Abdías 1 - Bible in Tzotzil de Chamula

Ta xpec'tsanbat sc'oplal ti jteclum Edome

¹ Ti c'usi ac'bat sna' ti Abdías yu'un ti Dios ta sventa ti jam sba sate. C'ot ta jni' ta jchiquincutic ta ya'yiel sc'op ti Diose; jun j'alc'op ti xi bat yal ta stojol ti muc'tiquil lumetique: “Jtam batel jbetic, ba jtsactic ta letovajel ti jteclum Edome.” Ti Ajvalil ti ja' Diose xi ta xalbe ya'i ti jteclum Edome:

² “Juteb ta xac'otic cu'un ta stojol ti yan muc'tiquil jteclumetique; peq'uel ta xc'ot cu'un ti ac'oplal ta j'ech'ele.

³ Laj ava'i aba ti nacalot xa ta toyol jap ch'entique, jech o xal c'ot ta avo'nton ti mu'yuc buch'u xasjipot yalel teye.

⁴ Ac'o mi ta toyol to xavilet muyel jech c'u cha'al ta spas ti muc' ta xique, ti ta toyol to laj ameltsan ti avayeb ti bu oy ti c'analetique, ta jipot yalel ti bu taje.” Ti Diose xi ta xal ta jamale:

⁵ “Mi ta xtal ta ac'ubaltic ti oy c'usi ta xelc'anbot ti j'eleq'ue, mu xich'ic batel scotol; mi ta xtalic ti j'elec'-uvaetique, ta to xictaic comel jaybojuc. Ja'uc ti avajcontrataque ta smes ta tsutsesel ta j'ech'el.

⁶ Vi to s'elan laj avich' pojbel ti c'usitic oy avu'une, Esaú, laj avich' elc'anbel batel ti slajeb xa ti c'usitic toyol stojol oy avu'une.

⁷ Ti buch'utic jmoj ac'op xchi'uque, laj slo'laot; laj sjipot loq'uel ta abanomil. Jech xtoc ti buch'utic lec xavil abaic xchi'uque, joybij ta avajcontra; ti buch'utic apatoj avo'nton ta stojol ti jun ac'opic xchi'uque, laj yac'bot apets'altac. Ta j'ech'el mu'yuc sbijil ti jteclum Edome.”

⁸ Ti Diose xi ta xale: “C'alal ta jtsits ti jteclum Edome, ta jtubbe sts'unubal ti bijil viniquetic yu'une. Ta jch'aybe ta sjol ta yo'ntonic ti snopbenal yu'unic ti xi oyic ta stuq'uil vitstic yu'un ti Esaue.

⁹ Ti j'ac'-letoetic yu'un ti jteclum Temane xnicnunic xa liquel ta xi'el yu'un ti buch'utic xi oyic ta vitstic yu'un ti Esaue, mi junuc cuxul ta xcomic.

Smul scolo'ic ti jteclum Edome

¹⁰ “Ta xc'ot ta atojol ti volibilot yu'un ti q'uexlal apune, ti ta stsuts ac'oplal ta j'ech'ele, ta scoj ti laj avilbajin laj amil ti achi'il ta voq'uel Jacobe.

¹¹ C'alal laj stamic batel sc'ulejal ti jteclum ti jcontrainvanejetique, c'alal laj svoq'uic ti ochebal ti'naetic yu'un ti jteclum Jerusalén ti jyanlum soldadoetique, laj aq'uej aba loq'uel xtoc. C'alal laj sq'uelic ta orail ti c'usitic scomelale, ti laj yich'beic batel ti sc'ulejale, jech laj apas aba jech c'u cha'al ti stuquique.

¹² Ti jechuque, ma'uc xamuyubaj xa ta stojol ti achi'il ta voq'uel ti yorail laj sta ti svocole. Ti jechuque, ma'uc xamuyubaj xa ta stojol ti Judá ti yorail laj yich' ilbajinele. Ti jechuque, ma'uc laj ana'le ti yorail ti mu xnel x'ech' ti yilbajinele.

¹³ Ti jechuque, ma'uc la'och batel ta jteclum ti yorail ta xich' ti svocolique. Ti jechuque, ma'uc latse'in ti c'usi chopol c'ot ta stojole, ti yorail ti xch'amoj c'ot ta bee. Ti jechuque, ma'uc laj avelc'anbe sc'ulejal ti yorail ti mu stac' alel ti c'usi c'ot ta stojole.

¹⁴ Ti jechuque, ma'uc bat amacacan ta be ti bu ta xvulic ta loq'uele. Ti jechuque, ma'uc laj avac' ta c'abal ti buch'utic ta xjatavic ti yorail ti mu'yuc xa c'usi xut sba laj ya'ie.

¹⁵ Ti c'u s'elan laj xa apasbe ti yane, ja' no'ox jech ta xavich' pasbel ec, loc' ta sa'el avu'un. “Ta xa xc'ot sc'ac'alil ti ta xvul ta loq'uel ti Dios ta stojol ti muc'tiquil lumetique.

Ta xc'ot ta pasel ti ta xich' toybel sc'oplal ti Israele

¹⁶ Ti jech mu xa no'ox jayloq'uel laj ava'ibe yipal ti avocolic ti laj ataic ta jch'ul vitse, ja' no'ox jech ta xa'iic ec ti yan muc'tiquil jteclum ti c'un-c'un xa ta xa'ibe lec ti yipale, ja' to ti c'uxi ta xc'ot ta pasel ti ta xtub ti sc'oplal ta j'ech'ele.

¹⁷ Ja'uc ti vits Sione, ja' jun ch'ul vits ti bu ta xc'ot ta pojel jun chibuque. Jech ti sts'unubaltac ti Jacobe ta xu'ninic yan velta ti yosil sbanomilique.

¹⁸ Snitilultac ti Jacobe, c'otemic jech c'u cha'al ti c'oq'ue; ti snitilultac ti Josee, c'otemic jech c'u cha'al ti leb c'oq'ue. Ja'uc snitilultac ti Esaue, c'otemic jech c'u cha'al ti c'a' no ti ch'abal c'usi ta xcom yu'un ti c'oc' taje. Mi junuc ta xcol snitilultac ti Esaue. Jech laj xa cal ti vu'un Diosune.”

¹⁹ Ti israeletic ti buch'utic oyic ta Négueve, ta xu'ninic ti vitstic yu'un ti Esaue. Yan ti israeletic ti buch'utic oyic ta Sefelae, ta xu'ninbeic yosilic ti filisteoetique. Ta xu'ninbeic xtoc yosiltac ti Efraine xchi'uc yosiltac ti Samariae. Ti snitilultac ti Benjamín xtoque ta xu'ninbe yosil ti Galaade.

²⁰ Ti israeletic ti va'i yepal ti bec'bil to ox loq'uic taje, ta xu'ninbeic c'u sjamlej yosil ti cananeoetique, ti ta xc'ot c'alal to Sareptae. Yan ti jchuqueletic ti oyic to ox ta Jerusalén ti oyic ta Safarade, ta xu'ninic ti jteclumetic ti oy ta Negueve.

²¹ Tsalvanem xa ta xa'iic ti ta xmuyic batel ta vits Sione, ti jbel xa c'usi yalic c'otel ta stojol ti buch'utic oyic ta vitstic yu'un ti Esaue. Ja' xa c'ot ta Ajvalil ti Diose.