2 Samuel 22 - Bible in Tzotzil de Chamula

Sq'uejimolal ti tsalvanem c'ot ti Davide

¹ Sq'uejimol ti David ti lic sq'uejinta ta stojol Dios ti jech mu'yuc to x'aq'ue ta c'abal yo' ta xmile yu'un ti Saule xchi'uc scotol ti yajcontrataque,

² ti xi lic yale: “C'otemot ta jpojobbailot, Dios, ta jnac'obbailot, ta jpojvanejot.

³ Ti Diose, co'ol s'elan jbej muc' ta ton ti snac'ojun leque, ti c'otem ta jun jmacobbaile, ti cuchem yu'un ta spojelune, ti ta toyol to nac'alun yu'une, ti c'otem ta toyol jpojobbaile, ti c'otem ta jcoltavaneje. Laj atic' aba ta spojelun ti c'alal tsots ta j'ech'el ti jvocole.

⁴ Ti vo'ote, Cajval Dios, ac'otebal o ti lequil c'optabilote. C'alal ta xajtaot ta c'oponele, ta xapojun ta yoc ta sc'ob ti jcontrataque.

⁵ “Co'ol s'elan ya'lel nab ximaxet xa licom yu'un ti lajebale; ti c'usi ta xmilvane co'ol s'elan balac' vo' ti xbalaq'uin no'ox talel laj quil ti lixi' yu'une.

⁶ Ti lajebale laj sts'otun ta xch'ojon; xi'bal sba ti pets'etic laj jta yu'une.

⁷ Ti jech mu x'ech' xjelav ti vocol laj ca'ie, laj jta ta c'oponel ti Diose. Laj jc'anbe ti ac'o stic' sba ta jpojel ti Diose. Ta xch'ulna to, laj ya'i ti jc'opojel jti'inele; c'ot ta sni' ta xchiquin ti li'avane.

⁸ “C'ot ta pasel ti tsots xnicnun no'ox liquel ti banomil yu'une, ti xi s'elan c'ot ta pasele: nic yoyaltac ti vinajele, nic ta j'ech'el ta scoj scapemal sjol ti Diose.

⁹ Xvajet no'ox yu'un ti ch'ail ta sni'e; loc' talel jmilvanej c'oc' ta ye; xleblajan no'ox ti c'oc' ta xloc' talel ta yee.

¹⁰ Laj sjam smactac ti vinajele, yal talel un. Ta yolon ti yoque, xvolet no'ox lumal toc.

¹¹ Xvinaj to ti xvilet cuchbil batel yu'un ti iq'ue.

¹² C'ot ta axibalna yu'un ti c'usi ic' xvolet ta sjoylejale, xchi'uc ti lumal toc ti xi'bal sba xchi'uc ti ya'lele.

¹³ Xjaplajet xojobal ti c'usi loc' talel ta stojole, ti xleblajet no'ox ta j'ech'el stilemal ti c'oq'ue.

¹⁴ “Ti Dios ti oy ta toyole, xi to s'elan xvo'o'et laj yac' ta a'yiel ti sc'opojel ta vinajele:

¹⁵ xc'avlajet no'ox yal talel yu'un ti chauque, ti xjipte-jipte no'ox yu'un ti syolobe, ti mu xa xa'i sbaic xjipetic ta jatobal yu'un ti cajcontrataque.

¹⁶ Stuc xa yav t'ajal com snabil ti nabe; xvinaj xa ta q'uelel com yoyaltac ti banomile, ta sventa ti xi'el xac' sc'opojel ti Diose, ta sventa ti oy c'usi tsots xjumet no'ox laj yac' taluque.

¹⁷ “Ta toyol to, laj yac'bun talel sc'ob ti Diose; ta sc'ob laj xchechun loq'uel ti mu albajuc sjamalil ti nabe.

¹⁸ C'alal mu'yuc xa c'usi xcut jbae, ti tsalbilun xa yu'un ti cajcontra ti ech'em xu' yu'unique, ti mu sta ti vu'une, laj stic' sba ta spojelun.

¹⁹ Yu'un ja' o laj stsaquicun ta c'op ti c'alal oyun ta vocole; ja'uc le' une, xi s'elan laj stic' sba ta spojelun ti Diose:

²⁰ Lic'ot ta pojel colel yu'un; mu tuch'bajun ta yo'nton ti laj scoltaune.

²¹ Xc'ot o ti laj jta jmoton yu'un ti Diose, yu'un xca'ibe ti sni' xchiquinale.

²² Jtamoj ti c'usi sc'an ti Diose; ta j'ech'el mu'yuc laj jtuch' ta co'nton ti Diose.

²³ Ti ta scotol ti c'usi nopbil yu'une, laj jpas; ta j'ech'el mi ja'uc laj quicta jba ta spasel ti jbel ti c'usi albil yu'une.

²⁴ Tuc' jol co'nton ta stojol; laj quicta jba ta spasel ti c'usi chopole.

²⁵ Ti jech mu yanuc ti jol jbaquil ta stojole, ti Diose laj yac'bun jmoton.

²⁶ “Ti vo'ote, Dios, mu xana' xayanijes avo'nton xchi'uc ti buch'u jun yo'nton ta atojole; jun yutsil ta xavil ti buch'u mu xyanij sjol sbaquil ta atojole.

²⁷ Jamal avo'nton ta stojol ti buch'u jamal yo'nton ta atojole; tsots ta xava'an aba ta stojol ti buch'u spajebal o chopol ta spase.

²⁸ Ti buch'u biq'uit ta xac' sbae, ta xacolta; ja'uc ti buch'u cajal toyobba xa'i sbae, avac'oj asat ta stojol ti ta xapec'tsanbe ti sc'oplale.

²⁹ C'otemot cu'un ta saquilal osil, Ch'ul Dios; xchijlajan vulel axojobal ta jtojol ti c'alal ic'uneb ta xca'i ti osil banomile, Cajval Dios.

³⁰ Ti jech coltabilun avu'une, ta jtsac ta c'op ti jcontrae, ti ta xibit ochel ta sba smocal ti steclumalique.

³¹ “Ti bu stamoj ech'el ti Diose, toj jun yutsil ta j'ech'el; ti c'usi ta xloc' ta ye ta yalel ti ta spas ti Diose, stac' ich'el ta muc' ta j'ech'el. Scotol ti buch'utic jun yo'ntonic ta stojole, ta stuc'ulan lec ta xchabiel.

³² ¿Mi mu ja'uc Ajvalil ti Dios un cha'e? ¿Mi yu'un oy to yan dios ti xu' ta xispojotique?

³³ Ja' muc'ul cajchabivanej ti Diose; ja' yabtel ta spas ti lec jc'oplale.

³⁴ Ja' ta xac'bun canilajeb yo' jech xibitet ta anil jech c'u cha'al junuc te'tical chij; ja' ta xiyac'bun yipal yo' jech cajal ta xbat ti jc'oplale.

³⁵ Ja' ta xistojobtasun ta yaq'uel ti letoe; ja' ta xiyac'bun yipal ta xach'el ti c'anal taq'uin yolobe.

³⁶ “Vo'ot ta xapojun, ta xatic' aba ta scoltaelun; ta xc'uxul avo'nton oy c'usi ta jta.

³⁷ Ta aventa vo'ot lec ti bu jtamoj ech'ele, mu to bu stsulbij ti cacane.

³⁸ “Laj jnuts ti cajcontrae, laj jtsutsesic ta j'ech'el, ja' to lisut ech'el ti c'alal tub xa comel ti sc'oplale.

³⁹ Ta j'ech'el laj jtsutsesic, mu'yuc c'usi x'ayan comic cu'un. Xi c'ot ta pasel ti mu'yuc xa laj stam sbaique, busul comic ta coc.

⁴⁰ Vo'ot laj avac'bun yipal ti ac'-letoe; c'ot ta pasel avu'un ti nijil chimil c'otic ta jtojol ti jtoyobbaetique.

⁴¹ Va'i un, ta jba ta jsat, jatavic ech'el ti cajcontrataque, ja' jech laj jtsutsesic ti buch'utic xti'et sjolic ta jtojole.

⁴² Sc'anolanic xa pojel coltael, mu'yuc buch'u tal stic' sba ta spojelic; x'avetic xa ta stojol ti Diose, mu'yuc xtac'batic yu'un.

⁴³ Co'ol s'elan spucuquil banomil laj jlilinic ta j'ech'el. Co'ol s'elan ach'el laj ju'ilanic ta teq'uel ta be.

⁴⁴ Laj apojun ti c'alal oyic ta tsalvanej ti jteclumle. Staoj yav va'alun ta banquilalun yu'un ti muc' ta lume; c'otic ta cajtuneltac avu'un ti lumetic ti buch'utic mu xcojtiquinane.

⁴⁵ C'alal ta xa'iic ti jc'ope, ta xisch'unbeicun; lec jc'oplal yu'unic ti jyanlumetique.

⁴⁶ Mu'yuc xa xchi'uc xch'ulelic ta xa'i ti jyanlumetique, ti xnicnunic xa ta xi'el ta xloq'uic talel ti bu snac'oj sbaique.

⁴⁷ “Muyubtabiluc ti Diose. Ich'biluc ta muc' c'otuc ti cajpojvaneje. Toybiluc c'otuc sc'oplal ti Dios jcoltavanej jpojvanej cu'une.

⁴⁸ Yu'un ti Dios taje, ja' ti buch'u laj spacbun ti jc'oplale, ti nijil chimil c'ot yu'un ti lume.

⁴⁹ Yu'un ja' lispojun ti oyun ta yoc ta sc'ob ti cajcontrae, ti oyun ta stojol ti jtoyobbaetic ti cajal ye sti' xa'i sbaic ta jtojole. Mu teyuc no'ox aq'uelojun ti c'alal oyun ta yoc ta sc'ob ti viniquetic ti buch'utic xti'et ti sjole, laj atic' aba ta jpojel.

⁵⁰ Jech o xal ta sba ta satic ti muc'tiquil lumetique, ta xa jlequil-copta, ta jq'uejinta q'uejimoletic ta sventa ti ach'ul bie.

⁵¹ Loc' ayan ta avo'nton ti jtsalvanejuc c'ot avu'un ti ajvalil ti laj at'uje; staoj oy ti xc'uxul avo'nton ta stojol ti Davide xchi'uc ti snitilultaque.”