2 Samuel 20 - Bible in Tzotzil de Chamula

Ti Sebae ta spoj ya'i abtelal

¹ Ta snitilultac ti Benjamine oy jun vinic ti mu'yuc xch'ulel xa'i sbae, ti sbiinoj Sebae, xnich'on ti Bicrie, ti oy ta Gilgale. Ti Sebá taje xi laj yalbe ti c'ot ta pasel ti laj sliquesbe sjol ti jteclum ti laj stsac ti yabtejebic yu'une: “¡Mu'yuc yac'oj jol co'ntontic ta stojol ti Davide! ¡Mi ja'uc jmojuc jrextotic jutebuc xchi'uc xnich'on ti Isaie! ¡Jcotoltic ti israelotique, batic ta jnatic quere!”

² Scotol ti viniquetic yu'un ti Israele laj yictaic comel ti Davide yo' jech ta xbat sco'oltas sjolic xchi'uc Sebá xnich'on ti Bicrie. Ja'uc ti viniquetic yu'un ti Judae, c'alal to ta uc'um Jordán, ta Jerusalén, staoj yav jun yo'ntonic ta stojol ti ajvalil yu'unique.

³ C'alal sut ech'el ta sna ti David ta Jerusalene, laj stac ta iq'uel ti lajunvo' sts'acal ajniltac ti laj yicta comel ta xchabiel ti snae. Laj stic' ochel ta jbej na ti chabibil leque, ti staoj yav ta stuc'ulan lec ti bu taje, ti mu ja'uc xa laj xchi'inan ta vayele. Ja' jech bajal comic, c'otic ta me'unal ants ti c'u sjalil cuxulique.

⁴ Laj taj une, ti ajvalile xi laj yalbe ti Amasae: —Ba ic'o talel ti viniquetic yu'un ti Judae, ta yoxibal c'ac'al un, li' xa oyucot ta jtojole.

⁵ Ti Amasae ba stsob, ti joc'tsaj xchi'uc ti c'u sjalil albile.

⁶ Va'i un, ti Davide xi laj yalbe ti Abisaie: —Ti Sebae ep ta xac' liquel vocol, ja' mu sta ti Absalone. Ja' yu'un un cha'e, ta xcac'bot abain ti cajsoldadotaque. Ba nutso ya'i, naca mi ta sta jlomuc jteclumetic ti oy lec smocal ti xu' ta xjatav batel ta coc ta jc'obtique.

⁷ Svinictac ti Joabe, ti cereteoetique, ti peleteoetique, ti jchabivanej yu'un stuc ti ajvalil ti baxbol ta soldado xa'i sbaique, loq'uic ech'el ta Jerusalén xchi'uc ti Joab ta snutsel ti Sebae.

⁸ C'alal oyic xa ta sts'el muc' ta nail ch'en ti oy ta Gabaone, loc' talel nupvanuc ta be ti Amasae. Ti Joabe slapoj ech'el sc'u' sventa ti ac'ob-letoe. Syomoj lec ta chuquel xchi'uc ti xchuque, ti joc'ol batel ta xocon ti yespada ta snaile, ti xu' ta snit loq'uel ta yolon no'oxe.

⁹ Ti Joabe, ta sbats'i c'ob ta stoybe muyel yolon ye ti Amasa yo' ta sbuts'e, ti xi laj sjac'bee: —¿Mi lec ta xbat avu'un, cuts' calal?

¹⁰ Ti Amasae mi ja'uc laj stuc'ulan ti oy ta sc'ob yespada ti Joabe. Nax to ti Joabe, paj xutbe ti c'alal to lum scotol ti sbel xch'ut yu'une. Toj chamel c'ot yu'un. Mu xa ti'iltaseluc sc'an jmojuc yu'un ti Joabe. Laj taj une, ti Joabe xchi'uc ti Abisai ti ja' xchi'il ta voq'uele, laj stam batel sbeic ta sa'el ti Sebá xnich'on ti Bicrie.

¹¹ Va'i un, ti jun ta scotol yajsoldado ti Joabe, xi laj yal ti laj sva'an sba ta sts'el ti bu bitsil ti Amasae: —¡Ti buch'u yac'oj sjol yo'nton ta stojol ti Joabe xchi'uc ti Davide, ac'o stijliic batel ti Joabe!

¹² Ti balom ch'ich' xbalet xa ti Amasa ta o'lol bee, laj yil jun soldado ti scotolic ta x'ech' ta va'lej ti yajval lume. Laj sbalalin loq'uel ta be ti Amasae. Lic smac ta jlic c'u'il, ja' ti ta xil ti tey ta xc'otic ta va'lej ti buch'utic ta x'ech'ique.

¹³ C'alal laj xa sbalalin loq'uel ta o'lol bee, tuc' xa ta xjelav scotolic ti buch'utic co'ol sjolic xchi'uc ti Joab ta snutsel ti Sebae.

¹⁴ Ja'uc ti Sebae lec jelav ech'el ta stojol jujuvoc' nitiluletic slumal ti Israele. C'ot ta Abel-bet-maaca. Stsoboj ech'el scotol snitilultac ti Bicrie, ti ochic batel ta jteclum xchi'uque.

¹⁵ C'alal c'otic ta jteclum Abel-bet-maaca svinictac ti Joabe, lic smeltsanic ochel jelavebal ta sba moc yo' jech ta stsaquic ta leto ti lume, xchi'uc scotolic ta sjipic yalel ta lum ya'iic ti moque.

¹⁶ Ta jech to yepal, xi avan talel jun ants ta sba ti moque, ti oy sbijil sna' c'u s'elan ta spaquel ti c'ope: —¡A'yio ava'iic! ¡A'yio ava'iic! ¡Avocolicuc! ¡Albeic ya'i ti Joab ta jventae, ti ac'o nopajuc talele, yu'un ta jc'opon ca'i!

¹⁷ C'alal nopaj ech'el ti Joabe, xi jac'bat yu'un ti antse: —¿Mi vo'ot Joab? —Vu'unun ma' ti Joabe —xi laj stac' ti stuque. Ti antse xi laj yale: —A'yibo sc'op ti avajtunel li'e. —Albun ca'itic —xi laj staq'ue.

¹⁸ Va'i un, xi lic yal ti antse: —Oy xi xalic xca'i ti c'op ta vo'nee: “Mi oy buch'u oy c'usi ta sjac' ya'ie, ac'o ba sjac' ta Abel.” Ja' to jech ta xchapaj ti c'ope.

¹⁹ Yu'un ti jlumalcutique, ja' jun ti mu sna' sa'ic ti c'ope. Mu sna' syanijes ti o'ntonal ta stojol ti Israele. ¡Ja' jun ti cajal c'otem ti sc'oplale! Manchuc mi jech un, ja'uc ti vo'ot une, ta xalilin ava'i. ¿C'u cha'al ta xalilin ti c'usi ja' yu'un ti Diose?

²⁰ Xi laj stac' ti Joabe: —¡Mu jechuc ma' taje! Mi ja'uc oy ta co'nton ta jlilin ti stuc slilijemal ta xcom cu'une.

²¹ Ma' taje, mu jechuc. Oy vinic sbiinoj Sebá ti liquem talel ta yosilal ti Efraine, ti xchapanoj xa sba xchi'uc yabtejeb ta scontrainel ti ajvalil Davide. Chucbun talel ti stuque, ta xiloc' batel li' ta jteclume. —Ta jipcutic talel ti sjol ta sba ti moque —xi laj stac' ti antse.

²² Ti oy sbijil ti sna' c'u s'elan ta spac ti c'ope, bat ta anil ta yu'ninbel sjol yo'nton ti jteclume. Laj sbojbeic sjol ti Sebae. Laj sjipbeic ech'el ti Joabe. Va'i un, ti Joabe laj yal mantal ti ac'o yich' oq'uisanel ti oq'uese. La yictaic comel ti jteclume. Ta jujun tal bat ta snaic. Ja'uc ti Joabe sut ech'el ta Jerusalén yo' ta sc'opon sbaic xchi'uc ti ajvalile.

Ti yaj'opisialtac ti Davide

²³ C'ot ta banquilal yu'un soldado Israel ti Joabe. Ja'uc ti Benaíase, xnich'on ti Joiadae, ja' c'otem ta banquilal yu'un ti jchabivanej soldadoetic cereteoetique, ti peleteoetique.

²⁴ Ti tsots abtel sc'an pasele, ja' sbainoj ta sq'uelel ti Adorame. Ti ochemic ta yajts'ibajom ti ajvalile, ja' ti Josafate, xnich'on ti Ahilude.

²⁵ Ti ochem ta yalel ti c'usitic ta xc'ot ta pasele, ja' ti Sevae. Ja'uc ti paleetique, ja'ic ti Sadoque, xchi'uc ti Abiatare.

²⁶ Ti Irae, ti liquem talel ta steclumal ti Jaire, ja' yajpale xtoc ti Davide.