2 Samuel 2 - Bible in Tzotzil de Chamula

Ta x'ac'bat yich' yabtel ta ajvalilal ti David ta Judae

¹ C'alal laj taj une, lic sjac' sba ta stojol Dios ti Davide, ti xi laj yalbee: —¿Mi ta xibat ta junuc jteclumetic yu'un ti Judae? —Tana —xi tac'bat yu'un ti Diose. —¿Bu jotucal ta xibat un? —xi laj stac' ti David une. —Batan ta Hebrón —xi tac'bat yu'un ti Diose.

² Ti bu taje, yic'oj batel xchibal yajnil ti Davide, ja' ti Ahinoam ti liquem talel ta jteclum Jezreele, xchi'uc ti Abigail yajnil to ox ti Nabal ti liquem talel ta Carmele.

³ Yic'ojan batel xtoc ti svinictaque xchi'uc ti c'u yepalic ta jujuchope, ti c'ot nacliicuc ta jteclumetic yu'un ti Hebrone.

⁴ Ts'acal to un, c'otic ti jnaclejetic yu'un ti Judae. Laj smalbeic aceite ta sjol sventa ta snup yabtel ti Davide yo' jech ta x'och ta ajvalilal yu'un ti Judae. C'alal albat ya'i ti David ti ja'ic ti jnaclejetic ta Jabes yu'un ti Galaad ti laj smuquic ti Saule,

⁵ ja'uc ti David une laj sta ta iq'uel ti j'al-mantal j'ich'-c'opetic ti xi laj yalbe ya'ie: “Batanic, ba albeic ya'iic ti ac'o sva'an sba ti Dios ta stojolique, ja' ti c'uxubaj yo'ntonic ta stojol ti Saúl ti laj smuquic spixic ti yajvalique.

⁶ Junuc yo'ntonic yu'un ti Diose. Ja'uc ti vu'un eque lec ta xquilic ti jech laj spasic taje.

⁷ Avi tana le' une, ayanuc avipic, tsatsubicuc, mu stsiq'ues yo'ntonic yu'un ti cham laj xa ti Saúl ti ja' yajvalique, yu'un snitilultac ti Judae laj yac'beicun jnup cabtel yo' jech ta xi'och ta ajvalil yu'unic.”

Ta stsac sbaic ta leto ti Israel xchi'uc ti Judae

⁸ Ja'uc ti Abner xnich'on ti Nere, banquilal jtsobvanej yu'un yajsoldadotac ti Saule, laj yic' batel ta Mahanaim ti Is-boset xnich'on ti Saule.

⁹ Ti bu taje, lic sva'an ta ajvalilal yu'un scotol ti c'u yepal smacoj ti Israele, xchi'uc ti Galaade, ti Guesurie, ti Jezreele, ti Efraine, ti Benjamine.

¹⁰ C'alal och ta ajvalil ti Is-boset ta Israele, yich'oj xa ox cha'vinic (40) jabil, ti c'ajomal chib jabil ech' ta ajvalilale. Ja'uc snitilultac ti Judae sna' lec ti ja' ajvalil yu'unic ti Davide.

¹¹ Ti David une, vucub jabil xchi'uc vaquib u sjalil, och ta ajvalilal ta Judae, ti bu chotol ta spas mantal ti ta Hebrón ti muc' ta jteclum yu'une.

¹² Ti Abner une loc' batel ta Mahanaim, bat ta Gabaón ti jba'be ech'el ta stojol yajsoldadotac ti Is-bosete.

¹³ Ja'uc ti Joab xnich'on ti Sarviae stsoboj batel yajsoldadotac ti Davide. Loq'uic batel ta Hebrón ti jmoj snupoj sbaic c'ot ta be ta sts'anleb vo' ti oy ta Gabaone. Xcha'voc'alic ti soldadoetique lic sa' lec yavilic ta jujujot ta sts'anleb vo' ti slecoj lecoj vololic ta jujujot xocone.

¹⁴ —Ac'o stsac sbaic quic ta leto ti querem viniquetic ta jba ta jsatic jcotoltique, —xi laj yac' ta na'el ti Abner ta stojol ti Joabe. —Lec ta xca'i —xi laj stac' ti Joabe.

¹⁵ Ti ta stsac sbaic ta letoe, loq'uic talel lajcha'vo' querem viniquetic ta sventa ti Benjamín ti svoloj ti Is-boset xnich'on ti Saule. Loq'uic talel lajcha'vo' xtoc ta sventa yajsoldadotac ti Davide.

¹⁶ Ta jujun tal laj stsacbeic ta sjol ti scontraique. Laj xenbe sbaic ti espada ta xoconique, ti scotolic chamemic xa yalic ta lum ta j'ech'ele. Jech o xal ti bu taje, laj sbiin yu'unic Helcat-hazurim ti banomil ti oy ta Gabaone.

¹⁷ Toj tsots laj stsac sbaic ta leto ti jech c'ac'al taje. Ti Abnere xchi'uc ti soldadoetic yu'un ti Israele, tsalbil c'otic yu'un yajsoldadotac ti Davide.

¹⁸ Ti bu taje, tey oyic ti oxvo' xnich'nab ti Sarviae, ja' ti Joabe, ti Abisaie, xchi'uc ti Asaele. Ti Asael taje, co'ol s'elan jamalaltic ta xa'i ti bu ta x'ech'e, ti xbitet no'ox ta anil ti co'ol s'elan junuc te'tical chij

¹⁹ ta snutsel ta jatvil ti Abnere, ti xac'touc ta to xcol ti yaloje.

²⁰ —¡Vo'ot ca, Asael! —xi avan ti Abner c'alal laj sq'uel sutel ti spate —¡Vu'unun unbi, c'u ca xi un! —xi laj staq'ue.

²¹ —Ch'an xa'utun ta snutselun. Ja' lec, chuco batel jun chibuc ti mosoviletique. Ich'o comel ti c'usitic yich'ojique, —xi albat yu'un ti Abnere. Ja'uc ti Asael une mu xicta sba ta snutsel.

²² —Ch'an xa'utun ta snutselun. Mi mo'oj cac'tique, nax to me ti jip xacut ta lume. Mi jech ta xc'ot ta pasele, ¿mi yu'un stac' to ono'ox xu' ta jtoy jsat ta stojol ti achi'il ta voq'uel Joab unbi? —xi laj xcha'al ti Abnere.

²³ Ja'uc ti Asaele mu xicta sba ta nutsvanej. Jech o xal ti Abnere nax to ti paj xutbe ech'el sni' ti slanzae, ti toj jelavel c'alal to spate, ti chamem yal ta lum ti Asaele. Scotolic ti buch'utic ta xc'otic ti bu cham yal ta lum ti Asaele, va'alic xa ta sq'uelic.

²⁴ Ja'uc ti Joabe xchi'uc ti Abisaie xbitetic no'ox ech'el ta snutsel ti Abnere. Xcajet xa c'ac'al, c'otic ta vits ti sbiinoj Amae, ta yeloval Gía ta sbelel sbajtical banomil ti ta xbat ta Gabaone.

²⁵ Ti bu taje, laj stsob sbaic snitilultac ti Benjamine xchi'uc ti Abnere. C'otic ta jvoc' soldado ti laj svol sbaic ta toyol vits ti sa'oj xa yavilic ta letovajele.

²⁶ —¿Mi yu'un avaloj laj sc'oplal ma' ti letovajel li' une? ¿Mi mu xavil ti ja' no'ox c'ux ta xcac'be jbatic ti jvocoltique? ¿Bu to ma' ora ta xavalbe mantal ti avinictaque ti ac'o yicta sbaic ta snutsel ti svinquilel sbaique? —xi laj yavta Joab ti Abnere.

²⁷ —Xil Dios xcal, ti manchucuc jech laj aval taje, ti jvinictaque yich'ojic ta sacub ta snutsel sbaic ti svinquilel sbaique —xi laj stac' ti Joabe.

²⁸ Jech ti Joabe ta ora no'ox laj yal mantal ti ac'o yich' oq'uisanel ti oq'uese. Ta jech to yepal laj spajes sbaic scotol ti viniquetic ta snutsel ti israeletic ti scontra sbaique.

²⁹ Sjunul ac'ubal, xanavic xchi'uc svinictac ti Abner ta stenlejal yu'un ti Arabae, ti ech' sjoyilanic jelavel ti uc'um Jordane xchi'uc sjunlej ti Bitrone, ti c'otic ta Mahanaime.

³⁰ Ti Joabe laj yicta sba ta snutsel ti Abnere. Laj stsob scotol ti svinictaque. C'alal xcholet laj yavta ti biile, vinaj ti chamic balunlajunvo' (19) yaj'opisialtac ti Davide, xchi'uc xtoc ti Asaele.

³¹ Manchuc mi jech un, ti c'u yepal sts'acliojic ti Davide, laj smilic vaxaclajunvinic (360) ta vo' viniquetic yu'un ti Benjamine xchi'uc svinictac ti Abnere.

³² Laj taj une, laj spoyic ech'el sbec'tal ti Asael ta Belene. Laj yich' muquel yu'unic ta smuquinal ti stote. Ti Joabe xchi'uc ti svinictaque, sjunul ac'ubal xanavic ti c'otemic xa ta Hebrón ti c'alal sacub talel ti osile.