2 Samuel 9 - Bible in Tzotzil de Chamula

Ti Davide ta xc'uxubin ti Mefi-bosete

¹ Oy jun c'ac'al ti xi laj sjac' ti Davide: “¿Mi oy to buch'u cuxul com yuts' yalal ti Saule, ti ta jbain ta scoltaele yo' jech mu xch'ay ta co'nton sc'oplal ti Jonatane?”

² Oy jun yajmosov yuts' yalaltac ti Saúl ti sbiinoj Sibá ti laj staic talel ta iq'uel yo' jech ta xtal ta stojol ti Davide. C'alal c'ot ti Sibae, xi jac'bat yu'un ti ajvalile: —¿Mi vo'ot Sibaot? —Vu'un yajtunelun ti Jcuch Abtele —xi laj stac'.

³ Va'i un, xi jac'bat yu'un ti ajvalile: —¿Mi oy to buch'u cuxul comem yuts' yalal ti Saúl ti xu' ta jtic' jba ta scoltael ta sventa ti Diose? Xi laj stac' ti Sibae: —Oy to jun xnich'on ti Jonatán ti cuxule, ti soquem xchibal ti yoque.

⁴ —¿Bu oy taj une? —xi laj sjac' ti ajvalile. —Oy ta Lodebar ta sna Maquir xnich'on ti Amiele —xi laj stac' ti Sibae.

⁵ Va'i un, ti ajvalil Davide laj yal mantal ti ac'o ba yich' iq'uel talel ti bu taje.

⁶ C'alal vul ta stojol David ti Mefi-boset xnich'on ti Jonatane, smom ti Saule, laj snijan sba ta stojol svinajeb ti ta x'ich'van ta muq'ue. —¡Mefi-boset! —xi avan ti Davide. —Vu'un, Jcuch abtel —xi laj stac'.

⁷ Xi laj yal ti Davide: —Mu xaxi', yu'un mu'yuc c'usi chopol ta jpasbot ta sventa ti mu ch'aybaj ta o'ntonal sc'oplal ti Jonatán ti ja' atote. Ta xcal mantal ti ac'o avich' sutesbel scotol yosil ti amuc'tot Saule, xchi'uc xata ti ta x'ech' ta ave ati' ti c'usi stac' tunel lajesel ta jmexae.

⁸ Ja'uc ti Mefi-bosete xnijilet xa ti xi laj yale: —¿C'u cha'al ta xavich' avocol ta xcuchbel svocol ti avajtunel li'e, Jcuch abtel, ti c'alal co'ol j'elan jun chamem ts'i'e?

⁹ Manchuc mi jech un, ti ajvalile xi laj yalbe ya'i ti c'alal laj stac ta iq'uel ti Sibá yajmosov ta vo'ne ti Saule: —Ti rextoil ti x'ayan yu'un ti avajvale, xchi'uc ti c'usi x'ayan yu'un ti yuts' yalaltaque, laj xa cac'be ta yoc scotol ta sc'ob ti smome.

¹⁰ Ja'uc ti vo'ot une, ti anich'nabe, ti amosovtaque, ta xavabtelanbeic ti sbanomile. Ta xatsobilan batel ti c'usitic ta xch'ie yo' jech ta stun slajesic yalab xnich'nab ti avajvale, ac'o mi ta xve' ta jmexa ti Mefi-boset ti ja' smome. Oy vo'lajuneb ta vo' xnich'nab ti Sibae, oy jtob ta vo' smosovtac.

¹¹ Xi laj stac'be ti ajvalile: —Scotol ti va'i s'elan laj yal mantal ti Jcuch abtele, ta spas ti avajtunel li'e. Ja'uc ti Mefi-bosete jmoj ta xve'ic xchi'uc ti Davide, co'ol s'elan ja' jun xnich'on ti ajvalile.

¹² Ma'uc no'ox taje, ti Mefi-bosete oy jun xnich'on ti biq'uit to ti sbiinoj Micaíae. Ti c'u yepal oy ta sna ti Sibae ochemic ta smosovtac ti Mefi-bosete.

¹³ Ja'uc ti Mefi-boset ti buch'u soquem ti xchibal yacane, nacal ta Jerusalén, ja' ti jmoj ta xve'ic xchi'uc ti ajvalile.