2 Samuel 7 - Bible in Tzotzil de Chamula

Ti Diose ta sva'an sba ta sts'uiltasel ti Davide

¹ C'alal chotol xa ta sna ti ajvalil Davide, ja' stuc ti Diose laj xa slamajes ti c'op xchi'uc yajcontra ti joyol ta spat ta xocone,

² jech ti Davide xi laj yalbe ya'i ti j'alc'op Natane: —Aviloj ta aba ta asat ti nacalun ta jun na ti naca meltsanbil ta ch'ut-te'e. Ja'uc ti bu oy xcaxa ti Diose, ta uni poc' no'ox ti snail ac'bile.

³ Ja'uc ti Natane xi laj staq'ue: —Ja' yu'un un cha'e, paso scotol ti c'u s'elan anopoje, yu'un stic'oj sba ti Dios ta atojole.

⁴ Ta yac'ubalil no'ox un, ti Diose bat ta stojol Natán ti xi laj yalbe ya'ie:

⁵ “Batan, ba c'opono ti cajtunel Davide. Chapbo ya'i ti xi ta xcal ti vu'un Diosune: ‘Ma'uc ma' ti vo'ot albil ac'oplal ta xameltsan jun ch'ulna ti bu ta xinaquie.

⁶ Ti sc'ac'alil ti c'alal laj jloq'ues talel ti israeletic ta Egiptoe, xchi'uc tana li'e, mu'yuc ono'ox bu linaqui talel ta ch'ulna, c'ajomal uni Axibalna bu li'ech'ilan talel.

⁷ Ti c'u xa sjalil laj jchi'inic talel ta xanobale, mi junuc jtsobvanej yu'unic. Mi ja'uc junuc ti buch'u laj jva'anan ta jpas-mantal yu'un ti jteclum Israele ti laj jc'anbe ti ac'o xismeltsanbeicun junuc ch'ulna ti meltsanbil ta ch'ut te'e.’

⁸ Ja' yu'un un cha'e, albo ya'i ti cajtunel David ti xi ta xcal ti vu'un Diosun ti scotol xu' cu'une: ‘Laj xa quic'ot loq'uel ti bu sbajleb ti chije. Laj xa avicta comel sq'uelel ti chije yo' jech lac'ot ta banquilal yu'un ti calab jnich'nab Israele.

⁹ Ti buyuc no'ox xajoyet batele, laj jchi'inot. Laj jtubbe sc'oplal ti avajcontra ti laj stsacot ta letoe. Cajal c'ot ac'oplal cu'un jech c'u cha'al ti viniquetic ti tsots xu' yu'unic li' ta banomile.

¹⁰ Ma'uc no'ox taje, chapal xa cu'un yavilic ti calab jnich'nab Israel ti bu ta xcac' nacliicuque yo' jech ta xcom ta yu'un stuquic ti bu mu x'ilbajinatique, ti bu mu x'utilanatic yu'un ti jchopol joletic jech c'u cha'al spasbatic ta ba'yele

¹¹ c'alal lic jva'anan talel ti jpojvanejetic ta sventainel ti calab jnich'nab Israele. Ja'uc ti vo'ote ta xc'ot ta pasel cu'un ti mi ja'uc ta stijot ta c'op ti avajcontrataque. Ta jcaj-t'abbot ava'iic ta yaq'uel ana' ti ta xquepajes ti anitilultaque.

¹² Mi sta yorail ti ts'ij xi sc'oplal ti ach'iel ac'opojele, ti xc'ot ta pasel ta xacham xalaje, ta jva'an junuc anitilultac ta aq'uexol ti jbel sc'oplal ta x'och ta ajvalil cu'une.

¹³ Ti buch'u taje, ja' ta sva'anbun ti jch'ulnae, ti ta xcac' que jti' ta xjalij ta ventainvaneje.

¹⁴ Ta xisbisun ta stot. Jechun ec ta jbis ta jnich'on. C'alal mi oy bu chopol xbat yu'une, ta jtsits, ta xcac'be ya'i jech c'u cha'al ta spas scotol ti totiletic ti ta stsits ti xnich'nabique.

¹⁵ Ja'uc le' une, mu'yuc ta jtuch' ti syail xc'uxul co'nton ta stojol jech c'u cha'al laj jch'ay ta co'nton ti Saule, ti lacom ta xq'uexol ti c'alal laj jten loq'uele.

¹⁶ Ti anitilule, ti avabtele, ta j'ech'el mi ja'uc xtub sc'oplal ti chabibil cu'un ta yolon jqueoval caxinale, ti j'ech'el mu xtub sc'oplal xtoc ti laventainvane.’ ”

¹⁷ Ti Natane lic xchapbe ya'i David scotol ti va'i s'elan taje. Mi ja'uc jutebuc laj syanijes ti c'usi laj yile, ti c'u s'elan laj ya'ie.

¹⁸ Va'i un, ti ajvalil Davide och batel ta sc'oponel ti Diose, ti xi laj yale: “Cajval, ¿buch'uun ya'yel? ¿Buch'uic la ya'yel ti jtot jme'e ti jech li' to c'alal laj avic'un talele?

¹⁹ ¡Mu no'ox c'usi tsots sc'oplal laj ava'i, Cajval, yu'un ta xacaj'albe sc'oplal snitilul ti avajtunele! ¡Ti c'u s'elan ta xanop ta xapase, Cajval, mu junuc vinic ti xu' jech ta snope!

²⁰ ¿C'usi xa ma' ti xu' ta xcalbot une, Cajval, ti xavojtiquin lec ti avajtunel li'e?

²¹ Scotol ti c'usitic ta xch'ay o'ntonal yu'un ta q'uelel ti laj apase, ti c'ot ta nopel avu'une, ti loc' ta alel avu'une, ja' ta sventa yo' jech ta xcojtiquin lec ta jba ta jsat.

²² ¡Toj jelavem yutsil smuc'ul un cha'e, Cajval, ti c'usi ta xapase! ¡Yu'un mu'yuc buch'u xco'olaj jech c'u cha'al ti vo'ote! Yu'un mu'yuc xa yan xco'olaj jech c'u cha'al ti vo'ote. Mu'yuc xa yan dios jech c'u cha'al ti vo'ote, jech c'u cha'al jcotolcutic ca'binojcutique.

²³ Ja'uc ec ti Israel ti ja' anich'nabe, ¡mu'yuc xa yan xco'olaj jech c'u cha'al ti stuquique! ¡Yu'un c'ajomal no'ox stuc muc' ta lum oy ta banomil! Yu'un vo'ot laj atic' aba ta spojel scoltael, Dios, ti c'ot ta alumale, ti cajal c'ot sc'oplal avu'un ta sventa ti oy c'usi muc'tic laj apas ti ch'ayal c'ot o'ntonal yu'une. Laj yil ta sba ta satic ti avalab anich'nabe ti tenbil c'ot ti jyanlumetic xchi'uc ti diosetic yu'unic ti laj atic' aba ta spojel scoltael ti oyic ta Egiptoe.

²⁴ Yu'un c'ot ta nopel avu'un atuc ti j'ech'el o ta xc'ot ta avalab anich'nab ti Israele, ti ta xac'ot ta Dios yu'unique, Cajval.

²⁵ “Ja' yu'un un cha'e, Cajval, Dios, staojuc o me yav ti c'otuc ta pasel ti ac'op ti laj ava'an aba ta yalele, ti c'otuc ta pasel ti c'usi laj aval ta stojol ti avajtunele xchi'uc ta stojol ti snitilultaque.

²⁶ J'ech'eluc o cajal c'otuc ti ac'oplale. ‘¡Ti Ajvalil Dios ti scotol xu' yu'une, ja' Dios yu'un ti Israele’, xi'uc ti ac'oplale! ¡Ti snitilultac ti avajtunel Davide, c'otuc ta pasel ti pojbil chabibil avu'une!

²⁷ Ti vo'ote, Dios ti scotol xu' avu'une, laj avac'bun jna' ti ta xatoy ta xava'an liquel ti jnitilule. Ja' yu'un un, ac'o mi avajtunelun, jelav me que jti' ti xivocolet liquel ta atojole.

²⁸ Ti vo'ote, Cajval Diosot, melel ti ac'ope. Laj ava'an aba ta yalel ta stojol ti avajtunel ti yutsil slequil avo'ntone.

²⁹ Va'ano aba un cha'e ta yac'bel alequilal avutsilal snitilultac ti avajtunele yo' jech staoj yav pojbil chabibil avu'un. Laj aval, Cajval Dios, ta xavac'be yich' alequilal avutsilal snitilul avajtunele, ti sbatel osil c'uxubinbil o avu'une.”