2 Samuel 5 - Bible in Tzotzil de Chamula

Ti Davide ta x'och ta ajvalilal yu'un ti lum Israele xchi'uc ti Judae

¹ Ts'acal to un, scotol snitilultac ti Israele xi laj yalbeic ti David ti c'alal bat sc'oponic ta Hebrone: “Mu yanucutic, jun ti jch'ich'eltique.

² Ta melel, ja' to ox ajvalil cu'uncutic ti Saule ti c'alal vo'ot ono'ox ta xavol ta stojobtasel ta spasel ta mantal ti israeletic ti c'alal ta xloq'uic ta letovajele. Ma'uc no'ox taje, yalojbot ono'ox ti Diose ti ta xatojobtas ta xaventain ti Israele.”

³ Ti jech taj une, scotol ti moletic yu'un ti Israele bat sc'oponic ti David ti ja' ajvalil ta Hebrone. Laj spas trate ta stojolic ti laj sva'an ta rextico Dios ti stuque. Va'i un, laj yac'beic snup yabtel ti Davide yo' jech ta x'och ta ajvalil yu'un ti Israele.

⁴ Ti Davide yich'oj xa lajuneb xcha'vinic (30) jabil c'alal lic ochuc ta ajvalile, ti xi s'elan cha'vinic (40) jabil laj spas ajvalilale:

⁵ O'lol xvaxaquibal (7 1/2) jabil och ta ajvalilal yu'un Judá ta Hebrone. Ja'uc ta Jerusalene, och ta ajvalil yu'un scotol Israel xchi'uc Judá oxlajuneb xcha'vinic jabil (33) sjalil.

Ti Davide ta xu'ninan ti nac'obbail ta Sione

⁶ Ti ajvalil Davide xchi'uc ti svinictaque laj stam ech'el sbeic ta stuq'uil Jerusalén yo' jech xbat stsaquic ta leto ti jebuseoetic ti nacalic ta yosilal ti jteclum taje. Ja'uc ti jebuseoetique laj snopic ti mu'yuc c'usi xut ta x'och batel ta jteclum ti Davide, ti xi laj yalbeique: “Mu'yuc c'usi xavut xa'och talel ma' li' une. Tenbil ta xaloc' yu'un ma' ti uni ma'satetique xchi'uc ti uni coxovetique.”

⁷ Ja'uc ti David une laj yu'nin ti nac'obbail jteclum ta Sione, ti ojtiquinbil ta Steclumal David yu'unic avi tana le'e.

⁸ “Ja'uc le' une, scotol ti buch'u xu' yu'un ta stsac ta leto ti jebuseoetique, ac'o ochicuc ti bu ta xjelav yoc ti vo' ta smilel ti ma'satetic xchi'uc ti coxovetic ti mu junuc co'nton ta stojole”, ti xi laj yal ti David ta yorail taje. Ja' ta scoj taje, lic talel yu'unic ti xi lic yalique: “Mi ja'uc xu' x'och ta xch'ulna Dios ma' ti ma'satetique, ti coxovetique.”

⁹ Ts'acal to un, ti Davide com ta naclej ta nac'obbail jteclum ti laj yac'be sbiin Steclumal Davide, ti jech xtoc lic smeltsanbe smocal ta joyob, ti jelav ech'el bu oy sna ti ajvalile.

Ti ajvalil Hirame ta stac batel yajtuneltac ta stojol ti Davide

¹⁰ Ja'uc ti Davide yantic stsac ech'el yip ti c'usi ta spase, chi'inbil yu'un ti Ajvalil Dios ti scotol xu' yu'une.

¹¹ Jech o xal ti Hirame, ajvalil yu'un ti lum Tiroe, laj stac ech'el yajtuneltac ta stojol ti Davide. Laj stac batel xtoc jch'ul-te'etic, j'an-tonetic, ti naca ch'ut te'etic laj stunesic ta sva'anbel sna bu choti ta ajvalilal ti Davide.

¹² Va'i un, ti Davide lic sna' ti c'ot ta pasel ti albat yu'un ti Dios ti ta x'och ta ajvalil yu'un ti Israele, ja' stuc ta sva'an sba yo' jech ta x'a'yibat sc'op yu'un jteclum Israel ti c'u sjalil ochem ta ajvalilale.

Xnich'nabtac ti David ti ts'acal to laj yile

¹³ Ts'acal to, ti c'alal loc' batel ta Hebrón ti bat ta Jerusalene, ti Davide laj yic' yan yajniltac xchi'uc sts'acal ajniltac, ti laj to yil squerem stsebtac xchi'uque.

^14-16 Ti xnich'nabtac ti laj voc'uc ta Jerusalene, xi s'elan ti sbiic jech c'u cha'al li'e: ti Samúae, ti Sobabe, ti Natane, ti Salomone, ti Ibhare, ti Elisúae, ti Nefege, ti Jafíae, ti Elisamae, ti Eliadae, xchi'uc ti Elifelete.

Ti Davide ta stsal ti filisteoetique

¹⁷ C'alal laj ya'iic ti filisteoetic ti ac'bat xa snup yabtel ta ajvalilal yu'un Israel ti Davide, scotolic bat sa'ic. Ja'uc ti David une laj ya'i, bat stic' sba ta pojobbail yu'un ti jteclume.

¹⁸ Va'i un, ti filisteoetique xlametic batel, ti volol c'otic ta stenlejal Refaime.

¹⁹ Ti jech taj une, xi lic sjac'be Dios ti Davide: —¿Mi xu' ta xba jtsac ta leto ti filisteoetique? ¿Mi ta xavac'bun quip ta stsalelic? —Tana, ba tsaco ta leto. Ta xcac'bot avip ta stsalelic —xi tac'bat yu'un ti Diose.

²⁰ Ti Davide c'ot ta Baal-perazim, ti tsalbil c'ot yu'un ti yajcontra ti bu taje. Jech o xal xi laj yale: “Co'ol s'elan uc'um xbalaq'uin no'ox ech' sjam jbe ti Dios ti beq'ueic ech'el ti cajcontra ti tsalbil c'otique.” Ti bu taje, laj yac'be sbiin Baal-perazim.

²¹ Ma'uc no'ox taje, stuc laj yictaic comel sdiosic ti filisteoetique, ti lic stsobic ti David xchi'uc ti svinictaque.

²² Lic no'ox svol sbaic ta stenlejal Refaim ti filisteoetique.

²³ Ja'uc ti David une lic sjac'be ti Diose, ti xi tac'bat talel yu'un ti Diose: —Mu ta yelovaluc sat ti c'alal xatsac ta letoe. Ja'uc le'e, joyobtao ta stsaquel ta leto ti oyic ta patil mi lac'ot ti bu teq'uel ti balsamo te'etique.

²⁴ C'alal mi ta xava'i ti oy buch'u xchajet ta xanav ta sbaba ni' ti te'etique, viletan batel ta stsaquel ta leto. Ti svinajeb xa taje, ja' ti jba'beun ech'el avu'un yo' jech ta jyayijes ta milel ti soldado filisteoetique.

²⁵ Ti Davide jech laj spas jech c'u cha'al albat yu'un ti Diose. Tsalbil c'ot ti filisteoetic ti lic ta Gabaone, ti c'ot c'alal to Gezere.