2 Samuel 17 - Bible in Tzotzil de Chamula

Ti c'usi snopoj ox ta spas ti Ahitofele, laj smac ta be ti Husaie

¹ Ts'acal to un, ti Ahitofele xi laj yalbe ya'i ti Absalone: —Ac'bun jt'uj lajcha'miluc (12,000) ta vo' viniquetic. Ti ac'ubaltic tana li'e, ta xiloc' batel ta snutsel ti Davide.

² Yu'un ti c'alal lubem xae, ti mu xa xu' yu'une, toj lec ta loc'obinel. Ta xcac'be ya'i xi'el ta j'ech'el ti jatvil ta xbatic ec ti c'u yepal ti svinictac xchi'ucanojane. Ja' no'ox ta jmil ya'i ti ajvalile, mu'yuc yan.

³ Jech ta xc'ot ta pasel cu'un ta xlecub yo'ntonic ti jteclum ta atojole, ti co'ol s'elan junucuc me' lecomajel ta slajesbe yo'nton ti smalale. Ti vo'ote, ja' no'ox ta xac'an ti ac'o chamuc ti jun vinique, ti c'otuc ta pasel ti lamajuc c'op yu'un scotol ti jteclume.

⁴ Toj c'otel ta yo'nton ti Absalone xchi'uc scotol ti israeletic ti va'i s'elan laj yich'ic bijubtasele.

⁵ Ja'uc ti Absalone laj stac mantal ta yiq'uel ti Husai ti arquitae yo' jech ta xal ec ti c'usi xu' ta snope.

⁶ C'alal c'ot ti Husai ta stojol ti Absalone, xi albat yu'une: —Xi s'elan ma' ti nopbil yu'un ti Ahitofele. ¿Mi ja' ta xlic jpascutic xana', mi mo'oj?

⁷ Ti Husaie xi laj staq'ue: —Ma' taje, mu lecuc ti c'usi laj snop ti Ahitofel avi tanae.

⁸ Xana' lec, ti atote xchi'uc scotol ti svinictaque, mu sna' xi'ic, ti co'ol xa van s'elan jech c'u cha'al junuc me' oso ti pojbatem ti yol ti mu stac' nopele. Ma'uc no'ox taje, yu'un ti atote xojtiquinbe smelol ti letovajele, ti mu jmojuc ta x'ech' yu'un ac'ubal xchi'uc ti svinictaque.

⁹ Avi taje, snac'oj sba ta junuc nail ch'en, mi yan xa bu snac'oj sba. Ti yan xtoque, c'alal ta xbit batel ti c'op ta sliquebal no'ox tsalbil ta xc'ot ti avinictaque, mu ta vocoluc ta xalic ti tsalbil c'otic ti buch'utic snabanoj sbaic ta atojole.

¹⁰ Ti buch'u x'ech' to mu sna' xi'e, ti buch'u co'ol s'elan spucujil león ta j'ech'el ti stalele, ta j'ech'el ta stsic' yo'nton. Yu'un sna'ic lec scotol Israel, ti atote xchi'uc ti xchi'iltaque mu sna' xi'ic.

¹¹ Avi tana un cha'e, ta jbijubtasot ava'i, ja' lec ti tsobo talel scotol ti israeletic ta atojol ti oyic ta Dane, ti oyic ta Beersebae, ti co'ol s'elan yi' ta ti' nab ti mu albajuc ti yepalique, ti ta xatojobtas atuc ta yaq'uel ti letoe.

¹² Va'i unbi, ta jtsactic ta leto ti atot ti buyuc jotucal oye, ti lamal ta xijc'ot ta sbaic co'ol s'elan jech c'u cha'al ti ts'ujul ti ta xyal talel ta banomile, ti j'ech'el ta xlajic xchi'uc scotol ti svinictaque.

¹³ Mu'yuc ta alel, mi snac'oj sba ta junucuc jteclum, yu'un ta xquich'tic batel ch'ojon jcotoltic ti israelotique, ti ta jujubej ta jchajtic lec ta sa'el ta scotole, ti ta x'ech' jchajtic ta jteclum ja' to ti c'uxi xc'ot ta uc'ume, ti ta xich' chajel scotol ti tontique.

¹⁴ Ti Absalone xchi'uc scotol ti israeletique c'ot ta yo'ntonic ti va'i s'elan laj yal ti Husaie, ti ja' mu sta ti c'u s'elan laj snop ti Ahitofele. (Yu'un ti Diose c'ot ta nopel yu'un ti socuc scotol ti c'u xa ox s'elan nopbil yu'un ti Ahitofele yo' jech ta sta svocol stuc ti Absalone.)

¹⁵ Ts'acal to un, ti Husaie laj yalbe ya'i ti Sadoque, ti Abiatare, ti ja' paleetique, ti c'u s'elan laj yich' bijubtasel yu'un Ahitofel ti Absalone xchi'uc ti moletic yu'un ti Israele, xchi'uc laj yal ti c'u s'elan bijubtasvan ti stuque.

¹⁶ C'ot ta pasel ti bat yalbeic ya'i ti David ti bijbijicuque, ti mu x'ech' yu'un ti ac'ubaltic ta stenlejal sbajtical banomile, ti jelavicuc batel ta jot uc'um Jordane yo' jech mu xlajic ta milel xchi'uc ti svinictaque.

¹⁷ Ja'uc ti Jonatane xchi'uc ti Ahimaase oyic ta En-rogel ti xi'baltic sba mi ta x'ilatic ti oyic xa ta jteclume. Oy me' mosovil tseb lic yal slo'il ya'yej un. Ti stuquic une batic ta anil ta yalbel ya'i ti ajvalil Davide.

¹⁸ Manchuc mi jech un, laj yil jun querem ti bat yalbe ya'i ti Absalone. Ja'uc le' ec une, laj suj sbaic ti c'otic ta sna jun yuts' yalal ti Bahurime, laj stic' sbaic ochel ta jun joc' ti oy ta amaq'ue.

¹⁹ Yajnil ti vinic taje, ta anil no'ox laj smac ta jbej ton ti sti' ti joq'ue. Laj sq'ui majbil trigo ta sba. Mu'yuc buch'u laj sna' ti va'i s'elan taje.

²⁰ C'alal c'otic ti buch'utic nabalic ta stojol ti Absalone, xi laj sjac'beic ti antse: —¿Bu oy ti Jonatane xchi'uc ti Ahimaase? —Le' ech'ique, xi batic ta stuq'uil uc'um laj quile —xi tac'batic yu'un ti antse. Ti buch'utic nabalic ta stojol ti Absalone bat sa'ic. C'alal mu'yuc laj staique, sutic ech'el ta Jerusalén.

²¹ Ts'acal to un, ti c'alal batic xae, ti Ahimaase, ti Jonatane loq'uic talel ti ta joq'ue, batic ta anil ta sbijubtasel ti Davide. Laj yalbeic ya'i ti stamuc batel ti sbeic ta anile, ti jelavicuc ech'el ta jot sti'il ti uc'ume, ti bijubtasvan xa ti Ahitofele ti ta xich'ic tsaquel ta letoe.

²² Va'i un, ti Davide xchi'uc scotol ti c'u yepal xchi'ucanojane, ta jech to yepal ta anil no'ox laj xchapan sbaic. Laj xtuch'ic jelavel ti uc'ume. C'alal sacub xa ta yoc'omale, co'ol s'elan ti mu'yuc buch'u jelavem ta uc'um yilele.

²³ C'alal laj yil ti Ahitofel ti mu'yuc xc'ot ta pasel ti c'u s'elan snopoje, lic yac'be siyail ti sburroe, bat ta sna ta slumal ti bu voq'ue. Lic xchapan ti c'usi sc'an chapanel ta sventa ti yuts' yalaltaque, laj xchuc snuc', ja' jech cham. Laj yich' muquel ti bu mucul ti stote.

Ti Davide ta xc'ot ta lum Mahanaim

²⁴ C'alal c'ot ta Mahanaim ti Davide, ja' o xa laj xtuch' jelavel uc'um Jordán ti Absalone xchi'uc scotol ti israeletique.

²⁵ Ti Absalone stic'oj xa ox ta banquilal jpas-mantal yu'un soldadoetic ti Amasae, ta sventa xq'uexol ti Joabe. Ti Amasa taje, xnich'on jun ismaelita ti sbiinoj Itrae, ti sna'be sba lec yo'ntonic xchi'uc ti Abigail yantsil ol ti Nahase, xchi'il ta voq'uel ti Sarvia sme' ti Joabe.

²⁶ Ti Absalone xchi'uc scotol israeletique laj slaman sbaic ta yosilal Galaad.

²⁷ C'alal c'ot ta Mahanaim ti Davide, bat nupaticuc ta be yu'un ti Sobie, ti Maquire, ti Barzilaie. Ti Sobie, ja' ti xnich'on ti Nahase, ti liquel talel ta Rabá ti oy ta Amone. Ti Maquire, ja' ti xnich'on ti Amiel ti liquel talel ta Lodebare. Ti Barzilaie, ja' ti liquel talel ta Roguelim ti oy ta Galaade.

²⁸ Ti viniquetic taje, laj yich'ic batel tem, lumal bin, xchi'uc lech-lech taq'uin. Ja' jech xtoc laj yich'ic batel trigo, ti jchop o ta trigoe, ti ninal trigoe, ti bacubtasbil trigoe, ti javaxe, ti jchop o ta arbijae.

²⁹ Ma'uc no'ox taje, laj yich'ic batel ti ajapome, ti c'usi xnititete, ti quexu meltsanbil ta chu' vacaxe, ti quexu meltsanbil ta chu' chije, yo' jech ta slajes ti Davide, xchi'uc scotol ti svinictac ti c'u yepal xchi'uque. Yu'un laj snopic ti liquic talel ta stenlejal sbajtical banomile, ti ta xvi'najique, ti oyic ta taqui ti'ile, ti lubemic xa xtoque.