2 Samuel 24 - Bible in Tzotzil de Chamula

Ti Davide lic stsac tsacob-biil yu'un ti jteclume

¹ Ti Diose lic sc'ac'al yo'nton ta stojol ti israeletique, ti laj stijbe yo'nton ti Davide yo' jech ta xcontrainatic yu'une, ti lic yal mantal ti licuc tsacob-biil ta stojol ti Israele xchi'uc ta stojol ti Judae.

² Va'i un, ti ajvalile xi laj yalbe ya'i mantal ti Joab banquilal jpas-mantal yu'un ti soldadoetic ti xchi'inoje: —Bat xaniic scotol steclumal ti Israele, ti licuc talel avu'unic ti tsacob-biil ta Dane, ti c'otuc c'alal to Beersebae, yo' jech ta jna' c'u yepal oy ti jnaclejetique.

³ Ja'uc le' une, xi tac'bat ti ajvalil yu'un ti Joabe: —Ti Ajvalil Dios yu'un ti Jcuch abtele, ac'o yepajes to ta vo'vinic (100) velta yepal jnaclejetic jech c'u cha'al yepal avi tana li'e, xchi'uc xtoc ti yiluc ta sba ta sat ti Jcuch abtel ti cuxul toe. Ja'uc le' une, ¿c'u cha'al oy ta yo'nton ti Jcuch abtel ta sliques ti tsacob-biile?

⁴ Manchucuc mi jech un, ti Joabe xchi'uc ti yan banquilaletic yu'un ti soldadoetique, tsots albatic mantal yu'un ti Davide, ti loq'uic ech'el ta stojol ajvalil ti Joabe xchi'uc ti banquilaletic yu'un ti soldadoe, yo' jech ta sliquesic ti tsacob-biil ta stojolic ti jteclum Israele.

⁵ Ech' xtuch'ic ti uc'um Jordane. Laj sliquesic ta Aroer xchi'uc ta jteclum ti oy ta o'lol stenlejal ta stuq'uil ech'el ti Gade xchi'uc ti Jazere.

⁶ Ts'acal to un, c'otic ta Galaad xchi'uc ta Cades, slumalic ti hititaetique. C'otic xtoc ta Dan ta ts'acal to. Loq'uic ech'el ta Dan ti ech' sjoyic ta Sidone.

⁷ Laj taj une, batic ta nac'obbail ta Tiro, xchi'uc ta scotol ti lumetic yu'un ti heveoetique, ti cananeoetique, ja' to ti c'uxi c'otic ta loq'uel ta yolon ti yac'ol xocon sloq'ueb c'ac'al ti oy ta Judá ti ta Beersebae.

⁸ Laj yich' baluneb (9) u xchi'uc jtob (20) c'ac'al ta xaniel scotol ti lumetique. Ta ts'acal to un, c'otic ta Jerusalén.

⁹ Ti Joabe laj yac'be jelavel ajvalil ti c'u yepal laj sta ta tsacbel sbi ti jnaclejetic ti oyic ta jteclume, ti loc' ta chapel vaxaquib ciento ta mil (800,000) viniquetic ti chapalic ta ac'-leto ta Israele, xchi'uc vo'ob ciento ta mil (500,000) ta Judae.

¹⁰ Ja'uc le' une, laj ya'i ta yo'nton ti David ti laj sta smul ti laj sliques ti tsacob-biil yu'un ti jteclume, ti xi jamal laj yalbe ti Diose: —Tsots laj xa jta jmul ti jech laj jpas le'e. Ja'uc le' une, ta xajc'anbe vocol, Dios, ch'aybun jmul jcolo' ti laj sta ti avajtunelune. Pimil toyobba xca'i jba ti jech laj jpase.

¹¹ Sob xa ta yoc'omal un, ti c'alal liquem xa ti Davide, ti Diose xi laj yalbe ti yaj'alc'op Gade, ti ja' j'alc'op yu'un ti Davide:

¹² “Batan, ba q'uelo ti Davide, ti xi xavalbe ya'i ta jventa ti c'alal ta xac'opone: Oy oxtos ti c'usi ta xcac'be sna'e, ti ac'o st'uj c'usi sc'an ta jpasbee.”

¹³ Ti Gade bat sq'uel ti Davide, ti xi laj yac'be sna'e: —¿C'usi la ti junucal lec ta xava'ie? ¿Mi ja' ti vucub jabil vi'nal ta xlic ta jteclume? ¿Mi ja' ti oxib u ti jatbil nutsbilot yu'un ti avajcontrae? ¿Mi ja' ti oxib c'ac'al ta xtal tsots chamel ta jteclume? Nopo, tac'o ca'itic avi tana li' une yo' jech ta jna' c'usi ta jtac'be ti Buch'u laj stacun talele.

¹⁴ Ti Davide xi laj stac'be ti Gade: —Muc' jmacoj ma' ti vocol une. Avie, xloc' venta ti ac'o slaman yoc sc'ob ti Dios ta jtojoltique, yu'un jelavem ta j'ech'el ti yutsil slequil yo'ntone. Altic ta j'ech'el ma' ti ta xij'och ta yoc ta sc'ob ti jcontrainvaneje.

¹⁵ Va'i un, ti Diose laj stac talel chamel ta stojolic ti Israele, ti lic no'ox ta sacubele, ja' to ti c'uxi c'ot ti bu c'alal albil ti sc'oplale. Lic talel ta Dan ti c'ot c'alal to ta Beersebae, ti chamic lajuneb xchanvinic ta mil (70,000) ta vo' ti jnaclejetique.

¹⁶ C'alal ti ánjel ta xa x'och ta slilin ti Jerusalene, mu lecuc laj ya'i ti Dios ti jech ta spase, ti xi laj yalbe mantal ti ánjel ti ochem ta slilin ti lume: “¡Pajeso xa aba, ch'an xa uto!” Yu'un ti yaj'ánjel Diose xyaquet xa bu ta smaj trigo ti Arauna ti ja' jebuseoe.

¹⁷ C'alal laj yil ti David ti ta slilin ta milel jteclum ti ánjele, xi laj yalbe ti Diose: —¡Vu'un ta jcoj le'e! ¡Vu'un ta jmul jcolo'! ¿Mi yu'un la oy c'usi chopol laj spasic ti uni chijetic le'e? ¡Ti tsitsel ta xavac'bee, cajano ta jba xchi'uc ti c'u yepal oy ta jnae!

Ta sva'an jun altar ti Davide

¹⁸ Ta yorail no'ox ti c'ac'al taje, ti Gade bat sc'opon ti Davide. Laj yalbe ya'i ti ac'o sva'an jun altar ta sventa ti Dios ti bu smajob trigo ti Arauna ti ja' jebuseoe.

¹⁹ Va'i un, ti Davide bat ta smeltsanel ti c'u s'elan albil yu'un Dios ti Gade.

²⁰ Ti Araunae, ta nom to sq'ueloj talel ti c'alal laj yil ti xvoletic batel ti Davide xchi'uc ti svinictac ta stojole. Va'i un, ti Araunae nopaj talel, ti snupilan xa banomil c'ot spatan sba ta lumtic ta stojol ti ajvalile.

²¹ Xi laj yalbee: —¿C'usi smelol tal vu'lanvanuc ti Jcuch abtel xchi'uc ti yajtuneltaque? Xi laj stac' ti Davide: —Ta jmanbot yavil smajobil ti atrigoe. Ta jva'an jun altar ta sventa ti Diose yo' jech ta xloc' batel ti jtsutsesvanej chamel xyaquet ta stojol ti jteclume.

²² Ti Araunae xi laj staq'ue: —Ac'o yich' ti bu lec ta xil ti Jcuch abtele. Oy li' vacax ti ta xich' chiq'uel ta sventa ti matanale. Oy ti xjochob xch'abajob ti vacaxe xchi'uc ti jlocob banomil te'e ti ta xtun ta sventa ti si'e.

²³ Scotol taje, ta xcac'be ti Jcuch abtel ti c'usi ta xtun yu'une. Ma'uc no'ox taje, xi avan ti Araunae: —Lecuc la yil ti Dios ti va'i s'elan ta spas ti Jcuch abtele.

²⁴ Ja'uc le' une, xi laj yal ti ajvalile: —Colaval, ja'uc le' une, ta jmanbot scotol ja' ti c'u s'elan ti xloc' ta scotol ti stojole. Mi ja'uc ta xcac'be ta smoton ti Cajval Diose ti mi mu'yuc jmanoje. Loc' ta lajuneb yoxvinic (50) ta sep plata taq'uin ti laj sman o David ti yavile xchi'uc ti vacaxe.

²⁵ Ti bu taje, laj sva'anbe yaltar ti Diose. Laj yac' ti chic'bil matanale xchi'uc ti c'usitic ta xich' svocol ta sventa ti lajesobil o'ntonale. Va'i un, ti Diose laj xchiquinta ti ta xc'anbat vocol sventa ti lume. Ti chamel lajel ta xmilatic o xchi'uc ti Israele, loc' batel.