Amós 4 - Bible in Tzotzil de Chamula

¹ A'yio ava'iic lec li'e, antsetic, ti caj tsacal xava'i abaique, ti spajebal xa no'ox jun avutsilic ta q'uelel ti acuxojic lec ti oyoxuc ta jteclum Samariae, ti avac'ojbeic yipal ta yilbajinel ti me'un mu'nate, ti abol sba avu'un ta yilbel svocol ti buch'utic mu sta ti c'usitic ta xtun yu'une, ti apasojic ta mantal ti amalalic ta yich'el talel ti vino yo' ta xavuch'ique.

² Ti Dios ti stalel o ja' ch'ul Diose, xi laj sva'an sba ta yalele: “Ta xc'ot sc'ac'alil ti quilbil ta xaloq'uic batel ta jun xot-xot taq'uine, ti co'ol s'elan stsacobil choy ta xquilatic batel xtoc ta jun xot-xot taq'uin ti avalab anich'nabique.

³ Xacholetic loq'uel ti bu jombil ti moque, yu'un tenbil ta xaloq'uic ti li' ta vits Hermone. Ti vu'un Diosune, mu me lo'iluc no'ox ta xcal.

Ti labanel tojobtasele

⁴ “Batanic ta Betel un, xchi'uc ta Gilgal. Sa'ic ti amul acolo'ique, toyo abaic ta j'ech'el. Ich'ic batel milbil matanal ta jujun sob ic'lumane. Ich'ic batel ta jujun ox-ox c'ac'al ti jun ta jujun lajlajunebe.

⁵ Chiq'uic ti pan ti mu'yuc ac'bil ti spajubtasobil ta sventa matanal yu'un ti coliyale. Buyuc no'ox, caj'alic batel sc'oplal ti matanal ti ta xloc' x'ayan ta avo'ntonique. Ti jech taje, ja' sve'el ach'ulelic ta xava'iic.” Ti vu'un Diosune, mu me lo'iluc no'ox ta xcal.

Manchuc mi ta stsitsatic ti Israele, mi ja'uc xtojob o xchi'uc

⁶ “C'ot ta pasel cu'un ta atojolic ti vi'nal ta scotol ti ateclumalique. C'ot ta pasel cu'un ti mu xa xata ave'elic ta scotol ti alumalique. C'u stu un, mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal.

⁷ Ja' jech xtoc laj jpas ti mu'yuc xtal oxib (3) u ti vo'e, ti c'alal ja' o xa yorail ta xich' ts'unel ti ts'unubale. Ja'uc ti ta yan jteclume, laj cac' taluc vo'. Ti ta yan jteclume, mu'yuc xcac' taluc vo'. Ti ta yan osil banomile, laj cac' taluc vo'. Ti ta yan osil banomile, mu'yuc xcac' taluc ti vo'e.

⁸ Xtal xbatic ti jnaclejetic ta jujun jteclum ta sa'el ti vo'e. Mi ja'uc ep ta staic yo' ta sicubtas ti yo'ntonique. C'u stu un, mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal.

⁹ “C'ot ta pasel cu'un ti tal tsots ic' xchi'uc sc'ac'al ta atojolic, xchi'uc ti yan ti c'usitic toj chopole yo' jech ta jtsitsoxuc. C'ot ta pasel cu'un ti nucultaj ti c'usitic ts'unbil avu'unique, xchi'uc ti yaq'uil uvaetic avu'unique. Laj ta c'ulubetic ti icuxetic xchi'uc ti olivoetic avu'unique. C'u stu un, mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal.

¹⁰ “C'ot ta pasel cu'un ta atojolic ti oy c'usi chopol laj jtac talel ta atojolic jech c'u cha'al laj jtac ta stojolic ti egipcioetique. Laj cac' chamicuc ti jva'lej viniquetic avu'unic ti c'alal xyaquet ti letoe. Laj cac'be yu'nin aca'ic ti avajcontraique. Laj ava'ibeic stuil cu'un ti animaetic ti bu lamalic ta avaxibalnaique. C'u stu un, mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal.

¹¹ “C'ot ta pasel cu'un ti oy c'usi tsots laj jtac talel ta atojolic yo' jech ta jtsutsesoxuc ta j'ech'el jech c'u cha'al c'ot ta pasel ta jteclum Sodoma xchi'uc ti ta Gomorrae, ti co'ol s'elan chac uban ac'al ti ja' to no'ox laj yich' loq'uesel ta jornoe. C'u stu un, mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal.

¹² Jech o xal un, Israel, jech ta jpas ta atojol. Ta xc'ot ta pasel cu'un ta atojol. Chapano me aba c'u s'elan ta xanup abaic ta be xchi'uc ti Dios avu'une.”

¹³ Ti Diose laj smeltsan ti vitsetique, ta xac' taluc ti iq'ue. Ta xac' ta ojtiquinel ta stojol vinic ti c'u s'elan snopoje. Ta sjoybin ta ic'al osil ti saquilal osile. Ta slajun xanubta ti bu toyol ta j'ech'el ti banomile. Ajvalil Dios ti scotol xu' yu'une, xi ma' ti sc'oplal une.