Amós 3 - Bible in Tzotzil de Chamula

Ti yabtel sc'an spas ti j'alc'opetique

¹ Xi albatic yu'un Dios ti jteclum ti loq'uesatic talel ta jteclum Egiptoe: “A'yio ava'iic, israeletic,

² c'ajomal no'ox vo'oxuc laj jt'ujoxuc loq'uel ta stojol scotol ti jteclumetic ti c'u yepal oy ta banomile. Jech o xal ta xquich' ave ati'ic yu'un scotol ti c'usitic chopol laj xa apasique.”

³ Mi jmoj xlotetic ta jun bee, yu'un jmoj ti snopobil yu'unique.

⁴ Mi xloquet no'ox snuc' ti león ta te'tique, yu'un oy c'usi laj sta ta lubiel. Mi xviquet xa ti ch'in león ta xch'ene, yu'un oy xa c'usi laj sta ta tsaquel.

⁵ Mi baj yalel ta lumtic ti jcot mute, yu'un cotol laj sta ti pets'e. Mi laj xchech sba liquel ta banomil ti pets'e, yu'un oy c'usi laj xa sta ta tsaquel.

⁶ Mi xtutet xa liquel ti oq'ues ta jun jteclume, mu xa stac' a'yeluc ta xa'i c'usi xu' ta spas ti jteclume. Mi oy c'usi chopol c'ot ta pasel ta jun jteclume, yu'un jech c'ot ta nopel yu'un ti Diose.

⁷ Mu'yuc c'usi ta spas ti Diose ti mi mu'yuc ba'yel ta xac'be yil ti jtunel yaj'alc'optaque.

⁸ ¿Mi yu'un la oy buch'u mu sna' xnic ta xi'el ti c'alal xloquet no'ox snuc' ti leone? ¿Mi yu'un la oy buch'u mu xalbe sc'oplal Dios ti c'alal ja' ta xal ti mantale?

Ti jteclum Samariae ta xtub sc'oplal

⁹ Xi alic ta spasob mantaltac ti jteclum Asdode, xchi'uc ta pasob mantaletic yu'un ti jteclum Egiptoe: “La' avilic ta vitstic yu'un ti jteclum Samariae. Q'uelo avilic ti c'usitic mu'yuc smelol ta xc'ot ta pasele, xchi'uc ti vocol ti yacal ta xc'ot ta pasel une.”

¹⁰ Xi ta xal ti Diose: “Ti stuquique mu sna' stuc'ulan sbaic ta spasel ti c'usi leque. Snac'ojic ta spasob mantalic ti c'usitic laj stsatsal elc'anic batele.”

¹¹ Ja' yu'un un, xi s'elan ta xal ti Diose: “Ti jvoc' jcontrainvaneje ta svolic ti jteclume. Ta sjines ti nac'obbaile. Ta xchaj ta sa'el ti c'usitic x'ayan avu'unic ta apasob mantaltaque.”

¹² Xi ta xal ti Diose: “Jech c'u cha'al ti jun jq'uel-chij ti ja' xa no'ox ta stabe talel ti xchibal yacane, mi ja' ti juteb xa xchiquin ti xchij ti laj ta ti'el yu'un ti jti'oval leone, ja' jech, jun chib no'ox ta xcolic ti israeletic ti nacalic ta jteclum Samariae. Taje, ja' sc'oplalic ti buch'utic jun xa yutsiquil ti xchotlebic ti chotajtic ta jteclum Damascoe.”

¹³ Xi ta xal ti Ajvalil Dios ti scotol xu' yu'une: “A'yio ava'iic ti vo'oxuque, va'ano abaic ta yalel ti ta xlic yich' contrainel slumal ti Jacobe.

¹⁴ Ti sc'ac'alil ta xquich'be ye sti'ic ti Israel ta scoj ti smul colo'ique, ta jlilin ti altaretic ti oy ta jteclum Betele. Ti jech oy xulubtac ti altare, ta xich' c'oquel. Ta xbaj yalel ta banomil.

¹⁵ Ta jlilin ta j'ech'el ti naetic ti ja' sventa ta x'ech' o yu'unic ti c'alal yorail oy ti sique, xchi'uc ti ta x'ech yu'unic ti c'alal yorail ti xchic'chun ti banomile. Ta jtubbe sc'oplal ti naetic ti meltsanbil ta saquiquil bax-tone. Ta jlilin ta j'ech'el ti muc'tiquil chapanobbaile.” Ti va'i s'elan taje, ja' ta xal stuc ti Diose.