Amós 1 - Bible in Tzotzil de Chamula

Ti muc'tiquil jteclumetic ti nopol ta Israele, ta xich'ic chapanel

¹ Ti c'op li'e, ja' albil yu'un ti Amose, jun jq'uel-chij ti nacal ta jteclum Tecoae. Chib to jabil sc'an ti bu c'ot ta pasel ti lic niquele, c'alal ja' o tiq'uil ta ajvalil ti Uzías ta jteclum Judae, xchi'uc ti Jeroboam xnich'on ti Joás tiq'uil ta ajvalil ta Jteclum Israele, ti c'oponat yu'un Dios ti Amós ta sventa sc'oplalic ti Israele:

² Xi laj yal ti Amose: C'alal ta svinajes ti xvo'o'et no'ox sc'opojel Dios ti ta xlic talel ta vits Sión ti oy ta jteclum Jerusalene, ti yaxaltic ta banomile ta xlic nucultajuc, ta xlic taquijuc ta j'ech'el ti yaxaltic yu'un ti vits Carmelo xtoque.

³ Xi ta xal ti Diose: “Ti jteclum Damascoe, ep ti c'usitic chopol spasojique. Ta ono'ox jtsitsic ya'iic. Mu no'ox albajuc laj yilbeic svocol ti jteclum Galaade, ti silantic com ti sbec'talic ta chiv-chiv taq'uin yu'unique.

⁴ Jech o xal un, ta jtsanbe sc'ac'al ti muc' ta na ti ja' laj sva'an stuc ti ajvalil Hazaele. Jech ti c'oc' taje ta stubbe sc'oplal ti muc' ta naetic yu'un ti Ben-hadae.

⁵ Ta jtsatsal-voc' ochel sti'tac ti jteclum Damascoe. Ta jtubbe sc'oplal ti buch'u ta spas mantal ta jteclum Bicat-avene xchi'uc ti buch'u ta spas mantal ta Bet-edene. Jech xtoc ti sirioetique chucbil ta xbatic ta jteclum Kir.” Ti va'i s'elan taje, ja' ta xal stuc ti Diose.

⁶ Xi ta xal ti Diose: “Ti jnaclejetic yu'un ti Gazae, ep ti c'usitic chopol spasojique. Ta ono'ox jtsitsic ya'iic. Laj svolic batel ta chuquel scotol ti jnaclejetic ti oyic ta jun lume. Laj xchonic batel ta jteclum Edom yo' ta xc'ot ta mosovil yu'unic.

⁷ Jech o xal un, ta jtic'be sc'ac'al ti moquetic yu'un ti jteclum Gazae. Jech ti c'oc' taje ta stubbe sc'oplal ti muc'tiquil naetic yu'unique.

⁸ Ta jtubbe sc'oplal ti buch'u ta spas mantal ta jteclum Asdode, xchi'uc ti buch'u ochem ta ajvalilal ta jteclum Ascalone. Ta sjunul jmuc'ul jtsatsal ta jtsac ta contrainel ti jteclum Ecrone. Ti mi oy buch'u cuxul junuc ti filisteoe, ta ono'ox xcham.” Taje, ja' ta xal stuc ti Diose.

⁹ Xi ta xal ti Diose: “Ti jteclum Tiroe, ep ti c'usitic chopol spasojique. Ta ono'ox jtsitsic ya'iic. Laj svolic batel ta chuquel jun lum ti spasojic jun trate ti ja' xchi'il ta xa'i sbaique. Laj yac'beic ta yoc ta sc'ob ti Edome, ti pasbilic ta mantal c'otique.

¹⁰ Jech o xal un, ta jtsanbe sc'ac'al smocal ti jteclum Tiroe. Jech ti c'oc' taje ta stubbe sc'oplal ti muc'tiquil naetic yu'unique.”

¹¹ Xi ta xal ti Diose: “Ti jteclum Edome, ep ti c'usitic chopol spasojique. Ta ono'ox jtsits ya'iic. Mu'yuc xa syail xc'uxul yo'ntonic ti sye'ojic no'ox batel yespadaic ti laj snutsic batel ti svinquilel ta Israele. Laj sloq'uesic ta j'ech'el ti sc'ac'al yo'ntonique, ti mu xa buch'u jech tabaj ti sti'emal sjolique.

¹² Jech o xal un, ta jtsanbe sc'ac'al ti jteclum Temane. Jech ti c'oc' taje ta stubbe sc'oplal ti muc' ta naetic yu'un ti jteclum Bosrae.”

¹³ Xi ta xal ti Diose: “Ti jteclum Amone, ep ti c'usitic chopol spasojique. Ta ono'ox jtsitsic ya'iic. Ti jech juteb ta yo'ntonic ti ta smuq'uibtas ya'iic ti sbanomilique, jech o xal ti antsetic ti nacalic ta yosilal Galaade, laj sjatbeic xch'ut ti buch'utic xchi'ucanoj ti yolique.

¹⁴ Jech o xal un, ta jtsanbe sc'ac'al ti moquetic yu'un ti jteclum Rabae. Jech ti c'oc' taje ta stubbe sc'oplal ti muc'tiquil naetic ti c'alal xvochet ti j'ac'-letoe, ti c'alal mu xnel mu x'ech' ti vocol ti jech c'ac'al taje.

¹⁵ Jech ti ajvalil yu'unique, bec'bil ta xloc' ta yosilal jmoj xchi'uc ti svinictac ti ich'bil ye sti'ique.” Ti va'i s'elan taje, ja' ta xal ti Diose.