2 Samuel 15 - Bible in Tzotzil de Chamula

Ti Absalone ta stoy sba ta stojol ti Davide

¹ Ech' c'uc sjaliluc un, ti Absalone laj sta jcot carreta sventa ac'ob-leto, xchi'uc ca'etic, ti lic svol lajuneb yoxvinic (50) ta vo' viniquetic ti c'ot ta yajchabivanej stuque.

² Sob ta xlic batel, ta xbat sva'an sba ta ti' be ta ochebal yu'un ti jteclume. Scotolic ti buch'utic ta xc'otic ta sc'anic ti chapanaticuc yu'un ti ajvalil ta scoj ti oy c'op yu'unique, ta xic' talel. Ta sjac'be bu lumal liquel talel. Ti mi ta staq'uic ti ja'ic snitilultac ti Israele,

³ va'i un, ti Absalone xi ta xalbe ya'iique: “Ta melel ava'uquic ti ac'opique oy stuq'uil, oy smelol. Ja'uc le' une, mu'yuc buch'u xchiquinta ta xchapanel ti ac'op ta sventa ti ajvalile.”

⁴ Xi to ta sts'acubtas ech'el ti slo'ile: “¡C'u no'ox cha'al ti mu jchapanvanejucun yu'un ti lum xcal li'e yo' jech scotol c'ac'al xtal sq'uelicun ti buch'utic sc'an lequil chapanel yu'un ti sc'opique, ta jchapan ma' ti jechuque!”

⁵ Ma'uc no'ox taje, ti buch'u ta xbat c'oponvanuque, ta stsacbat sc'obic, ta sbuts'eic yu'un ti Absalone.

⁶ Ja' jech ta spasolanbe scotol ti Israel ti buch'utic ta xbat sq'uelic ti ajvalil ti ta sc'anic chapanel yu'un ti sc'opique. Ja' jech ta xu'ninbe yo'nton ti israeletique.

⁷ Ta xchanibal xa ox jabil un, ti Absalone xi laj yalbe ti ajvalile: —Avocoluc, Jcuch abtel, ac'bun ave ati' ti batcun ta Hebrone yo' jech ta xc'ot ta pasel cu'un ti oy c'usi calojbe jtrate ti ta xcac'be ti Diose.

⁸ Ti avajtunel li'e, Jcuch abtel, c'alal nacalun to ox ta Gesur ti oy ta Siriae, laj calbe ya'i ta jamal ti Diose, ti mi sc'an ti ta xisut talel ta Jerusalene, ta jbic'tajes jba ta stojol ta yich'el ta muc'.

⁹ —Junuc avo'nton, batan —xi laj stac' ti ajvalile. Va'i un, ti Absalone bat ta Hebrón.

¹⁰ Ja'uc le' une, ta yorail no'ox laj stac batel jun chibuc j'al-mantal j'ich'-c'opetic ta stojol scotol snitilultac ti Israele yo' ta xalbe ya'iic ti c'alal mi ta xa'i ta xich' oq'uisanel ti oq'uese, ta xvinajesbat sc'oplal ti Absalón ti ac'bat xa snup ti yabtel ta Hebrone.

¹¹ Ma'uc no'ox taje, laj yic' batel lajunvinic (200) ta vo' xchi'iltac ta Jerusalene ti jun yo'nton batique. Mi ja'uc sna'ic jutebuc ti c'usi smelole.

¹² C'alal xyaquet taje, ti Absalone laj sta ta iq'uel jun ta scotol yajbijubtasvanej ti Davide, ti sbiinoj Ahitofel ti liquel talel ta Gilo ti ja' slumale, yo' jech ta xchi'invan ti c'alal ta xac' ti milbil matanale. Epaj ech'el ti jcontrainvanejetic yu'un ti Davide. Epaj ech'el xchi'iltac ti Absalone.

Ti Davide ta xjatav loq'uel ta Jerusalén

¹³ Oy jun j'al-mantal j'ich'-c'op bat yalbe ti Davide ti ta xa sco'oltas sjolic xchi'uc Absalón ti israeletique.

¹⁴ Va'i un, ti Davide xi laj yalbe mantal ti yaj'opisialtac ti xchi'inojan ta Jerusalene: —¡Jatavcutic loq'uel avie, naca mi lajcutic ta milel yu'un ti Absalone! ¡Batic ta anil, naca me li' to staotic ti xiyac'botic jvocoltique, ti sbal ta milel ta espada scotol ti jteclume!

¹⁵ —Chapaluncutic xa ta spasel ti c'u s'elan ta xal mantal ti Jcuch Abtele —xi laj staq'uic ti stuquique.

¹⁶ Va'i un cha'e, chi'inbil loc' batel ti ajvalile xchi'uc ti c'u yepal ta snae. C'ajomal xa no'ox laj yicta comel lajunvo' stsacal ajniltac yo' ta xchabiic ti nae.

¹⁷ C'alal loc' xa batel ti ajvalil xchi'uc ti c'u yepal jchi'invanejetique, c'ot sva'an sbaic ta slajeb xa na yu'un ti jteclume.

¹⁸ Volibil ta o'lol yu'un ti yaj'opisialtaque. Xvoletic batel ta jba'be scotolic ti quereteoetique, ti peleteoetic ti jchabivanejetic yu'un ti ajvalile, xchi'uc ti vaquib ciento (600) ta vo' geteoetic ti liquic talel ta Gat ti ts'acalic talele.

¹⁹ Ta jech to yepal, ti ajvalile xi laj yalbe ti Itai ti liquem talel ta Gate: —¿C'u cha'al tal achi'inuncutic ec un? Ta lec no'ox, sutan ech'el. C'otan ta jun svinic ti ach' ajvalile. Jna' lec ac'oplal ti ja' jun jyanlum vinicot ti nutsbilot loq'uel ta alumale.

²⁰ Yu'un ja' to no'ox volje lavul. ¿C'u ono'ox la xachi, ‘la' chi'inuncutic’ xacut ti c'alal mi ja'uc jna' ti bu ta xibate? Ta lec no'ox, sutanic batel xchi'uc ti avinquileltaque. Ac'o sva'an sba ta atojol ti Diose, ac'o xa xchi'inot ta j'ech'el.

²¹ Ti Itaie xi laj stac'be ti ajvalile: —Ta jva'an ta rextico ti Diose, xchi'uc ta stojol ti Jcuch abtele, ta xcal ti buyuc no'ox yalel muyel ti Jcuch abtele, mi sventa lequilal, mi co'ol xcac' jol jbaquil xchi'uque, tijil ono'ox ta xbat ti avajtunel li'e.

²² —Batic un cha'e, ba chi'inuncutic —xi tac'bat yu'un ti Davide. Ti jech taj une, jmoj batic xchi'uc David ti Itaie, xchi'uc ti svinictac ti volol ta stojole, xchi'uc ti yan ti xvoletic ta stojolique.

²³ Scotolic ti jteclume lic smil sbaic ta oq'uel. Ech'ic scotolic ta uc'um Cedrón. Ja' jba'be ech'el yu'unic ti ajvalil ta ts'acal to une. Scotol ti lume stamojic batel sbelel ti sbajtical banomil xchi'uquique.

²⁴ Bat ec ti Sadoque, xchi'uc scotol ti levitaetic ti yich'ojic batel xcaxail strate ti Diose, ti bat scomtsanic ta stojol ti Abiatare, ja' to ti c'uxi loc' batel scotol ti buch'utic oy ta lume.

²⁵ Ja'uc ti ajvalile xi laj yalbe ti Sadoque: —Ich'o sutel ti xcaxa Dios ta lume. Mi ta stic' sba ta jtojol ti Diose, ta xc'ot ta pasel yu'un ti ta xisut talele. Ta xquil ti xcaxa ta yavil ti bu ac'bile.

²⁶ Yan ti mi ta xal ti mu lecuc ta xiyile, li' oyune, c'otuc ta pasel yu'un ta jtojol ti c'usi lec ta xa'ie.

²⁷ Ti ajvalil xtoque xi laj yalbe ya'i ti Sadoc ti ja' palee: —A'yio ava'i, ti vo'ote xchi'uc ti Abiatare, junuc avo'ntonic sutanic batel ta lum xchi'uc ti xcha'vo'al anich'nabique. Ic'o batel ti anich'on Ahimaase, xchi'uc ti xnich'on ti Abiatare, ja' ti Jonatane.

²⁸ Ja'uc ti vu'une ta xicom ta stenlejal sbajtical banomil, ja' to ti mi laj avalic ca'i ti c'u s'elan ta xc'ot ta pasel ta jteclume.

²⁹ Ti Sadoque xchi'uc ti Abiatare laj yich'ic sutel ta Jerusalén ti xcaxa Diose, comic ti bu taje.

³⁰ Ja'uc ti David une muy batel ta stselej vitstic yu'un ti Olivoetique. Mi ja'uc slapoj ech'el ti xonobe, ti x'oc'olet batele, ti smucoj ti sjole, svinajeb ti mu x'ech' ta xa'i ti svocole. Ti c'u yepal ti jteclum ti xchi'inojan batele, x'oc'oletic batel ti smucoj ti sjolic ta xmuyic ech'ele.

³¹ C'alal laj yich' albel ya'i ti David ti co'ol yo'nton xchi'uc Absalón ti Ahitofel ta contrainvaneje, ti Davide laj sc'anbe vocol ti Diose, ti c'otuc ta pasel ti socuc ta be ti c'u xa s'elan snopoj ta spas ya'i ti Ahitofele.

³² C'alal c'ot ti David ta sjol ti vits ti bu ta xich' ich'el ta muc' ti Diose, ja' o vul ta loq'uel ti Husai ti liquel talel ta stojol snitilultac ti arquitaetique. Jatantic xa ti sc'u'e, balom lum xa ti sjole,

³³ ti xi albat yu'un ti Davide: —Mi tal achi'inune, toj ep ta xlic avac' jvocol.

³⁴ Ja'uc le'e, mi ta xasut batel ta Jerusalene, ti mi xavut c'otel ti Absalone: “Ti avajtunel li'e, Jcuch abtel, ta xac' sba ta tunel ta atojol jech c'u cha'al laj yac' sba ta tunel ta stojol ti atote”, ta xatic' aba ta scoltaelun ta smaquel ta be yabtel ti c'usi snopoj ta spas ti Ahitofele.

³⁵ Yu'un ti bu taje, oy ta atojol ti pale Sadoque xchi'uc ti Abiatare. Ja' yu'un un cha'e, vo'ot ta xachapbe ya'i scotol ti c'usitic ta xava'i ta xich' alel ta sna ti ajvalile.

³⁶ Ti xnich'nabtaque, ja' ti Ahimaase, xchi'uc ti Jonatane, tey oyic ec un. Ta xavalbun ca'i ti c'usitic ta xc'ot ta pasel ta sventaic taje.

³⁷ Ti Husaie, ti ja' jun ti lec xil sbaic xchi'uc ti Davide, ja' o c'ot ta Jerusalén ti c'alal ja' o xa yorail ta x'och ech'el ta jteclum ti Absalone.