2 Samuel 23 - Bible in Tzotzil de Chamula

Slajebtic xa ech'el sc'op ti oy c'usi laj yal ti Davide

¹ Ti li'e, ja' slajebtic xa ech'el sc'op ti David ti xi laj yale: “Ti vinic ti toybat sc'oplal yu'un ti Diose, ja' ti David xnich'on ti Isaie, ti t'ujat ta ajvalilal ta sventa Dios yu'un ti Jacobe, ti utsil jq'uejimol vinic yu'un ti Israele, xi laj yal ta jamale:

² “Xcuxlejal ti Diose c'opoj ta jtojol, ti oy ta que ta jti' ti sc'opojele.

³ Ti Dios yu'un ti Israele yu'un c'opoj xa. Ti jpojvanej yu'un ti Israele yu'un xiyute: ‘Ti buch'u oy slequil stuq'uil sna' xchapanvane, ti xi'taoj Dios ta xventainvane,

⁴ le' une, co'ol s'elan xojobal saquil osil ti tixil muyel ta yibel vinajel ta yamal osile, ti xchijlajan no'ox yutsil jech c'u cha'al ti sacubel osil ta sob ti mu'yuc macal ta toc ti c'ac'ale, ti ta xch'i yu'un ti momoletic ti c'alal mi laj xa ox yac' ti vo'e.’

⁵ Jech o xal ti jnitilultaque lec va'alic ta stojol ti Diose, yu'un sbatel osil laj spas strate ta jtojol, yu'un lec chapbil yu'un scotol, ti jbel ta xc'ot ta pasel yu'une. Jbel sc'oplal ti jtsalvanej ta xic'ot yu'une, ti ta xc'ot ta pasel yu'un ti c'usi oy ta co'nton ta jc'anbee.

⁶ Ja'uc le' une, scotol ti buch'utic yan sjol sbaquilique, co'ol s'elan junuc ch'ix ti tenbile, ti mu'yuc buch'u sc'an stsaque.

⁷ Yu'un sc'an junuc taq'uin, mi ja' junuc lanza, yo' jech ta xich' tamel ti ta xich' jipel ochel ta c'oq'ue, yo' jech ta xc'ac' ta j'ech'el o.”

Ti banquilal soldadoetic yu'un ti David ti mu sna' stsic' yo'ntonique

⁸ Xi s'elan sbitac ma' ti banquilal yajsoldadotac ti Davide: Ti Is-Boset ti hacmonitae, ti ja' banquilal yu'un ti yoxibal ti mu sna' xi'e, oy jun velta, ta slanza no'ox, laj smil vaxaquib ciento (800) ta vo' viniquetic.

⁹ Laj taj une, tey nabal ec ti Eleazar xnich'on ti Dodoe, ti ahohita ti ja' jun xtoc ta yoxibal ti mu sna' xi'e. Yu'un ti c'alal xchi'inoj sbaic xchi'uc ti David ta Pas-damime, ti filisteoetique laj svol sbaic ta ac'-leto xchi'uc ti Israele. Ti israeletique laj sq'uej sbaic ech'el.

¹⁰ Ja'uc ti stuc une mi ja'uc laj sibtas sba. Lic stsacan ta milel ti filisteoetique, ja' to ti c'uxi lubtsaj ti sc'obe, ti mu ja'uc xa xtoy yu'un ti yespadae. Ti jech c'ac'al taje, ep tsalvan ta j'ech'el ti Diose. Ti yan soldadoetique laj sts'acliic batel ti Eleazare yo' jech ta stamic talel ti c'usitic com yu'unic ti anima yajcontraique.

¹¹ Ma'uc no'ox ti Eleazare, nabal talel ec ti Sama xnich'on ti Agee, ti araritae. C'alal svoloj sbaic ti filisteoetic ta Lehie, ta osiltic ti bu ts'unbil ti jchop o ta arbijae, ti soldado Israele jatavic loq'uel ta stojolic.

¹² Ja'uc ti Samae laj xic'an lec sba ta o'lol osiltic yo' ta xpojvan, ti laj stsal ti filisteoetique. Ta j'ech'el tsalvanem c'ot yu'un ti Diose.

¹³ Oy jun velta ti ja' o yorail ta xich' tsobel ti ts'unobile, oy oxib ta scotolic ti lajuneb xcha'vinic (30) ta vo' ti tsatsaquil viniquetique, bat snup sbaic ta be xchi'uc ti David ta nail ch'en ti oy ta Adulame. Ja'uc ti j'ac'-leto filisteoetique slamanoj sbaic ta stenlejal yu'un Refaim.

¹⁴ Ti Davide snac'oj sba ta nac'obbail c'alal ti j'ac'-leto filisteo ja' o xa oyic ta Belene.

¹⁵ Ti ja' o juteb ta yo'nton ti Davide, xi laj yale: “¡Ti oc la ta alel ti oyuc buch'u xiyac'bun cuch' ti vo' ta joc' ti oy ta ochebal yu'un ti Belene!”

¹⁶ Va'i un, ti oxib ti mu sna' xi'ique ochic batel ti bu vololic ti filisteoetique. Laj spulic loq'uel ti vo' ta joc' ti oy ta ochebal yu'un ti Belene. Laj yich'ic batel ti bu oy ti Davide. Ja'uc ti stuc une, mu'yuc laj yuch'. C'ajomal no'ox laj smal ta sventa smoton ti Diose,

¹⁷ ti xi lic yale: “¡Ma'uc calbe Dios ma' ti ta xcuch' une! ¡Yu'un co'ol s'elan ta xcuch'be xch'ich'el ti viniquetic li'e, ti mu sventaicuc mi ta xchamic ti ay spulic talel ti vo'e!” Mi ja'uc c'ot ta yo'nton ta yuch'el ti vo'e. Ja' jech taje ti laj spasic ma' ti oxib ti mu sna xi'ique.

¹⁸ Ti Abisai xchi'il ta voq'uel ti Joabe, xnich'on ti Sarviae, c'otem ta banquilal yu'unic ti lajuneb xcha'vinic (30) ta vo' viniquetic ti mu sna' xi'ic taje. Oy jun velta, c'ajomal no'ox slanza yich'oj ti laj stsaquic ta c'op vo'lajunvinic (300) ta vo' viniquetic ti laj smilique. Cajal c'ot sc'oplal ta stojol ti lajuneb xcha'vinic (30) ta vo' viniquetique,

¹⁹ ti ich'bil ta muc' c'ote, ti mu sta ti yane, ti c'ot ta banquilal yu'unique. Ja'uc le' une, mu xco'olaj xchi'uc ma' ti oxibic ta ba'yele.

²⁰ Ti Benaía xnich'on ti Joiadae, ti liquel talel ta lum Cabseele, ja' jun vinic ti mu sna' xi'e, ti ep ti c'usi laj spase. Taje, ja' laj smil ti cha'vo' xnich'on Ariel ti liquel talel ta Moabe. Oy jun velta, ti c'alal ja' o ta xyal talel ti bote, laj stic' sba ochel ta jun pujul nail ch'en, ti laj smil jcot león ta yute.

²¹ Ja' jech xtoc xi s'elan laj smil jun muc'ul egipcio vinic ti stsacoj slanza laj stae: Ti Benaías laj sc'ambe te'. Laj spojbe ti slanzae. Ta slanza no'ox stuc, laj smil o xchi'uc.

²² Ti va'i s'elan laj spas ti Benaíae, xnich'on ti Joiadae, laj sta ti puc ti sc'oplal ta stojol ti lajuneb xcha'vinic (30) ta vo' ti mu sna' xi'ique.

²³ Laj sta ti ich'bil ta muc' c'ote. Ja'uc le' une, mu sta jech c'u cha'al ti oxibic ta ba'yele. Jech ti Davide ja' laj yac' ochuc ta banquilal yu'un yajchabivanej ti stuque.

^24-39 Ti ta stojol ti lajuneb xcha'vinic (30) ta vo' viniquetic ti mu sna' xi'ique, tiq'uil me ta venta ma' ti yan eque: Ti Asael xchi'il ta voq'uel ti Joabe. Ti Elhanán xnich'on ti Dodo ti liquel talel ta Belene. Ti Sama ti liquel talel ta Harode. Ti Elicá ti liquel talel xtoc ta Harode. Ti Heles ti paltitae. Ti Ira xnich'on ti Iqués ti liquel talel ta Tecoae. Ti Abiezer ti liquel talel ta Anatote. Ti Sibecai ti liquel talel ta Husahe. Ti Salmón ti ahohitae. Ti Maharai ti liquel talel ta Netofae. Ti Heled xnich'on ti Baana ti liquel talel ta Netofae. Ti Itai xnich'on ti Ribai ti liquel talel ta Gabaa ti oy ta yosilal ti Benjamine. Ti Benaía ti liquel talel ta Piratone. Ti Hidai ti liquel talel ta uc'um Gaase. Ti Abí-albón ti arbatitae. Ti Azmavet ti liquel talel ta Bahurime. Ti Eliahbá ti saalbonitae. Ti xnich'nab ti Jasene. Ti Jonatane. Ti Sama ti araritae. Ti Ahiam xnich'on ti Sarar ti ararita xtoque. Ti Elifelet xnich'on ti Ahasbai ti liquel talel ta stojolal ti Maacae. Ti Eliam xnich'on ti Ahitofel ti liquel talel ta Guiloe. Ti Hesrai ti liquel talel ta Carmele. Ti Paarai ti arbitae. Ti Igal xnich'on ti Natán ti liquel talel ta Sobae. Ti Bani ti liquel talel ta Gade. Ti Sélec ti liquel talel ta Amone. Ti Naharai ti liquel talel ta Beerot ti ja' yajcoltaobba ti Joabe, xnich'on ti Sarviae. Ti Ira ti liquel talel ta Jatire. Ti Gareb ti liquel talel ta Jatire. Ti Urias ti hitita xtoque. Vuclajuneb xcha'vinic (37) ta vo' viniquetic ti oy ta scotole.