2 Samuel 4 - Bible in Tzotzil de Chamula

Smilel ti Is-bosete

¹ Xnich'on ti Saúl ti Is-boset sbie, ti c'alal laj ya'i ti laj yich' milel ta Hebrón ti Abnere, tsic' ti yo'nton ta j'ech'ele. Scotol ti Israele mu x'ech' ta xa'iic ti xi'el ta j'ech'ele.

² Oy cha'vo' viniquetic ta xtun yu'un ti Is-bosete, ti ja' jun banquilal jvolvanej yu'un ti j'eleq'uetique, ti sbiinoj Baana ti june, ti sbiinoj Recab ti yane, ti ja' xnich'nabtac ti Rimón ti oy ta Beerote ti c'otemic ta snitilultac ti Benjamín xcaltique. Yu'un ti jteclum Beerote, albil sc'oplal yu'unic ti ja' snitilultac ti Benjamine.

³ Yu'un ti jnaclejetic ta Beerote jatavic loq'uel, bat snac' sbaic ta naclej ta Gitaim, ti bu co'ol s'elan jyanlumetic bisbilic avi tana li'e.

⁴ Ma' taj une, oy yan xnich'on ti Saule, ti sbiinoj Jonatane, ti oy xnich'on ec ti sbiinoj Mefi-bosete, ti soquem ti xchibal yacane. Ti c'alal yich'oj vo'ob jabil ti Mefi-bosete, vinaj talel lo'il a'yej ta Jezreel ti cham xa ti Saule xchi'uc ti Jonatane. Petbil loc' yu'un ti me' ts'itesvanej ti jatvil bat xchi'uque. Ti anilic xa ta jatobale, yal ta lum ti coxov com xchi'uque.

⁵ Ja'uc ti Recabe xchi'uc ti Baanae, xnich'nabtac ti Rimón ti oy ta jteclum Beerote, batic ta sna ti Is-bosete. Ti c'alal c'otique. ja' o yorail ti ta xcux yo'nton ti Is-bosete ti c'alal xchic'chun ta j'ech'el ti c'ac'ale.

⁶ Ma' taj une, ta to ox sjic'a trigo ti ants ti sbainoj ta sjamel ti ti'nae. Ta jech yepal lic ochuc svayel ti mu ja'uc vinaj ochic batel ta na ti Recabe, ti Baanae, ti ja' xchi'il sbaic ta voq'uele.

⁷ C'alal ochic batel ta nae, puch'ul ta xvay ta stem laj staic ti Is-boset ti bu svayebe. Ta jech yepal laj smilic. Laj sc'ocbeic ti sjole. Sjunul ac'ubal xanavic ti xchechojic batel ti sjol ta sbelel Arabae.

⁸ Xchechojic batel sjol ti Is-boset ta stojol ti David ti oy ta Hebrone, ti xi c'ot yalbeic ya'i ti ajvalile: —Jcuch Abtel, li' ta xacac'becutic sjol ti Is-boset xnich'on ti Saule, ti ja' to ox yajcontra ti Jcuch Abtel, ti oy ta yo'nton ta xmilat ox ya'ie. Avi tana une, Jcuch Abtel, pacbat xa sutel yu'un ti Dios ti c'usi laj spas ti Saúl xchi'uc ti snitilultaque.

⁹ Xi tac'batic yu'un ti Davide: —Ta jva'an ta rextico ti Diose, ti Buch'u laj stic' sba ta jpojel yu'un ti vocole,

¹⁰ c'alal oy jun tal yalbun ti slo'il ya'yeje, laj jnop ti ja' jun lequil ach' c'op tal xchapbun caloje, ja' to laj ca'i ti tal yalbun ti cham xa ti Saule, ti laj stoj ta sjol cu'un ti laj jmil ta Siclage.

¹¹ ¡Ja'uc tana le' ec une, avac'toicuc ma' ti mu jechuc ta xc'ot ta atojolique, banquilal jmilvanejetic, ti laj amilic jun vinic ti ch'abal smule, ti c'alal jun yo'nton puch'ul ta xvay ta sna laj ataique! Ja' yu'un un cha'e, ¡ta xcac' atojic ti jech chame! ¡Ta jtub ac'oplalic ta banomil!

¹² Ta jech to yepal, laj yalbe mantal yaj'opisialtac ti Davide, ti lic smilique. Laj sc'ocbeic ti sc'obe xchi'uc ti yacane. Laj sjoc'anic ta sts'el xch'amleb vo' ta Hebrón. Ts'acal to un, laj xchechic batel sjol ti Is-bosete, laj smuquic ta Hebrón ti bu mucul ti Abnere.