2 Samuel 16 - Bible in Tzotzil de Chamula

Ti Sibae oy c'usi ta xalbe ya'i ti Davide

¹ Ech' xa ox batel jutuc ti David ta sjol vitse, c'alal ti Sibá smosov ti Mefi-bosete, loc' talel ta be. Snitoj c'otel cha'cot sburro ti ep xcuchoj ech'el yicats ta jujujote, ti xcuchoj batel lajunvinic (200) ta bej pane, vo'vinic (100) ta bej muc'tic pan ti meltsanbil ta taquintajesbil sat uvae, vo'vinic (100) ta bej sat lo'bolal te'etic ti c'alal ja' o yorail oye, xchi'uc jun yavil vino ti meltsanbil ta nucul ti lec noj ta vinoe.

² Ti ajvalile xi laj sjaq'ue: —¿C'usi ta xtun o ti laj avich' talel le'e? Ti Sibae xi laj staq'ue: —Ti burroetique ta scajlebin batel ti c'u yepal oy yu'un ti ajvalile. Ja'uc ti panetique xchi'uc ti sat lo'bolal te'etique, ta stun ta slajesic ti soldadoetique. Ti vinoe, ja' ta xuch'ic ti buch'utic ta xlubic ta be ti ta sbajtical banomile.

³ —¿Bu oy smom ti avajvale? —xi laj sjac' ti ajvalile. —Com ta Jerusalén —xi laj stac' ti Sibae—. Yu'un ta snop ti xu' ta x'ac'bat yich' yabtel yu'un ti israeletic ti laj yich' to ox ti smuc'tote.

⁴ —Lec —xi laj stac' ti ajvalile—. Avi tana le' une, ja' xa avu'un scotol ti c'usi ja' to ox yu'un ti Mefi-bosete. —¡Ti jechuc o la lec ta xilun ti Jcuch abtel le'e, toj lec! —xi laj stac' snupilan xa banomil laj spatan sba ta lumtic ta stojol ajvalil ti Sibae.

⁵ C'alal c'ot ta jteclum Bahurim ti ajvalil Davide, loc' talel jun vinic yuts' yalal ti Saule, ti sbiinoj Simei xnich'on ti Gerae, ti mu ts'icbaj ti c'usi ta xloc' ta yee.

⁶ Xjipte-jipte no'ox ech'el ton yu'un ta stojol ti Davide, xchi'uc ta stojol scotol ti yaj'opisialtaque. Ac'o mi lec macbil ech'el yu'un ti svinictaque xchi'uc yajchabivanej soldadotac stuc ti ajvalile,

⁷ ti xi ta xal ti Simei ta sbisel ta cotol chavale: —¡Loc'an batel li'e, jlo'-ch'ich', jmilvanej!

⁸ ¡Syaquil xa ta stsitsot ti Dios ta scoj ti laj amilbe yuts' yalaltac ti Saule, ti juteb ta avo'nton ta xa'och ava'i ta xq'uexole! ¡Avi tana li' une, ti Diose ja' xa ta xac' ochuc ta aq'uexol ti anich'on Absalone! Ta achopolal atuc ta xavich' avocol yu'un ti li' oyot le'e, ti c'alal ja' jmilvanejote.

⁹ Va'i un, ti Abisaie, xnich'on ti Sarviae, xi laj yalbe ti ajvalile: —¿C'u cha'al ya'yel ti chamem ts'i' le'e ti ja' no'ox ta soquesbe sc'oplal ti Jcuch abtele? ¡Nax to ma' ti mu ta xba jbojbe ya'i ti snuq'ue!

¹⁰ Ja'uc le'e, xi tac'bat yu'un ti ajvalile: —Le'e, ma'uc aventaic, xnich'nab Sarvia. Ti jech ta xisbisun ta cotol chavale, yu'un nan jech ac'bat sna' yu'un ti Diose. Ti mi jech ono'ox une, ¿buch'u ono'ox ta xchapanat yu'un ti jech ta spase?

¹¹ Laj taj une, ti Davide laj sq'uel batel ti Abisaie xchi'uc scotol ti yaj'opisialtaque, ti xi laj yalbe ya'iique: —Ti c'alaluc xa ta jnich'on no'ox ta xismil ya'ie, ¡ja'uc xa van ti jun snitilultac ti Benjamine! ¡Q'uelic no'ox ti ta xisbisun ta cotol chavale, ti yu'un jech ta x'ac'bat sna' yu'un ti Diose!

¹² Yu'un ti c'alal ta xlic yil jvocol ti Diose, ja' nan ta sva'an sba ti ta sjoybin ta jlequilal ti jech bisbilun ta cotol chavale.

¹³ Ja'uc ti Davide xchi'uc ti svinictaque laj stam batel ti sbeique. Ja'uc ti Simeie xvulvun xa batel ta xch'ut vits ta spat ti Davide, ta sbisel ech'el ta cotol chaval, ti xjipte-jipte no'ox ech'el yu'un ti tone, ti xvajet no'ox ech'el yu'un ti pucuque.

¹⁴ Toj lubemic xa c'alaluc c'otic ta uc'um Jordán ti ajvalil xchi'uc ti svinictac ti xchi'ucanojan batele. Ti bu taje lic xcuxiic.

Ta x'och batel ta Jerusalén ti Absalone

¹⁵ C'alal jech syaquil taje, ti Absalone chi'inbil ochel ta Jerusalén xchi'uc scotol ti israeletique, xchi'uc ti Ahitofele.

¹⁶ Ja'uc ti Husai ti arquitae, ti lec xil sbaic xchi'uc ti Davide, xi x'avet xa batel ta yalel ti bat snup ta be ti Absalone: —¡Ajvalilucot, ajvalilucot!

¹⁷ Va'i un, xi albat yu'un ti Absalone: —¿Mi ja' jech stalel avo'nton ta stojol ti buch'u lec xavile? ¿C'u cha'al mu'yuc xabat xchi'uc?

¹⁸ —Mu stac' —xi laj stac' ti Husaie—. Yu'un tsots sc'oplal ta jnaban jba ta stojol xchi'uc ta jchi'in ti buch'u t'ujbil c'ot yu'un ti Diose, ti t'ujat yu'un scotol ti Israele.

¹⁹ Ti yan xtoque, ti mi oy buch'u ta xcac' jba ta tunel yu'une, ja'uc ta stojol xnich'on ti buch'u lec xquil jba xchi'uque. Ja' no'ox jech ta xcac' jba ta tunel ta atojol, Jcuch abtel, jech c'u cha'al laj cac' jba ta tunel yu'un ti atote.

²⁰ Va'i un, ti Absalone xi laj sjac'be ti Ahitofel ta sjalile: —¿C'usi stac' xabijubtasvanic ta yalel ti ac'o jpastique?

²¹ Ti Ahitofele xi laj staq'ue: —Chi'inano ta vayel ti stsacal ajniltac atot ti laj yicta comel ta xchabiel ti nae. Ja' to jech ta sna'ic scotol ti Israele ti toj ech'em xti'et ajol ta stojol ti atote. Ja' to jech ta stsatsub yo'ntonic ti buch'utic snabanoj sbaic ta atojole.

²² Va'i un, lic sva'anic axibalna ta xcha'cojal ti na ta sventa ti Absalone, ti ta xchi'in ta vayel ti stsacal ajniltac ti stot ti bu taje, ti yiloj lec ta sba ta satic scotol israeletic ti c'usi ta spase.

²³ C'alal oy c'usi ta xjac'bat bijubtasel ti Ahitofel ti jech yorail ta vo'ne taje, co'ol xchi'uc ti oy c'usi ta xac' ta na'el ti sc'op Dios ti ta xich' jaq'uele. Ja' jech sc'oplal ti Ahitofel yu'un ti Davide xchi'uc ti Absalone.