2 Samuel 19 - Bible in Tzotzil de Chamula

¹ C'alal laj ya'iic ti jnaclejetic ti x'oc' x'avan xa ti ajvalil ta scoj ti cham ti Absalón ti ja' xnich'one, bat yalbeic ya'i ti Joab.

² C'ot ta pasel ti tsalvanic ti jech c'ac'al taje, lic joybijuc ta me'inal un yu'un scotol ti lume.

³ Yu'un xi s'elan ta spas sbaic ti soldadoetic ti mu'yuc xa ta xac' sbaic iluc ta x'ochic batel ta jteclume: Q'uexlal xa sbaic ti xvoletic ta xanobale, ti co'ol s'elan jatvilic loq'uel ti bu lamalic to ox ta ac'-letoe.

⁴ Ja'uc ti ajvalile smacoj sat ti xi ta xal ti smiloj sba ta oq'uele: “¡Nich'on, Absalón! ¡Cuni nich'on Absalón, cuni nich'on!”

⁵ Ti Joab une xi bat yalbe ti ajvalil ta snae: —Jcuch abtel, ta xavac' ta q'uexlal ti avinictac ti co'ol sjolic ta atojole c'alal laj spojic ti Jcuch abtel avi tana li'e, ti xnich'nabe, ti yajnile, xchi'uc ti sts'acal ajniltaque.

⁶ Ti Jcuch abtele laj yac' ta ilel ti mu tsotsuc sc'oplal ta xa'i ti banquilaletic yu'une, ti yaj'opisialtaque, ti yac'oj xc'uxul ta stojol ti scontrae, ti contra ta xil ti buch'u c'ux ta x'a'yiat yu'une. Avi tanae, laj xa quil ti ja' toj lec ta xa'i ti Jcuch abtele ti ja'uc cuxuluc ti Absalone, ja' mu'yuc ta alel ma' ti chamcuncutic jcotolcutic yu'une.

⁷ Avi tana une, Jcuch abtel, loc'an batel, bat ac'bo smuc'ul yo'nton ti avinictac ti co'ol yo'ntonic ta atojole. Jamal xcal ta sba ta sat ti Diose, ti mi mu jechuque, ti ac'ubaltic tana li'e, mu jvoc'uc avinic ta xcom. Ti jech taje, Jcuch abtele, ja' to toj ech'em scotol ti vocol ta xc'ot ta atojol ti ta to xavil batele, ja' mu sta laj avil ti c'alal aqueremal to oxe.

⁸ Ti ajvalile lic batel, bat chotluc ta ochebal sti' yu'un ti jteclume. C'alal laj ya'i scotol ti lum ti chotol xa ta ochebal sti' jteclum ti ajvalile, scotolic batic ta stojol. Ja'uc ti Israele jatavic loq'uel scotolic ta snaic.

Ti Davide ta sut ech'el ta Jerusalén

⁹ Ti jujuvoc' nitiluletic slumal ti Israele, xvulajetic ta jech yepal ti xi ta xalbe sbaique: “Ti Davide laj spojotic loq'uel ta yoc ta sc'ob ti filisteoetic ti ja' cajcontratique. Manchuc mi jech xtoc un, ta scoj ti Absalone, jatav loq'uel ti li' ta jteclume.

¹⁰ Ti Absalone laj xa ox snup yabtel cu'untic yo' ta x'och ta ajvalil ti cham xa ta ac'-letoe. ¿C'usi ta jmalatic un cha'e mi mu sut talel ti ajvalil David cu'untique?”

¹¹ Ti va'i s'elan ta snopic scotol ti Israele, c'ot ta sni' ta xchiquin ti ajvalil Davide. Va'i un, xi laj stac batel mantal ta stojol ti pale Sadoque xchi'uc ti Abiatare: “C'oponic ti moletic yu'un ti Judae. Jac'beic ca'itic c'u cha'al ta sjaliltasic ti mu xisut batel ta jna yu'unique.

¹² Albeic ya'i ti mu'yuc smelol ti ta xc'otic ta slajeb ti ta xisut batel yu'unique, ti c'alal mu yanicuque, ja' jvinquileltac chapalultac.”

¹³ Laj yal mantal xtoc ti xi albatuc ya'i ti Amasae: “Jun jch'ich'eltic ti ta xc'ot ta pasel avi tanae, ti li' ta xlic batel ti ta xa'och ta banquilal yu'un ti cajsoldadotaque, ti sbainoj to ox ti Joabe, ti tsotsuc stsitsun ti Dios ti mi mu xc'ot ta pasel ti jc'ope.”

¹⁴ Ja' jech laj svulubtasbe xch'ulel scotol viniquetic yu'un ti Judae. Scotolic ti co'ol s'elan sc'op no'ox jun vinic laj yalic scotolic ti laj staquic ech'el mantal ta stojol ti ajvalile, ti ac'o sutuc batel xchi'uc scotol ti yaj'opisialtaque.

¹⁵ Va'i un, ti ajvalile laj stam sutel ti sbee, c'ot ta uc'um Jordán. Ti jnaclejetic ta Judae batic ta Gilgal yo' jech ta snupic ta be, ta scoltael jelavel ta xtuch'el ti uc'um Jordane.

¹⁶ Ja' jech ec ti Simeie, xnich'on ti Gerae, ti ayanem talel ta stojol snitilultac ti Benjamine, ti liquel talel ta jteclum Bahurime, lic xchapan sba ta anil ti laj suj sba yalel jmoj xchi'uc svinictac ti Judae, yo' jech ta snupic ta be ti ajvalil Davide.

¹⁷ Xchi'inoj batel lajuneb ciento (1,000) ta vo' svinictac ti Benjamine. Ja'uc ec ti Sibae, smosov yuts' yalaltac ti Saule, xchi'inoj batel vo'lajuneb (15) ta vo' xnich'nab xchi'uc jtob (20) ta vo' smosovtac, ti c'ot ba'yel ta uc'um Jordán ti c'alal mu to ta xc'ot ti ajvalile.

¹⁸ Ta jech to yepal, jelav ech'el ta spul-pulil uc'um yo' ta scolta ta xtuch'el uc'um ti c'u yepal x'ayan yu'un ti ajvalile, yo' jech ta sta ti lec xil sbaic xchi'uque. C'alal ta xa xtuch' jelavel uc'um Jordán ti ajvalile, ti Simeie laj snijan sba ta stojol,

¹⁹ ti xi laj yalbee: —Avocoluc, Jcuch abtel, mu xatic' ta avo'nton ti bu mu lecuc bat cu'une. Mu ja'uc xavules ta avo'nton smul ti avajtunel li'e ti laj jta ti c'alal liloc' batel ta Jerusalene. Mu tiq'uiluc o ta avo'nton.

²⁰ Laj quil jba jtuc ti oy jmule. Ti c'u yepal oy snitilultac ti Josee, vu'un ti ba'yel liloc' talel ta snupelot ta bee, Jcuch abtel.

²¹ Va'i un, ti Abisaie, xnich'on ti Sarviae, xi laj yale: —¿Mi mu ja'uc xc'ot o chamuc ti Simeie, ti laj sbis ta cotol chaval ti ajvalil t'ujbil yu'un ti Diose?

²² Ja'uc ti Davide xi laj staq'ue: —¡Xnich'on Sarvia, le'e ma'uc aventaic! ¿C'u cha'al mu lecuc xavilicun? Avi tanae, jna' lec, vu'unun ti ajvalil yu'un ti Israele. Mu'yuc buch'u ta xcham junuc li' ta Israel ti c'ac'al avie.

²³ Laj taj une, laj sva'an sba ta rextico ti laj yalbe ya'i ti Simeie ti mu xich' milele.

²⁴ Ja' jech xtoc bat snup ta be ti Mefi-bosete, xnich'on ti Saule. Ti sc'ac'alil ti c'alal loc' ech'el ti ajvalile, ti c'alal lec sut ech'ele, mu'yuc c'usi laj spas. Mi ja'uc oy bu spocoj ti yacane. Mi ja'uc oy bu xch'uloj ti yisime. Mi ja'uc oy bu xchuc'oj sc'u' ti Mefi-bosete.

²⁵ C'alal bat ta Jerusalén yo' jech ta snup ta be ti ajvalile, xi albate: —Mefi-boset, ¿c'u cha'al ti mu'yuc xbat achi'inune?

²⁶ Xi laj stac' ti stuque: —Jcuch abtel, ti jmosove laj slo'laun. Ta scoj ti coxovune, laj calbe ya'i ti ac'o xislapbun siya ti jmulae, ti ta xicaji batel yo' ta jchi'in ech'el ti Jcuch abtele.

²⁷ Ja'uc le' une, laj stic'bun jmul ta stojol ti Jcuch abtele. Manchucuc mi jech un, ti Jcuch abtele, co'ol s'elan junuc yaj'ánjel Dios ti sna' lec ti c'usi ta spas ta jtojole.

²⁸ Ac'o mi ja' xtun o ta xich' milel ta stojol ajvalil ti cuts' calaltac ta sventa ti totil me'ile, ti avajtunel li'e, ic'bil batel ta ve'el ta xmexa ti Jcuch abtele. ¿Mi yu'un to oy c'usi stac' ta jc'anbe ti ajvalil une?

²⁹ Xi laj stac' ti ajvalile: —Mu xa cac' o calilantic taje. Yu'un laj xa cal mantal ti ac'o avich'ic ch'acbel ti banomil xchi'uc ti Sibae.

³⁰ Ja' no'ox le' une, xi laj stac' ti Mefi-bosete: —Ac'o yich' comel scotol ti stuque. Ti tsots sc'oplal ta xca'ie, ja' ti mu'yuc c'usi laj spas, ti lec vul ta sna ti Jcuch abtele.

³¹ Ja'uc ti Barzilai ti liquel talel ta Galaade, yal batel ta Rogelim ti ta xchi'in jelavel ta jot uc'um Jordán ti ajvalile. Ta xch'ac sbaic xchi'uc ti bu taje.

³² Mol xa ta j'ech'el, yu'un yich'oj xa chanvinic (80) jabil. Laj yac'be ech'el ti c'u yepal ta xtun yu'un ti ajvalil ti c'u sjalil oy ta Mahanaime, ja' ti jc'ulej xa'i sbae.

³³ Ti ajvalile xi laj yalbe ya'i ti Barzilaie: —Ba chi'inun ta Jerusalén, ta xajbainot ti bu taje.

³⁴ Ja'uc ti Barzilaie xi laj staq'ue: —Altic xa ta xibat ta Jerusalén xchi'uc ti Jcuch abtele, mu xa jaluc cuxulun.

³⁵ Yu'un quich'oj xa chanvinic (80) jabil. Ti c'usi ta jtun ta jlajese, ti c'usi ta xcuch'e, mu xa xca'i mi oy to smuil, mi ch'abal xa. ¿Mi ta to la xca'i avaloj ti c'u s'elan ta xq'uejinic ti jq'uejimoletique, ti me' jq'uejimoletique? Mu xa jc'an xcac'be svocol ti Jcuch abtele.

³⁶ Yu'un c'ajomal tal quech'ta jelavel ta jot uc'um Jordán ti Jcuch abtele. ¿C'u cha'al oy ta yo'nton ta xbainvan ya'i ti Jcuch abtele?

³⁷ Ja' no'ox ta jc'anbe vocol ti Jcuch abtele, ti ac'o yac' ye sti' ti sutcun ech'el ta jlumale yo' jech tey ta xicham, ti ac'o quich' muquel ti bu mucul ti jtot jme'taque. Ja'uc le' une, Jcuch abtel, li' oy jun avajtunel ti xi s'elane, ja' ti jnich'on Quimame. Batuc xchi'uc ti Jcuch abtele, ti c'otuc ta pasel ta stojol yu'un ti Jcuch abtele ti c'usi lec ta xile.

³⁸ Xi laj stac' ti ajvalile: —Taluc ta jtojol ti Quimame. Ta xlic jpas ta stojol ti c'usi lec ta xavile. Ta xc'ot ta pasel cu'un scotol ti c'usi ta xac'ane.

³⁹ Scotolic jelavic ta jot uc'um Jordán. C'alal laj xtuch' jelavel uc'um ti ajvalile, laj sbuts' comel ti Barzilaie, laj xch'ac sbaic. Va'i un, ti Barzilaie sut ech'el ti bu nacale.

⁴⁰ Ja'uc ti ajvalile laj stam batel sbe ta Gilgal. Chi'inbil batel yu'un ti Quimame, xchi'uc scotol ti viniquetic yu'un ti Judae, xchi'uc o'lol jvoc' viniquetic yu'un ti Israele.

⁴¹ Va'i un, scotol ti israeletique bat sq'uelic ti ajvalile, ti xi laj yalbeique: —¿C'u cha'al ya'yel ti jvinquileltic snitilultac ti Judae ta spojbotic ya'iic ti Jcuch abtele? ¿C'u cha'al ya'yel ti c'ot ta yajsoldadotac ta xchabiel talel yalab xnich'nabtac ti ajvalile, ti c'ot ta svinictac scotol ti xvoletic batel ti c'alal ech' xtuch'ic ti uc'um Jordane?

⁴² Scotol jnaclejetic yu'un ti Judae xi laj stac'beic ti jnaclejetic yu'un ti Israele: —Ti ajvalile, ja' cuts' calalcutic jcotolcutic. Altic no'ox xtoc ti ta xavich' sc'ac'al avo'ntonic yu'une. ¿Mi yu'un ta xanopic ta jtun ta jlajescutic ti c'usi oy yu'un ti ajvalile? ¿Mi yu'un laj xa jtamcutic ta stunesel slajesel ti c'usi oy yu'une?

⁴³ Ja'uc ti israeletique xi laj staq'uique: —Lajuneb to velta oy stunel cu'uncutic ti ajvalile, ja' mu sta ti vo'oxuque. Ma'uc no'ox taje, ta sventa ti totil me'il cu'untique, ja' banquilal ti cu'uncutique, ma'uc ti vo'oxuque. Ja' yu'un un cha'e, ¿c'u cha'al ta xajip xatenuncutic? ¿Mi mu ja'uc ba'yel laj jnopcutic ti sutuc talel ti ajvalil cu'untique? Manchuc mi jech un, snitilultac ti Judae toj tsots tsacvanic ta c'op, ja' mu sta ti Israele.