2 Samuel 8 - Bible in Tzotzil de Chamula

Chapalic ta tsalvanej yajsoldadotac ti Davide

¹ Laj taj une, ti Davide tsalbil c'ot yu'un ti filisteoetique, ti mu'yuc xa c'usi xut spoj sbaique. Tubbat ti smucul stsacalic ti xu' yu'unic ta spojel sbaic yu'un ti yoc sc'obique.

² Ja' jech xtoc tsalbil c'ot yu'un ti moabitaetique, ti xi s'elan c'ot ta stojol ti laj yich'ic bisel ta jlic ch'ojon ti c'alal bitsajtic ta lumtic yu'une: Ti buch'u c'amal ta xc'ot ta stojol ti xcha'meyelal ch'ojon ti sbisele, jbel sc'oplal ta xich'ic milel. Ja'uc ti buch'u mu xloc' xcha'meyelal ch'ojon ti sbisele, mu'yuc ta xich'ic milel. Ja' jech c'ot ta stojol ti moabitaetic ti mu'yuc xa c'usi xut spoj sbaic ta stojol ti Davide, lic stojic patan.

³ Ti Davide tsalbil c'ot yu'un xtoc ti Hadad-ezer xnich'on ti Rehobe, ajvalil yu'un ti lum Sobae, ti c'alal yaloj xa ox ta xcha'u'nin banomil ti oy ta uc'um Eufratese.

⁴ Tsacbil c'otic ta chuquel yu'un ti David jmil xchi'uc vucub ciento (1,700) ta vo' soldadoetic ti cajalic ta ca'e, xchi'uc jtob ta mil (20,000) ti ta xanav ta yoquique. Ma'uc no'ox taje, laj sc'asbeic yacan scotol ti ca'etic ti snitojanic ti carreta sventa ti ac'ob-letoe. Laj to yicta comel ca'etic ta xjochel vo'vinic (100) ta cot ti carretae.

⁵ Ta jech yepal vulic sirioetic ta Damasco, ti ta stic' sbaic ta spojel ta scoltael ti Hadad-ezer ajvalil yu'un ti Sobae. Ja'uc ti David une laj stsal ti sirioetique. Laj smil chib xcha'vinic mil (22,000) ta vo'.

⁶ Laj taj une, ti Davide laj stac batel jchabivanejetic jq'uelvanejetic ta Siria ti oy ta Damascoe, ti mu'yuc xa c'usi xut spoj sbaic ti sirioetique, ti sujbil c'otic ta stojel ti patane. Yu'un ta xc'ot ta pasel yu'un Dios ti tsalbil ta xc'ot yu'un scontra ti David ti buyuc no'ox ta xbate.

⁷ Laj taj une, lic yu'ninan David ti macobbail ti meltsanbil ta oro ti ta stunesic yaj'opisialtac ti Hadad-ezere, ti laj yich' batel ta Jerusalene.

⁸ Ma'uc no'ox taje, laj yu'nin ti mu albajuc yepal ti c'anal taq'uinetic ti oy ta Bétahe xchi'uc ta Berotaie, lumetic ti sventainoj ti Hadad-ezere.

⁹ Ja'uc ti Toi ti ja' ajvalil yu'un ti lum Hamate, ti c'alal ya'ibe sc'oplal ti David ti laj xa stsalbe yajsoldadotac ti Hadad-ezere,

¹⁰ ta jech to yepal laj stac batel ti Joram ti ja' xnich'one, ti yich'oj batel ti c'usitic meltsanbil ta platae, ta oroe, ta c'anal taq'uine. Laj stac batel ti Jorame ta sc'oponel, ta yalbel ya'i chabanuc ti ajvalil David ti tsal yu'un ta stsaquel ta leto ti Hadad-ezere. Yu'un ti Toi eque laj stsaquilan sbaic ta leto xchi'uc ti Hadad-ezere.

¹¹ Ti Davide laj yac'be sventain Dios scotol ti c'usitic taje, jmoj xchi'uc ti oroe, ti platae, ti t'ujbil talel ti c'ot ta sventae, ti xi s'elan lic talel ta scotol ti lumetic ti mu'yuc xa c'usi xut spoj sbaique:

¹² ti Edome, ti Moabe, ti Amone, ti filisteoetique, ti amalecitaetique, xchi'uc ti c'u yepal laj spoj talel ti c'alal laj stsac ta leto ti Hadad-ezer ajvalil yu'un ti Sobae, xnich'on ti Rehobe.

¹³ Puc sc'oplal ta j'ech'el ti Davide. C'alal sut xa talel ta stsalel ti edomitaetique, laj yilbe svocol vaxaclajunmil (18,000) ta vo' edomitaetic ti bu sbiinoj Stenlejal Ats'ame.

¹⁴ Laj taj une, laj stac batel jchabivanej jq'uelvanej ta sbejel Edom. Jech scotol ti edomitaetique mu'yuc xa c'usi xut spoj sbaic ta stojol ti Davide. C'ot ta pasel yu'un Dios ta stojol ti tsalbil ta xc'ot yu'un scontra ti buyuc no'ox ta xbate.

Yaj'opisialtac ti Davide

¹⁵ C'alal tiq'uil ta ajvalilal ti David yu'un scotol ti Israele, ta stuq'uil yutsil sjol yo'nton lec laj chapan scotol ti slumale.

¹⁶ Ti banquilal jpas-mantal yu'un ti soldadoe, ja' ti Joabe, xnich'on ti Sarviae. Ja'uc jts'ibajom yu'un ti ajvalile, ja' ti Josafate, xnich'on ti Ahilude.

¹⁷ Ti paleetique, ja' ti Sadoque, xnich'on ti Ahitobe, xchi'uc ti Ahimeleque, xnich'on ti Abiatare. Ti yabtelinoj ta sq'uelel ta yalel ti c'usi ta xc'ot ta spasele, ja' ti Seraíase.

¹⁸ Ja'uc ti Benaiae, xnich'on ti Joiadae, ja' jpasel ta mantal yu'un ti jchabivanej yu'unic ti cereteoetique xchi'uc ti peleteoetique. Xnich'nabtac ti Davide, ja' jc'opojeletic yu'un ti ajvalile.