⁹ Yu'un co'ol s'elan jech c'u cha'al ti buch'u ta xjatav batel ta xi'elal ti leone, ti snupoj ta be ta xc'ot ti oso xtoque. Mi mo'oje, co'ol s'elan jech c'u cha'al ti buch'u ta x'och batel ta yut sna ti yicoj xa batel pac'bal ti ti'bil xa ono'ox ta chon ta xa'ie.

²⁰ Melel, ti sc'ac'alil ti ta xtal ti Diose, ja' ta xc'ot ta pasel ti ic' ta xcome. Ma'uc ti xojobin ti c'ac'ale. Yu'un ic' ta j'ech'el, mi ja'uc jutebuc sac jaman.

²¹ Xi ta xal ti Diose: “Yu'un chopol ta xquil, mi ja'uc xlaet co'nton yu'un ti q'uin ta xapasic ta sventa ti oy c'usi ach'unojique. Mi ja'uc lec ta xquil ti ch'ul tsoblej ta xapasic ti avalojique.

²² Mi ja'uc jutebuc ta jc'an ta jq'uelbe sat ti chic'bil matanal ti ta xavaq'uic ta sventa quich'obil ta muq'ue, mi ja'uc ti matanal sat ts'unubil ta xavaq'uique. Mi ja'uc ta jtsac ta xquich' ti jubemic ch'in vacax ti ta xich' svocol ta milel ta sventa ti lajesobil o'ntonale.

²³ Ts'ijlanic ti jech xavochetic ta q'uejimol ta jtojole, yu'un mu xa jc'an xca'i ti xt'um-t'un no'ox ti arpae.

²⁴ Ja' no'ox un, jechuc me jech c'u cha'al junuc tuquemal vo' ti lec c'usi sc'an pasele. Ti stuq'uil slequil o'ntonale, jechuc me jech c'u cha'al jun sat vo' ti mu sna' x'ule.

²⁵ “Israeletic, ¿mi laj avac'beicun milbil matanal xchi'uc yan matanaletic ti cha'vinic (40) jabil ti oyoxuc ta sbajtical banomile?

²⁶ Jechuc un, ja' no'ox ti cuchetan ava'i xchi'uc sloc'ol ti ajvalil Sicute, xchi'uc sc'analil ti Quiiune, ti ja' avajdiosic ti laj ameltsan atuquique.

²⁷ Avi tana une, ta jipoxuc batel ta sbajtical banomile, ti xjelav to ech'el ta jteclum Damascoe.” Ti va'i s'elan taje, ja' ta xal ti Ajvalil Dios ti scotol xu' yu'une. Jech o xal sbiinoj Dios.